Acts 13

Saul-aankuk Barnabas-aaq-llu Ayagcecimallrak Jews-aarunrilngurnun

1Antioch-ami agayuviim yui ilangqertut prophet-aanek elitnaurilrianek-llu ukunek: Barnabas, Simeon-llu tungulriamek aprumalria, Lucius-llu Cyrene-armiu, Manaen-llu, Herod-aam atanirturilriim anglicaraullgutii, Saul-aaq-llu. 2Agayullratni yagluteng-llu nerrlermeggnek, Anernerem Tanqilriim qanrutai, “Allakarcikek Barnabas, Saul-aaq-llu caliarkamun pisqellemnun.” 3Taukut-llu yagluteng piicagluteng unatmeggnek-llu pategvikraarlukek, ayagcetagket.

Cyprus-aamun Ayagtuk

4Elkek tua-i Anernerkun Tanqilriakun ayagcecimiimek, Seleucia-mun atrartuk. Tuaken-llu angyamun eklutek Cyprus-aamun ayagtuk. 5Salamis-aarmiunun tekicamek, Agayutem qaneryaraa qalarutkaak Jews-aat agayuviatni, John-aaq-llu ikayurtekluku. 6Qikertaq tamana tamalkuan iquklilluku pektaat, Paphos-aarmiut engelkarrluki. Tuani naspertuyulimek nall'arkengut prophet-aaruamek piciunrilngurmek, Jews-aaruluni, aprumaluni Bar-Jesus; 7nunalgutekluku atanerruaq Sergius Paulus. Taum atanerruam umyuartuami, Barnabas-aankuk Saul-aaq-llu taisqak ellminun, Agayutem qaneryaraa niicugluku. 8Tau͡gaam naspertuyulim Elymas-aam (wani-wa atqekii cali), narurtak atanerruaq inerqurluku ukveresqevkenaku. 9Tau͡gaam Saul-aam, aprumalriim Paul-aamek, Anernermek Tanqilriamek imiumiimi tangvagaa, 10qanrulluku-llu, “Elpet piciunrilngurmi, piyunailngurmi-llu, tuunrangayiim yuani, elluam-llu inglukestiini, taqeqatanrituten-qaa Agayutem tumyaraqesqellra piciulria allaurtengnaqlerpenek? 11Tangerrluku-llu, Agayutem unatain agturaatgen, cikmirciquten-llu akerta tangerrngaunaku akaarnun.” Egmianun-llu iik taitungyarturtuk tangellra-llu tan'geriluni; tarritaqami-llu tass'uqestekaminek unayaqlilartuq. 12Atanerruam tua-i tangrramiu waten picia, ukvertuq, irr'iluni Atanrem ayuqucirtuutainek.

Antioch-amun Pisidia-melngurmun Ayagtuk

13Tuaken Paphos-aarmiunek Paul-aaq ilani-llu tengalrarluteng ayagtut Perga-rmiunun Pamphylia-melngurmun, John-aam tau͡gaam unitak uterrluni-llu Jerusalem-aamun. 14Elkek tau͡gaam tuaken Perga-mek ayiimek, Antioch-amun tekituk Pisidian-aamelngurmun. Tuani, Sabbath-aaruan, agayuvigmun itertuk aqumlutek-llu. 15Agayuvkaristiit naaqirraarluteng Alerquutnek, Prophet-aat-llu igaitnek, ullagcetait qanrulluki, “Ilamtaa ukuut, qaneryararkangqerquvci yuut ayuqucirtuutekaatnek, tua-i qanqici.” 16Paul-aaq-llu nangercami unatmikun elucirarai nepaitesqelluki, qanerluni-llu, “Israel-aarmiut ukuut, tamarpeci-llu Agayutem takaqestaini niicugnicia. 17Ukut Israel-aat Agayutiita ciuliaput nakmikellrui, Egypt-aami-llu uitallratni piunrurcetellrui ilaitni, tallimikun-llu pinilriakun tuaken nunamek anutai. 18Allrakuni-llu yuinaagni malrugni kusguagai yuilqumi. 19Canaan-aami-llu yuut malrunelgen atanellgutkenrilnguut piunriamiki, nunat cikiutekai ellaitnun (Israel-aarmiunun) paitaqesqelluku, allrakuni yuinaat yuinaagni yuinagnek malrugnek cipluku qula-wa. 20Kinguatgun-llu ciuliqagten̄ek atanerkitai Samuel-aaq engelkarrluku prophet-aaq. 21Tamatum kinguani atanvagnek kaigallruut. Agayutem-llu atanerkitai Saul-aamek Kish-am qetunraanek, Benjamin-aam kinguvranek, atanruluni allrakuni yuinaagni malrugni. 22Au͡gaamiu-llu David-aamek cimiraa atanrusqelluku. Tauna-llu nallunairutkaa qanerluni, ‘Nallunriraqa David-aaq Jesse-m qetunraa, yuk umyuama nall'aringastii, taum pisqutenka aturarkaugai.’ 23Taum kinguvrin iliitnek Agayutem Israel-aat anirturtekaatnek Jesus-aamek cikillrui akqucini aturluku. 24Civuaraani John-aaq qaneryariullruuq, anglluryaramek umyualinqigtellerkaatnek Israel-aam yuin tamarmeng. 25John-aam-llu caliani qaqicamiu yuut aptai, ‘Kituuyuksecia waniwa? Taungunritua tekitarkaq, tau͡gaam kingumkun agiirtellriartangqertuq, taum aluilitagken cingigkenek angicillerkamnek tunriukutua.’

