Lukas 23

Si Isa si harapan Pilatus

(Mateo 27:1-2, 11-14; Markus 15:1-5; Yahiya 18:28-38)

1Manjari kēmon kakunsihalanin kuwat duk binoꞌo weꞌ de si Isa pī paharap pu si Pilatus. 2Pagtekkade laꞌi, tinuntutan si Isa weꞌ de. Paꞌinde, “Takuhi kami aꞌa inin nimboꞌohan bangsa kamihin nguntarahan gubelnohin. Gaꞌi daꞌakne meꞌ aꞌahin magbayed sukey si Sultan Nakuraꞌin. Duk paꞌinne pe weꞌ iye koꞌ Almasihin, hātinen, tapeneꞌ Tuhan magsultanin.” 3Tilew Pilatus iye, paꞌinne, “Sultan meꞌ Yahudihin ke kew?” Nambung si Isa, paꞌinne, “Iye du pinaꞌinnu iyan.” 4Paꞌin Pilatus si meꞌ nakuraꞌ imamin duk si meꞌ aꞌa mabanesin, “Gaꞌ niyaꞌ takasuwaꞌku duse aꞌa inin.” 5Saguwaꞌ pasegeꞌ teꞌed siye, paꞌinde, “Magsasew iye si meꞌ aꞌahin sabab toloꞌnen. Tinagnaꞌan weꞌ ne pagtoloꞌnen laꞌi si lahat Jalil, duk magtoloꞌ isab iye si tibuꞌukan Yahudiya, duk kuweꞌitu tiyaꞌ ne isab iye tuꞌu si Awrusalam.”

Si Isa si harapan si Herod

6Pagkale Pilatus inin, paꞌinne, “Aꞌa Jalil ke aꞌa inin?” 7“Aweꞌ,” paꞌinde. Pagkataꞌuhan Pilatus weꞌ si Isa amban lahat diyalem pagsultanan si Herod, dinaꞌak weꞌ ne si Isa binoꞌo pī pu Sultan Herod, peggeꞌ sābu laꞌi iye si Awrusalam masa miyaꞌan. 8Pagkite si Herod si Isa, kēgan teꞌed iye peggeꞌ tiggel ne kabayaꞌne mangite iyehin. Ekka aka-aka bakas takalene sabab si Isa duk bayaꞌ iye ngite hinangan balakat hinangne. 9Hangkan tiggel panilew-nilewne si Isahin, saguwaꞌ gaꞌ si Isa nambung. 10Manjari meꞌ nakuraꞌ meꞌ imamin duk meꞌ guru si saraꞌ āgamahin patapit pī duk pinabasag weꞌ de panuntutde si Isahin. 11Manjari hinang dagey si Isa weꞌ si Herod duk meꞌ sundalunen duk diniyawaꞌan weꞌ de. Pinasemmekan iye weꞌ de juba tanam manamal, ubus bu daꞌak si Herod ne iye binoꞌo balik pī pu si Pilatus. 12Ellew miyaꞌan magbagay ne Pilatus duk si Herod. Matuꞌuhin magbanta hep siye.

Si Isa ilaboꞌan hukuman pinapatey

(Mateo 27:15-26; Markus 15:6-15; Yahiya 18:39–19:16)

