Acts 15

Arenqiirtullrat Jerusalem-aami

1Judea-mek-llu angutet tekitut, ukverumalriit ayuqucirturluki waten, “Nuugiryaramek pinrilkuvci Moses-aam picirkiutiinek, anirtuumasciigatuci.” 2Tamana pitekluku ayuqenriqertut Paul-aaq Barnabas-aaq-llu naigtaarlukek kiutaagulluteng. Taumek picirkirtut, Paul-aankuk Barnabas-aaq-llu allanek ilalukek Jerusalem-aamun ayaasqelluki Apostle-aanun ciulirnernun-llu, qaillukuarutkesqelluku man'a. 3Kilgaat-llu agayumalriit qaniiceteng, Phoenicia tumkaat Samaria-llu, agayumanrilnguut caullruciitnek qalarutaqluki; tuaten quyavkarluki agayumalriit. 4Jerusalem-aamun-llu tekicata, agayumalriit apostle-aat-llu ciulirnerita-llu ciuniurait, elkek-llu apervikuaguk Agayutem caliaranek ellmegnegun. 5Tau͡gaam Pharisee-aat ilait ukvengelriit nangertut qanerluteng, “Nuugiumanricunaitut Moses-aam-llu picirkiutii atuusqelluku qanrucunarqut.”

6Tuani apostle-aat ciulirneret-llu quyungqaut man'a qaillukuarluku. 7Qanrumariata-llu ayuqenrilngurnek, Peter nangertuq qanerluni, “Ilamaa, nallunrituci Agayutem pisquciatun, Jews-aarunrilnguut qanemnek ciumek niitellruut Qaneryaraqegtaarmek ukvengluteng-llu. 8Agayutem-llu ircaqum nallunritestiin, nallunaircetai Anernermek Tanqilriamek cikirluki, wangkucicetun. 9Wangkucicetun-llu ayuqluki ircaqruit carrirai ukveratgun. 10Caluku-llu Agayun naspaaceciu ukvengelriit atmingnaqluki uqamailngurnek ciuliamta wangkuta-llu aturciigalkemten̄ek? 11Tau͡gaam ukvertukut Jesus-aam naklekutiikun kiingan anirtuumacimten̄ek, ellait-llu.”

12Tamarmeng-llu yugugaat qanerviitut, tau͡gaam niicugnilukek Barnabas-aaq Paul-aaq-llu apervikuallragni Jews-aarunrilngurni Agayutem nallunailkuciarinek irr'inarqelrialiarinek-llu ellmegnegun. 13Taqngagnek-llu James-aaq qanertuq, “Ilamaa, niicugniqercia: 14Simon-aam qanemcitellruaci, Jews-aarunrilnguut Agayutmun paqcetqarraallratnek, yugkaminek cucukiarkauluni, at'mikun aprumaarkanek. 15Man'a-llu qanrutkumauq prophet-aat igaitni waten, 16‘Ukaniku-llu uterciiqua, David-aam-llu pelatekaa agayuvik maktenqigciiqaqa imumalria, imnera-llu makluku naparrluku-llu, 17allat-llu yuut yuarniaraat Ataneq Agayun, cali-llu tamarmeng Jews-aarunrilnguut atemkun aprumalriit. 18Tuaten qanertuq Ataneq Agayun, makut nallunairtiit ciuqvanek.’ 19Taumek umyuartequa uitacurlagcecunaicukluki Jews-aarunrilnguut Agayutmun cautellriit. 20Tau͡gaam igarnarqai agayutnguanun minguumalriit atulaasqevkenaki, akusrarutekisqevkenaki-llu, avatellernek-llu nerlaasqevkenaki, augmek-llu. 21Wani-wa Moses-aam igainek naaqilartut qaneryariulriit elitnaurvigni Sabbath-aat tamaitni.”

22Tua-i-llu man'a atawakngamegteggu apostle-aat, ciulirneret-llu agayuviim-llu yuin tamarmeng, ilameggnek cucuklirtut maligutarkagnek Paul-aamun Barnabas-aamun-llu Antioch-amun, wani-wa ukugnek Judas Barsabbas, Silas-aaq-llu ciulirneret ilagketnek. 23Elkegnegun-llu igaq ayagcetaat waten ayuqelria, “Wangkuta apostle-aani ciulirneritni-llu, ilakelriani ilamten̄un Jews-aarunrilngurnun Antioch-ami Syria-mi-llu Cilicia-mi-llu, umyuaqutmek tuyuramceci: 24Niicamta maaken ayallernun umyuarci pekcetniluku, nalirrungevkarluci-llu, qanerluteng nuugiumanricunaitniluci, alerquutet-llu atuusqelluki: wangkutnek tau͡gken cingumavkenateng. 25Taumek umyuallgutekluta umyuangellruukut cucuklirluta yuugnek, elpecen̄un ayagceciyugluta maligutesqelluki Barnabas-aamun Paul-aamun-llu, 26taukuk unguvallerkartek arcaqakevkenaku Atanrem Jesus-aam atra pitekluku. 27Wani-wa-llu ayagcetagput Judas-aaq Silas-aaq-llu, makunek tungaunaci qanrutesqelluci. 28Atawak'ngarput man'a, Anernerem-llu Tanqilriim atawakngaku, uqamailngurnek atmiryuumiitamceci makut arcaqalriit avatiitni: 29Agayutnguanun minguumalriit atulaasqevkenaki, augmek-llu neresqevkenaci avatellernek-llu, akusrarutekisqevkenaci-llu. Tamakut atunrilkuvciki atawauciquci. Tua-ingunrituq.”

30Tua-i taukut ayagcecimalriit Antioch-amun tekitut, yugugaat-llu quyurcecamegteki igaq tunaat. 31Taukut-llu naaqngamegteggu, caceturucirteng quyatekaat. 32Ukuk-llu Judas-aankuk Silas-aaq-llu, qaneryariulriaruamek ukverumalriit qarutaarakek, ukverat-llu pinircarluku. 33Akaarnun-llu tuani uitalutek, ciunekenka-llu ayagcetagket uitanqegcisqellukek ayagcecestekegnun. 34Tau͡gaam Silas-aaq uitayulliniuq. 35Tau͡gken Paul-aaq Barnabas-aaq-llu Antioch-ami uitauk elicungcarilutek qalarucilutek-llu, Atanrem qaneryaraanek, allanek-llu amllernek ilalutek.

Paul-aankuk Barnabas-aaq-llu Avtuk

36Tua-i-llu caqerluni Paul-aaq qanertuq Barnabas-aamun, “Ayanqiggnaurtukuk ukverumalriit paqluki nunani tamaitni qaneryariurvillmegni, qaillun ayuquciat tangerrniaput.” 37Barnabas-aam-llu John-aaq maliksugluku, tauna Mark-amek at'lek. 38Tau͡gaam Paul-aam elluakenritaa malikellerkaa, Pamphylia-mi unitellruatek taum; caliani ciumurutenrilaku. 39Taumek tamana pitekluku ayuqenriqertuk, avvlutek-llu. Barnabas-aaq-llu Mark-amek maligluni ayagtuq tengalrakun Cyprus-aamun.

Paul-aam Nakmikillra Silas-aamek

40Paul-aam tau͡gaam Silas-aaq cucukaa, ayaglutek-llu, ukverumalriit Agayutem naklekutiikun pisqumiicetek. 41Ayagtuk-llu Syria tumekluku Cilicia-llu, asvairluki agayuviit.

Currently Selected:

Acts 15: YPK

Highlight

Copy