Lukas 24

Si Isa ellum balik

(Mateo 28:1-10; Markus 16:1-8; Yahiya 20:1-10)

1Subu-subu ellew Ahadin, hap pī meꞌ dende miyaꞌan si kubul moꞌo meꞌ laksiꞌ pinanyapden. 2Pagtekkade laꞌi, takitede weꞌ ubus ne iligidan batu bakas panampeng lingabin. 3Padiyalem siye saguwaꞌ takitede weꞌ gaꞌ ne laꞌi bangkey si Isahin. 4Gaꞌi siye magkataꞌu-taꞌu sabab miyaꞌan. Manjari bessuwang niyaꞌ nengge si bihingde duwangan lella, semmekden makasilew manamal. 5Kadahitan teꞌed meꞌ dendehin duk pakusu siye. Saguwaꞌ paꞌin meꞌ lellahin si siye, “Weꞌey pihabi aꞌa maꞌellumin tuꞌu si pangubulande meꞌ aꞌa mateyin? 6Gaꞌ ne tuꞌu si Isa. Ubus ne iye ellum balik. Essebun bi pinaꞌinne si kaꞌamin palaꞌine pe si Jalilin. 7Paꞌinne hep weꞌ iye, Anak Manusiyaꞌin, sinōngan du pī si antanan meꞌ aꞌa dusehan duk lansangde iye diyataꞌ olom duk katellu ellewnen ellum du iye balik.” 8Manjari taꞌesseb weꞌ meꞌ dendehin meꞌ bakas binissā si Isa miyaꞌan. 9Tahalaꞌ siye amban kubulin duk hap lumaꞌ ne siye. Inaka weꞌ de kēmon inin si meꞌ tindeg si Isa sampūꞌ duk dambuwaꞌin duk si kēmon meꞌ tindeg si Isa sinduwehin. 10Meꞌ dende inin disi Mariyam, dende amban Magdalahin, si Joꞌanna, duk si Mariyam isab, saꞌi si Yakubin, duk niyaꞌ isab meꞌ dende seddili saweꞌde. Siye inin mangakahan meꞌ tindeg kawakilan si Isahin sabab takiteden. 11Saguwaꞌ meꞌ kawakilanin, gaꞌ kinahagad weꞌ de inaka meꞌ dendehin peggeꞌ paꞌinde meꞌ koto-koto hadja miyaꞌan. 12Saguwaꞌ paghulangkad si Petros magubas pī si kubul. Pagtekkane laꞌi, pakokkoꞌ iye pasīp diyalem lingabin. Luwal takitene malaꞌihin meꞌ saputin. Manjari tahalaꞌ iye hap lumaꞌ, ulaliꞌ teꞌed sabab bakas maꞌumantagin.

Si lān tudju Emmaus

(Markus 16:12-13)

13Ellew miyaꞌan du isab niyaꞌ duwangan tindeg si Isa maglengngan hap pī si kalumaꞌan inēnan Emmaus, niyaꞌ sampuk-dambuwaꞌ kilumetro talahannen amban Awrusalam. 14Magbissā-bissā siye si lān sabab meꞌ bakas maꞌumantag baꞌahu miyaꞌan. 15Sasangde magbissā-bissāhin, pī si Isa patapit duk patuhut iye si siye. 16Takitede iye saguwaꞌ gaꞌ takilalede si Isa. 17Paꞌinne si siye, “Ine pagbissā-bissābi miyaꞌan sasangbi malumengnganin?” Padeheng siye duk takite si bantuk luwe duwanganin weꞌ suse siye.

