Luke 1

Theophilus-aamun Igautii

1Amlleret yuut wangkutni pillernek igallrung'e'rmeng, 2wangkutnun tunumallruciicetun, iimegteggun tangvallruameng qalarutkellruamegteggu-llu; 3wani-wa atawaunayukngamku, yuvrinqegcaararraarluki ciuqliatnek ayagluki tungliquciicetun igaqataramken Theophilus-aaq, qigcikekmaa, 4elicungcaumallerpet piciuciatnek nallunritesqelluten.

John-aam Angllurcecilriim Yuurtellerkaan Akqutii

5Herod-aaq atanrullrani, agayulircetangqellruuq Zacharias-aamek, Abijah-m kinguvranek, nuliangqerrluni Aaron-aam kinguvranek, Elizabeth-aamek. 6Tamarmek-llu Agayutem takuani piciulutek, Atanrem alerquutai picirkiutai-llu maligtaqurrlainarluki. 7Tau͡gaam irniarunatek, Elizabeth-aaq qingayuilan, maa-i-llu ayagyuanrirlutek.

8Taum nalliini agayulirtem caliaranek pillrani Agayutem takuani pillerkiurami, 9agayulirtet pilauciicetun, Atanrem Agayuvianun itertuq agayuvigmi atutukiitnek aruviryarturluni. 10Yugugaat-llu elaqliantut piicagluteng aruviryartullrani. 11Tuani-llu Atanrem an'gilaa alairtuq elliinun aruvirviim tallirpilirnerani nangengqaluni. 12Zacharias-aam-llu tangrramiu tatamuq, alingluni-llu. 13Tau͡gaam an'gilam qanrutaa, “Zacharias, alingevkenak, nulian Elizabeth qetunrangciquq pikarpenek, acirarkaugan-llu John-aamek. 14Angnirciquten-llu nunaniryugluten, amlleret-llu quyaciqut yuureskan. 15Atanrem takuani angciquq, wine-amek taangamek-llu merngaituq, Anernermek Tanqilriamek imiumaciquq yuurtellerminek ayagluni. 16Israel-aam-llu yui amlleret Atanermun Agayutiitnun tuigciiqai. 17Takuani-llu yuuciquq yuucingqerrluni piningqerrluni-llu Elijah-tun, ataita umyugait tuiggluki irniaritnun cumigtellerkaatnun, niicunrilnguut ellualrianun umyuallgutekliulluki, upciiqai-llu yuut, Ataneq upyulluku.” 18Zacharias-aam-llu an'gilaq qanrutaa, “Qaillun man'a nallunriciiqsia? Tang, wiinga angukara'urluurtellrianga, nulirqa-llu ayagyuanrirluni.” 19An'gilam-llu kiugaa, “Gabriel-aaruunga, Agayutem takuani nangengqalartua; wani-wa ayagcecimaunga qanrutesqelluten, tailluten-llu angniutekarpenek. 20Tangerrluku-llu, elpet qanernanrirciquten qallatesciiganak-llu mat'um piciurtellerkaan engeliinun, tua-i ukveqenrilavki qanellrenka piciurtellerkalget.” 21Yuut-llu Zacharias-aaq utaqaat, paqnayugluteng iluqlirmi muluan. 22Anngami-llu, qalarutesciigatai, ellaita-llu elpekaat camek tangellrucia tuani iluqlirmi, elliin-llu elucirararai qallatesciiganani-llu. 23Caliani-llu pillerkiurani pelluata eneminun ayagtuq.

24Makut erenret kinguatni nulirra Elizabeth qingartuq, iraluni-llu tallimani tangrruuksaunani, qanerluni, 25“Waten Atanrem ikayuraanga kiaresngialutek'lalqa pellugtelluku.”

Mary-mun Nallunairumallra An'gilakun

26Iralut-llu arvinelgatni an'gilaq Gabriel-aaq Agayutem ayagcetaa Galilee-am nunain iliitnun Nazareth-aamun, 27tuavet neviarcarmun Joseph-aam nulirkautiinun. Joseph-aaq-llu David-aam kinguveqaa. Neviarcar-llu atengqertuq, Mary. 28An'gilam ullagaa qanrulluku-llu, “Waqaa, nakmikumalriami, Atanrem nayuraaten, arnani atawakumaciquten!” 29Mat'umek niicami angelriamek tatamuq, umyuangcarluni-llu umyuaqutmi caucianek. 30An'gilam-llu qanrutaa, “Alingevkenak, Mary, Agayutem nakmikaaten. 31Tangerrluku-llu, qingarciquten qetunrangluten-llu; acirarkaugan-llu Jesus-aamek. 32Aterpauciquq, Quyinrulriim-llu Qetunraanek atengqerciquq, Atanrem-llu Agayutem cikirciqaa David-aam ciuliaran angayuqauvianek. 33Atanruarkauguq-llu Jacob-aam kinguvrini akwarpak tayima, angayuqauvia-llu iquklisngaunani.” 34Mary-m-llu an'gilaq kiugaa, “Qaillun-mi tuaten piciqsia wii uingunii?” 35An'gilam kiugaa, “Anernerem Tanqilriim tusvikciqaaten, Quyinrulriim-llu pinian naligciqaaten, taumek-llu elpeni piurtarkaq tauna Tanqilria atengqerrarkauguq Agayutem Qetunraanek. 36Tangerrluku-llu, tungelqun Elizabeth ayagyuanring'e'rmi qingartuq qetunrarkamek, maa-i-llu iraluin arvinlekaat, atengqellrung'e'rmi qingayuilngurmek. 37Wani-wa Agayutmi ca caperrnarqenrituq.” 38Mary-llu kiuguq, “Qanrucirpetun Atanrem pisqutii wangni piuli.” An'gilam-llu unitaa.

