Lukas 7

Pinakoleꞌ weꞌ si Isa daraꞌakan kapitanin

(Mateo 8:5-13)

1Pagubus inin kēmon bissā si Isa si meꞌ aꞌahin, pī iye si puweblo Kapernaum. 2Na, laꞌi si puweblo miyaꞌan niyaꞌ dambuwaꞌ kapitan si armi bangsa Roma. Niyaꞌ daraꞌakanne lella legget manamal duk sōng matey ne. Asal kalasahanne teꞌed daraꞌakanne inin. 3Pagkale kapitanin sabab si Isa, ngandaꞌak iye meꞌ bahiꞌ meꞌ Yahudihin pī pu si Isa nilew iye, bang makajari iye pī makoleꞌ daraꞌakanne miyaꞌan. 4Pagtekkade laꞌi pu si Isa, boꞌode teꞌed iye duk paꞌinde, “Pataꞌ teꞌed tabangannu kapitan miyaꞌan, 5peggeꞌ pabagay teꞌed iye si bangsate bi Yahudi duk iye hep maggastuhin pamatengge langgalte bi si puweblo inin.”

6Manjari nuhut siye ne si Isa. Pagtapit ne siye si lumaꞌ, ngandaꞌak kapitanin meꞌ bagayne pī pasampang pu si Isa moꞌo bissānen, pinaꞌin, “Tuwan, daꞌa ne kew mapekkengan dinu peggeꞌ gaꞌi ku pataꞌ papituhannu si lumaꞌku. 7Peggeꞌ bangsahan kew teꞌed, hangkan pikilku gaꞌi ku isab pataꞌ paguwaꞌ piyu si kaꞌu. Saguwaꞌ missā kew hadja duk koleꞌ du daraꞌakankun. 8Kataꞌuhanku peggeꞌ bisan aku inin, pagbayaꞌan ku weꞌ malangkew amban akuhin duk magbayaꞌ ku si meꞌ sundalukun. Bang paꞌinku si dangan, ‘Pī kew,’ pī iye. Bang paꞌinku si seddili, ‘Pitu kew,’ pitu iye. Duk bang paꞌinku si daraꞌakankun, ‘Hinangun inin,’ hinangne.”

9Pagkale si Isa inin, ulaliꞌ iye si binissā kapitanin. Manjari hinarap weꞌ ne meꞌ aꞌa mabanes mapatuhut si dambulihannen, duk paꞌinne si siye, “Akahante kaꞌam, bisan si bangsa Israꞌil gaꞌ ku bakas makadugpak aꞌa kuweꞌ kapitan miyaꞌan asal sandel manamal.” 10Manjari balik ne meꞌ aꞌa bakas dinaꞌak kapitanin duk pagtekkade si lumaꞌ, takitede daraꞌakanin koleꞌ ne.

Pinakellum balik weꞌ si Isa anak dende baluhin

11Gaꞌ du tiggel puwas miyaꞌan, hap pī si Isa si dambuwaꞌ puweblo inēnan Nain. Nuhut iye meꞌ tindegnen duk banes teꞌed meꞌ aꞌa patuhut si iye. 12Pagtekka ne siye si tarangka paꞌasekan hap puweblo miyaꞌan, niyaꞌ meꞌ aꞌa magtanggung aꞌa matey binoꞌo paluwas pī si pagkubulan. Lella mamatey miyaꞌan anak dambuwaꞌ-buwaꞌ du duk saꞌinen balu ne. Banes aꞌa amban puweblo miyaꞌan nuhut baluhin pī ngubul anaknen. 13Pagkite si Isa, Panuhutanin, dende balu miyaꞌan, maꞌaseꞌ teꞌed iye si dendehin duk paꞌinne si iye, “Daꞌa ne kew magtangis, dende.” 14Ubus pasōng iye duk inantanan weꞌ ne tanggunganin hangkan padeheng meꞌ aꞌa magtanggungin. Manjari paꞌinne, “Bagay, dongaꞌ kew.” 15Magtawus aꞌa mamateyin ellum balik duk ningkoloꞌ iye duk missā. Duk dinaꞌak ne iye weꞌ si Isa ineddoꞌ si saꞌinen. 16Kēmon aꞌa malaꞌihin asekan talew duk pinudji weꞌ de Tuhanin. Paꞌinde, “Niyaꞌ nabi balakatan tuꞌu si kite bi! Taꞌesseb Tuhanin du kite bi meꞌ aꞌanen.” 17Bawag bakas hininang si Isa inin si meꞌ kalahatan si Yahudiya duk si meꞌ kalahatan mapaliputin.

