Lukas 18

Dalilan sabab dende baluhin duk hukumin

1Manjari inakahan weꞌ si Isa meꞌ tindegnen dambuwaꞌ dalilan pamintangande supaya siye luwal ngampun si Tuhan duk gaꞌi jumuꞌ. 2Paꞌinne, “Si dambuwaꞌ lahat niyaꞌ hukum gaꞌi tinalew si Tuhan duk gaꞌi magaddat si pagkasine manusiyaꞌ. 3Niyaꞌ isab si lahat miyaꞌan dende balu taga palkalaꞌ. Dende inin luwal pī si hukum miyaꞌan māku tabang si iye duk pabuyuꞌ-buyuꞌ duk tapakitene kabennalannen. Paꞌinne, ‘Tabanganun be ku duk gaꞌi ngandaꞌag kuntarakun.’ 4Tagnaꞌ gaꞌi ngatu hukum miyaꞌan nabangan dendehin saguwaꞌ pagtiggel-tiggel ne, paꞌinne si dine, ‘Aku inin gaꞌi talew si Tuhan duk gaꞌi magaddat si manusiyaꞌ, 5saguwaꞌ peggeꞌ tiyaꞌ makasasew aku balu inin, tabanganku iye. Jumuꞌ ne ku luwal papituhanne.’ ”

6Manjari paꞌin si Isa, “Na, pakalehun bi pinaꞌin hukum manggaꞌi mabentel miyaꞌan. Tinabangan du weꞌ ne dendehin. 7Na, gaꞌi ke isab tabangan Tuhanin meꞌ aꞌa tapeneꞌnen, mamāku-māku si iye ellew-sangemin? Magdayan-dayan pe ke iye nabangan siye? 8Akahante kaꞌam,” paꞌin si Isa, “asal palakkes Tuhanin nabangan siye. Saguwaꞌ si pasōngan bang aku, Anak Manusiyaꞌin, balik pitu si dunya, ngasuwaꞌ enteꞌ ku meꞌ aꞌa sandel si aku?”

Dalilan sabab Pariseohin duk aꞌa magpāku-pāku sukeyin

9Niyaꞌ isab dalilan inaka weꞌ si Isa si meꞌ aꞌa pangimmatde si diden weꞌ bentel siye duk diniyawaꞌan weꞌ de meꞌ aꞌa sinduwehin. 10Paꞌinne, “Niyaꞌ duwangan aꞌa pataked pī si langgal hadje ngampun. Dambuwaꞌin Pariseo duk dambuwaꞌin aꞌa magpāku-pāku sukey. 11Paglaꞌi ne siye dem langgal, nengge Pariseohin duk ngampun iye diyalem ateyne. Paꞌinne, ‘O Tuhan, magpasalamat ku si kaꞌu weꞌ dumaꞌin ku kuweꞌ meꞌ aꞌa sinduwehin napsuhan duk ngaliba duk magjina. Duk magpasalamat ku isab weꞌ dumaꞌin ku kuweꞌ aꞌa magpāku-pāku sukey miyaꞌan. 12Kahabaꞌ simana minduwe ku magpuwase duk jakatanku kēmon usahakun.’ 13Saguwaꞌ aꞌa magpāku-pāku sukeyin, nengge patala-tala duk gaꞌi bisan mayam padiyataꞌ saguwaꞌ patondok hadja iye. Tineppak-teppak weꞌ ne dākannen hawal susenen duk paꞌinne, ‘O Tuhan, maꞌaseꞌ kew si aku, dusehan ku.’ 14Akahante kaꞌam,” paꞌin si Isa, “weꞌ aꞌa inin hap lumaꞌ kinimmatan ne bentel weꞌ Tuhanin duk dumaꞌin Pariseohin mabentelin. Peggeꞌ sine-sine mahadje dine, pinadiyawaꞌ du, duk sine-sine madiyawaꞌ dine, pinahadje du.”

Si Isa malasa si meꞌ mākanak dikiꞌ

(Mateo 19:13-15; Markus 10:13-16)

15Na, niyaꞌ meꞌ aꞌa moꞌo meꞌ anakde dikiꞌ pī pu si Isa supaya siye antananne. Pagkite inin weꞌ meꞌ tindegnen, pinagamāhan siye weꞌ de. 16Saguwaꞌ ilinganan weꞌ si Isa meꞌ mākanakin duk paꞌinne si meꞌ tindegnen, “Ambat pitu si aku meꞌ mākanakin duk daꞌa siye saggaꞌun bi. Peggeꞌ aꞌa kuweꞌ meꞌ mākanakin ngatu du pinagbayaꞌan weꞌ Tuhanin. 17Sabennal akahante kaꞌam,” paꞌin si Isa, “bang pangandel aꞌa si Tuhanin dumaꞌin kuweꞌ pangandel mākanakin, na, aꞌa iyan asal gaꞌi sumakup dem pagbayaꞌan Tuhanin.”