Mary-m Nunatellra Elizabeth-aamun

39Taum-llu nalliini Mary tuaken ayagtuq ingrinun, Judah-m nunain iliitnun. 40Zacharias-aam-llu eniinun itertuq Elizabeth-aaq-llu aryuqutmek piluku. 41Tua-i-llu Elizabeth Mary-m aryuqutiinek niicami, qingaa pekcillagtuq iluani, Anernerem-llu Tanqilriim imiraa. 42Angnirluni-llu qastuluni qanertuq, “Atawaunruuten arnani, atawaunruluni-llu qingan engeliavni. 43Qaillun piama Atanema aaniin ullagtanga? 44Tangerrluku, aryuqutevnek niiyucimtun qingaqa pekcillagtuq engeliamni angnirluni. 45Atawauguten-llu, ukvelriami, tua-i Atanrem qanellri piciurtarkaungata.” 46Mary-llu qanertuq, “Tarnema Ataneq nanraraa, 47anerneqa-llu angnirtuq Agayutmun Anirturtemnun, 48pistem̄i-llu cakegtaunrilucia catkenrilaku. Tangerrluku-llu, wak'nirnek kinguvalriit atawauniciqaatnga, 49pinilriim angelriamek pillruanga, atra-llu Tanqiuguq. 50Naklekilaucia takaqestem̄ini kinguvalriit kinguvritnun tusngaciquq. 51Tallimikun pinimek nasvallruuq, ircaqumegteggun pivakellriit sekavtellrui. 52Atanrulriit-llu atanruviillrui, cakegtaunrilnguut-llu nalugluki. 53Kailriit-llu camircetai, tukuulriit-llu ayagcetai unangevkarpek'naki. 54Israel-aaq pisten̄i kusguallrua, tua-i takumcukutni umyuaqluku. 55Abraham-aamun kinguvrinun-llu akwarpak tayima ciuliamten̄un qanellruciatun.” 56Mary-m-llu iraluni pingayuni nayuraa, nutaan-llu nunaminun uterrluni.

John-aam Angllurcecistem Yuurtellra

57Elizabeth pinariani irniuq qetunrangluni. 58Nunaqliin tungelqurrin-llu Atanrem takumcukutii angelria elliinun niicamegteggu angnillgutkaat. 59Tua-i-llu erenret pingayunelgurcata mikelnguq nuugiqatallratni, tuani aciqataryaaqaat atiin atranek, Zacharias-aamek. 60Tua-i-llu aanii qanertuq, “Tuaten pinrilli, tau͡gaam atengqerciquq John-aamek.” 61Qanrutaat-llu, “Tungelqurpenek atengqelriartaituq waten.” 62Atii-llu eluciraraat camek atengqerresqumacianek. 63Tua-i-llu igarkamek pisqelluni, igartuq waten, “John-aamek atengqertuq.” Tamarmeng-llu irriut. 64Egmianun-llu qaneryaurtuq, alungutii uqiggenani qallalluni, Agayun-llu nanrarluku. 65Tamakut-llu nunalgutkelriit qigcigyunga'artut, man'a-llu sekavtuq Judea-mi ingrini nunalegni tamaitni. 66Tamatumek-llu niitellriit umyuangcautekaat, qanraqluteng, “Mikelnguq una cauqatarta?” Tua-i Atanrem ikayuumaa.

67Atii-llu Zacharias Anernerem Tanqilriim imiumiini, qalaruciuq waten, 68“Atawauguq Ataneq, Israel-aat Agayutiit, tua-i yun'i umyuaqngamiki, anirtuutekaatnek-llu pillruamiki. 69Anirturistekamten̄ek-llu taivkarillruuq pistem̄i David-aam kinguvranek. 70Prophet-aatgun ellualriatgun ak'allarteggun qanrutkellrucimitun, 71anirtuumasqelluta inglukestemten̄ek uumikestemta-llu unataitnek. 72Qaqilluku takumcukun ciuliamten̄un akqutkumalria, akqutni-llu tanqilria umyuaqluku, 73Abraham-aamun ciuliamten̄un ukvernarcallni; 74tua-i anirturyugluta inglukestemta unataitnek, nutaan wangkuta camek civuuravkenata kevgiurarkaurrluku, 75tanqigmi elluami-llu unguvallemten̄i, elliin ciuqerrani. 76Wani-wa elpet, mikelnguuq, Quyinrulriim prophet-aaranek aprumaciquten, tua-i Atanrem ciungakun pekciiquten tumyararkai upluki. 77Yui-llu anirtuutekaatnek elpengcarluki assiilnguillratgun. 78Tua-i Agayutem naklegtalriim takumcukutiikun, tanqigmek pakmaken eruskakut, 79tanqiginaluki imkut tan'germi tuqum-llu talinrani uitalriit, tass'uqnaluta-llu nepaitem tumyaraakun.” 80Mikelnguq-llu tauna angliuq, yuucimikun piningqerrluni, yuilqumlluni-llu erneq imna engelkarrluku Israel-aanun elpekevkallni.

Currently Selected:

Luke 1: YPK

Highlight

Copy