1 Kings 13

1 Atanrem pisquciatun prophet-aaq Judah-mek ayagtuq Bethel-aamun tekilluni-llu tuavet Jeroboam-aaq nangerngainanrani ekuavigmi ekuagiqatarluni. 2Maligtaquluku Atanrem alerquutii, prophet-aam ikiaraa niitelluni ekuavik: “Ekuaviik, ekuaviik, waten qanertuq Ataneq: Mikelnguq, atengqerrarkaq Josiah-mek, yuurciiquq nakmiin ilainun David-aam. Tuqurqiciquq agayulirten̄ek kevgiulrianek agayumanrilnguut ekuaviitni elliitnek ekuavkarilrianek elpenun, ekuavkariciquq-llu yuinarnek enernek.” 3Nallunailkutaliuq-llu taumi ernermi, qanerluni, Una nallunailkutnguuq Atanrem qanellranek, “Tangerrluku, ekuavik imcimaarkauguq, qamlleq-llu qainganelnguq kuvumaarkauluni.”

4Angayuqam-llu niicamiu man'a, eniraa ellimerrulluku-llu, “Teguu tauna angun!” Egmian-llu angayuqam tallia nalauq, ataam ellminun cayugciigali'irrluki. 5Ekuavik alqunaq navgurtuq qamlleq-llu kuvluni nunamun, prophet-aam piciqnillratun Atanrem atrakun. 6Angayuqaq-llu Jeroboam-aaq qanertuq prophet-aamun, “Piicauteqernga Atanermun Agayutevnun, kaigavikluku unatenka ataam assirivkaasqelluki.”

Prophet-aaq-llu piicagtuq Atanermun, angayuqam-llu tallia canrircecimauq. 7Angayuqaq-llu qanertuq prophet-aamun, “Maligglua enemnun neryartua. Nunulirciqamken caliallerpenek.”

8Prophet-aaq kiuguq, “Cikingerpenga avganek tukuutvet, wiinga maligcanritamken wall'u nerngaunii merngauni-llu aipirluten. 9Alerqullruanga Atanrem camek neresqevkenii mer'esqevkenii-llu, utercesqevkenii-llu tumelqa aturluku.” 10Taumek utertenrituq tumllermikun taillermini, tau͡gaam allakun tumyarakun.

Ak'allaq Prophet-aara Bethel-aam

11Taum nalliini uitauq ak'allaq prophet-aaq Bethel-aami. Qetunraagken-llu ullagluku qanrutaak tamalkuitnek prophet-aam pillrinek taumi ernermi Bethel-aami; qanellrinek-llu angayuqamun. 12Atiignek-llu qanrutak, “Natetmun ayagta?” Qetunraagken-llu apertuataak natetmun prophet-aam ayallrucianek, tekitelleq Judah-mek. 13Ellii-llu qanertuq qetunraagminun, “Aqumgavilirtegu ciulvak.” Tua-i aqumgaviliraak ciulvak ellii-llu ekluni. 14Kingunrirturaa-llu prophet-aaq, nalaqaa-llu aqumgallrani aciani napam; elliin-llu qanrutaa, “Elpet-qaa prophet-aaruuten tailleq Judah-mek?”

Qanertuq-llu, “Taunguunga.”

15Tua-llu qanrutaa, “Maligesnga enemnun neryarturluten kelipamek.”

16Ellii-llu qanertuq, “Maliggluten uterrngaitua, ciuniurngaunaku-llu allaniuruten. Nerellgutekngaitamken wall'u mellgutekluten maani, 17tua-i-wa Atanrem alerqullruanga camek nerqaasqevkenii wall'u meqaasqevkenii, utercesqevkenii-llu tumelqa aturluku.”

18Tua-llu angukaraurtellria prophet-aaq Bethel-aamek qanertuq elliinun, “Wiinga-llu, prophet-aaruunga elpetun, an'gilam-llu qalarutellruanga alerquuciatun Atanrem, qanrullua ut'rucesqelluten wangnun allaneqluten.” Tau͡gaam tauna angukara'urluq iqluuq.

19Tua-i taum maligtaa eniinun, nerluni-llu kelipamek eniini, merluni-llu mermek. 20Aqumgauk-llu estuulumi, qaneryaraa-llu Atanrem taiguq prophet-aamun taum ut'rutestiinun. 21Ellii-llu qanpagtuq prophet-aamun Judah-mek taillermun, “Waten qanertuq Ataneq, ‘Tua-i-wa elpet narurcavgu qaneryaraa Atanrem, atunrilavgu-llu alerquutekellra elpenun Atanrem Agayutvet, 22tau͡gaam uterrluten, nerluten-llu kelipamek merluten-llu mermek nunami elpenun qanrutkellrani neresqevkenak kelipamek, mer'esqevkenak-llu mermek; elpet temen qungasngangaituq qunguitnun nakmiin ilavet.’”

23Nerumariami-llu kelipamek, merluni-llu, aqumgaviliraa ciulvak prophet-aamun taitellerminun. 24Ayainanrani-llu yugtutulim pairtaa tumyarami tuqulluku-llu. Temii-llu egingaluni tumyaramun, ciulvak-llu caniani nangengqaluni; yugtutuli-llu nangengqaluni caniani temiin. 25Angutet-llu kiturtut tamaaggun tangerrluku-llu temii egcimaluni tumyaramun. Yugtutuli-llu nangengqaluni caniani temiin. Tekilluteng-llu nunarpagmun qanrutkaat angukara'urluum prophet-aam uitaviani.

26Tua-llu prophet-aam ut'rutestellran tamaaken niicamiu qanertuq, “Taunguuq prophet-aaq narurcilleq qaneryaranek Atanrem! Taumek Atanrem tunellrukii yugtutulimun, taum-llu allgurluku tuqutaa, Atanrem qanellruciatun elliinun.” 27Ellii-llu qanertuq qetunraagminun, “Aqumlliritegnga ciulvagmek.” Aqumlliriuk-llu. 28Ayagluni-llu, nataqluku-llu temii egcimaluni tumyaramun, ciulvak yugtutuli-llu nangengqalutek caniani temiin. Yugtutulim nereksaunaku tema uitalluku-llu ciulvak. 29Prophet-aam-llu tema tegua ut'rulluku-llu nunarpagmun angniilutekluku tungmaggnaluku-llu. 30Ellia-llu tema nakmiin qunguminun; nangtequtekaat-llu qanerluteng, “Tangerrluku anelgutka!” 31Tungmagcimariamiu-llu qetunraagminun qanertuq, “Tuqukuma tungmageskitegnga qungumun prophet-aam tungmagingavianun; elliluki enrenka enrin caniatnun. 32Qallatellra qastuluni qanrutkesqellranek Atanrem inglukluku ekuavik Bethel-aami, tamalkuita-llu agayularviit Samaria-m nunarpaini, ilumun piciurtenrilngaitut.”

Jeroboam-aam Tuquteknarqellria Assiilngua

33Mat'um kinguani Jeroboam-aaq tuigtenrituq assiiluciminek, tau͡gaam cali agayulirciluni agayularvignun tamaaken yuut ilaitnek; kina tua-i piugngalria naaqitaqluku agayulirten͞gurrluku tamakunun. 34Mat'um assiilnguum elliin caliallran taitaa iquklitlerkaa piunrirteqapiggluku elliin kinguvrin-llu angayuqaulallrat.

Currently Selected:

1 Kings 13: YPK

Highlight

Copy