Acts 20

Paul-aaq Jerusalem-aamun Ayakatalria

1Nepairata-llu, Paul-aam elitnaurani taivkarai qaruqaarluki-llu unitai, ayagluni-llu Macedonia-mun. 2Tamakumiut qaqicamiki qarucimariamiki-llu tekituq Greek-aanun, 3uitaluni-llu iraluni pingayuni. Angyakun-llu Syria-mun ayakataullruan Jews-aat ingcuraat. Taumek ellii Macedonia-kun pitngu'rtuq. 4Ukut-llu pillguciraat Asia-mun, Sopater Berea-rmiu, Thessalonica-rmiuk-llu Aristarchus, Secundus-aaq-llu, Derbe-rmiu-llu Gaius, Timothy-llu, cali-llu Asia-rmiuk Tychicus Trophimus-llu. 5Taukut ciumten̄i ayagluteng utaqaitkut Troas-aami. 6Ayagtukut-llu angyakun Philippi-mek, quulciiriyarailngurnek kelipartularviata kinguani; erenret-llu tallimiitni Troas-aamun tekilluta, tuani-llu uitaluta malrunlegni ernerni.

7Nitilim-llu erenrin ciuqliatni, elitnaurai quyungqallratni nerellgutekluteng, Paul-aam qalarutai, unuaqu ayakataami, qalarcimaluni-llu unuum qukallranun. 8Kenurralirtuq tamana qulliq quyungqaviat. 9Yun'errartangqertuq-llu Eutychus-aamek aterluni, egalermi aqumgaluni qavangelliniuq. Paul-aaq-llu qallasngiinaan tauna acivarluni qavanguq, enet-llu qulmun pingayuatnek igtuq. Maaten piat tuqumaluni. 10Paul-aam-llu atraami akuqeraa, qanerluni, “Tavenrici, unguvii elliincan.” 11Ataam-llu mayuami kelipamek-llu nerngami, akaarnun cali qallatuq errvianun, nutaan-llu ayagluni. 12Yun'erraq-llu tauna unguvaan ayautaat, quyaqapiggluteng.

13Ciungakun-llu ayagtukut angyakun Assos-aamun, tuani Paul-aaq eknaluku, picirkillratun; ellii nunakun nangrrarmi piyugluni. 14Assos-aami-llu tekicakut ek'arput Mitylene-amun-llu tekilluta. 15Tuaken-llu tengalraamta unuaquan tekitukut Chios-aamun; unuaquan-llu Samos-aamun tekilluta, uitaqerluta-llu Trogyllium-aami, unuaquan-llu Miletus-aamun. 16Ellii Paul-aaq umyuangami Ephesus-aami egmian kiturarkauluni, Asia-mun tagkuni uamn̄ayukluni, patagtungami piyunarqekuni Jerusalem-aamun tekingnaqnaluni, Pentecost-am erenrani.

Ephesus-aarmiut Ciulirnerita Ullagaat

17Miletus-aami-llu ayagceciuq Ephesus-aamun, Agayuviim ciuliqagtai taisqelluki. 18Ulliitni-llu qanrutai, “Nallunritarpecia Asia-mun tekiqaanemnek qaillun ayuquciqa kesianek. 19Kevgiurluku Ataneq, umyuamkun pivakevkenii, iluteqaqlua naspaamaaqlua-llu, Jews-aat ingcullratni. 20Camek-llu iirutellrunritamci atawakarkarpecen̄ek, tau͡gaam nasvitellruluci ayuqucirturluci-llu quyurrvigni eneni-llu. 21Umyualinqigcaraq nallunairutekluku Jews-aanun Greek-aanun-llu Agayutem tungiinun, ukveq-llu Atanemten̄un Jesus-aamun Christ-amun. 22Tangerrluku-llu, wani-wa Jerusalem-aamun ayakatartua, qillerqumapigainarlua Anernerkun, nalluluki tut'arkat wangnun. 23Tau͡gaam nunani tumeklemni Anerneq Tanqilria nallunairistek'larqa qillerqumallerkamnek nangteqlerkamnek-llu. 24Tau͡gaam tamakut pekcetenritaatnga unguvaka-llu qunukenritaqa, caliaqa qaqiskumku angnirciqngama, akurtulqa-llu caliaqesqutii Atanrem Jesus-aam Agayutem naklekutii nallunairesqelluku. 25Tangerrluku-llu, watua, nallunritamci qalaruskengamni qiliim angayuqauvianek, wak'nirnek kegginaqa tangenqiggngaitarci. 26Taumek mat'umi ernermi nalqigglua qanrutamci, yuum auga wangnun tusngangaituq. 27Cakaaritenrilamci Agayutem pisqutiinek. 28Taumek murilkici elpecen̄ek, quyungqalrianun-llu, Anernerem Tanqilriim qaunqesten͞guruciatun, nerevkararkauluku Agayutem Agayuvia, aumikun kiputellra. 29Wani-wa nallunaituq uniskumci keglunret alingnarqelriit piciqngaceci, uitasngaunaci katngarrani. 30Tuaten-llu ilavcen̄ek yuut alairarkaugut qannguarluteng, elitnauraungraata ellmeggnun cauvkarluki. 31Taumek murilkici, neq'akluku allrakuni pingayuni aarcirtuutekelqa tamaitnun, erenrani unugtuumaan-llu aluvilluaqlua. 32Wani-wa-llu, anelgutmaa, Agayutmun pisqamci qaneryarartaanun-llu kenkiin. Elliin naucugngiici, paitarkitarkauluci-llu ilakluki carriumalriit. 33Yuum akiutiinek wall'u suulutaamek akluanek-llu ayarillrunritua. 34Nallunrilkevcia ukut unatma tau͡gaam aulukellruatnga piilutemnek, calillgutenka-llu. 35Picirkiramci tamalkuitni caliurluci cailnguut aulukesqelluki, umyuaqiciu-llu qaneryaraa Atanerpeci Jesus-aam waten, ‘Atawaunruuq cikiqenglleq akurtunermi.’”

36Tuaten-llu qanrumariami ciisqumigtuq piicallgutekluki-llu taukut. 37Tamarmeng-llu iluteqeqapiggluteng akuqaquat uyaqurruikun melugarluku-llu. 38Angniilutkenruat-llu tamalkuitni qanellrini, qanran tangenqiggngaitniluku kegginani, ellaita-llu angyamun maligtaat.

Currently Selected:

Acts 20: YPK

Highlight

Copy