Lukas 22

Pagisun laꞌat para pu si Isahin

(Mateo 26:1-5; Markus 14:1-2; Yahiya 11:45-53)

1Tapit ne pagkādjaꞌan meꞌ Yahudihin pamangande pan gaꞌi sinagetan pasuligin. Pagkādjaꞌan miyaꞌan inēnan Kādjaꞌan Pangesseban. 2Meꞌ nakuraꞌ imamin duk meꞌ guru si saraꞌ āgamahin, pinikil-pikil weꞌ de bang saꞌingge si Isa tapapateyde duk gaꞌi kataꞌuhan meꞌ aꞌahin. Peggeꞌ talew siye si meꞌ aꞌahin.

Paꞌisun si Judas muddihan si Isa

(Mateo 26:14-16; Markus 14:10-11)

3Manjari paꞌasek nakuraꞌ seyitanin pu si Judas. Iye inin si Judas Iskariyot, dambuwaꞌ meꞌ tindeg si Isa sampūꞌ duk duwehin. 4Tahalaꞌ iye duk pī iye si meꞌ nakuraꞌ meꞌ imamin duk si meꞌ kapitan meꞌ guwaldiya si langgal hadjehin moꞌo siye magisun bang saꞌingge pamuddine si Isahin duk tasōnganne si siye. 5Sinna teꞌed siye duk nanggup siye ngurungan iye sīn. 6Magaweꞌ ne si Judas. Manjari kemuwe miyaꞌan, miha ne iye waktu hāp panōngne si Isa supaya iye tasiggewde duk gaꞌi kataꞌuhan meꞌ aꞌahin.

Magpanyap disi Isa para si pagjamu-jamuhan Pangessebanin

(Mateo 26:17-25; Markus 14:12-21; Yahiya 13:21-30)

7Manjari taꞌabut ne kādjaꞌan pamangande pan gaꞌi sinagetan pasuligin. Duk si ellew miyaꞌan subey meꞌ aꞌahin numbaliꞌ anak bili-bili kakande pangessebande masa pamaluwas Tuhan bangsaden amban kamatey laꞌi si lahat Misil awwalley. 8Dinaꞌak weꞌ si Isa si Petros duk Yahiya, paꞌinne, “Pī kaꞌam magpanyap kinakanten bi para si pagjamu-jamuhan Pangesseban inin.” 9Paꞌinde si iye, “Tuwan, antag kami kabayaꞌannu magpanyapin?” 10Paꞌinne si siye, “Pagdiyalembi si puweblo, niyaꞌ iyan aꞌa tasampangbi magboꞌo komboꞌ isihan boheꞌ. Nuhut kaꞌam iye pī si lumaꞌ padiyalemannen, 11duk paꞌinun bi si dapuꞌ lumaꞌin, ‘Dinaꞌak kew tinilew weꞌ guruhin bang antag koꞌ bilik pagjamu-jamuhanne duk meꞌ tindegnen para si Kādjaꞌan Pangessebanin.’ 12Manjari niyaꞌ iyan pakitehanne kaꞌam bilik luha laꞌi diyataꞌ lumaꞌ,” paꞌin si Isa. “Andang ne panyap bilik miyaꞌan. Laꞌi kaꞌam maghatul kinakanten bi.” 13Manjari hap pī ne siye duk takitede laꞌi sa pangaka si Isa si siyehin. Duk maghatul ne siye laꞌi kinakande para si pagjamu-jamuhan Pangessebanin.

Magjamu-jamu si Isa duk meꞌ tindegnen

(Mateo 26:26-30; Markus 14:22-26; 1 Korinto 11:23-25)

14Pagtekka ne waktu pagjamu-jamuhin, ningkoloꞌ ne si Isa duk meꞌ kawakilannen mangan. 15Manjari paꞌin si Isa si siye, “Asal iye hep teꞌed kinabayaꞌankun kapagtuhut kite bi mangan kinakan para si pagjamu-jamuhan Pangesseban inin meke ku nandal kabinasahan. 16Peggeꞌ akahante kaꞌam, puwas inin gaꞌi ne ku mangan inin balik. Meke ku mangan inin balik bang Tuhanin ne magbayaꞌ si meꞌ aꞌahin duk tuman ne bang ine asal hāti pagjamu-jamuhan inin.”

