Lukas 20

Tinilew weꞌ de si Isa bang amban kapatutnen

(Mateo 21:23-27; Markus 11:27-33)

1Dambuwaꞌ ellew laꞌi si Isa magtoloꞌ si meꞌ aꞌahin dem langgal hadjehin duk magmahalayak isab aka-aka mahāpin si siye. Manjari patapit pī si iye meꞌ nakuraꞌ imamin duk meꞌ guru si saraꞌ āgamahin duk meꞌ kabahiꞌanin. 2Paꞌinde si iye, “Ine kapatutnu ngahinang meꞌ hininangnu ellew miyaꞌan? Sine mangurungan kaꞌu kapatutin?” 3Sambungan si Isa siye, paꞌinne, “Niyaꞌ isab tilewku si kaꞌam. Akahanun bi ku, 4pamandi Yahiya meꞌ aꞌahin, amban Tuhan ke atawa amban manusiyaꞌ hadja?” 5Manjari magisun-isun siye. Paꞌinde, “Bang saꞌupama paꞌinte bi weꞌ kapatut Yahiya pamandine meꞌ aꞌahin amban Tuhan, paꞌinne iyan, ‘Na, weꞌey Yahiya gaꞌ kahagadbi?’ 6Saguwaꞌ bang paꞌinte bi, ‘Amban manusiyaꞌ,’ na, pagtibagan kite bi iyan weꞌ meꞌ aꞌahin kēmon, peggeꞌ kahagad siye weꞌ Yahiya asal nabi Tuhanin.” 7Hangkan nambung siye, “Gaꞌi kataꞌuhan kami bang amban kapatut Yahiyahin.” 8Manjari paꞌin si Isa si siye, “Na, gaꞌi isab kaꞌam akahanku bang amban kapatutku maghinang meꞌ hininangku miyaꞌan.”

Dalilan sabab likus ubasin duk meꞌ tatungguꞌnen

(Mateo 21:33-46; Markus 12:1-12)

9Manjari inakahan weꞌ si Isa meꞌ aꞌahin dalilan inin. “Niyaꞌ,” paꞌinne, “aꞌa maglikus bāhan ubas duk pinatungguꞌ weꞌ ne si meꞌ aꞌa, pagbahagiꞌan uli tinanemnen. Ubus bu tahalaꞌ iye pī si lahat tala duk tiggel iye laꞌi. 10Pagtaꞌabut pagbuwaꞌ ubasin, dinaꞌak weꞌ dapuꞌ likusin dambuwaꞌ daraꞌakanne pī si meꞌ aꞌa tatungguꞌnen māku bahagiꞌne si meꞌ buwaꞌ ubasin. Saguwaꞌ pinapeddiꞌan daraꞌakanin weꞌ de duk pinapoleꞌ iye gaꞌ niyaꞌ taboꞌone. 11Ubus ngandaꞌak ne isab dapuꞌ likusin seddili daraꞌakanne pī si siye. Pinapeddiꞌan du isab weꞌ de duk pinaꞌiyaꞌ duk pinapoleꞌ gaꞌ niyaꞌ taboꞌone. 12Ubus ngandaꞌak ne isab iye daraꞌakanne pī kamintellunen. Inin bakat-bakat du isab weꞌ de, ubus bu sinōgadan weꞌ de pī si bukut birang likusin. 13Manjari paꞌin dapuꞌ likusin, ‘Ine enteꞌ hinangku? Gam pe daꞌakku pī anakku kinalasahanku teꞌedin. Bugtuꞌ pagaddatande iye.’ 14Saguwaꞌ pagkite meꞌ tatungguꞌ likusin anakne miyaꞌan, magisun siye, paꞌinde, ‘Iye hep inin pinusakaꞌanin. Dayiꞌ kaꞌam, papateyte bi duk likus inin tepe si kite bi.’ 15Manjari siniggew iye weꞌ de duk sinōgadan pī si bukut birang likusin duk pinapatey weꞌ de. Na,” paꞌin si Isa, “ine enteꞌ hinang dapuꞌ likus miyaꞌan si siye? 16Hap pī iye duk papateyne meꞌ tatungguꞌ miyaꞌan duk patungguꞌanne likusnen si seddili.” Pagkale meꞌ aꞌahin inin, paꞌinde, “Karayaw patala Tuhanin!” 17Saguwaꞌ pinayaman siye weꞌ si Isa duk paꞌinne, “Na, ine paꞌinbi hāti ayat inin, tasulat dem kitab, pinaꞌin,

