Acts 19

Ephesus-aamun Paul-aaq Tekituq

1Tua-i-llu Apollos Corinthia-melnginanrani, Paul-aaq nunakun keluqvaarkun ayagluni Ephesus-aamun tekituq, elitnaurartangqellriamun, 2apluki-llu, “Ukvengllerpecen̄i-qaa Anernermek Tanqilriamek pingellruuci?” Qanertut-llu elliinun, “Qang'a, Anernermek Tanqilriamek niiteksaitukut.” 3Qanertuq-llu ellaitnun, “Camun-mi angllullruceci?” Qanertut-llu, “John-aam angllurceciyaraanun.” 4Paul-aaq-llu qanertuq, “John-aaq angllurcecilartuq umyualinqigtesqutem angllurceciyaraanun, qanerluni yugnun ukvervikesqelluku kingunemikun tekitarkaq, Jesus Christ-aq.” 5Makunek-llu niicameng, angllurcetevkartut atranun Atanrem Jesus-aam. 6Paul-aam-llu unatminek pategvikngaki, Anernerem Tanqilriim tusvikai; qallalluteng-llu alungutetgun, qaneryariurluteng-llu. 7Taukut-llu angutet amllertaut qula malrugnek cipluku.

8Agayuvigmun-llu iterluni, qallatuq ancurturpek'nani iraluni pingayuni, ciumuarulluki taringevkangnaqluki Agayutem angayuqauvia pitekluku. 9Tau͡gaam ilait asvailameng, ukveryugpek'nateng-llu, ukverumalriit inglukait iqluurutekluki yugugaat ciuqerratni, taumek elliin avtai, elitnaurat-llu malikluki qaneryariurluni Tyrannus-aam elitnaurviani erenret tamaitni. 10Tuaten caliurtut allrakugni malrugni, Asia-melnguut-llu tamarmeng Jews-aat Greek-aat-llu Atanrem Jesus-aam qaneryaraa niitaat.

11Agayutem-llu caliari irr'inarqelriit Paul-aakun nasvaumalartut. 12Ilait-llu Paul-aam atullrinek perriutainek wall'u manuilitanek, ayaulluteng ilateng naulluulriit tamakunek agturtelluki assirivkalarait apquciitnek, anernerrluut-llu anevkalarait. 13Tua-i-llu Jews-aat ilait, tuunritulit, cali Atanrem Jesus-aam atrakun anernerrlugnek anevkaringnaqsaaqut naaqilluki waten: “Jesus-aakun, Paul-aam qanrutkellrakun ellimerturamci anesqelluci.” 14Jews-aat agayulirten͞gunrata Sceva-m qetunrai malrunelgen tuatnallruut. 15Tau͡gaam anernerrluum kiugai, “Jesus-aaq nallunritaqa, Paul-aaq-llu nallunritaqa; tau͡gaam elpeci cauceci?” 16Anernerrlulgem-llu curukarai callugluki cirlakualuki-llu; taumek enemek tuaken anqertut matarmeng aknirqumaluteng-llu. 17Tamana niitaat Ephesus-aarmiut tamarmeng Jews-aat Greek-aat-llu. Taumek civuurangut, Atanrem-llu Jesus-aam atra takarnariuq. 18Amlleret-llu ukvengelriit ullautut apervikualuteng caliateng-llu maniluki. 19Amlleret-llu tuunritulit kalikateng quyurtait, ekualuki-llu yuut takuatni, akillrit-llu quyuita naaqngamegteki, akit tiissitsaat yuinaak malruk qulnek cipluki (50,000) amllertaut. 20Tuaten Agayutem qaneryaraa amlleriqapigtuq saggluni-llu tamiinun.

