Psalm 116
116
Tuquqatallminek Anirtuumallrem Nanraraa Agayun
1Kenkaqa Ataneq niicugnilaanga;
ikayungcautenka elliinun niitelarai.
2Niicugnilaanga kesianek
unguvaqallemni kaigavikeciqaqa.
3Tuqum avatairumallruanga negatun;
tuqullerkaqa waniwa aarnaqluni;
alingem nanikuam-llu tullua.
4Tua-i-llu wiinga Ataneq qayagaurluku,
“Ataneq, takumcuca'artua elpenun anirturnga!”
5Naklegtalriaruuq Ataneq assiqapiggluni;
Agayutvut wangkuta takumcutalriaruuq.
6 Atanrem cayailkuciumalarai ellmeggnek ikayurciigalnguut;
wiinga-llu aarnarqelriametlemni anirtullruanga.
7Umyuamkun caceturilii,
Atanrem assirlua piurallruanga.
8 Atanrem anirtullruanga tuqumek;
aluviliunrirtellua
cirliqlerkamnun-llu pivkarpek'nii.
9Taumek wiinga yuugua niisngaluku Ataneq,
nunami yuulriit ilalirluki.
10Ukveqa pegtenritaqa, waten qanellrung'e'rma,
“Anglilli wangni nangteqvaa,”
11alingellemni-llu cali waten qanerlua,
“Kitumek cacetuquteksunarqellriartaituq.”
12Camek Ataneq cikiqatarcia
elliin assilriit wangnun piurallri akinaurluki?
13Elliitekamnek wine-amek Atanermun taiciiqua,
quyavikluku anirtuucimnek.
14Yuin quyungqallrata nalliini
cikirciqaqa Ataneq wiinga akqutkellemnek.
15 Atanermun cakneq nangteqnarqelartuq
yum'i iliit tuquaqan.
16 Ataneq, wiinga kevgaqerpenga;
kevgiuramken aanama kevgiullruciatun.
Elpet-wa anirtullruavnga tuqumek.
17Wiinga elliiciqua tuqutarkamek ungungssimek
quyassuutekluku elpenun piicagvikluten-llu.
18-19Yugpet quyungqallrata nalliini,
Agayuvigpagmi Jerusalem-aami,
cikirciqamken akqutkellemnek.
Nanrarciu Ataneq!
Currently Selected:
Psalm 116: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