‘Batu tinayikutan weꞌ meꞌ pandey maghinang lumaꞌ batuhin, peggeꞌ kannalde gaꞌi taguna, kuweꞌitu iye ne miyaꞌan batu tamanan maniyaꞌ kagunahannen.’ ”

18Paꞌin si Isa pe, “Kēmon malaboꞌ diyataꞌ batu inin posak-posak barannen. Duk sasuku kalaboꞌan batu inin, pipis iye.”

Bang magbayed sukey ke si Sultan Nakuraꞌin atawa gaꞌi

(Mateo 22:15-22; Markus 12:13-17)

19Meꞌ guru si saraꞌ āgamahin duk meꞌ nakuraꞌ imamin, batang ne siggewde si Isa duꞌun-duꞌun, peggeꞌ tahātide weꞌ siye inandigne si dalilan sabab likus miyaꞌan. Saguwaꞌ gaꞌ iye siggewde peggeꞌ talew siye si meꞌ aꞌa maꞌekkahin. 20Hangkan miha-miha siye lān supaya iye tasōngande pī si antanan gubnulin. Nangdan siye meꞌ aꞌa dinaꞌak pī pakale pu si Isa, magmā-mā weꞌ siye meꞌ aꞌa asal nuhut saraꞌ, supaya iye takuhide si meꞌ bissānen. 21Manjari paꞌin meꞌ aꞌa tinangdanan miyaꞌan pu si Isa, “Tuwan, kataꞌuhan kami weꞌ patut meꞌ binissānun duk pamanoloꞌnun. Gaꞌi pagbiddaꞌnu aꞌahin duk bennal meꞌ panoloꞌnu sabab kahandak Tuhanin. 22Ine paꞌinnu. Patuhut ke si saraꞌte bi bang kite bi magbayed sukey si Sultan Nakuraꞌ bangsa Romahin atawa gaꞌi.” 23Saguwaꞌ kataꞌuhan si Isa pangakkalden. Paꞌinne si siye, 24“Pakitehanun bi ku sīn tuwas.” Paglaꞌi ne sīnin, paꞌinne, “Pattaꞌ sine teꞌ duk sulat sine si sīn inin?” Paꞌinde, “Pattaꞌ Sultan Nakuraꞌin duk sulatnen.” 25“Na,” paꞌin si Isa, “pangurungun bi si Sultan Nakuraꞌin sukuꞌ si iyehin, duk pangurungun bi si Tuhan sukuꞌ si Tuhanin. (Hātinen, magbayed kaꞌam sukey duk pangurungun bi dibin dambūs-būs si Tuhan.)” 26Gaꞌ iye takuhide si meꞌ binissāne si harapan meꞌ aꞌahin. Saguwaꞌ ulaliꞌ teꞌed siye si sambungnen, hangkan gaꞌ ne niyaꞌ bissāde.

Panilew sabab pagellum balik meꞌ pateyin

(Mateo 22:23-33; Markus 12:18-27)

27Puwas miyaꞌan, niyaꞌ pī pu si Isa meꞌ Sadduseo. Siye inin gaꞌi kahagad weꞌ ellum balik meꞌ pateyin si ellew dambuli. 28Paꞌinde pu si Isa, “Tuwan, niyaꞌ saraꞌ pangurung si Musa kite bi, paꞌinne, ‘Bang niyaꞌ lella bu matey iye gaꞌ niyaꞌ anakne, subey ne maganda salinen si balu miyaꞌan duk niyaꞌ tubuꞌ sakanen.’ 29Na manjari, niyaꞌ miyaꞌan pituꞌ lella magpungtinaꞌi. Sakahin maganda, manjari matey iye gaꞌ anakde. 30Ubus mapasunuꞌin maganda si baluhin, duk matey iye gaꞌ du isab niyaꞌ anakde. 31Ubus bu katelluhin pagantiꞌ nganda baluhin, sampay kēmon siye kapituꞌ magpungtinaꞌihin maggantiꞌ nganda baluhin, duk matey siye gaꞌ niyaꞌ anak ambanande. 32Si kakapusannen matey isab dendehin. 33Na, Tuwan,” paꞌinde, “si ellew pagellum balik meꞌ pateyin, anda sine iye? Bu pituꞌ magpungtinaꞌihin makaꞌanda iye.”

