Yahiya 14

Si Isa lān mapī si Samanen

1Paꞌin si Isa si meꞌ tindegnen, “Daꞌa kaꞌam suse dem ateybi sabab meꞌ pinaꞌinku miyaꞌan. Sandel kaꞌam si Tuhan duk sandel isab kaꞌam si aku. 2Laꞌi si lahat Samaku Tuhanin, ekka patennaꞌan. Bang inin gaꞌi toꞌo gaꞌi kaꞌam akahanku. Pī ku manyap patennaꞌanbin. 3Manjari bang ubus ne ku magpanyap patennaꞌanbin, balik du ku pitu ngeddoꞌ kaꞌam duk boꞌote kaꞌam pī si patennaꞌankun duk kite bi magdambuwaꞌ patennaꞌan. 4Duk kataꞌuhanbi du lān hap pī si papīhankun.”

5Paꞌin si Tomas si iye, “Tuwan, gaꞌi kataꞌuhan kami bang tungan papīhannun. Saꞌingge pangataꞌu kami lān hap pīhin?” 6Paꞌin si Isa si iye, “Aku inin lān tudju Tuhanin, aku poꞌon sasuku mabennalin, duk aku poꞌon umulin. Gaꞌ niyaꞌ tapī si Samaku Tuhanin bang dumaꞌin aku palabeyannen. 7Kuweꞌitu peggeꞌ kataꞌuhanbi ne ku,” paꞌin si Isa, “kataꞌuhanbi du isab Samakun. Tinagnaꞌan kuweꞌitu, kataꞌuhanbi ne Samakun duk takitebi ne iye.”

8Paꞌin si Pilip pu si Isa, “Tuwan, pakitehanun si kami Samanun duk kaduhulan ne kami.” 9Sambungan si Isa iye, paꞌinne, “Katiggelku ne tuꞌu si kaꞌam, gaꞌi pe kataꞌuhannu bang sine ku, Pilip? Sine-sine ngite aku, kuweꞌ Samakun ne teꞌed takitenen. Hangkan weꞌey paꞌinnu weꞌ subey pinakitehan si kaꞌu Samakun? 10Weꞌ gaꞌi kew kahagad, Pilip, weꞌ Samakun duk aku dambuwaꞌ du? Meꞌ pamanoloꞌku si kaꞌamin dumaꞌin amban aku, saguwaꞌ amban Samaku mateteg tuꞌu si akuhin. Kēmon meꞌ hinangkun iye mangahinangin.” 11Paꞌin si Isa, “Subey kahagadbi pinaꞌinkun weꞌ Samakun duk aku dambuwaꞌ du. Bang gaꞌi kaꞌam kahagad sabab bissāku inin, kahagad kaꞌam hadja sabab meꞌ hinang bakas hininangkun. 12Sabennal akahante kaꞌam,” paꞌin si Isa, “sine-sine kahagad si aku, hinangne du isab meꞌ hinang hininangkun. Duk pasōng pe meꞌ tahinangnen amban meꞌ hininangkun, peggeꞌ pī ne ku si Samaku Tuhanin. 13Ine-ine pākubi si Samakun sabab sandelbi si akuhin, hinangku si kaꞌam supaya tapudji Samakun sabab hininangkun. 14Ine-ine pākubi si aku sabab sandelbi si akuhin, hinangku si kaꞌam.”