26“Ilamaa ukuut, Abraham-aam kinguvrini, tamarpeci-llu Agayutem takaqestaini, man'a qaneryaraq anirtuun wangkutnun taicimauq. 27Jerusalem-aarmiut atanirturtaita-llu nalluamegteggu, Prophet-aat-llu igait nalluluki, naaqelangermegteki Sabbath-aani tamalkuitni, taukut piciurtait Jesus-aaq tuqucatgu. 28Tuqutesqutkamek-llu nataqvikenrilngermegteggu Pilate-aaq kaigavikaat tuqutesqelluku. 29Piciurcimariamegteki-llu tamalkuita, pitekluku igausngalriit, napalriamek atrartaat, qungumun-llu elliluku. 30Tau͡gaam Agayutem unguircetaa tuqumalrianek. 31Erenret-llu qavcin kinguatni tangercetuq yugnun malillminun Galilee-amek mayullermeggni Jerusalem-aamun. Taukut-llu maa-i nallunairutkaat yugugarnun. 32Qaneryaraqegtaarmek-llu taitamceci, Agayutem ciuliamten̄un akqutkellrinek, 33maa-i piciurcata irniaritnun wangkutnun, Jesus-aaq unguirtelluku, igausngaciatun Psalm-at yuarutet iliitni waten, ‘Qetunraqamken, ernermi mat'umi Ataksagutarpenga.’ 34Unguinqigucianek tuqunqigtarkaunrilucianek-llu qanellruuq waten, ‘Cikirciqamken David-aam akqutainek ellualrianek piciulrianek-llu.’ 35Allami cali yuarutmi qanellruuq, ‘Tunngaitan Ellualriartan arullerkaanun.’ 36David-aaq tauna egilrallni qaqicamiu tuqullruuq tungmagcimaluni-llu ciuliami nuniitnun, temii-llu aruluni. 37Tau͡gaam tauna Agayutem unguircetellra arullrunrituq. 38Taumek, ilamaa, nallunriciu man'a: Elliikun tau͡gaam au͡g'aritmek cikiumauci. 39Elliikun-llu ukvelriit tamarmeng ellualriarurtut. Tau͡gaam Moses-aam alerquutaikun ellualriarurtesciiganateng.

40“Taumek murilkici, prophet-aatgun qanrutkumalriim nall'arcuaraaci, 41‘Atam, ukuut! Piunrilkilriani, irr'ici, piunrirluci-llu, wani-wa nallevcen̄i caliamek caliqatartua ukveqngailkevcen̄ek nalqigusngang'e'rpeci.’”

42Jews-aat agayuvigmek anngata, Jews-aarunrilnguut kaigaut makunek qaneryaranek cali qalarutesqelluteng Sabbath-aanqigeskan. 43Agayuviim-llu yui eskavcata, amlleret Jews-aat, caullret-llu maligtagket Paul-aaq Barnabas-aaq-llu, taukuk-llu qalarutakek Agayutem naklekutiinetesqelluki.

44Sabbath-aanqigcan-llu nunat tamarmirrluteng quyurtut Agayutem qaneryaraanek niicugluteng. 45Tau͡gaam Jews-aat ukut yugugaat tangrramegteki, ciknangut, qanngarrluteng-llu naigtaarluku Paul-aaq, qanellri narurtaarluki qanerrlugluteng tuaten. 46Nutaan Paul-aaq, Barnabas-aaq-llu alingevkenatek qanertuk, “Agayutem qaneryaraa elpecen̄un ciumek qalarutkumaarkaullruyaaquq; tau͡gaam akurtunrilavciu, unguvallerkarci-llu nangyuilnguq qessakngavciu, wani-wa Jews-aarunrilngurnun tuigteqatartukut. 47Tuaten Atanrem ellimertuakut qanerluni, ‘Elliamken Jews-aarunrilngurnun tanqiusqelluten, anirtuutekesqelluten-llu nunat iquitnun.’” 48Jews-aarunrilnguut-llu mat'umek niicameng, angnirtut Agayutem-llu qaneryaraa ucurnarivkarluku; tamarmeng-llu unguvamun nangyuilngurmun pisqumalriit ukvertut. 49Atanrem-llu qaneryaraa qanrutkumauq tamiinun taumi nunami. 50Tau͡gaam Jews-aat kikiarait arnat piuranrit, nunat-llu ciulirnerit angutet, nangtesqellukek Paul-aaq Barnabas-aaq-llu, anqerrullukek-llu tuaken nunameggnek. 51Elkek tau͡gaam urr'aq it'gamegnek evcugaak taukunun, ayaglutek-llu Iconium-aamun tekituk. 52Ukvengelriit-llu elitnaurat angnimek imangut, Anernermek-llu Tanqilriamek.

Currently Selected:

Acts 13: YPK

Highlight

Copy