18Manjari dangan siye, ēnnen si Kelopas, nambung, paꞌinne, “Weꞌ gaꞌi kataꞌuhannu maꞌumantag si Awrusalam baꞌahu miyaꞌan, bu kēmon aꞌa laꞌi ngataꞌu?” 19“Weꞌey, ine maꞌumantagin?” paꞌin si Isa. “Maꞌumantag pu si Isahin be, aꞌa Nasaretin,” paꞌinde. “Si Isa inin nabi balakatan si matahan Tuhan duk meꞌ aꞌahin kēmon. Taga balakat iye si meꞌ bissānen duk si meꞌ hinangannen. 20Sinōngan iye weꞌ meꞌ nakuraꞌ meꞌ imam kamihin duk meꞌ nakuraꞌ lahat kamihin pī si gubnulin duk ilaboꞌan iye hukuman pinapatey, ubus bu ilansang iye weꞌ de diyataꞌ olom duk iye matey. 21Bu asal ase-ase kami teꞌed miyaꞌan, weꞌ iye ne pinapitu Tuhan mamaluwas meꞌ tubuꞌ Israꞌilin. Aweꞌ, duk dumaꞌin hadja miyaꞌan, saguwaꞌ tellum bahangi ne kuweꞌitu kemuwe pamapateyde iyehin. 22Duk niyaꞌ isab meꞌ dende saweꞌ kamihin, niyaꞌ inaka weꞌ de si kami makaꞌulaliꞌ kami teꞌed. Ensiniꞌ salung, subu-subu pe, hap pī koꞌ siye si kubul si Isa. 23Saguwaꞌ gaꞌ ne koꞌ laꞌi baran si Isahin, duk paꞌinde weꞌ niyaꞌ koꞌ takitede pabagala meꞌ malaꞌikat magpaꞌin si siye weꞌ ellum ne koꞌ si Isa. 24Manjari sinduwe meꞌ saweꞌ kamihin hap pī si kubul, duk takitede sa pinaꞌin meꞌ dendehin. Saguwaꞌ si Isa gaꞌ du isab takitede.”

25Manjari paꞌin si Isa si siye, “Babbal pahāp kaꞌam iyan. Weꞌey gaꞌi kahagadbi kēmon pinaꞌin meꞌ kanabihan dem kitabin? 26Paꞌin meꞌ kanabihanin hep weꞌ Almasihin subey dahuꞌ makalabey kabinasahan meke iye magsultan si kēmon-kēmonin.” 27Manjari pinahāti weꞌ si Isa si siye kēmon sinulat dem kitab sabab iyehin. Tinagnaꞌan weꞌ ne amban meꞌ tasulat si Musahin hap pī si meꞌ tasulat meꞌ kanabihanin kēmon.

28Pagtapit ne siye si kalumaꞌan papīhanden, si Isa magmā-mā kuweꞌ sōng patalus, 29saguwaꞌ inohotan teꞌed iye weꞌ de, paꞌinde, “Tuꞌu ne kew dahuꞌ si kami peggeꞌ iyuꞌ ne kohap teꞌed. Sōng lindem ne.” Hangkan padiyalem ne si Isa nuhut siye. 30Manjari inin, paglaꞌi siye magtingkoloꞌ sōng mangan, ngeddoꞌ si Isa pan duk magpasalamat iye si Tuhan, ubus bu kinepak-kepak weꞌ ne duk pinangurung weꞌ ne si siye. 31Bessuwang hadja takilalede ne si Isa. Saguwaꞌ magtawus iye lanyap amban bihingde. 32Manjari magbissā-bissā siye duwangan, paꞌinde, “Hangkan du hatiꞌ landuꞌ kēgten sābune mamissā si kite si lānin, pagpahātine kitab si kitehin.”

33Kuwat siye duꞌun-duꞌun duk balik siye hap Awrusalam. Pagtekkade laꞌi, takasuwaꞌde tindeg si Isa sampūꞌ duk dambuwaꞌin magtipun-tipun duk meꞌ sinduwehin. 34Paꞌinde si duwanganin, “Asal ellum ne teꞌed balik Panuhutanin duk bakas pakite iye pu si Simon.” 35Manjari magsuwi-suwi isab duwanganin sabab malumabey si siye si lānden, duk bang saꞌingge pakakilalede pu si Isahin. Paꞌinde weꞌ pangilalehande iyehin pangepak-ngepakne panin.

