Genesis 10
10
Noah-m Qetunrain Kinguvrit
1Ukut waniwa kinguvrit Noah-m qetunrain Shem-am, Ham-am, Japheth-aam-llu. Ukut qetunrangellruut ulerpiim kinguakun.
2Japheth-aam qetunrai: Gomer, Magog, Madai, Javan, Tubal, Meshech, Tiras-aaq-llu. Ukut ciuliaqait yuut kinguvrita atrinek aprumalriit. 3Gomer-aaq kinguvengqertuq yuitnek Ashkenaz-aam, Riphath-aam, Togarmah-m-llu. 4Javan-aaq kinguvengqertuq yuinek Elishah-m, Spain-am, Cyprus-aam, Rhodes-aam-llu. 5Ukut ciuliaqellruit yuut imarpiim cen̄iini qikertani-llu uitalriit. Japheth-aam kinguveqluki, yuuluteng ilakutellriit allakarmeng nunameggni, allakarmeng-llu qaneryaramegcetun qalartetuluteng.
6Ham-am-llu qetunrai: Cush, Egypt, Libya, Canaan-aaq-llu. 7Cush-aq kinguvengqertuq yuinek Seba-m, Havilah-m, Sabtah-m Raamah-m, Sabteca-m-llu. Raamah-llu kinguvengqertuq yuinek Sheba-m Dedan-aam-llu. 8Cush-aq-llu qetunrangqellruuq aterluni Nimrod-amek, tauna ciuqlikacagauluni ellarpiim iluani cirlakilriarullruuq pinilriaruluni. 9Atanrem ikayuumiini piculriarullruuq. Taumek waten yuut qanlalriit, “Atanrem piculiuvkaqiliten Nimrod-atun!” 10Taum atanirturillra ukunek ayagnillruuq: Babylon, Erech, Accad-amek-llu. Tamarmeng ukut uitaluteng Babylonia-mi. 11Tamaaken nunamek ayallruuq Assyria-mun nunarpaliluni-llu Nineveh-mek, Rehoboth-Ir-amek, Calah-mek-llu, cali 12Resen-aamek, tauna uitaluni akuliigni nunak Nineveh-nkuk nunarpiim-llu Calah-m.
13Egypt-aaq kinguvengqellruuq yuinek Lydia-m, Anam-aam, Lehab-am, Naphtuh-m, 14Pathrus-aam, Casluh-m, Crete-am-llu. Crete-aq ciuliaqluku Philistine-at.
15Canaan-aam-llu qetunraak Sidon-aaq amaqlia, Heth-aq-llu. Ukuk kinguliakek atkegnegun nallunaitelartut. 16Canaan-aaq-llu ciuliaqellruat Jebusite-at, Amorite-at, Girashite-at, 17Hivite-at, Arkite-at, Sinite-at, 18Arvadite-at, Zemarite-at Hamathite-at-llu. Canaan-aam ilakuralriartai ayuqenrilnguut sagtellruut, 19kiituani nuniita ilaksagutaa Sidon-aaq ayagluni-llu ungalatmun Gerar-amun, Gaza-m nunii yaaqsigpek'naku. Tuamta-llu ayagluni calaratmun Sodom-aamun, Gommorrah-mun, Admah-mun, Zeboiim-un-llu yaaqsigpek'naku Lasha. 20Ukut kinguveqai Ham-am, allakarmeng ilakutellriit yuuluteng nunani ayuqenrilngurni, qalartellrit ayuqevkenateng.
21Anngaa Japheth-aam Shem-aq Hebrews-aat tamarmeng ciuliaqaat. 22Shem-am qetunrai, Elam, Asshur, Arpachsad, Lud, Aram-aaq-llu ciuliaqluki tuaten yuut aterpagcimalriit. 23Aram-aaq kinguvengqertuq yuitnek ukut: Uz, Hul, Gether, Meshek-aam-llu. 24Arpachshad-aaq atakluku Shelah-m Eber-aam atiin. 25Eber-aaq malrugnek qetunrarluni. Aipaan-wa atra Peleg,#10.25: Peleg: Uum atrem nepii Hebrew-tun ayuquq “avegluni.” waten aterluni tamatum nalliini ellam yui avgumallrulliniata. Anelgutii aterluni Joktan-aamek. 26Joktan-aaq kinguvengqertuq yuinek Almodad-am, Sheleph-aam, Hazarmaveth-aam, Jerah-m, 27Hodora-m, Uzal-aam Diklah-m, 28Obal-aam, Abimael-aam, Sheba-m, 29Ophir-aam, Havilah-m, Jobab-aam-llu. Ukut tamarmeng ciuliarluteng Joktan-aamek. 30Nuna uitaviat Mesha-mek ayagluni Shephar-aam tungiinun qemit calaralirnermi tekilluki. 31Ukut waniwa kinguvri Shem-am. Allakarmeng ilakellriit nunaluteng. Ayuqevkenateng qaneryarait.
32Makut tamalkuita ilakuralriit kinguveqai Noah-m, ilakuyutetaciicetun atanruviitni; ukunek ayagnirluteng yuut cekavtut nunami ulerpiim kinguani.
Currently Selected:
Genesis 10: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