Meꞌ panilew weꞌ Yahiya magpandi-pandi aꞌahin

(Mateo 11:2-19)

18Kaꞌakahan isab Yahiya weꞌ meꞌ tindegnen sabab meꞌ hinangan si Isahin. 19Manjari ngalingan iye duwangan meꞌ tindegne duk daꞌakne siye pī pu si Isa, Panuhutanin, nilew iye bang iye ne ke bakas pinaꞌal mapitu si dunyahin atawa bang niyaꞌ pe ke seddili amban iye subey ase-asede pitu. 20Pagtekka duwanganin pī pu si Isa, paꞌinde, “Dinaꞌak kami pitu si kaꞌu weꞌ Yahiya magpandi-pandi aꞌahin peggeꞌ batang kataꞌuhanne bang kaꞌu ne ke bakas pinaꞌal mapitu si dunyahin atawa bang niyaꞌ pe ke seddili subey ase-ase kami pitu.”

21Papīden sābu si Isa miyaꞌan magpakawuliꞌ meꞌ aꞌa ekka taga saki bayuꞌ-bayuꞌan, duk pasayedan seyitan. Ekka isab meꞌ aꞌa pessek ngite balik weꞌ ne. 22Manjari sambungan si Isa duwangan tindeg Yahiyahin, paꞌinne, “Pī ne kaꞌam duk akahanun bi Yahiya meꞌ bakas takitebi hininangkun duk bakas takalebi binissākun. Akahanun bi iye weꞌ ngite ne meꞌ mapessekin, meꞌ kukuꞌin lumengngan ne, meꞌ inipulin kawuliꞌan ne, meꞌ mabisuhin makakale ne, meꞌ mamateyin ellum balik, duk minahalayak ne aka-aka mahāpin si meꞌ aꞌa makaꞌaseꞌ-aseꞌin. 23Duk kēgan du sasuku gaꞌi magduwe-duwe si akuhin.”

24Paglumikut ne meꞌ dinaꞌak Yahiyahin, missā si Isa si meꞌ aꞌa mabanesin sabab Yahiya. Paꞌinne, “Ine teꞌ bakas kabayaꞌanbi pinayamanin papībi pu si Yahiya si lahat makagindew-gindewin? Kabayaꞌanbin ke mayaman aꞌa gaꞌi teteg pamikilnen kuweꞌ dalil udjung-udjung magpalehan weꞌ baliyu? Dumaꞌin? 25Na, ine teꞌ kabayaꞌanbi pinayaman mapīhin? Aꞌa magsemmek mahalgaꞌ? Meꞌ aꞌa magsemmek mamahalgaꞌin duk maparasahan teꞌedin laꞌi patennaꞌanden dem astanaꞌ. 26Na, ine teꞌ pinayamanbi mapīhin? Nabi? Aweꞌ, akahante kaꞌam, nabi takitebin pasōng amban nabi sinduwehin. 27Si Yahiya hep inin aꞌa sinulat dem kitabin, pinaꞌin laꞌi, ‘Paꞌin Tuhanin: Daꞌakku pī pamasanankun dehellu amban kaꞌu duk memesne lānnun.’ 28Akahante kaꞌam,” paꞌin si Isa, “gaꞌ niyaꞌ aꞌa bakas inanakan tuꞌu si dunya bangsahan amban Yahiya inin. Saguwaꞌ dem pagbayaꞌan Tuhanin, bisan aꞌahin diyawaꞌ teꞌed pagaꞌanen, bangsahan pe iye amban Yahiya.”

29Kēmon meꞌ aꞌahin duk pasōng pe meꞌ magpāku-pāku sukeyin, pakale teꞌed pu si Isa. Siye inin bakas makipandi pu si Yahiya peggeꞌ kahagad siye weꞌ Tuhanin bentel. 30Saguwaꞌ meꞌ Pariseohin duk meꞌ guru si saraꞌ āgamahin, gaꞌ siye makipandi pu si Yahiya peggeꞌ gaꞌi siye mabayaꞌ nuhut kinabayaꞌan Tuhan para si siyehin. 31Manjari paꞌin si Isa, “Ine pangandalilku meꞌ aꞌa maꞌellum kuweꞌitu inin? Kuweꞌ ine siye? 32Kuweꞌ siye dalil mākanak magtingkoloꞌ si tabuꞌan magdagey magkawin duk magkubul. Maglingan siye si saweꞌden, paꞌinde, ‘Magtambul kami si kaꞌam saguwaꞌ gaꞌ du kaꞌam mansak. Magmatey kami saguwaꞌ gaꞌ du kaꞌam magtangis.’ 33Kaꞌam kuweꞌ meꞌ mākanak miyaꞌan. Peggeꞌ pitu Yahiya magpandi-pandi aꞌahin, bu daran iye muwase duk gaꞌi iye nginum makalango, paꞌinbi weꞌ pasayedan seyitan iye. 34Ubus aku, Anak Manusiyaꞌin, pitu ku bu mangan ku duk nginum, paꞌinbi, ‘Payamanun bi aꞌa iyan, dahagaꞌ teꞌed duk palalango. Meꞌ bagaynen meꞌ aꞌa magpāku-pāku sukey duk meꞌ aꞌa dusehan sinduwehin.’ 35Saguwaꞌ,” paꞌin si Isa, “meꞌ aꞌa manuhut Tuhanin naksiꞌ weꞌ lalem teꞌed kataꞌu Tuhanin.”

