Lukas 17

Magduse

(Mateo 18:6-7, 21-22; Markus 9:42)

1Manjari paꞌin si Isa si meꞌ tindegnen, “Bugtuꞌ niyaꞌ teꞌed meꞌ sassat tekka si manusiyaꞌ makapaduse siye. Saguwaꞌ kaꞌaseꞌ-aseꞌ aꞌa manassat saweꞌnen duk iye makaduse, peggeꞌ asal legga Tuhanin teꞌed iye. 2Hāp pe siꞌ iye miyaꞌan tapatowengan dahuꞌ batu hadje si kellongne bu ilaboꞌ iye pī dem tahik duk hadja gaꞌi tasassatne magduse dangan meꞌ madiyawaꞌ ateynen duk masandel si akuhin. 3Hangkan pahatul-hatul kaꞌam. Bang saweꞌnun kapagduse si kaꞌu, boꞌohun magbissā duk toloꞌanun. Bang pagsusunanne dusenen duk lebbahanne dusenen ampunun iye. 4Bang dem da ellewin kapagduse iye mimpituꞌ si kaꞌu duk mimpituꞌ isab iye piyu si kaꞌu māku ampun, subey iye ampunnu.”

Sandel

5Manjari paꞌin meꞌ tindeg si Isa bakas kawakilannen si iye, Panuhutanden, “Tuwan, pabasagun sandel kami si Tuhanin.” 6Nambung Panuhutanden, paꞌinne, “Bang sandel kaꞌam si Tuhan bisan hadja kuweꞌahat, dalilnen kuweꞌ hadja hadjehan bigi mustasa, makajari paꞌinbi si poꞌon kayu mahadje miyaꞌan, ‘Pabeddut kew duk palinda kew pī dem tahik,’ ubus bu tuhutne du pinaꞌinbin.”

Sukuꞌ hininang daraꞌakanin

7Paꞌin si Isa pe, “Bang saꞌupama dangan kaꞌam taga daraꞌakan duk hinangnen magbadjaꞌ si tanaꞌ atawa magipat hayepbi. Bang tekka iye amban paghinangannen, paꞌinbi ke si iye, ‘Na, mangan ne kew?’ 8Asal gaꞌi. Saguwaꞌ iye paꞌinbi si iye, ‘Magsayin ne kew bu panyapun kinakankun duk ku makaꞌakan. Bang ku ubus, meke ne kew mangan.’ 9Magsampūꞌ-sāmat pe ke kaꞌam si daraꞌakanbin peggeꞌ hinangne pangandaꞌakanbin? Gaꞌi du. 10Damikkiyan kaꞌam isab, bang tahinangbi ne kēmon pangandaꞌakan si kaꞌamin, paꞌinun bi, ‘Kite bi inin meꞌ daraꞌakan gaꞌi pataꞌ sinanglitan, peggeꞌ iye du hadja tahinangten, sukuꞌ hininangten.’ ”

Sampūꞌ aꞌa inipul kawuliꞌan weꞌ si Isa

11Palumengngan si Isa hap Awrusalamin, palabey iye amban ellet lahat Samariya duk lahat Jalil. 12Pagtapit ne iye si kalumaꞌan, niyaꞌ pī si iye sampūꞌ aꞌa inipul. Nengge siye patala-tala, 13duk ngalingan siye, paꞌinde, “O Isa! Tuwan! Maꞌaseꞌ ne kew si kami.” 14Pagkite si Isa siye, paꞌinne si siye, “Pī kaꞌam si meꞌ imamin, ambat lilingde baranbin weꞌ kawuliꞌan ne.” Duk sasangde mapīhin, kawuliꞌan ne siye. 15Dangan siye, pagkitene weꞌ kawuliꞌan ne iye, magtawus iye balik duk pinudji weꞌ ne Tuhanin pinapales. 16Pasujud iye si antag bettis si Isa magpasalamat si iye. Aꞌa inin bangsa Samariya. 17Paꞌin si Isa, “Dumaꞌin ke sampūꞌ aꞌa kawuliꞌanin? Antag ne siyamin? 18Weꞌey aꞌa liyu-liyu inin du hadja mabalik mapitu magpasalamat si Tuhanin?” 19Manjari paꞌin si Isa si iye, “Nengge kew, bagay, duk palanjal ne kew. Kawuliꞌan kew peggeꞌ sandel kew.”

