Lukas 8

Meꞌ dende nuhutan si Isa

1Gaꞌ du tiggel puwas miyaꞌan, ilatag weꞌ si Isa meꞌ puweblohin duk kalumaꞌanin magmahalayak aka-aka hāp sabab pagbayaꞌ Tuhan si meꞌ aꞌahin. Nuhut iye tindegne sampūꞌ duk duwehin. 2Niyaꞌ isab meꞌ dende nuhut iye. Meꞌ dende miyaꞌan, niyaꞌ siye bakas pakawuliꞌ si Isa sakiden. Niyaꞌ isab bakas pasayedan seyitan ubus bu paluwas si Isa meꞌ seyitanin. Dambuwaꞌ meꞌ dende inin si Mariyam, dende amban Magdala, bakas paluwasan seyitan pituꞌin. 3Sinduwehin si Joꞌanna, anda si Kusa kapatas meꞌ daraꞌakan Sultan Herodin, duk si Susanna, duk ekka pe meꞌ dende seddili. Siye ne inin mangatasan disi Isahin.

Dalilan sabab aꞌa magsabulak binihiꞌin

(Mateo 13:1-9; Markus 4:1-9)

4Dambuwaꞌ ellew pagbanes aꞌa patipun pu si Isa, duk magkatekka siye amban meꞌ kalumaꞌanin, missā si Isa si siye magdalilan. Paꞌinne, 5“Niyaꞌ aꞌa pī si tanaꞌne magsabulak binihiꞌ. Pagsabulakne, niyaꞌ binihiꞌ tapisik si lān. Manjari tadiꞌik-diꞌik duk pī meꞌ manuk-manukin manganne. 6Meꞌ binihiꞌ sinduwehin laboꞌ diyataꞌ batu pānas, duk sakaliꞌ ne tomoꞌ, lanes peggeꞌ gaꞌi paꞌessepan boheꞌ. 7Sinduwehin laboꞌ dem kasampinitan, duk nuhut nulig sampinitin manjari katalungan tinanemin. 8Niyaꞌ isab meꞌ binihiꞌ sinduwehin laboꞌ si kahāpan bulak. Meꞌ binihiꞌ inin tomoꞌ duk nulig duk moꞌo buwaꞌne. Ekka manamal jarihannen.” Manjari missā si Isa, paꞌinne, “Amey-amey pakalehun bi bang niyaꞌ pinaꞌin si kaꞌam.”

Puꞌunne magdalilan

(Mateo 13:10-17; Markus 4:10-12)

9Tinilew si Isa weꞌ meꞌ tindegnen bang ine hāti dalilan miyaꞌan. 10Paꞌinne, “Kaꞌurungan ne kaꞌam kataꞌu, supaya tahātibi meꞌ tinapukan Tuhan dem pikilannen sabab bang saꞌingge pagbayaꞌne si meꞌ aꞌanen. Saguwaꞌ si meꞌ aꞌa sinduwehin inaka kēmon si dalilan, supaya payamande saguwaꞌ gaꞌi takitede, duk supaya takalede saguwaꞌ gaꞌi tasabutde.”

Pinahāti weꞌ si Isa dalilan sabab aꞌa magsabulak binihiꞌin

(Mateo 13:18-23; Markus 4:13-20)

11“Na, iye inin hāti dalilan miyaꞌan,” paꞌin si Isa. “Binihiꞌin lapal Tuhanin. 12Meꞌ kasabulakan si lānin, dalil meꞌ aꞌa makakale lapal Tuhanin, manjari pī nakuraꞌ seyitanin ngagew lapalin amban dem pikilande supaya siye gaꞌi kahagad duk gaꞌi siye timbul. 13Duk meꞌ kasabulakan diyataꞌ batu pānasin, dalil meꞌ aꞌa makakale lapal Tuhanin duk magtawus kahagadde duk kēgan siye. Saguwaꞌ kuweꞌ siye dalil binihiꞌ gaꞌ nganggamut. Kahagad siye daddaliꞌ saguwaꞌ pagtekka sassatin, gaꞌi ne siye kahagad. 14Duk meꞌ binihiꞌ malaboꞌ dem kasampinitanin, dalil meꞌ aꞌa makakale lapal Tuhanin saguwaꞌ sābude mapasōngin, ekka makasuse siye duk alal siye weꞌ meꞌ alataꞌden duk sinna siye magadjak. Kuweꞌ siye dalil meꞌ tinanem katalungan duk gaꞌ abutan toꞌe buwaꞌden. 15Duk meꞌ sinabulakan dem bulak mahāpin, dalil meꞌ aꞌa makakale lapal Tuhanin, ateyden hāp duk lunuk. Ellegde teꞌed lapalin dem ateyde duk magtuyuꞌ teꞌed siye nuhutne, hangkan dalil tinanemin buwaꞌ siye, hātinen hāp kaꞌujudanden.”

