Zechariah 14
14
Jerusalem-aaq Atanruviit-llu
1 Atanrem aqumellerkaa qanercetaarvigmun mallgiuq. Tua-llu Jerusalem-aaq uayaumaciquq, tangvagciqaci-llu uayaaqengat averqumakata. 2Atanrem atanruviit taiciiqai anguyaasqelluku Jerusalem-aaq. Nunarpak tegumaciquq, enet-llu uayarciqait, arnat-llu akusrarutekumaciqut. Avgit yuut nunameggnek ayaucimaciqut, tau͡gaam tuanelnguut ayaucimangaitut nunarpagmek. 3Nutaan-llu Atanrem callugyarturciqai tamakut atanruviit, tamatum ciungani pilallmitun. 4Taum nalliini nangengqaciquq Olive-aam Ingriani, Jerusalem-aam calaralirnerani. Olive-aam-llu Ingria qupciquq malruirrluni calaramek kanavamun kuignayugpiim caniani. Avga ingrim negetmun ayagluni, avga-llu ungalatmun. 5Qimagciquci tamaaggun ingrim malruirrluni avgutiignegun. Elpeci qimagciquci ciuliarpecetun nuna pektellrani Judah-m angayuqran Uzziah-m nalliini. Tuani Ataneq Agayutka taiciquq, an'gilat tamalkuita malikluki.
6Taum-llu nalliini, nengletairuciiquq wall'u kanermek, 7cali-llu tan'gertairulluni. Erenrem tanqianek pitangqerrlainarciquq, unuungraan. Tau͡gaam tuaten ellillerkaa Atanrem kiimi nallunritaa.
8Tauna erneq tekiskan, meq'egtaar qurrlurciquq Jerusalem-aamek, avga qurrlurluni Dead Sea-mun, avga-llu Mediterranean-aamun. Qurrlurciquq allrakuq kassuggluku, ellalliqsaitellran nalliini ayuqluku ellallillran-llu nalliini. 9Ataneq-llu ataneqciqaa nunam tamarmi; yuut tamarmeng agayuvikelarciqaat Agayutnguluku nalluvkenaku-llu tuaggun atrakun.
10Nuna tamarmi, Geba-mek neglirnermi ayagluni Rimmon-aaq tekilluku ungalalirnermi, manigcimaciquq. Jerusalem-aaq quyigluni quliinciiquq avatmini nunami; nunarpak-llu angtaciquq Benjamin-aam Amiiganek ayagluni Kangiram Amiiganun tekilluni, tuavet ciungani amigtangqellermun, Hananel-aam-llu Qertulriaranek atanret wine-arkanek atsanek itumcissuutiit tekilluku. 11Yuut tuani uitaciqut camek alingniurpek'nateng, aarniurcecimanrirluteng pillugnarqelriamek.
12 Atanrem-llu tuknilria cangerlak tuc'eciiqaa tamalkuitnun atanruvignun Jerusalem-aam anguyagtek'lallrinun. Kemgit aruciqut unguvangraata; iingit alungutait-llu aruciqut.
13Taum-llu nalliini Atanrem tuuskayagceciiqngateng alingevkarluki-llu yuk caniqliteng teguluki callugnayukluku. 14Judah-m angutai anguyagciqut teguvkanritengnaqluku Jerusalem-aaq. Atanruviit-llu tamalkuita uayarciqait tukuutaitnek, suulutaamek, qerrirlimek, aturanek-llu amlleriluki.
15Tuknilriim cangerliim tuciiqai horse-aat, ciulviit, qulugnelget ungungssit, tuciiquq tamalkuitnun ungungssinun inglukestaita uitaviatni uitalrianun.
16Atanruviit-llu yuit anguyallermeggni Jerusalem-aaq tuqullrunrilnguut tuavet ayalarciqut allrakut tamalkuita agayuyarturluteng Atanermun Artuqailngurmun Uqisviit-llu Nerevkaritiit aturnaluku. 17Naliat imna atanruviit agayuyarturyuumiilkan Atanermun Artuqailngurmun, tua-i ellallirngairuciiquq nuniit. 18Egyptian-aat aturyuumiilkatgu Uqisviit Nerevkaritiit, cangerliim tuciiqai Atanrem tuc'etarkaan tamalkuitnun atanruvignun piliyaryuumiilngurnun. 19Man'a anucimirqecetaarutkaqaa Egypt-aam allat-llu tamalkurmeng atanruviit atunrilkatgu Uqisviit Nerevkaritiit.
20Taum nalliini horse-aarit-llu uskuraita kuluk'uunaqengraiceteng igangqelarciqut, “Qigcignarqelriaruuq Atanermun.” Egatet Agayuvigpagmi kencignarqetariciqut qantatun ekuaviim ciuqerrani uitalriatun. 21Tamarmeng egatet Jerusalem-aami tamiini-llu Judah-mi allakaumaciqut agayuaqameng tau͡gaam Atanermun Artuqailngurmun atulararkauluki. Yuut elliilriit tuqutarkanek atularciqait kemgitnek keniraqameng. Tauna pillerkaq tekiskan, tunenialriartairuciiquq Agayuvigpiini Atanrem Artuqailnguum.
Currently Selected:
Zechariah 14: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