34Nambung si Isa, paꞌinne, “Meꞌ aꞌa si dunya inin maganda duk magella. 35Saguwaꞌ meꞌ aꞌa kinimmatan weꞌ Tuhan mapataꞌ pinakellum balik amban meꞌ pateyin duk maglahat laꞌi si surgaꞌin, gaꞌi ne siye maganda atawa magella. 36Peggeꞌ gaꞌi ne siye matey saguwaꞌ kuweꞌ ne siye meꞌ malaꞌikatin. Meꞌ anak Tuhanin ne siye peggeꞌ bakas pinakellum ne siye balik amban kamateyden. 37Na, pasal meꞌ aꞌa mamateyin weꞌ pinakellum balik, pinapastiꞌ inin weꞌ si Musa dem kitab. Sinulat hep weꞌ ne laꞌi sabab poꞌon puhung makayatin. Pangēnne Tuhanin laꞌi, ‘Tuhan pagtuhanan disi Ibrahim duk si Isahak duk si Yakubin.’ 38Tuhanin Tuhan meꞌ maꞌellumin dumaꞌin Tuhan meꞌ mamateyin. (Hātinen bisan disi Ibrahim duk Isahak duk si Yakub tiggel ne matey, ellum siye laꞌi si surgaꞌ peggeꞌ inisbat pe weꞌ de Tuhanin.) Bang si bistahan Tuhan, ellum kēmon aꞌahin.” 39Paꞌin sinduwe meꞌ guru si saraꞌ āgamahin pu si Isa, “Tuwan, hāp sambungnu miyaꞌan.” 40Gaꞌ ne siye makatawakkal nilew iye namba.

Panilew sabab Almasihin

(Mateo 22:41-46; Markus 12:35-37)

41Manjari paꞌin si Isa si siye, “Weꞌey meꞌ aꞌahin magpaꞌin weꞌ Almasihin tubuꞌ Sultan Daꞌud koꞌ. 42Peggeꞌ si Daꞌud ne teꞌed magpaꞌinin dem kitab Jabur, paꞌinne,

‘Missā Tuhanin si Panuhutankun.

Paꞌin Tuhanin:

Dayiꞌ kew, ningkoloꞌ kew tuꞌu si kanawananku, tuꞌu si paningkoloꞌan mabangsahanin.

43Bettadku du meꞌ bantanun diyawaꞌ pat bettisnu.’

44Na,” paꞌin si Isa, “bang Almasihin inēnan Panuhutan weꞌ si Daꞌud, saꞌingge kajarinen weꞌ tubuꞌ Sultan Daꞌud iye?”

Paghalliꞌanun bi meꞌ guru si saraꞌ āgamahin

(Mateo 23:1-36; Markus 12:38-40)

45Duk sasang meꞌ aꞌahin kēmon pakale, paꞌin si Isa si meꞌ tindegnen, 46“Paghalliꞌ-halliꞌanun bi meꞌ guru si saraꞌ āgamahin. Sinna siye lumengngan magsemmek tahaꞌ duk sinna siye sinalam si meꞌ tabuꞌan. Bang dem langgal, mabayaꞌ siye ningkoloꞌ si meꞌ paningkoloꞌan para si meꞌ aꞌa pinagaddatanin. Damikkiyan bang siye si meꞌ pagjamu-jamuhan, kabayaꞌanden ningkoloꞌ si meꞌ paningkoloꞌan mabangsahanin. 47Sinigpitan weꞌ de meꞌ dende baluhin supaya taꞌeddoꞌde meꞌ lumaꞌden, duk panapukde hinangande malaꞌat inin, magsambahayang siye patahaꞌ, magmā-mā weꞌ aꞌa hāp siye. Bugtuꞌ hukuman hadje tasangkaden si ahilat.”

Currently Selected:

Lukas 20: yakV

Highlight

Copy