Zechariah 12
12
Tekitarkaq Aviucimallerkaa Jerusalem-aam
1Una qaneryaraqaa Israel-aaq piluku Atanrem, Atanrem sagcestellrata qiliit, piliaqestellran ellarpiim, yuk-llu unguvalriarurtelluku. Ellii qanertuq, 2“Jerusalem-aaq saskam imaatun wine-atun ayuqlirivkarciqaqa; atanruviit avaqlii merciqut ayalualuteng-llu taangiqellriatun. Jerusalem-aaq-llu avataiqatgu, Judah-m-llu nunarpai avatairumaciqut. 3Tau͡gaam tauna pillerkaq tekiskan, Jerusalem-aaq teggalqutun uqamailngurtun ayuqlirivkarciqaqa; kina imna angayuqauvik kevengnaqestii akngirciiquq. Tamarmeng nunam angayuqauvii iliksaguciiqut curugnaluku. 4Taum nalliini tamalkuita horse-aarit alingmun tuc'eciiqanka ekumastait-llu usviirutelluki. Judah-m yui qaunqeciqanka, tau͡gaam cikmirceciiqanka inglukestaita horse-aarit. 5Tua-i Judah-m yui ellmeggnek qanruyuciiqut ‘Atanrem Agayutem Artuqailnguum pinirivkalarai yun'i Jerusalem-aami uitalriit.’
6“Taum nalliini Judah-m yui naparugarni kenertun ayuqeciqut, wall'u mukaarkatun avurnarilriatun piunrirciqait tamalkuita avaqliteng atanruviit. Jerusalem-aam yui assirluteng uitaciqut nunarpagmi.
7“Wiinga, Ataneq, cirlakivkarciqanka Judah-m anguyagtai ciumek, takarnarqun tut'arkaq David-aam kinguvrinun Jerusalem-aam-llu yuinun pinrusqevkenaku Judah-m yuin pikaatni. 8Taum nalliini Atanrem camun pivkarngaitai Jerusalem-aami uitalriit, pinialkacagait-llu David-aatun pinirtariciqut. David-aam kinguvrin ciuliqagciiqait Atanrem an'gilaatun, Agayucetun. 9Taum nalliini piunrirciqanka tamalkuita atanruviit anguyangnaqestai Jerusalem-aam.
10“David-aam kinguvri allat-llu Jerusalem-aam yui imirciqanka anerneranek takumcukiyaram anerneranek-llu piicagyaram. Tangerciqaat nuussikun kapurluku tuqutellrat, angniilutekciqaat-llu angniilutkelauciatun mikelnguq kiimi irniarulria. Cakneq angniiciiqut, tuquilriatun qetunranguteqarraamegnek. 11Taum nalliini Jerusalem-aami angniitellrat angelriaruciquq angniilutkellracetun Hadad Rimmon-aaq#12.11: Hadad Rimmon: Una Baal-am ateqsugnarqaa, naunrat agayutiita Canaan-aami Syria-mi-llu. Naunrat nalaaqata allrakuni tamalkuitni, tuavet agayutulit umyuarteq'lallrulliniut agayun tuquyukluku, angniilutkaqluku-llu tuqullra. Megiddo-m nuniini. 12-14Ilakuralriit allakarmeng qivruyaraq aturciqaat: ilakuralriit kinguvalriit David-aamek, Nathan-aamek, Levi-amek, Shimei-amek, allanek-llu ilakuralrianek. Ilakuralriit allakarmeng tamana aturciqaat, angutaita-llu ilakuralriit allakarmeng aturluku arnanek ilangqerpek'nateng.”
Currently Selected:
Zechariah 12: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
