Psalm 107
107
Tallimiit Psalms-aam Kalikain
(Psalms 107–150)
Nanrarluku Assiucia Agayutem
1“Quyavikiciu Ataneq, assilriaruan;
kenkillra-llu yugnek nangengaunani!”
2Mat'umek ataam qanerci,
tamarpeci elpeci Atanrem anirtullrini.
Inglukestevcen̄ek elliin aviutellruaci
3ut'rutellruaci-llu nunakenrilkevcen̄ek,
calaramek, kanaknermek, negeqvamek, ungalamek-llu.
4Ilait calligtaallruut yuilqumi nunakarniilngurmi,
nunakameggnek nalaqutesciiganateng.
5Kaigluteng, meqsugluteng,
kiituani neryuniurutairutut.
6Nanikuallermeggni kaigallruut Atanermun,
elliin-llu niilluki aviutai nanikuallratnek.
7Ciuliqagtai-llu caqiatevkenaki
nunarpagnun uitavigkaatnun.
8Quyaviknarqaat Ataneq kesianek kenkesteteng,
yugnun assiqapigtellriit caliari pitekluki.
9Meqsuirucet'larai meqsulriit
kailriit-llu neqkegcivkarluki nerevkaraqluki.
10Ilait yuut uitallruut tan'gercetqapigtellriami,
nangteqluteng itercivigmelameng kalivnerciumaluteng,
11Agayutem qanellranun inglulitellrulliniameng
ayuqucirtuutai-llu cakaarluki.
12Cirlaurtellruut cakviurluteng calivakaameng;
iquange'rmeng ikayurtekaunateng.
13Tua-i-llu nanikuallermeggni kaigallruut Atanermun,
elliin-llu niilluki aviutai nanikuallratnek.
14Tan'gercetqapigtellriamek anutellrui
kalivnertait-llu navgurluki ciqumlluki.
15Quyaviknarqaat Ataneq kesianek kenkesteteng,
yugnun assiqapigtellriit caliari pitekluki.
16Navgurai punerneret ikirtuqait
kepurluki-llu caviit canirutait.
17Ilait usviinateng assiilngirpakaameng nangteq'ngellruut,
assiilngurmek caliarata naulluuvkarluki;
18neqkat tamalkuita qessayagulluki
tuqullerkarteng canimellian.
19Tua-i-llu nanikuangameng kaigallruut Atanermun,
elliin-llu anirturluki nanikuallratnek.
20Qanllermikun canrircetai
anirturluki tuquarkauyaaqellratnek.
21Quyaviknarqaat Ataneq kesianek kenkesteteng,
yugnun assiqapigtellriit caliari pitekluki.
22Quyassuutnek elliikilit,
yuarutetgun-llu nunanirqellriatgun qalarutekluki elliin caliaqellri.
23Ilait-llu ayalallruut imarpigkun sun'atgun,
yuungnaqutekluku imarpiliullerteng.
24Tanglarait-llu caliari Atanrem,
irr'inarqelriit caliari imarpigmi.
25Qanllermikun anuqengevkaraqluku,
imarpik qailingevkarluku.
26Qairet nalugaqluki sun'at qulvanun,
ellurluteng-llu cali aciqvanun.
Alingnaqngan sun'am yui ciunerkairut'lartut;
27ayalualuteng iqualuteng tuaten taangiqellriatun,
imarpiliuneq nallunrilngermegteggu cacirkaunateng.
28Nanikuangameng-llu kaigaluteng Atanermun,
elliin-llu niilluki anirturluki nanikuallratnek.
29Elliin quunengevkaraa,
qailinrirtelluku.
30Taukut-llu quyaluteng quunengan,
Agayutem-llu assirluki ciunicelluki ayagviatnun.
31Quyaviknarqaat Ataneq kesianek kenkesteteng,
yugnun assiqapigtellriit caliari pitekluki.
32Qalaruteknarqaat artuqailucia yuut quyungqallratni agayuvigmi,
nanrarluku-llu ciulirneret quyungqalriit takuatni.
33Kuiget kinercet'larai nunallrit qau͡gyaurtelluki,
nunam-llu akuliinek ulvelriit mer'et ulvenrircetaqluki.
34Naungignarqellrungraan nuna taryungevkarluku caunrircetellrua,
tua-i-wa tamaanelnguut yui assiitqapigcata.
35Kinertellria nuna mertangevkalaraa,
mer'ilnguq-llu nuna ulvelriartangevkarluku.
36Kainiqellriit yuut tamaani uitavkalarai,
ellait-llu nunaliluteng uitavigkameggnek.
37Naucetaarviliut nauceciiluteng-llu wine-arkanek,
amllernek-llu naugiluteng.
38Agayutem yun'i atawaqercecateng amllernek yung'ut;
ungungssiutait-llu ikegliyuunateng.
39Agayutem yui inglukestaita cirlakellraceteng kasnguyullruut;
picurlagcecimaluteng nangtauluteng-llu.
40Elliin-llu eq'ukutni nasvagaa nangtestaitnun;
tarracelluki yuilqumi kinertellriami nunakarniilngurmi.
41Tau͡gaam aviutai caitulriit nangteqellratnek
yugyangevkarluki amlleriinartelluki ungungssiartun katngagtun.
42Yuut ellualriit man'a tangerrluku angnirtut,
tau͡gken assiitellriit yuut nepaircimaluteng.
43Kia imum umyuartukuni murilkeciqai makut;
umyuangcautekluku-llu Atanrem pektayiilnguq kenkii.
Currently Selected:
Psalm 107: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
