Psalm 66
66
Yuarun Nanrautnek Quyatnek-llu
1Angnirluci nanrautnek neplirci Agayutmun, tamarpeci ellam yuini!
2Atuutekiciu atran ucurnarqucia;
nanrarluku ucurnariluku!
3Qanruciu Agayun, “Anglilli irr'inaqvaa caliarpeni!
Elpet pinin ayuqailan
inglukesteten alingluteng ciktelartut ciuqerpenun.
4Nunam yui tamarmeng agayuut elpenun,
nanrautnek aturtut elpenun,
aturluteng-llu nanraraat atren.”
5Tailuci tangerciki Agayutem caliari,
irr'inarqellriit taqellri yuut takuatni.
6Imarpik nunaurtellrua kinertelluku;
ciuliaput-llu piyualuteng qerarluteng.
Tuani angnillruukut caliara tangerrluku.
7Artuqailucini aturluku atanirturilartuq;
atanruviit murilkelarai.
Taumek elliinek cakaarilriit ellmeggnek pivakenrilkilit.
8Nanrarciu Agayutvut, tamarpeci nunarpallgutkelriani;
nunam yuinun niitelluci nanrarciu.
9Elliin unguvavkaraakut
iquvkaqsaunata-llu.
10Elpet-wa, Agayun, naspaallrukevkut;
qerrirlim menuircaumalallratun kenerkun,
tuacetun menuircallrukevkut wangkuta.
11Kuvyamun naptellriatun pivkallruarpekut
atmagtelluta-llu uqamailngurnek.
12Inglukestemten̄un tutmaucetellruarpekut;
kenerkun merkun-llu ayallruukut,
tau͡gaam maa-i ciunicelluta alingnailngurmun uitallerkamten̄un.
13Elliitekamnek taiciiqua enevnun;
elliilua wiinga akqutkellemnek.
14Picurlaumallma nalliini
akqutkellemnek cikirciqamken.
15Elliiciqua qusnginek ekuavigmi ekuagarkanek.
Tuqucirraarlua ekuagiciqua angucalunek qusnginek qusngirngalngurnek-llu,
aruviit mayurtelluku pagaavet qilagmun.
16Tailuci niicugniyarturci tamarpeci qigcikestaini Agayutem,
qanrutniamci elliin caliallrinek wangnun.
17Wiinga-llu qayagaullruaqa ikayuusqellua;
nanrarluku-llu yuarutetgun.
18Assiilnguunka nallunguallrukumki,
Atanrem niicallrunritaanga.
19Tau͡gaam ilumun Agayutem niitellruanga;
elliin piicauteka niitellrua.
20Nanraumali Agayun,
piicauteka cakaanrilaku
kenkii-llu wangnun cakaniyuunani.
Currently Selected:
Psalm 66: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