17Manjari ngeddoꞌ iye sawan duk pagubus iye magpasalamat, paꞌinne si siye, “Eddoꞌun bi inin duk inumun bi maggantiꞌ-gantiꞌ. 18Peggeꞌ akahante kaꞌam, tinagnaꞌan maꞌin, gaꞌi ne ku nginum balik boheꞌ ubas samantaꞌan gaꞌi pe Tuhanin magbayaꞌ si meꞌ aꞌahin.” 19Ubus, ngeddoꞌ iye pan duk pagubus iye magpasalamat si Tuhan, kinepak-kepak weꞌ ne bu pinangurung weꞌ ne si siye. Paꞌinne, “Pan inin barankun, paglillaꞌku sabab kaꞌam. Hinangun bi inin supaya ku luwal taꞌessebbi.” 20Damikkiyan isab ubus siye mangan, pinangurung weꞌ ne sawanin duk paꞌinne, “Ininum inin tandaꞌ janjiꞌ Tuhan si kaꞌam mabaꞌahuhin. Bugtuꞌ janjiꞌ Tuhan inin sabab buꞌus lahaꞌkun para si kaꞌam. 21Saguwaꞌ, payamanun bi,” paꞌin si Isa, “aꞌa sōng mamuddihan akuhin, saweꞌte bi du magtingkoloꞌ tuꞌu si lamisahan. 22Aku inin, Anak Manusiyaꞌin, matey du ku peggeꞌ inin pangagantaꞌ Tuhan akuhin. Saguwaꞌ makaꞌaseꞌ-aseꞌ teꞌed aꞌa mamuddihan akuhin.” 23Manjari magtilew-tilew siye bang sine enteꞌ siye magsakap mamuddihan iyehin.

Pagsuweyande bang sine subey pinalangkewin

24Na, magsuweyan meꞌ tindeg si Isahin bang sine siye subey pinalangkewin. 25Saguwaꞌ paꞌin si Isa si siye, “Tuꞌu si dunya, meꞌ sultanin magbayaꞌ teꞌed si meꞌ aꞌaden. Duk meꞌ aꞌa taga kapatutin, kabayaꞌanden pinaꞌin weꞌ siye mangurung kahāpan si lahatin. 26Saguwaꞌ kaꞌam subey gaꞌi magsa miyaꞌan. Tamanan mabangsahan si kaꞌamin subey boꞌohannen kuweꞌ iye sali-salihin. Duk nakuraꞌin subey tapikilne dinen kuweꞌ iye daraꞌakanin. 27Sine teꞌ bangsahan, maningkoloꞌ mamanganin atawa manāgad iyehin? Dumaꞌin ke maningkoloꞌ mamanganin? Saguwaꞌ aku inin tuꞌu ku si kaꞌam kuweꞌ daraꞌakan.

28“Kaꞌam ne iyan maneteg si akuhin bisan dem meꞌ kasusehanku. 29Aku inin kaꞌurungan kapatut weꞌ Samaku Tuhanin magbayaꞌ si pasōngan. Damikkiyan isab urungante kaꞌam kapatut magbayaꞌ. 30Magtuhut kite bi magkakanan laꞌi dem pagsultananku. Duk patingkoloꞌku du kaꞌam si meꞌ paningkoloꞌan bangsahan duk magbayaꞌ kaꞌam si sampūꞌ duk duwe bangsa tubuꞌ Israꞌilin.”

Pinaꞌal pamasuwey si Petrosin

(Mateo 26:31-35; Markus 14:27-31; Yahiya 13:36-38)

31Manjari paꞌin si Isa pu si Petros, “Simon, pakale kew. Bakas kaꞌam pāku nakuraꞌ seyitanin sinuleyan bang taboꞌone ke kaꞌam si kalaꞌatan. Panuleyannen kuweꞌ paley bang tinahapan duk pinagseddili buwasin duk apanen. 32Saguwaꞌ bakas kew ampunanku si Tuhan, Simon, karayaw teteg sandelnu si akuhin. Tayikutannu du ku, saguwaꞌ pagbalik ne kew si aku, pahagetun sandel meꞌ pungtinaꞌinun.” 33Paꞌin si Petros, “Tuwan, gaꞌi kew tayikutanku. Bang kew kinalabusu nuhut ku kaꞌu. Bang kew pinapatey, maglillaꞌ ku isab pinapatey basta magtuhut kite.” 34Paꞌin si Isa, “Akahante kew Petros, gaꞌi pe makatingkowak manukin sangem inin, kapamasuwey ne kew mintellu weꞌ gaꞌi ku kataꞌuhannu.”