Nanggup si Isa weꞌ papitune Niyawa Sutsihin

15Paꞌin si Isa pe, “Bang bennal ku kalasahanbi, bugtuꞌ tuhutbi meꞌ pangandaꞌakanku si kaꞌamin. 16Pākuku du si Samakun duk kaꞌam urunganne seddili nabangan kaꞌam gantiꞌku. Luꞌu du iye si kaꞌam salama-lama. 17Manabang inin, Niyawa Tuhanin. Iye magaka mabennalin sabab Tuhanin. Saguwaꞌ meꞌ aꞌa manggaꞌi manuhut Tuhanin, gaꞌi tatayimaꞌde Niyawa Tuhanin peggeꞌ gaꞌi iye tahātide duk gaꞌi iye kataꞌuhande. Saguwaꞌ kaꞌam, kataꞌuhanbi du Niyawa Tuhanin peggeꞌ luꞌu iye si kaꞌam duk pateteg du iye dem ateybi. 18Bisan ku tahalaꞌ, gaꞌi du kaꞌam siya-siyaku. Balik du ku pitu si kaꞌam. 19Gaꞌi ne tiggel gaꞌi ne ku takite weꞌ meꞌ aꞌa manggaꞌi manuhut Tuhanin. Saguwaꞌ kaꞌam, kitebi du ku. Duk peggeꞌ ellum ku salama-lama, kaꞌam ellum du isab salama-lama. 20Pagtekka ellew miyaꞌan, kataꞌuhanbi du weꞌ Samakun duk aku magdambuwaꞌ. Duk kataꞌuhanbi isab weꞌ kaꞌam duk aku magdambuwaꞌ. 21Sine-sine nayimaꞌ meꞌ pangandaꞌakankun duk tuhutne du, iye iyan aꞌa asal mamalasa si akuhin. Aꞌa mamalasa si akuhin kinalasahan du iye weꞌ Samakun. Duk kalasahanku isab iye duk pahātiku du dikun si iye.”

22Manjari tinilew si Isa weꞌ si Judas, dumaꞌin si Judas Iskariyot. Paꞌin si Judas, “Tuwan, ine sababnen hangkan pahātinu dinun si kami hadja bu dumaꞌin si meꞌ manusiyaꞌin kēmon?” 23Nambung si Isa, paꞌinne, “Bang aꞌahin malasa si aku, bugtuꞌ tuhutne meꞌ panoloꞌkun. Manjari kalasahan Samakun iye, duk laꞌi kami duk Samakun patennaꞌ si iye. 24Saguwaꞌ aꞌa manggaꞌi malasa si akuhin, gaꞌi du isab tuhutne meꞌ pamanoloꞌkun. Duk meꞌ pamanoloꞌku si kaꞌamin dumaꞌin amban aku saguwaꞌ amban Samaku mamapitu akuhin.

25“Inaka inin kēmon weꞌ ku si kaꞌam pādpād tiyaꞌ pe ku tuꞌu si kaꞌam. 26Saguwaꞌ papitu Samakun du si kaꞌam manabangin, gantiꞌku. Iye Niyawa Sutsihin. Toloꞌanne du kaꞌam kēmon-kēmonin duk paꞌessebanne kaꞌam kēmon bakas panoloꞌku si kaꞌamin.”

27Paꞌin si Isa pe, “Iye pangambanku si kaꞌamin atey sanyang. Kasanyangan inin amban aku duk gaꞌi inin magsaliꞌ duk kasanyangan si dunyahin. Hangkan daꞌa kaꞌam suse dem ateybi duk daꞌa kaꞌam tinalew. 28Bakas ne kaꞌam akahanku weꞌ aku inin tahalaꞌ ne, saguwaꞌ balik du ku pitu si kaꞌam. Bang kaꞌam asal malasa si aku, bugtuꞌ kēgan kaꞌam weꞌ pī ku si Samakun, peggeꞌ langkew iye amban aku. 29Andang ne kaꞌam akahanku pādpād gaꞌ pe taꞌabut waktu patahalaꞌkun supaya bang taꞌabut ne waktu miyaꞌan, asal kahagad ne teꞌed kaꞌam. 30Gaꞌi ne ku makajari missā si kaꞌam tiggel peggeꞌ sōng tekka ne nakuraꞌ seyitan magnakuraꞌ si dunya inin. Gaꞌi du ku kapagbayaꞌanne. 31Saguwaꞌ subey kataꞌuhan meꞌ manusiyaꞌin kēmon weꞌ malasa ku si Samakun, hangkan pagtuyuꞌanku kēmon hininang sa pangandaꞌakan Samaku akuhin. Na, kuwat ne kaꞌam, sūng ne kite bi,” paꞌin si Isa.

Currently Selected:

Yahiya 14: yakV

Highlight

Copy