Payitaꞌan ilekkeban

(Markus 4:21-25)

16Paꞌin si Isa pe, “Gaꞌ niyaꞌ aꞌa mekketan payitaꞌan ubus bu lekkebanne duk palanggana atawa papīne diyawaꞌ kantil. Saguwaꞌ papīne payitaꞌanin diyataꞌ tengenanne, supaya meꞌ aꞌa mapadiyalemin kitede dantaꞌin. 17Peggeꞌ gaꞌ niyaꞌ tinapukan kuweꞌitu weꞌ gaꞌi ujud pinaguwaꞌ si pasōngan, duk kēmon manggaꞌi tahāti kuweꞌituhin, ujud kataꞌuhan du si pasōngan. 18Hangkan pakalehun bi pahāp-hāp. Peggeꞌ sine-sine makasabut, inurungan du iye duk tasabutne namba. Saguwaꞌ sine-sine gaꞌi makasabut, bisan kannalne niyaꞌ kuweꞌahat tasabutne, inānan du amban iye.”

Saꞌi si Isahin duk meꞌ pungtinaꞌine lellahin

(Mateo 12:46-50; Markus 3:31-35)

19Manjari tekka pī saꞌi si Isahin duk meꞌ pungtinaꞌine lellahin, saguwaꞌ gaꞌ siye tumapit si iye hawal ekka aꞌahin. 20Niyaꞌ ngakahan si Isa, paꞌinne, “Tuwan, īꞌ saꞌinun duk meꞌ pungtinaꞌinun si bukut duk batang kew kitede.” 21Paꞌin si Isa si meꞌ aꞌa malaꞌihin, “Sasuku pakale duk nuhut lapal Tuhanin, siye iyan saꞌiku duk meꞌ pungtinaꞌiku.”

Si Isa mateddoꞌ lahat-lahat

(Mateo 8:23-27; Markus 4:35-41)

22Dambuwaꞌ ellew pasakey si Isa duk meꞌ tindegnen dem bangkaꞌ duk paꞌinne si siye, “Sūng kite bi pī palipag si dambiyaꞌ lamew.” Hangkan patulak ne siye. 23Sasangde mapīhin tumuli si Isa. Bessuwang nihup baliyu mabasagin duk sōng pennoꞌ ne bangkaꞌden weꞌ boheꞌ, hangkan piligdu siye palenneb. 24Pī siye mangun si Isa, paꞌinde, “O Tuwan, matey kite bi inin!” Manjari dongaꞌ si Isa duk pinadeheng weꞌ ne baliyuhin duk meꞌ goyak mabasagin. Magtawus ne padeheng baliyuhin duk teddoꞌ ne lamewin. 25Ubus paꞌin si Isa si meꞌ tindegnen, “Weꞌey kaꞌam gaꞌi ngandel si aku?” Tinalew siye duk ulaliꞌ teꞌed siye. Magtilew-tilew siye, paꞌinde, “Aꞌahey inin? Tadaꞌakne bisan baliyuhin duk goyakin duk tuhutde pangandaꞌakannen.”

