Acts 14

Iconium-aami Calirraarlutek Qimagtuk Lystra-mun

1Iconium-aami apostle-aak ilaklutek Jews-aat agayuviatnun itertuk, qalarucilutek-llu. Yugugaat-llu ukvengluteng, Jews-aat Greek-aat-llu. 2Tau͡gaam ukvenrilnguut Jews-aat agayumanrilnguut eguaqurait uumikesqellukek apostle-aak. 3Tau͡gaam akaarnun tuantuk, cumigglutek qalaruciaqlutek Atanerkun. Elliin-llu qalarutkellrak naklekutni nallunaircetaa nallunailkutanek irr'inarqelrianek-llu unatekegnegun. 4Tau͡gaam nunarpiit yuit avegtut, ingluit Jews-aanun ilaulluteng, ingluit-llu apostle-aagnun. 5Agayumanrilnguut Jews-aat-llu curukaryaaqagket atanermeng pisquciicetun, nangetnalukek teggalqunek-llu miluqunalukek. 6Elkek tau͡gaam taringarcamek qimagtuk Lycaonian-aam nunatainun Lystra-mun Derbe-mun-llu, avaqliitnun-llu, 7tamakuni-llu qaneryaraqegtaar qalarutkaak.

Paul-aam Canrircecillra Tussitellriamek

8Tuani-llu Lystra-mi angun aqumgalartuq pekcuilnguq, yuurqaanerminek tussitellriaruluni, piyuaksaunani. 9Taum Paul-aaq niicugnia. Elliin-llu Paul-aam tangvagaa elpekluku-llu ukvengucia anirturyuucia-llu, 10qanrutaa-llu qayagpagluku, “Nangerten.” Tauna-llu nangertuq piyualuni-llu. 11Yuut-llu Paul-aam calillranek tangrrameng, eriniagut qanerluteng, “Agayutet atralliniut wangkutnun yugtun ayuqluteng!” 12Barnabas-aaq aterpagtaat Jupiter-aamek, Paul-aaq-llu Mercurius-aamek, qalartesten͞guan. 13Jupiter-aam-llu agayulirtii, nunat elatiitni uitalria, kuluvagnek tangnircarluki taiciuq nunat iteryaraatnun, yuut ilakluki taukugnun agayunaluteng. 14Apostle-aak-llu Barnabas Paul-aaq-llu elpengamek, aturatek ullirqakek pulaarlutek-llu yugnun qanpaglutek, 15“Ukuut, ciin waten piceci? Wangkuk yuugukuk elpecicetun ayuqlunuk, tau͡gaam qaneryaramek taitamegceci makunek caunrilngurnek causqelluci unguvapialriamun Agayutmun, qiliim nunam-llu, imarpiim-llu imartuumarmi piliaqestiinun. 16Imumirpak nunam yui uitacaaqai umyuangutaciicetun pisqelluki. 17Tau͡gken nallunaicaaquq aulukicia, ellallircet'laaku pakmaken, cat nauvkarluki neqkarpecen̄ek ilukegcivkarluci.” 18Makunek qanerlutek cayaqlirluki taqevkarakek agayuyulriit ellmegnun.

Paul-aam Miluqumallra Teggalqunek

19Tau͡gaam Jews-aat tekitut Antioch-amek Iconium-aamek-llu, yugugaat-llu unakngamegteki, Paul-aaq teggalqunek miluquat, nunat-llu elatiitnun qamurluku tuqumayukluku. 20Tau͡gaam ukverumalriit uivarucatni maktuq, nunanun-llu iterluni. Unuaquan-llu Barnabas-aaq-llu Derbe-mun ayagtuk.

Antioch-amun Utertuk

21Tuani-llu qaneryaraqegtaar qalarutkumariamegnegu, amlleret-llu ukvengata, utertuk Lystra-mun Iconium-aamun-llu Antioch-amun-llu, 22ukverumalriit-llu asvaircarakek, eguaqurluki-llu ukverat pegtesqevkenaku, nalqigulluki-llu caknernarqelriakun Agayutem Angayuqauvianun itrarkauniluta. 23Agayuvigni-llu tamaitni aperturilartuk ciuliqagtekaitnek; yagluteng-llu piicaulluki, Atanermun ukvekek'ngaatnun nayumiqasqelluki.

24Pisidia-llu tumekluku Pamphylia-mun tekituk. 25Perga-mi-llu qaneryariurraarlutek atrartuk Attalia-mun. 26Tuaken-llu tengalrakun Antioch-amun ayagtuk, tuavet kingunermegnun, man'a caliartek yaguteqatallragni piicautellruicetek Agayutem naklekutiinun pekyutesqellukek. 27Tekicamek-llu agayuviim yui quyurcetakek, qanemcilluki-llu cat tamalkuitnek Agayutem caliaranek ellmegnegun, agayumanrilnguut-llu ukverem amiiganek ikirutniluki. 28Tuantuk-llu akaarnun ukverumalriani.

Currently Selected:

Acts 14: YPK

Highlight

Copy