Pasal pagbayaꞌ Tuhanin

(Mateo 24:23-28, 37-41)

20Dambuwaꞌ ellew tinilew si Isa weꞌ meꞌ Pariseohin bang sumiyan ne Tuhanin magbayaꞌ si meꞌ aꞌahin. Sambunganne siye, paꞌinne, “Gaꞌ niyaꞌ takite bang nagnaꞌ ne Tuhanin magbayaꞌ. 21Gaꞌ iyan niyaꞌ magpaꞌin, ‘Payamanun bi, tiyaꞌ tuꞌu pagbayaꞌan Tuhanin!’ atawa, ‘Īꞌ laꞌi!’ Peggeꞌ pagbayaꞌan Tuhanin luꞌu diyalembi.” 22Manjari paꞌin si Isa si meꞌ tindegnen, “Niyaꞌ du iyan meꞌ ellew si pasōngan asal bayaꞌ teꞌed kitebi weꞌ aku, Anak Manusiyaꞌin, magbayaꞌ ne. Bayaꞌ takitebi bisan da ellew hadja, saguwaꞌ gaꞌi pe takitebi. 23Niyaꞌ iyan magpaꞌin si kaꞌam, ‘O, īꞌ iye laꞌi!’ atawa, ‘Tiyaꞌ iye tuꞌu!’ Daꞌa kaꞌam pī miha aku. 24Peggeꞌ aku, Anak Manusiyaꞌin, bang ne ku pitu, keddut papitukun duk takite meꞌ aꞌahin kēmon, kuweꞌ lalat bessuwang ninagan dunyahin amban dengkepak pī si dengkepak. 25Saguwaꞌ meke inin umantag, subey ku dahuꞌ magsandal kabinasahan duk gaꞌi ku tinayimaꞌ weꞌ meꞌ aꞌa kuweꞌituhin. 26Si pasōngan, bang ne ku pitu balik si dunya, meꞌ hinangan meꞌ aꞌahin kuweꞌ du hinangan meꞌ aꞌa masa si Nu ley. 27Masa miyaꞌan mangan siye duk nginum, maganda siye duk magella sampay taꞌabut ellew paꞌasek si Nu dem kappalin. Manjari ilaseyan weꞌ Tuhanin dunyahin duk magmula siye kēmon. 28Damikkiyan du isab kuweꞌ masa si Lot ley. Mangan siye duk nginum, magbelli duk magdagang, magtanem duk magpatengge meꞌ lumaꞌ. 29Saguwaꞌ pagtekka ellew patahalaꞌ si Lot amban puweblo Sodomin, laboꞌ kuweꞌ ulan ebbutin duk meylangin amban diyataꞌ langit duk magmula siye kēmon. 30Damikkiyan du isab kuweꞌ miyaꞌan hinangan meꞌ aꞌa si dunyahin bang tekka ne ellew pamakite akuhin, aku Anak Manusiyaꞌin.

31“Pagtekka ellew miyaꞌan, bang niyaꞌ aꞌa si luwasan lumaꞌne bu meꞌ kēmonnen laꞌi diyalem lumaꞌ, subey ne iye gaꞌi padiyalem ngeddoꞌne saguwaꞌ subey ne iye lahi. Damikkiyan isab aꞌa malaꞌi si tanaꞌnen subey ne gaꞌi balik pī si lumaꞌne. 32Essebun bi bang ine maꞌumantag si anda si Lot masa awwalley. 33Sine-sine ngelleg umulne, gaꞌ niyaꞌ umulne salama-lama. Saguwaꞌ sine-sine gaꞌi ngelleg umulne sababku, bisan iye matey, niyaꞌ du umulne salama-lama. 34Akahante kaꞌam, bang ne ku pitu balik, niyaꞌ iyan duwangan magulid sangem, dambuwaꞌin ineddoꞌ duk dambuwaꞌin taꞌamban. 35Niyaꞌ iyan duwangan dende magtabang maggiling, dambuwaꞌin ineddoꞌ duk dambuwaꞌin taꞌamban. (36Niyaꞌ iyan duwangan lella maghinang si tanaꞌ, dambuwaꞌin ineddoꞌ duk dambuwaꞌin taꞌamban.)” 37Manjari tilew meꞌ tindegnen iye, paꞌinde, “Tuwan, antag inin umantag?” Sambungan si Isa siye duk eliꞌan, paꞌinne, “Antag-antag kaniyaꞌan bangkeyin, laꞌi magtipun meꞌ owakin.”

Currently Selected:

Lukas 17: yakV

Highlight

Copy