Psalm 62
62
Nalirrukevkenaku Agayutmun Cavkarngailucini
1Agayun kiingan utaqaaqa nerinisngialliqevkenii;
elliin tau͡gaam anirturyugngaanga.
2Ellii kiingan cayailkutkaqa anirturtekluku-llu;
ingluliurutestekaqa,
taumek wiinga cirlakumangailngua.
3Qangvarpak callukatarceciu yuk
asvaillrunrilnguq casguni navguumalriani?
4Picirkiulartuci tau͡gaam takarnarqellriami uitallranek atrarrnaluku;
anglanakelararci iqluuryaraq.
Qanllerpeciuggun atawaqercecilaryaaquci,
tau͡gken umyuarpeciuggun aniqlaaluku.
5Wiinga Agayun utaqaurala'arqa nerinisngialliqeksaunii,
neryuniurutenka elliinek tau͡gaam kingunengqerrata.
6Ellii kiingan cacetuqutekaqa anirturtekluku-llu;
cayailkuciumalaraanga,
pektayiitarkaulua-llu.
7Agayutem kiimi anirturyugngaanga takarnarqevkarlua-llu;
cayailkutkaqa Agayun,
qiurtun cayailngurtun uqisngavkalaraanga.
8Elpeci yumni cacetuqutekerrlainarciu;
arenqialluguteci tamalkuita elliinun qanrutkaqluki,
ellii qimagvigkaqngamteggu.
9Yuut ayuqluteng yuum aneryaaqallratun ayuqut;
angelriarung'e'rmeng pikegtaunrilnge'rmeng-llu cakegtauvkenateng.
Uqamaltassiaquneng uqamaltassiarcuun pektessngaitaat;
uqiggellruameng yuum anernerani.
10Ilasi alingcira'arluku camek unangengnaqeksaunaci;
umyuarteqsaqunaci camek unangnayukluci teglegyarakun;
tukuuteci-llu amlleringraata,
tamakut cacetuquteksaqunaciki.
11Ataucirquunrilngurmek niitellruaqa Agayun qanertelluku,
piniq-gguq elliin pikaa
12kenkii-llu-gguq cakaniyuituq.
Tua-i-wa elpet, Ataneq, nunulilaavki yuut tamalkuita caliarit cuqluki.
Currently Selected:
Psalm 62: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.