Genesis 11
11
Babylon-ami Ena Qertulria
1Ellarpiim yui ataucimek qaneryarangqellruut qanellrit ayuqluteng. 2Tua-i ayagallermeggni tamaani calaratmun, tekitut nunamek manigcelngurmek Babylonia-mi tuani-llu nunaliluteng. 3Qanruyutut-llu, “Kitaki qikulinaurtukut enekanek kenerkun-llu tegg'ivkarluki.” Tua-i qikuutengut enelissuutekameggnek taarmek-llu nepyutkaitnek. 4Qanertut-llu, “Nunalinaurtukut naparciluta-llu qertulriamek qilak tekilluku; caliamta niitnauvkarluta cekavcetenritniaraakut tamiinun ellarpiim iluanun.”
5 Ataneq-llu atrartuq tangerrnaluku nuniit tauna-llu qertulria yuut napartellrat. 6Qanertuq-llu, “Ukut yuut atauciurneruut, ataucimek qaneryararluteng. Una waten pillerteng ayagneqluku caperrsuyuiruciiqut camek taqutellerkameggnek. 7Tailuci atrarluta ayuquciirutnarivkarnaurput qaneryaraat taringutesciigali'irrniartut.” 8Tua-i Atanrem cekavtai ellarpiim iluanun, arulairluni nunarpagmek naucillrat. 9Nuniit tauna acillruat Babylon-aamek,#11.9: Babylon: Una ateq nepengqertuq Hebrew-tun “ayuquciinani.” tuani Atanrem qaneryarait ayuqenrircetellruaki. Tuaken-llu cekavvluki tamiinun nunam qainganun.
Shem-am Kinguvri
10Ukut waniwa kinguvri Shem-am. Allrakuk malruk kinguagni ulerpallran, Shem-aq allrakungluni yuinarnek tallimanek (100) qetunranguq Arpachshad-aamek. 11Taum-llu kinguani unguvaluni allrakuni tiissitsaam avgani (500) cali-llu allanek irniangluni.
12Arpachshad-aaq allrakungluni yuinaq akimiarmek cipluku (35) qetunrangellruuq Shelah-mek; 13taum-llu kinguakun unguvaluni allrakuni yuinaat yuinaq pingayunek cipluku (403) allanek-llu cali irniangluni.
14Shelah-llu allrakungluni yuinaq qulnek cipluku (30) qetunrangellruuq Eber-aamek. 15Taum-llu kinguakun unguvaluni allrakuni yuinaat yuinaq pingayunek cipluku (403) allanek-llu cali irniangluni.
16Eber-aaq-llu allrakungluni yuinaq akimiarunrita'armek cipluku (34) qetunrangellruuq Peleg-amek; 17taum-llu kinguakun unguvaluni allrakuni yuinaat yuinaq atauciq qulnek cipluku (430) allanek-llu cali irniangluni.
18Peleg-aaq-llu allrakungluni yuinaq qulnek cipluku (30) qetunrangellruuq Reu-amek. 19Tuamta-llu kinguakun unguvaluni allrakuni yuinarnek qulnek qulngunrita'armek cipluku (209) cali-llu allanek irniangluni.
20Reu-aq-llu allrakungluni yuinarmek qula malrugnek cipluku (32) qetunrangellruuq Serug-aamek; 21taum-llu kinguakun unguvaluni allrakuni yuinaat qulen malrunlegnek cipluku (207) cali-llu allanek irniangluni.
22Serug-aaq-llu allrakungluni yuinaq qulnek cipluku (30) qetunrangellruuq Nachor-amek; 23taum-llu kinguakun unguvaluni allrakuni yuinarni qulni (200) cali-llu allanek irniangluni.
24Nahor-aq-llu allrakungluni yuinaq qulngunrita'armek cipluku (29) qetunrangellruuq Terah-mek; 25taum-llu kinguakun unguvaluni allrakuni yuinaat talliman yuinaunrita'armek cipluku (119) cali-llu allanek irniangluni.
26Terah-llu allrakungluni yuinarnek pingayunek qulnek cipluku (70) irnianguq Abram-aamek, Nachor-amek, Haran-aamek-llu.
Terah-m Kinguvri
27Ukut waniwa kinguvri Terah-m atiita Abram-aam, Nahor-am, Haran-aam-llu. Haran-aaq atakellrua Lot-aam. 28Haran-aaq-llu tuqullruuq nunami Ur-ami Babylonia-mi, atani unguvainanrani. 29Abram-aaq-llu nulirturtuq Sarai-amek, Nahor-aq-llu nuliangluni Milcah-mek Haran-aam panianek. Haran-aaq atakluku Iscah-m. 30Sarai-a-llu irniangyuituq.
31Terah qetunrani-llu Abram-aaq, Lot-aaq-llu nurr'ani, Haran-aam qetunraa, ukurrani-llu Sarai, Abram-aam nulirra, malikluki taukut ayagtuq Canaan-aamun unilluku nunaseng Ur-aq Babylonia-melnguq. Ayallruut tekilluku Haran-aaq tuanlluteng-llu. 32Tuani tuqullruuq Terah allrakungluni yuinaat qulen tallimanek cipluku (205).
Currently Selected:
Genesis 11: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