Pitaka, bāg duk barung

35Paꞌin si Isa pe si siye, “Matuꞌuhin pangandaꞌakku kaꞌam malumengnganin, gaꞌi magboꞌo pitaka atawa bāg atawa tehompaꞌ, niyaꞌ ke kulang si kaꞌam?” “Gaꞌ,” paꞌinde. 36Manjari paꞌinne si siye, “Saguwaꞌ kuweꞌitu, bang niyaꞌ sīnbi duk semmek pagsayinanbi, boꞌohun bi si paglengngananbi. Duk manggaꞌ niyaꞌ barungnen, ambat pabellihanne jaketnen pamelline barung. 37Peggeꞌ akahante kaꞌam, subey tinumanan tasulat dem kitab sabab akuhin. Pinaꞌin hep laꞌi sabab aku, ‘Pinalamud iye si meꞌ aꞌa ngalanggalan saraꞌ.’ Sōng ne taꞌabut katumanne inin.” 38Manjari paꞌinde, “Tuwan, payamanun, niyaꞌ tuꞌu duwe barung.” “Sarang ne iyan,” paꞌinne.

Si Isa ngampun laꞌi si kūd Jaitun

(Mateo 26:36-46; Markus 14:32-42)

39Manjari paluwas si Isa amban puweblo hap pī si kūd Jaitun sa hinangannen. Patuhut meꞌ tindegnen si iye. 40Pagtekkane laꞌi si lugal papīhannen, paꞌinne si meꞌ tindegnen, “Māku-māku kaꞌam si Tuhan supaya kaꞌam gaꞌi taboꞌo weꞌ sassat.” 41Ubus patala-tala iye amban siye, talahannen niyaꞌ meꞌ limempūꞌ deppe duk laꞌi nengge iye si tuꞌutne ngampun si Tuhan. 42Paꞌinne, “O Ammaꞌ. Bang kew mabayaꞌ, daꞌa ku pasagadanun bininasa. Saguwaꞌ dumaꞌin tinuhutin kinabayaꞌankun saguwaꞌ kinabayaꞌannun.” 43Manjari niyaꞌ pabagala si iye dambuwaꞌ malaꞌikat amban surgaꞌ ngurungan iye basag. 44Peggeꞌ dukka teꞌed ateynen, ngampun teꞌed iye manamal, hangkan songotnen kuweꞌ lahaꞌ mettak-mettak si bulak. 45Ubus iye ngampun, kuwat iye duk balik iye pī si meꞌ tindegnen. Takitene siye kapatuli peggeꞌ pannahan siye hawal dukkaden. 46Paꞌinne si siye, “Weꞌey kaꞌam tuli? Kuwat kaꞌam duk māku-māku kaꞌam si Tuhan supaya kaꞌam gaꞌi taboꞌo weꞌ sassat.”

Paniggew pu si Isahin

(Mateo 26:47-56; Markus 14:43-50; Yahiya 18:3-11)

47Sasangne pe mamissāhin, banes aꞌa tekka. Panuhutanden si Judas, dangan si meꞌ sampūꞌ duk duwe tindeg si Isahin. Patapit si Judas duk inūk weꞌ ne si Isa. 48Paꞌin si Isā si iye, “Kuweꞌ inin ke, Judas, pamuddinu Anak Manusiyaꞌin?” 49Pagtahāti meꞌ tindeg si Isa mapaliput si iyehin bang ine sōng hininang meꞌ aꞌahin, paꞌinde pu si Isa, “Tuwan, guna kami ne ke barung kamihin?” 50Duk dangan siye, pineddang weꞌ ne daraꞌakan imam nakuraꞌin duk butas tayingene kanawanin. 51Saguwaꞌ paꞌin si Isa, “Sarang ne iyan.” Manjari inantan weꞌ ne tayinge daraꞌakanin duk kawuliꞌan weꞌ ne. 52Sinduwe meꞌ aꞌa mapī maniggew si Isahin, meꞌ nakuraꞌ meꞌ imamin, duk meꞌ kapitan guwaldiya si langgal hadjehin, duk meꞌ bahiꞌ meꞌ Yahudihin. Paꞌin si Isa si siye, “Weꞌ kannalbi mundu ku hangkan kaꞌam pitu niggew aku magbarung duk magboꞌo meꞌ kakakal? 53Ellew-ellew laꞌi ku si kaꞌam dem langgal hadjehin, bu gaꞌ ku siggewbi. Saguwaꞌ iye ne inin waktu pinasukuꞌ si kaꞌamin duk ku tasiggewbi, duk inin isab waktu pagbayaꞌ nakuraꞌ seyitanin.”