Aꞌa Gerasa pasayedan seyitanin kawuliꞌan

(Mateo 8:28-34; Markus 5:1-20)

26Manjari palanjal siye palipag duk tekka siye si lahat Gerasa, magantag du duk lahat Jalil. 27Pagduwaꞌi si Isa amban dem bangkaꞌ, niyaꞌ pasampang si iye dambuwaꞌ aꞌa amban puweblo lahat miyaꞌan pasayedan meꞌ seyitan. Tiggel ne iye gaꞌ magsemmek duk patennaꞌannen dumaꞌin si lumaꞌ saguwaꞌ si meꞌ lingab pagkubulan. 28Pagkitene si Isa, magkolehak iye duk pasujud iye si dehelluhan si Isa duk maggasud iye, paꞌinne, “Gaꞌ niyaꞌ lamudnu si aku, Isa. Kaꞌu Anak Tuhanin, iye Tuhan Tamanan Malangkewin. Junjungku si kaꞌu, daꞌa ku binasahun.” 29Missā iye sa miyaꞌan peggeꞌ dinaꞌak hep weꞌ si Isa seyitanin paluwas amban iye. Matuꞌuhin daran ne hep iye pagbayaꞌan weꞌ seyitanin duk bisan iye iningketan duk karena duk binanteyan weꞌ meꞌ aꞌa, ujud bekkat du weꞌ ne karenahin duk binoꞌo iye tahalaꞌ weꞌ seyitanin pī si lahat makagindew-gindew.

30Manjari tinilew iye weꞌ si Isa, paꞌinne, “Sine ēnnun?” Nambung iye, paꞌinne, “Ēnkun si Ibuhan.” Peggeꞌ ekka hep seyitan mapaꞌasek si aꞌa miyaꞌan. 31Duk pabuyuꞌ-buyuꞌ teꞌed meꞌ seyitanin pu si Isa, gaꞌi siye makipapī dem narkaꞌ.

32Niyaꞌ magsungkal laꞌi diyataꞌ bīd panenan bawi, ekka manamal. Pabuyuꞌ-buyuꞌ meꞌ seyitanin pu si Isa weꞌ paꞌasek siye pī dem meꞌ bawihin. Dinaꞌak ne siye weꞌ si Isa. 33Manjari paluwas meꞌ seyitanin amban aꞌahin duk padiyalem siye pī magdem baran meꞌ bawihin. Magtawus panenan bawihin magubas padurul pī si pampang magdem lamew duk lambo siye kēmon.

34Pagkite meꞌ aꞌa magipat bawihin maꞌumantag inin, magubas siye duk magaka-aka siye laꞌi si puweblo duk si meꞌ lahat diyataꞌ. 35Manjari pī meꞌ aꞌahin mayaman bakas maꞌumantag miyaꞌan. Pagtekkade laꞌi pu si Isa, takitede aꞌa bakas pasayedan seyitanin ningkoloꞌ laꞌi si bihing bettis si Isa. Magsemmek ne iye duk hāp ne pikilannen. Manjari tinalew siye. 36Ubus inaka-akahan ne siye weꞌ meꞌ aꞌa bakas mangitehin bang saꞌingge pamakawuliꞌ si Isa aꞌa bakas pasayedan seyitanin. 37Manjari kēmon meꞌ aꞌa miyaꞌan, meꞌ amban kalahat-lahatan laꞌi si Gerasa, dinaꞌak weꞌ de si Isa tahalaꞌ peggeꞌ paꞌasekan talew teꞌed siye. Hangkan pasakey si Isa dem bangkaꞌ duk sōng patulak ne. 38Aꞌa makawuliꞌanin pabuyuꞌ-buyuꞌ nuhut iye. Saguwaꞌ papoleꞌ si Isa iye, paꞌinne, 39“Hap lumaꞌ ne kew duk magaka-aka kew si meꞌ aꞌahin sabab hinangan hadje tahinang Tuhan si kaꞌuhin.” Manjari lumengngan ne aꞌahin duk ilatag weꞌ ne puweblohin magaka-aka sabab hinangan hadje bakas tahinang si Isa si iyehin.