Aꞌa dayahanin

(Mateo 19:16-30; Markus 10:17-31)

18Dambuwaꞌ ellew niyaꞌ Yahudi bangsahan pī pu si Isa nilew iye, paꞌinne, “Tuwan, aꞌa hāp kew. Ine subey hinangku duk ku pinasukuꞌan umul salama-lama?” 19Sambungan si Isa iye, paꞌinne, “Weꞌey paꞌinnu weꞌ hāp ku? Gaꞌ niyaꞌ hāp luwal Tuhan dambuwaꞌ-buwaꞌ. 20Kataꞌuhannu du meꞌ pangandaꞌakan Tuhanin: Daꞌa kew magjina. Daꞌa kew monoꞌ. Daꞌa kew nangkew. Daꞌa kew naksiꞌ gaꞌi bennal. Pagaddatanun saꞌi-samanun.” 21Paꞌin lellahin si iye, “Kēmon iyan, Tuwan, tinuhut weꞌ ku kemuwe nakanak pe ku.” 22Pagkale si Isa inin, paꞌinne si iye, “Niyaꞌ pe dambuwaꞌ gaꞌ tahinangnu. Pī kew, pabellihanun kēmon alataꞌnun bu pangurungun ulinen si meꞌ mamiskinin. Manjari niyaꞌ du iyan alataꞌnu laꞌi si surgaꞌ. Pagubus, balik kew pitu bu nuhut kew aku.” 23Pagkalene bissā si Isa miyaꞌan, suse teꞌed iye peggeꞌ dayahan iye manamal. 24Takite si Isa weꞌ suse aꞌahin, duk paꞌinne, “Asal hunit teꞌed meꞌ madayahanin ngatu pinagbayaꞌan weꞌ Tuhan. 25Mura pe untaꞌin palabey si lowang dalum amban aꞌa dayahanin ngatu pinagbayaꞌan weꞌ Tuhan.” 26Pagkale meꞌ aꞌahin pinaꞌin si Isa miyaꞌan, paꞌinde, “Na, sine ne tapī si surgaꞌin bang kuweꞌ iyan?” 27Saguwaꞌ paꞌin si Isa, “Meꞌ manggaꞌi tahinang manusiyaꞌin, tahinang du weꞌ Tuhanin.”

28Manjari missā si Petros. “Payamanun kami inin,” paꞌinne, “ubus ne ambanan kami meꞌ lumaꞌ kamihin duk nuhut ne kami kaꞌu.” 29“Aweꞌ,” paꞌin si Isa si siye, “sabennal akahante kaꞌam, bang niyaꞌ aꞌa ngambanan lumaꞌnen, andanen, meꞌ pungtinaꞌinen, saꞌi-samanen atawa meꞌ anaknen basta sumakup iye dem pagbayaꞌan Tuhanin, 30asal tumbasan Tuhanin iye tiggelanne tuꞌu si dunya labi pe teꞌed amban inambanannen, duk inurungan du iye umul gaꞌ tamananne laꞌi si ahilat.”

Kamintellune pinaꞌal weꞌ si Isa sabab kamateynen

(Mateo 20:17-19; Markus 10:32-34)

31Manjari binoꞌo weꞌ si Isa tindegne sampūꞌ duk duwehin patala-tala duk paꞌinne si siye, “Pakale kaꞌam, kite bi inin pataked hap Awrusalam. Paglaꞌi ne kite bi, tinumanan du kēmon bakas tasulat meꞌ kanabihan sabab aku, Anak Manusiyaꞌin. 32Sinōngan du ku pī si antanan meꞌ aꞌa dumaꞌin Yahudi, duk hinangde du ku dagey duk paꞌiyaꞌde ku duk pagluraꞌande. 33Lubakande ku ubus bu papateyde ku. Saguwaꞌ puwas tellum bahangi, ellum du ku balik.” 34Saguwaꞌ gaꞌ tahāti meꞌ tindegnen binissāne miyaꞌan. Gaꞌ pastiꞌ si siye duk gaꞌ kataꞌuhande bang ine hāti pinaꞌinnen.

Kawuliꞌan weꞌ si Isa aꞌa pessekin

(Mateo 20:29-34; Markus 10:46-52)

35Sakaliꞌ ne siye tapit si puweblo Ariha, niyaꞌ laꞌi ningkoloꞌ si higad lān palabeyanden aꞌa pessek magpāku-pāku sīn. 36Pagkale aꞌa mapessekin meꞌ aꞌa maꞌekka mapalabeyin, tilewne bang weꞌey miyaꞌan. 37Inakahan iye, paꞌinde, “Si Isa, aꞌa amban Nasaretin mapalabeyin.” 38Pagkalene inin magtawus iye ngalingan papales, paꞌinne, “O Isa, tubuꞌ Sultan Daꞌud, maꞌaseꞌ ne kew si aku.” 39Inamāhan iye weꞌ meꞌ aꞌa si dehelluhanin, gaꞌi iye dinaꞌak magbukag. Saguwaꞌ namba ne papalesne paglingannen. “O tubuꞌ Sultan Daꞌud,” paꞌinne, “maꞌaseꞌ ne kew si aku.” 40Manjari padeheng si Isa duk daꞌakne aꞌahin binoꞌo pī si iye. Pagtapit ne aꞌahin, tilew si Isa iye, paꞌinne, 41“Ine kabayaꞌannu hininangku si kaꞌuhin?” “Tuwan,” paꞌinne, “kabayaꞌankun makakite ne ku.” 42Paꞌin si Isa si iye, “Makakite ne kew. Kawuliꞌan kew peggeꞌ sandel kew si aku.” 43Magtawus iye makakite duk nuhut ne iye si Isa lumengngan. Pinudji ne paꞌin weꞌ ne Tuhanin. Duk meꞌ aꞌa mangite miyaꞌan, pinudji isab weꞌ de Tuhanin.

Currently Selected:

Lukas 18: yakV

Highlight

Copy