Masuwey si Petros weꞌ gaꞌi kataꞌuhanne si Isa

(Mateo 26:57-58, 69-75; Markus 14:53-54, 66-72; Yahiya 18:12-18, 25-27)

54Manjari siggewde si Isa duk boꞌode tahalaꞌ hap pī si lumaꞌ imam nakuraꞌin. Si Petros paturul pu si Isa saguwaꞌ patala-tala. 55Makellum meꞌ sundaluhin ebbut si tengngaꞌ lame lumaꞌ imam nakuraꞌin duk magtingkoloꞌ siye paliput. Ningkoloꞌ isab si Petros patuhut si siye. 56Manjari takite iye weꞌ dambuwaꞌ dende daraꞌakan sasangne maningkoloꞌ-ningkoloꞌ dem kasinagan ebbutin. Dinendengan iye weꞌ dendehin duk paꞌinne, “Aꞌa inin saweꞌ si Isa du isab.” 57Saguwaꞌ masuwey si Petros, paꞌinne, “Dende, gaꞌi iye kataꞌuhanku.” 58Gaꞌ du tiggel niyaꞌ dambuwaꞌ lella ngite iye duk paꞌinne, “Saweꞌde du kew isab.” Saguwaꞌ paꞌin si Petros, “Dumaꞌin, ella.” 59Paglabey niyaꞌ da ora, niyaꞌ ne isab seddili makatīk si Petros duk paꞌinne, “Kataꞌuhanku aꞌa inin asal bennal saweꞌne du isab. Peggeꞌ aꞌa Jalil du iye inin.” 60Saguwaꞌ paꞌin si Petros, “Lella, gaꞌi kataꞌuhanku bang ine pinaꞌinnu iyan.” Magtawus tingkowak manukin sasangne pe mamissāhin. 61Manjari pahaleng si Isa duk pinayaman weꞌ ne si Petros, duk taꞌesseb weꞌ si Petros bakas pinaꞌin si Isa si iyehin, “Gaꞌi pe makatingkowak manukin sangem inin, kapamasuwey ne kew mintellu weꞌ gaꞌi ku kataꞌuhannu.” 62Manjari tahalaꞌ si Petros duk magtangis teꞌed iye.

Hinang dagey si Isa duk pinapeddiꞌan

(Mateo 26:67-68; Markus 14:65)

63Hinang dagey si Isa weꞌ meꞌ aꞌa mamanteyan iyehin, duk pinapeddiꞌan weꞌ de. 64Binennesan pe weꞌ de luwenen duk sinampak weꞌ de duk tilewde iye, paꞌinde, “Untukun koꞌ, sine manampak kaꞌuhin?” 65Duk ekka pe bissāde seddili pamaꞌiyaꞌde iye.

Si Isa si harapan meꞌ kakunsihalanin

(Mateo 26:59-66; Markus 14:55-64; Yahiya 18:19-24)

66Pagsalung ne, magtipun meꞌ kabahiꞌanin duk meꞌ nakuraꞌ meꞌ imamin duk meꞌ guru si saraꞌ āgamahin. Siye meꞌ kakunsihalan mangahukumin. Binoꞌo si Isa pinaharap si siye. 67Paꞌinde pu si Isa, “Akahanun kami bang asal kaꞌu ne Almasihin.” Paꞌin si Isa si siye, “Bisan kaꞌam akahanku, gaꞌi du ku kahagadbi. 68Duk bang niyaꞌ tilewku si kaꞌam, gaꞌi du kaꞌam nambung. 69Saguwaꞌ tinagnaꞌan kuweꞌitu aku, Anak Manusiyaꞌin, laꞌi du ku ningkoloꞌ si kanawanan Tuhan Mabalakatanin.” 70Paꞌinde kēmon, “Bang sa īꞌ, Anak Tuhanin kew?” Nambung si Isa, paꞌinne, “Sa pinaꞌinbin, aku ne.” 71Manjari paꞌinde, “Weꞌey pe kite bi subey miha saksiꞌ seddili? Bu kite bi ne du makakale binissānen.”

Currently Selected:

Lukas 22: yakV

Highlight

Copy