13Manjari tinawag weꞌ Pilatus patipun meꞌ nakuraꞌ meꞌ imamin duk meꞌ bahiꞌin duk meꞌ aꞌahin. 14Paꞌinne si siye, “Binoꞌo weꞌ bi aꞌa inin pitu si aku duk paꞌinbi weꞌ katimboꞌohan weꞌ ne meꞌ aꞌahin nguntarahan gubelnohin. Bakas ne iye paliksaꞌku tuꞌu si panaꞌananbi, saguwaꞌ gaꞌ niyaꞌ kasuwaꞌku duse aꞌa inin kuweꞌ panuntutanbi iyehin. 15Duk bisan si Herod damikkiyan du isab, peggeꞌ daꞌakne ne iye binoꞌo balik pitu si kite bi. Pastiꞌ teꞌed weꞌ gaꞌ niyaꞌ laꞌat tahinang aꞌa inin talep pamapateyan iye. 16Hangkan daꞌakku hadja iye ilubakan ubus bu paluwasku ne iye.” (17Hangkan miyaꞌan paꞌin Pilatus, peggeꞌ iye addatnen, kahabaꞌ tahun bang magkādjaꞌan meꞌ Yahudihin inēnande Kādjaꞌan Pangessebanin, maluwas iye si meꞌ aꞌahin dambuwaꞌ pilisu.) 18Pagkale meꞌ aꞌahin pinaꞌin si Pilatus miyaꞌan, magkalolop siye kēmon, paꞌinde, “Papateyun aꞌa iyan! Barabbas kabayaꞌan kami pinaluwasin.” (19Si Barabbas inin tahan dem kalabusu peggeꞌ bakas iye nuhut meꞌ aꞌa nguntarahan gubelnohin laꞌi dem puweblo Awrusalam, duk makapapatey iye aꞌa.) 20Bayaꞌ si Isa paluwas Pilatus hangkan ngalingan iye balik si meꞌ aꞌahin. 21Saguwaꞌ magkalolop siye, paꞌinde, “Lansangun iye diyataꞌ olom. Lansangun iye diyataꞌ olom.” 22Kamintellunen paꞌin Pilatus si siye, “Weꞌey, ine laꞌat tahinangnen? Gaꞌ niyaꞌ takasuwaꞌku dusene talep pamapateyan iye. Hangkan daꞌakku hadja iye ilubakan ubus bu paluwasku ne iye.” 23Saguwaꞌ pasegeꞌ teꞌed siye duk magkalolop ne paꞌin weꞌ subey si Isa ilansang diyataꞌ olom. Ujudnen tatuhut du kinabayaꞌanden. 24Hangkan ngalaboꞌ hukuman Pilatus weꞌ subey tinuhut kinabayaꞌanden. 25Pinaluwas weꞌ ne aꞌa pinākude pinaluwasin, aꞌa kinalabusu sabab pangatune si gubelnohin duk sabab pamapateynen. Saguwaꞌ si Isa sinōngan weꞌ ne si meꞌ sundalu duk tahinang kinabayaꞌan meꞌ aꞌahin.

Pangalansang si Isa diyataꞌ olomin

(Mateo 27:32-44; Markus 15:21-32; Yahiya 19:17-27)

26Manjari binoꞌo ne weꞌ de si Isa lumengngan tudju pī si lugal pangalansangan iyehin. Sasangde si lān, niyaꞌ tasampangde aꞌa amban lahat Kirene, ēnnen si Simon. Bakas amban lahat diyataꞌ iye balik pī si puweblo. Ginagahan iye weꞌ meꞌ sundaluhin duk dinaꞌak pinanangkit si iye olom sōng pangalansangan si Isahin, dinaꞌak binoꞌo si dambulihan si Isa.

27Banes teꞌed aꞌa patuhut pu si Isa sampay niyaꞌ meꞌ dende magtangis duk magmatey sababne. 28Pahaleng si Isa duk paꞌinne si siye, “O meꞌ dende Awrusalam, daꞌa ku pagtangisanun bi. Iye pagtangisanun bi dibin duk meꞌ anakbin. 29Peggeꞌ niyaꞌ iyan meꞌ ellew tekka si pasōngan, paꞌin meꞌ aꞌahin, ‘Hāp sukud meꞌ dende manggaꞌi manganakin duk meꞌ dende manggaꞌ bakas manganak duk magpasusuhin.’ 30Duk suknaꞌan meꞌ aꞌahin iyan diden, paꞌinde, ‘Weꞌey pe ku gaꞌi tahanan punu inin. Weꞌey pe ku gaꞌi lekkeban kūd inin.’ 31Peggeꞌ,” paꞌin si Isa, “bang kuweꞌ inin hininangde si aꞌa manggaꞌ niyaꞌ dusenen, pasōng pe iyan hininangden si meꞌ aꞌa taga dusehin si meꞌ ellew īꞌ.”

32Niyaꞌ isab duwangan aꞌa seddili amban si Isa binoꞌo weꞌ de pinapatey. Duwangan miyaꞌan bakas ngalanggalan saraꞌ. 33Pagtekkade laꞌi si lugal ēnande “Bungkug,” ilansang weꞌ de si Isa diyataꞌ olom bu pinatengge weꞌ de olomin. Ilansang isab weꞌ de duwangan ngalanggalan saraꞌin si olomde. Dambuwaꞌ olomin patenggede si kanawanan si Isa duk dambuwaꞌin si bibanganne. 34Ngampun si Isa si Tuhan para si meꞌ mangalansang iyehin, paꞌinne, “O Ammaꞌ, ampunun siye peggeꞌ gaꞌi tahātide hininangde inin.” Meꞌ sundaluhin maglegot pagbahagiꞌde meꞌ semmek si Isahin. 35Sasang meꞌ aꞌa magtengge malaꞌihin mayam-mayam, meꞌ nakuraꞌ meꞌ Yahudihin, pinagudjiꞌan si Isa weꞌ de duk binissāhan. Paꞌinde, “Tatabangne meꞌ aꞌa seddilihin, ambat tabangne dinen bang asal bennal iye Almasihin, tapeneꞌ Tuhan magsultanin.” 36Hinang dagey isab iye weꞌ meꞌ sundaluhin. Patapit siye pī duk sinōngan iye weꞌ de ininum pamaꞌinum iye. 37Duk paꞌinde, “Bang sultan meꞌ Yahudihin kew, tabangun dinun.” 38Duk niyaꞌ sinulat si olom diyataꞌan kōkne pinaꞌin, “Inin sultan meꞌ Yahudihin.”

