Lukas 21

Sīn pangurung dende baluhin

(Markus 12:41-44)

1Manjari mayam si Isa duk takitene meꞌ aꞌa dayahanin ngalaboꞌ meꞌ sīn pangurungde si Tuhanin pī dem pangisi-ngisihan sīn laꞌi dem langgal hadjehin. 2Niyaꞌ isab takitene dambuwaꞌ dende balu miskin ngalaboꞌ duwe sīn peyat. 3Paꞌin si Isa, “Sabennal akahante kaꞌam, dende balu mamiskin inin, labi pe sīn talaboꞌnen amban kēmon siye. 4Peggeꞌ siye kēmon,” paꞌin si Isa, “ngurung siye amban alataꞌde maglabi-labihin. Saguwaꞌ dende inin, bisan iye miskin, pinangurung weꞌ ne kēmon sīnnen, bisān diddaꞌ panabangne sukalnen.”

Pinaꞌal weꞌ si Isa pamagkaꞌat langgal hadjehin

(Mateo 24:1-2; Markus 13:1-2)

5Niyaꞌ meꞌ tindegne sinduwehin magbissā-bissā sabab langgal hadje miyaꞌan. Paꞌinde weꞌ makasinna-sinna koꞌ meꞌ batu ginuna pangahinang langgal miyaꞌan duk makasinna-sinna isab koꞌ meꞌ bayuꞌan alat-alatne pinangurung weꞌ meꞌ aꞌahin. Pagkale si Isa pinaꞌinde miyaꞌan, paꞌinne, 6“Kēmon takitebi inin, si pasōngan pinagkaꞌat du. Niyaꞌ ellew, gaꞌ du iyan niyaꞌ talebbi tuꞌu meꞌ batu magbangkat-bangkat iyan, saguwaꞌ kēmon kinanat-kanat du.”

Meꞌ kasasewan duk kabinasahan

(Mateo 24:3-14; Markus 13:3-13)

7Manjari tinilew si Isa weꞌ de, paꞌinde, “Tuwan, sumiyan umantag meꞌ pinaꞌinnu iyan? Duk ine tandaꞌ mapaguwaꞌin bang sōng ne umantag meꞌ kēmon miyaꞌan?” 8Nambung iye, paꞌinne, “Pahatul-hatul kaꞌam duk kaꞌam gaꞌi kaꞌakkalan. Peggeꞌ ekka iyan pitu magēnan ēnkun duk magpaꞌin weꞌ siye ne Almasihin. Duk paꞌinde isab iyan, ‘Kiyamat ne.’ Saguwaꞌ daꞌa kaꞌam nuhut siye. 9Duk bang kaꞌam makakale sabab magbonoꞌ duk sabab meꞌ sasew, daꞌa kaꞌam tinalew. Kēmon inin subey umantag dahuꞌ, saguwaꞌ dumaꞌin pe inin ellew kiyamat.”

10Manjari paꞌinne si siye, “Dambuwaꞌ bangsa magbonoꞌ duk bangsa seddili, duk dambuwaꞌ pagsultanan magbonoꞌ duk pagsultanan seddili. 11Duk tekka iyan meꞌ linug mabasagin duk meꞌ unusin duk meꞌ saki malaꞌatin si meꞌ kalahat-lahatan tuꞌu si dunya. Niyaꞌ isab iyan takite meꞌ aꞌahin meꞌ tandaꞌ diyataꞌ langit makaꞌulaliꞌ duk makatalew-talew. 12Saguwaꞌ meke inin umantag kemōn, siggewde kaꞌam duk binasade kaꞌam. Boꞌode kaꞌam pī si meꞌ langgalde hinukum duk kalabusude kaꞌam. Binoꞌo du isab kaꞌam iyan si harapan meꞌ sultan duk meꞌ gubnul duk hukumde kaꞌam peggeꞌ nuhut kaꞌam aku. 13Bang laꞌi ne kaꞌam si harapande, taꞌakabi ne si siye aka-aka mahāp sabab akuhin. 14Kimmatanun bi teꞌed dem ateybi weꞌ gaꞌi pikilbi andang bang ine panambungbin bang kaꞌam binistiga. 15Peggeꞌ urunganku du kaꞌam kataꞌu duk kaꞌam taꞌu nambungan siye. Duk gaꞌ iyan niyaꞌ meꞌ kuntarabin makasaggaꞌ binissābin atawa makajawab kaꞌam. 16Bisan meꞌ matettoꞌabin, meꞌ pungtinaꞌibin, meꞌ baꞌanbin, duk meꞌ bagaybin, sōngande du kaꞌam iyan si kuntarabin. Duk niyaꞌ kaꞌam papateyde du. 17Duk kaꞌam, meꞌ tindegkun,” paꞌin si Isa, “kabunsihan du kaꞌam weꞌ kēmon aꞌa peggeꞌ nuhut kaꞌam aku. 18Saguwaꞌ gaꞌ du iyan niyaꞌ lepas bisan da lamba kōkbin. 19Bang gaꞌi usaꞌ sandelbin taga umul du kaꞌam si surgaꞌ gaꞌ niyaꞌ tamananne.”