Pakite si Isa si meꞌ tindegnen

(Mateo 28:16-20; Markus 16:14-18; Yahiya 20:19-23; Hinangan 1:6-8)

36Sasang magsuwi-suwi pe duwanganin, bessuwang si Isa laꞌi nengge si tengngaꞌde. Duk paꞌinne si siye, “Karayaw sanyang kaꞌam.” 37Takeddut siye duk kadahitan siye peggeꞌ kannalde panyataꞌ takitede miyaꞌan. 38Saguwaꞌ paꞌinne si siye, “Weꞌey kaꞌam takeddut duk weꞌey pe kaꞌam duwe-duwehan? 39Payamanun bi meꞌ tangankun duk meꞌ bettiskun. Asal aku hep ituꞌ. Antanun bi be ku duk kataꞌuhanbi weꞌ dumaꞌin ku ituꞌ panyataꞌ. Peggeꞌ panyataꞌin gaꞌ hep niyaꞌ baranne. Saguwaꞌ aku inin takitebi du weꞌ niyaꞌ baranku.” 40Paꞌinne inin duk pinakitehan weꞌ ne si siye meꞌ tangannen duk meꞌ bettisnen. 41Saguwaꞌ kuweꞌ kahunitan siye kahagad weꞌ asal toꞌo miyaꞌan, peggeꞌ kēgan teꞌed siye duk ulaliꞌ siye. Manjari paꞌinne si siye, “Niyaꞌ ke tuꞌu kinakan ine-ine?” 42Sinōngan iye weꞌ de dambuwaꞌ kenna tinunuꞌ. 43Ineddoꞌ weꞌ ne duk kinakan weꞌ ne si matahande.

44Puwas miyaꞌan, paꞌinne si siye, “Iye ne hep inin bakas pinaꞌinku si kaꞌam matuꞌuhin, masa pagtuhut-tuhutten bi pe. Paꞌinku hep weꞌ subey du tinumanan kēmon bakas tasulat sabab akuhin, iye tasulat dem saraꞌ si Musahin duk tasulat meꞌ kanabihanin duk dem kitab Jabur. Na, meꞌ maꞌumantag si aku miyaꞌan, katumanan ne meꞌ tasulatden.” 45Manjari inurungan siye pikilan supaya tasabutde kitabin, 46duk paꞌinne si siye, “Iye inin tasulat dem kitabin, weꞌ Almasihin subey nandalan kabinasahan sampay pinapatey duk katellu ellewnen puwas kamateynen ellum balik. 47Tasulat isab laꞌi weꞌ subey minahalayak si meꞌ aꞌa amban kēmon kabangsa-bangsahan weꞌ bang pagsusunande duk lebbahande meꞌ duseden, ampun Tuhanin du siye sabab tahinang Almasihin. Duk subey nagnaꞌ minahalayak tuꞌu si Awrusalam. 48Peggeꞌ kaꞌam ne teꞌed bakas mangite meꞌ maꞌumantag si akuhin, hangkan subey kaꞌam manaksiꞌin,” paꞌin si Isa. 49“Duk papituku du si kaꞌam,” paꞌinne, “pananggup Samaku Tuhanin. Hangkan daꞌa dahuꞌ kaꞌam usaꞌ amban puweblo Awrusalam inin samantaꞌan gaꞌi pe kaꞌam paꞌasekan balakat amban Tuhanin.”

Paꞌangkat si Isa hap surgaꞌin

(Markus 16:19-20; Hinangan 1:9-11)

50Manjari binoꞌo siye weꞌ ne paluwas amban Awrusalam hap pī si antag kalumaꞌan Betani. Pagtekkade laꞌi, pinadiyataꞌ weꞌ ne meꞌ tangannen māku-mākuhan siye kahāpan amban Tuhan. 51Sasangne pe mamāku-māku si Tuhanin, tahalaꞌ ne iye amban siye duk paꞌangkat iye hap surgaꞌ. 52Pasujud siye pu si Isa laꞌi, ubus bu balik ne siye hap Awrusalam. Kēgan teꞌed siye manamal, 53duk luwal siye laꞌi dem langgal hadjehin mudji Tuhanin.

Currently Selected:

Lukas 24: yakV

Highlight

Copy