39Binissā-bissāhan isab si Isa weꞌ dangan meꞌ aꞌa ngalanggalan saraꞌ ilansangin, paꞌinne, “Dumaꞌin ke kew Almasihin. Na, timbulun be dinun duk sampay kami isab.” 40Saguwaꞌ inamāhan iye weꞌ saweꞌnen, paꞌinne, “Weꞌey kew missā sa iyan? Weꞌ gaꞌi kew talew si Tuhan? Saliꞌ-saliꞌ hep hukuman si kitehin bi tellungan. 41Saguwaꞌ kite duwangan patut kite pinapatey kuweꞌ inin peggeꞌ inin tumbas meꞌ hinanganten. Saguwaꞌ aꞌa inin gaꞌ niyaꞌ laꞌat tahinangne.” 42Manjari paꞌinne pu si Isa, “O Isa, daꞌa ku kayipatanun bang ne kew magsultan.” 43Paꞌin si Isa si iye, “Sabennal akahante kew, ellew inin du, laꞌi kite magtuhut si surgaꞌ.”

Kamatey si Isahin

(Mateo 27:45-56; Markus 15:33-41; Yahiya 19:28-30)

44Paglettu ellew ne, ngalindem mata ellewin duk maglindem dem tibuꞌukan lahat miyaꞌan sampay lisag tellu kohapin. 45Duk garet isab paduwe semmek subuk hinang ellig dem langgal hadjehin. 46Manjari ngalingan si Isa papales, paꞌinne, “O Ammaꞌ, sōnganku niyawakun si antanannu.” Pagubus inin bissāne, bekkat ne napasnen. 47Pagkite kapitan meꞌ sundaluhin maꞌumantag miyaꞌan, pinudji weꞌ ne Tuhanin duk paꞌinne, “Asal aꞌa hāp teꞌed aꞌa inin!” 48Duk kēmon aꞌa malaꞌi magtipun mamayamin, pagkitede maꞌumantag miyaꞌan, hap lumaꞌ siye neppak-neppak dākanden peggeꞌ dukka siye manamal. 49Kēmon meꞌ bagay si Isahin, sampay meꞌ dende manuhut iye amban Jalilin, laꞌi siye nengge patala-tala duk takitede kēmon bakas maꞌumantagin.

Pangubul si Isahin

(Mateo 27:57-61; Markus 15:42-47; Yahiya 19:38-42)

50-51Niyaꞌ aꞌa laꞌi inēnan si Yusup amban puweblo Arimati, laꞌi si lahat Yahudiya. Aꞌa hāp iye duk bentel kawul-piꞌilnen. Inagad-agad weꞌ ne katuman meꞌ paꞌalan sabab pagbayaꞌ Tuhanin. Dangan iye si meꞌ kakunsihalanin, saguwaꞌ gaꞌ iye patuhut si meꞌ pikilande duk hinangande pamapateyde pu si Isahin. 52Si Yusup inin pī pu si Pilatus duk pināku weꞌ ne bangkey si Isahin. 53Manjari ilebbes ne weꞌ ne duk sinaput weꞌ ne. Ubus bu pinabāk weꞌ ne diyalem lingab ilowangan dem batu gaꞌ pe bakas pangubulan. 54Kohap Jumaꞌat ne miyaꞌan, duk seddep ne ellewin. Iye ne miyaꞌan tagnaꞌan ellew liꞌihin. 55Meꞌ dende manuhut si Isa amban Jalilin, paturul pu si Yusup duk takitede kubulin duk bang saꞌingge pamettadne si Isahin diyalem kubul. 56Manjari hap lumaꞌ ne siye manyap meꞌ laksiꞌ duk meꞌ isellan bengngi pangalaksiꞌde bangkey si Isahin. Pagellew liꞌi ne, pahali siye sa pangandaꞌakan saraꞌin.

Currently Selected:

Lukas 23: yakV

Highlight

Copy