1 Kings 9

Agayun Alainqigtuq Solomon-aamun

1Kinguani Angayuqam Solomon-aam qaqiutellran nautellranek Agayuvigpak, atanruvik-llu, allat-llu tamalkuita caliaqsullni, 2Ataneq alainqigtuq elliinun, Gibeon-aami pillrucimitun. 3Ataneq qanertuq elliinun, “Niitellruanka piicauteten. Kenciknarivka'rqa una Agayuvigpak caliaqellren piicagvigkauluku wangnun qangvarpak. Murilkeciqaqa cayailkuciumaluku-llu kesianek. 4Kevgiurarkaukuvnga takaqlua arenqiallugutaunak-llu, atavet David-aam pillruciatun, niisngakuvki picirkiutenka aturluki-llu tamalkuita elpenun alerquutekellrenka 5navegngaitaqa akqutelqa atavnun David-aamun qanrutlemku Israel-aat atanirturtengqerrlainarciqniluki elliin kinguvrinek. 6Tau͡gaam elpet wall'u kinguverpet maligtenriqatnga, narurrluki picirkiutenka alerquutenka-llu cikiutekellrenka elpenun, ciktaangluteng-llu allanun agayutnun, 7nutaan au͡g'arciqanka yuunka Israel-aat nunamek cikiuteklemnek ellaitnun. Cali-llu cakaarciqaqa una Agayuvigpak kenciknarivkalqa piicalarvigkauluku wangnun. Yuut tamiinek temciarautekciqaat Israel-aaq cautekenrirciqaat-llu. 8Una Agayuvigpak ayuqeciquq qalliryagusngalriatun enellertun, tamarmeng-llu kitulriit alangaalarciqut irr'iluteng-llu. ‘Ciin Atanrem waten piagu man'a nuna una-llu Agayuvigpak?’ apciiqut. 9Yuut kiuciqut, ‘Tua-i-wa ellaita cakaaratgu Ataneq Agayutseng, anucestellrat ciuliameng Egypt-aamek. Ellait akqiut piciunaluteng allanun agayutnun ciktaarvikluki-llu. Taumek Atanrem man'a picurlaun tuceskii ellaitnun.’”

Solomon-aam Umyuallguciutellra Hiram-aamun

10Solomon-aam allrakut yuinaat aturluki nautaa Agayuvigpak atanruvini-llu. 11Angayuqam Hiram-aam Tyre-armium pikiumallrua napanek unailngurnek cedar-aanek, nekevraartunek-llu pine-anek, suulutaamek-llu piyugtaciatun caliamini. Qaqicimarian Angayuqam Solomon-aam cikiraa Hiram-aaq yuinarnek (20) nunacuarnek avatiini Galilee-am. 12Hiram-aam tangerrsartullrui, assikenritai-llu. 13Tua-i qanertuq Solomon-aamun, “Tua-i makut, anelgutmaa, maa-i nunacuaraat wangnun cikiutekelten!” Una pitekluku cali maa-i aterpagcimauq Cabul-amek. 14Hiram-aam tuyullrua Solomon-aaq malleggluki, talliman cuqet (5 tons) suulutaamek.

Allat Solomon-aam Caliallri

15Solomon-aaq calillruuq calivkaumalrianek piscirluni Agayuvigpagmek atanruviminek-llu, imillerminiu-llu nuna calaralirnerani nunarpiim, qacarneq-llu nunarpiim avatiini. Atullruluki-llu cali napartenqigtellermini nunarpai Hazar-aam, Megiddo-m, Gezer-aam-llu. 16Angayuqran Egypt-aam anguyallrua Gezer-aaq teguluku-llu, tuqutellruluki yui nayurtai ekuavkallruluku-llu nunarpak. Tua-i-llu cikiutekellruluku kassuutellrani, panimi Solomon-aamek. 17Solomon-aam-llu piliaqenqiggluku. Aturluki calivkaumalriit pisten̄i, Solomon-aam-llu cali piliaqenqigtellrua atliq Beth Horon-aaq, 18Baalath-aaq, Tamar-aq yuilqurtaani Judah-m 19calissuutai atu'urkai-llu tuani uitaaqluteng, horse-aari pekcessuutai-llu allat-llu cat tamarmeng aturyulallri caliyugaqami, tuani Jerusalem-aami, Lebanon-aami, allani-llu angayuqauvimi iluanelngurni uitaluteng. 20Tamarmeng yuut uitaqallret Amorite-at, Hittite-at, Jebusite-at-llu, yuut Israel-aat ilakenrilkait — 21kinguvrit unegtellret nunamun kinguatni Israel-aam yuin piunriqapigtellrunrilkait, makut, Solomon-aam pistepaayuurtellrui, tuaten-llu ayuqluteng cali unuamek. 22Solomon-aaq tau͡gaam pistepayuurtellrunritai Israel-aat, kevgaugut tau͡gaam elliinun, anguyagten͞guluteng, atanerruaruluteng, alerkuagisten͞guluteng, pekcessuutnek aulukiluteng, horse-aarten͞guluteng-llu.

23Tamaani pitangqertuq tiissitsaam avga yuinaak malruk qulmek cipluku (550) atanerruanek qaunqesten͞guluteng calivkaumalrianun Solomon-aam caliarkainun alairturalrianun.

24Solomon-aam imiraa nuna calaralirneratni nunarpiit, kinguakun nuliami, panian atanran Egypt-aam, nugtartellran David-aam Nunarpiinek atanruvigmun Solomon-aam piliaqellranun elliinun.

25Pingayurqunek allrakumi Solomon-aaq elliilallruuq ekuagiluni, uitanqegcitem-llu elliitiinun, ekuavigmi Atanermun piliallmi qaingani. Tua-i Agayuvigpiim piliaqellra qaqitaa.

26 Ataneq Solomon-aaq cali piliuq sun'anek Eziongeber-aami, mallgeskiini Eloth-aam cen̄iini Kangiqutaan Aqaba-m, Edom-aamelnguum. 27Ataneq Hiram-aaq ayagceciuq imarpiliutulinek, piminek ikayuucartuusqelluki Solomon-aam pistainun. 28Tengalrarluteng-llu nuniinun Ophir-aam, ut'rulluteng-llu Solomon-aamun akimiaq ataucimek usperteggun cuqnek suulutaanek.

Currently Selected:

1 Kings 9: YPK

Highlight

Copy