Yahiya 15

Si Isa dalil poꞌon tinanem mahāpin

1Manjari magdalilan si Isa, paꞌinne si meꞌ tindegnen, “Aku inin dalil poꞌon tinanem mahāpin, duk Samakun dalil magipat tinanem inin. 2Kēmon pangeku manggaꞌi mabuwaꞌin totoꞌanne, duk kēmon pangeku mabuwaꞌin gawasanne duk ngaꞌekka buwaꞌnen. 3Kaꞌam iyan dalil kagawasan ne sabab meꞌ panoloꞌku si kaꞌamin. 4Subey kaꞌam pateteg si aku, duk teteg ku isab si kaꞌam. Dalil pangehin, gaꞌi makajari buwaꞌ pangehin amban dihananne, luwal bang gaꞌi butas amban poꞌonne, buwaꞌ du. Damikkiyan kaꞌam gaꞌi kaꞌam kapaghinang si kahāpan bang gaꞌi kaꞌam teteg si aku.

5“Aku inin poꞌon tinanemin duk kaꞌam dalil meꞌ pangehin. Bang kaꞌam teteg si aku duk aku isab teteg si kaꞌam, ekka tahinangbi kahāpan, peggeꞌ bang butas kaꞌam amban aku, gaꞌ niyaꞌ kasuddahan hinangbin. 6Bang aꞌahin gaꞌi teteg si aku, kuweꞌ iye dalil pange seppak ilakasan duk ngalanes. Manjari tinipun meꞌ pange inin bu ilakasan dem ebbut ineggas. 7Saguwaꞌ bang teteg kaꞌam si aku duk meꞌ panoloꞌkun ingketbi teꞌed dem ateybi, duhulan Tuhanin kaꞌam ine-ine pākubi. 8Bang ekka kahāpan tahinangbi, pinudji du Samakun duk kataꞌuhan du isab weꞌ kaꞌam bennal meꞌ tindegku. 9Lasaku si kaꞌamin kuweꞌ du lasa Samaku si akuhin. Patetegun bi lasabin si aku. 10Bang tuhutbi meꞌ pangandaꞌakankun, teteg du lasakun si kaꞌam. Kuweꞌ du akuhin, tinuhut weꞌ ku meꞌ pangandaꞌakan Samakun duk teteg lasanen si aku.

11“Hangkan inin panoloꞌku si kaꞌam, supaya talessabi isab kuweꞌ kēg dem ateykun duk supaya kēgbin jukup. 12Iye inin pangandaꞌakanku si kaꞌamin, subey kaꞌam maglasa-ilasa kuweꞌ pangalasaku si kaꞌamin. 13Bang aꞌahin maglillaꞌ matey sabab lasane si meꞌ bagaynen, gaꞌ niyaꞌ lasa manusiyaꞌ hadje amban inin. 14Kaꞌam, meꞌ bagayku kaꞌam, bang hinangbi meꞌ pangandaꞌakanku si kaꞌamin. 15Kuweꞌitu gaꞌi ne kaꞌam ēnanku meꞌ daraꞌakanku, peggeꞌ daraꞌakanin gaꞌi pinahātihan si siye bang ine ne paꞌin hininang amunen. Saguwaꞌ kaꞌam, bakas pahātiku ne si kaꞌam kēmon inaka Samaku si akuhin. Hangkan ēnanku ne kaꞌam meꞌ bagayku. 16Dumaꞌin weꞌ peneꞌbi ku, saguwaꞌ aku mameneꞌ kaꞌamin, duk kawakilan kaꞌam weꞌ ku supaya ekka hāp tahinangbi duk meꞌ mahāp tahinangbin gaꞌi pinda. Manjari, ine-ine pākubi si Samakun sabab sandelbi si akuhin, duhulanne kaꞌam. 17Na, iye inin pangandaꞌakanku kaꞌamin, subey kaꞌam maglasa-ilasa.”

Kabunsihan meꞌ aꞌa manuhut si Isahin weꞌ meꞌ aꞌa manggaꞌi manuhut Tuhanin

18Paꞌin si Isa si meꞌ tindegnen, “Daꞌa kaꞌam ulaliꞌ bang kaꞌam kabunsihan weꞌ meꞌ aꞌa manggaꞌi manuhut Tuhanin. Essebun bi weꞌ kabunsihande ku dehellu amban kaꞌam. 19Bang saꞌupama magdambuwaꞌ pikilan kaꞌam duk meꞌ aꞌa iyan, kalasahande hep kaꞌam. Saguwaꞌ pabiddaꞌ kaꞌam. Tapeneꞌ kaꞌam weꞌ ku duk pinaseddili kaꞌam weꞌ ku amban meꞌ aꞌa iyan. Hangkan hep kaꞌam kabunsihan weꞌ de. 20Essebun bi bakas pinaꞌinku si kaꞌamin: ‘Banyagaꞌin gaꞌi langkew amban amunen.’ Bang ku bakas bininasa weꞌ meꞌ aꞌa iyan, bugtuꞌ binasade du isab kaꞌam. Bang bakas tuhutde panoloꞌkun, bugtuꞌ tuhutde du isab panoloꞌbin. 21Kabunsihande kaꞌam duk binasade kaꞌam peggeꞌ kaꞌam sukuꞌ si aku duk peggeꞌ gaꞌ kataꞌuhande Tuhanin, Tuhan mamapitu akuhin. 22Bang ku gaꞌ tapitu noloꞌan siye, gaꞌ pe pastiꞌ duseden. Saguwaꞌ kuweꞌitu gaꞌi ne kadaꞌawahande duseden. 23Sine-sine bunsi si aku bunsi du isab iye si Samakun. 24Meꞌ hinang hininangku si matahanden, gaꞌ niyaꞌ aꞌa bakas makahinangne. Bang gaꞌ ku kapaghinang meꞌ hinangan miyaꞌan, gaꞌi hep pastiꞌ duseden. Saguwaꞌ takitede ne meꞌ hininangkun, duk kabunsihande ku duk Samakun. 25Saguwaꞌ bugtuꞌ du ku kabunsihande supaya tuman tasulat dem kitabin. Paꞌin kitabin: ‘Kabunsihande ku gaꞌ niyaꞌ jānne.’

26“Pitu du si kaꞌam pananabangin. Pananabang inin, Niyawa Tuhanin duk amban Samakun iye. Magtoloꞌ du iye mabennal sabab Tuhanin. Papituku du iye si kaꞌam amban Samakun duk pagtuꞌu ne iye, naksiꞌ du iye sabab aku. 27Kaꞌam isab, naksiꞌ du kaꞌam sabab aku peggeꞌ kemuwe tagnaꞌ magtuhut-tuhut kite bi.”

Currently Selected:

Yahiya 15: yakV

Highlight

Copy