Si Isa laꞌi si lumaꞌ si Simon, Pariseohin

36Dambuwaꞌ ellew binoꞌo si Isa weꞌ dambuwaꞌ meꞌ Pariseohin pī si lumaꞌne mangan. Pī ne si Isa duk ningkoloꞌ iye sōng mangan. 37Na, niyaꞌ dende si puweblo miyaꞌan bawag weꞌ dusehan. Pagkataꞌuhan dende inin weꞌ īꞌ si Isa si lumaꞌ Pariseo miyaꞌan mangan, pī iye moꞌo isellan bengngi mahalgaꞌ. Pangisihannen hininangin batu alabaster. 38Pī iye nengge si antag bettis si Isa nangis duk basseꞌ ne bettis si Isahin weꞌ boheꞌ matanen. Manjari pinunasan weꞌ ne duk bulu kōkne duk inūkan weꞌ ne bettis si Isahin, ubus bu tinataꞌan weꞌ ne duk isellan bengngi mahalgaꞌin. 39Pagkite inin weꞌ Pariseo mamoꞌo si Isahin, paꞌinne dem ateyne, “Bang toꞌo si Isa inin nabi, kataꞌuhanne siꞌ bang sine dende mangantan bettisne inin. Kataꞌuhanne siꞌ weꞌ dende inin dusehan.” 40Manjari missā si Isa si iye, paꞌinne, “Simon, niyaꞌ batang paꞌinku si kaꞌu.” “Ine Tuwan,” paꞌin si Simon. 41Manjari paꞌin si Isa, “Niyaꞌ duwangan aꞌa saliꞌ-saliꞌ taga utang si dambuwaꞌ aꞌa. Dambuwaꞌin utangnen lime hatus pilak duk dambuwaꞌin limempūꞌ pilak. 42Peggeꞌ gaꞌ niyaꞌ pamayedde, paꞌin aꞌa pangutanganden, ambat ne bisan ne siye gaꞌi magbayed. Na, bang si kaꞌu, sine si duwangan miyaꞌan asal malasa teꞌed si aꞌa bakas pangutanganden?” 43Nambung si Simon, paꞌinne, “Araꞌ-araꞌku aꞌa maꞌekka utangnen, iye miyaꞌan mamalasa teꞌed si iyehin.” “Tewwaꞌ sambungnu iyan,” paꞌin si Isa.

44Manjari paharap si Isa si dendehin duk paꞌinne pu si Simon, “Kitenu dende inin? Pitu ku dem lumaꞌnu ensiniꞌ, gaꞌ ku bisan panyapannu boheꞌ pangosoꞌku bettisku. Saguwaꞌ dende inin kinosoꞌan weꞌ ne bettiskun duk boheꞌ matane duk pinunasan weꞌ ne duk bulu kōkne. 45Gaꞌ ku ūkannu sa addatten bi saguwaꞌ dende inin, kemuwe padiyalem ku pitu, gaꞌ iye bakas pahali ngūkan bettiskun. 46Gaꞌ isellanannu kōkkun pangaddatnu aku, saguwaꞌ dende inin isellan bengngi mahalgaꞌ pe pangalatagne bettiskun. 47Hangkan akahante kew, dende inin hadje lasane si akuhin peggeꞌ dusene maꞌekkahin taꞌampun ne. Bang kulang du duse aꞌa taꞌampunin, kulang du isab lasa pinakitehannen.”

48Manjari paꞌinne si dendehin, “Taꞌampun ne meꞌ dusenun.” 49Meꞌ saweꞌ si Isa magtingkoloꞌ si lamisahanin magtilew dem ateyde, “Aꞌahey inin, ngampun meꞌ duse?” 50Saguwaꞌ paꞌin si Isa si dendehin, “Timbul ne kew peggeꞌ sandel kew si aku. Pī ne kew, daꞌa kew suse.”

Currently Selected:

Lukas 7: yakV

Highlight

Copy