Pinaꞌal weꞌ si Isa pamagkaꞌat puweblo Awrusalamin

(Mateo 24:15-21; Markus 13:14-19)

20“Bang takitebi ne puweblo Awrusalamin liput weꞌ meꞌ sundalu, na, kataꞌuhanbi weꞌ sōng tekka ne balaꞌnen. 21Manjari meꞌ aꞌa malaꞌi si Yahudiyahin subey ne lahi pī si meꞌ kapunuhan. Meꞌ malaꞌi diyalem puweblo Awrusalamin subey ne paluwas magdayiꞌ-dayiꞌ, duk meꞌ andang malaꞌi si luwasanin subey ne gaꞌi padiyalem pī dem puweblo. 22Peggeꞌ miyaꞌan ne meꞌ ellew pangalegga Tuhan meꞌ aꞌahin, duk tinumanan ne kēmon tasulat dem kitabin. 23Andūꞌ, makaꞌaseꞌ-aseꞌ teꞌed meꞌ mabettengin duk meꞌ maganak dikiꞌin laꞌi si meꞌ ellew īꞌ. Peggeꞌ niyaꞌ iyan kasigpitan hadje tekka tuꞌu si lahat inin duk meꞌ aꞌanen tewwaꞌ mulkaꞌ Tuhanin. 24Niyaꞌ siye matey binonoꞌ weꞌ meꞌ sundaluhin, duk sinduwehin siniggew duk binoꞌo hinang pilisu si kēmon kalahatan si dunya. Duk puweblo Awrusalam inin pinagkaꞌat du weꞌ meꞌ kabangsahan seddili, duk gaꞌi siye usaꞌ bittuꞌu samantaꞌan gaꞌi pe jukup gantaꞌan pagbayaꞌ meꞌ bangsa seddilihin.”

Papitu Anak Manusiyaꞌin

(Mateo 24:29-31; Markus 13:24-27)

25“Duk niyaꞌ iyan meꞌ tandaꞌ takite si mata ellewin duk si bulanin duk si meꞌ poteꞌanin. Duk tuꞌu si dunya kaꞌumagadan iyan meꞌ kabangsa-bangsahanin duk gaꞌi siye magkataꞌu-taꞌu sabab begeddu tahikin duk meꞌ goyak mahadjehin. 26Duk meꞌ aꞌahin agen matey hawal talewden duk hawal pagsusede sabab meꞌ balaꞌ inase-asede sōng matekka si dunyahin. Peggeꞌ meꞌ bayuꞌan diyataꞌ langitin tahalaꞌ amban lugalden. 27Manjari pagubus inin,” paꞌin si Isa, “kitede du ku, Anak Manusiyaꞌin, pitu dem inalak. Takite meꞌ aꞌahin du sahayakun duk balakatku mahadjehin. 28Na, bang nagnaꞌ ne umantag meꞌ pinaꞌinku inin, nengge kaꞌam duk patongas, peggeꞌ gaꞌi ne tiggel tinimbul ne teꞌed kaꞌam.”

Pamintangan si poꞌon kayuhin

(Mateo 24:32-35; Markus 13:28-31)

29Ubus magdalilan si Isa si siye, paꞌinne, “Pandogahanun bi kayu igirahin duk meꞌ kayu sinduwehin. 30Bang takitebi numbuꞌ meꞌ dawennen, kataꞌuhanbi weꞌ sōng baytu panas ne. 31Damikkiyan isab bang takitebi ne meꞌ pinaꞌinku ensiniꞌ miyaꞌan umantag, na, kataꞌuhanbi weꞌ tapit ne pagbayaꞌ Tuhan tuꞌu si dunyahin. 32Sabennal akahante kaꞌam,” paꞌin si Isa, “gaꞌi pe ubus matey kēmon aꞌa kuweꞌitu inin, tekka ne meꞌ bakas pinaꞌinku inin. 33Palabey hadja langitin duk dunyahin, saguwaꞌ bang bissākun asal gaꞌi usaꞌ.”

Subey papateng-pateng

34“Subey kaꞌam papateng-pateng,” paꞌin si Isa. “Kaw iye luwal tapikilbin magadjak-adjak duk maginuman duk magsuse sabab kaꞌellumanbin. Bu bessuwang tekka ellew pabalikkun, manjari tasaꞌut kaꞌam si kadupangan. 35Peggeꞌ asal bessuwang tekka ellew miyaꞌan, kuweꞌ dalil tagen tabekkas, duk tewwaꞌ kēmon aꞌa si babew dunya inin. 36Papateng-pateng kaꞌam teꞌed. Subey kaꞌam luwal ngampun weꞌ karayaw pabasag Tuhanin ateybin supaya tasandalbi du kēmon miyaꞌan. Ngampun kaꞌam karayaw gaꞌ niyaꞌ kaꞌiyaꞌanbi bang kaꞌam nengge si harapanku, Anak Manusiyaꞌin.”

37Kahabaꞌ ellew magtoloꞌ si Isa dem langgal mahadjehin, saguwaꞌ bang sangem, paluwas iye amban puweblo miyaꞌan duk laꞌi iye patennaꞌ si antag kūd Jaitun. 38Duk salung-salung pe, pī ne kēmon aꞌahin si langgal hadje pakale si usihatnen.

Currently Selected:

Lukas 21: yakV

Highlight

Copy