Anak si Jairusin duk dende mangantan semmek si Isahin

(Mateo 9:18-26; Markus 5:21-43)

40Pagbalik si Isa si dambiyaꞌ lamew, sinna meꞌ aꞌahin pasampang si iye peggeꞌ inagad-agad hep iye weꞌ de. 41Niyaꞌ tekka pī si iye dambuwaꞌ nakuraꞌ si langgal lahat miyaꞌan, ēnnen si Jairus. Pasujud iye si antag bettis si Isa duk pabuyuꞌ-buyuꞌ teꞌed iye moꞌo si Isa si lumaꞌne. 42Peggeꞌ niyaꞌ anakne dende dambuwaꞌ-buwaꞌ, sampūꞌ duk duwen tahun umulnen, legget manamal duk sōng matey ne. Nuhut si Isa iye.

Sasangde mapīhin, taligpit ne si Isa weꞌ meꞌ aꞌa mabanes mapatuhut si iyehin. 43Niyaꞌ laꞌi dem kaꞌekkahan aꞌahin dambuwaꞌ dende saki, luwal paguwaꞌan lahaꞌ. Sampūꞌ duk duwen tahun ne kemuwe kasakinen. Ubus ne tagastune kēmon sīnnen si meꞌ doktol, saguwaꞌ gaꞌ niyaꞌ makakawuliꞌ iye. 44Pī iye patapit si bukutan si Isa, duk inantan weꞌ ne tuggu badjuꞌ si Isahin. Magtawus padeheng paglahaꞌnen. 45“Sine bakas mangantan akuhin?” paꞌin si Isa. Maggaꞌ siye kēmon. Manjari paꞌin si Petros, “Tuwan, kabanes meꞌ aꞌa mapalaray si kaꞌu inin, magtilew pe kew?” 46Saguwaꞌ paꞌin si Isa, “Asal niyaꞌ bakas ngantan aku, peggeꞌ talessaku weꞌ niyaꞌ balakat paguwaꞌ amban dem baranku.” 47Sakaliꞌ kataꞌuhan dendehin weꞌ gaꞌi katapukanne bakas hininangne miyaꞌan, patapit iye pī migpid duk pasujud iye si antag bettis si Isa. Duk inakahan weꞌ ne si Isa si pakalehan meꞌ aꞌahin bang weꞌey iye antanne, duk inakahan isab weꞌ ne weꞌ kawuliꞌan iye magtawus. 48Paꞌin si Isa si iye, “Dende, kawuliꞌan ne kew peggeꞌ sandel kew si aku. Pī ne kew, daꞌa kew suse.”

49Sasang si Isa pe mamissā si dendehin, niyaꞌ ne aꞌa tekka amban lumaꞌ si Jairus. Paꞌinne pu si Jairus, “Anaknu dendehin gaꞌ ne. Daꞌa ne sasewun guruhin.” 50Takale si Isa inin, ubus paꞌinne pu si Jairus, “Daꞌa kew tinalew. Sandel kew hadja. Ellum du iyan anaknun.”

51Pagtekkade laꞌi si lumaꞌ si Jairus, gaꞌ niyaꞌ daꞌakne padiyalem luwal hadja si Petros, si Yahiya, si Yakub, duk saꞌi-sama nakanakin. 52Kēmon aꞌa malaꞌihin magtangis duk magmatey sabab nakanakin. Saguwaꞌ paꞌin si Isa si siye, “Daꞌa kaꞌam magtangis. Dumaꞌin matey nakanakin saguwaꞌ tuli hadja.” 53Pinagsayehan iye weꞌ de, peggeꞌ kataꞌuhande weꞌ asal matey ne nakanakin. 54Manjari inantanan weꞌ si Isa tangan nakanakin duk paꞌinne pinapales, “Endeng, dongaꞌ kew.” 55Na, balik niyawanen duk magtawus iye dongaꞌ. Duk dinaꞌak iye weꞌ si Isa pinakan. 56Ulaliꞌ manamal saꞌi-sama nakanakin. Saguwaꞌ sinessaꞌan teꞌed siye weꞌ si Isa, gaꞌi dinaꞌak inaka bisan pu sine sabab miyaꞌan.

Currently Selected:

Lukas 8: yakV

Highlight

Copy