21Makut kinguatni, Paul-aaq Anernerkun nasvicimiimi, pillerkiurtuq Macedonia Achaia-llu tumkerraarlukek Jerusalem-aamun ayagyugluni, qanerluni, “Tangrrumarikumki, Rome-amun cali ayagarkaugua.” 22Taumek ilagni ikayurtegni Timothy Erastus-aaq-llu, Macedonia-mun ayagcetak, ellii tau͡gaam uitaluni Asia-mi.

Demetrius-aam Pek'ngarcecillra Ephesus-aami

23Tamatum nalliini ukverumalriit nepliutengait. 24Yuut iliit Demetrius, suuluciiyurta, caliaminek qivruyugluni piuq; yuguanek agayutnguanek calilaami, agayutseng Diana ayuqeliluku; tuniaqelarai-llu, calillgutminek-llu ilaluni tamakut unangutkelarait tukuurutekluki. 25Tua-i quyurcetai calillgutni, qanrulluki, “Ukuut, nallunritarci caliamteggun tukuurucirput. 26Maa-i tau͡gaam tangrrarci niitaqluku-llu Paul-aam caliara, wani Ephesus-aami kiimi pivkenani, tau͡gaam Asia-mi tamiini, yuut caucaki ukverrluki agayutngunritniluki unatetgun piliaqumalriit. 27Taumek caliarput man'a kiingan aaqenritarput caunrirnayukluku, tau͡gaam Diana-m-llu agayuvia cali qigcikenrirnayukluku, ucurnarqucia-llu piunrirnayukluku agayutemta arnam, Asia-rmiut nunam-llu tamarmi caumaviata.”

28Makunek niicameng eq'uqertut, qayagpagluteng-llu, “Ucurnarquq Diana Ephesian-aat agayutiit!” 29Tamarmirrluteng-llu tamakumiut nep'ngartut ayuquciinateng. Paul-aam-llu ilak pektellgutek, Gaius Aristarchus-llu teguagket Macedonia-rmiuk, quyurrvigmun-llu itrullukek. 30Paul-aaq-llu itqataryaaquq. Tau͡gaam ilain elitnaurat pivkanritaat. 31Ilaita-llu Asia-rmiut ciulirnerita yugnikestain, qanrucetaat itresqevkenaku quyurrvigmun. 32Yuut-llu ayuqenrilngurnek qayagpagtut ayuquciinateng, nalluluteng-llu ca pitekluku quyurucimeggnek. 33Tuani Alexander-aaq qamurluku yuut akuliitnek antaat, ilain Jews-aat cingluku. Ellii-llu Alexander elucira'artuq qanerniarutnaluki yuut. 34Tau͡gaam elpekngatgu Jews-aarucianek, ataucikun yugugaat qayagpagtut sass'agni malrugni taqesciiganateng waten, “Ucurnarquq Diana Ephesian-aat agayutiit!” 35Nunarpiit-llu igartiita cayaqlirluki nepairamiki, qanertuq, “Ukuut Ephesian-aani! Kia nallunritenritau Ephesian-aat ciktaarvikekiit Diana, agayutiit ucurnarqelria, ayuqeliumallra-llu yuguaq pakmaken qilagmek igtelleq? 36Taumek makut asgurakviilata, qiperrlukaunricaaquci umyuarci-llu piciatun maligartevkenaku. 37Wani-wa ukut angutet quyurutaci, camek agayuvignek tegleksailengraata, agayutevcen̄ek-llu caunrilkiksaunateng. 38Taumek Demetrius calillgutai-llu yugmun camek pitengqerquneng, alerquucetangqertuq, cuqcistetarluni-llu, picetaaruskilitki ellmeggnek. 39Tau͡gaam camek allamek apyutkangqerquneng, tamakut qaillukuarvigmi picirkiumaarkaugut. 40Man'a alingurnarquq unuamek atullerput, quyurarucimten̄ek neplillemten̄ek-llu apqaurumakumta kiucirkaiciiqngamta.” 41Tuaten qanrraarluni, yuut quyungqallratnek ayagcetai.

Currently Selected:

Acts 19: YPK

Highlight

Copy