Yahiya 12

Pamuꞌus isellan bengngi si bettis si Isahin

(Mateo 26:6-13; Markus 14:3-9)

1Ennem ellew pe meke tinagnaꞌan Kādjaꞌan Pangessebanin, pī si Isa hap Betani, lahat si Lasarus aꞌa pinakellumne amban kamateynen. 2Paglaꞌi iye si Betani, magjamu-jamu meꞌ aꞌa malaꞌihin pamahadjede si Isa. Si Marta nabang magtāgad si siye. Si Lasarus magtuhut mangan duk si Isa duk meꞌ sinduwehin. 3Manjari ngeddoꞌ Mariyam isellan bengngi inēnan narda tengaꞌ kilu bohatnen. Mahalgaꞌ teꞌed isellan bengngi inin duk gaꞌ niyaꞌ lamud-lamudne. Pinatataꞌ weꞌ Mariyam isellan bengngi inin si bettis si Isa, ubus bu pinunasan weꞌ ne duk kōkne. Manyug bengnginen dem lumaꞌ. 4Manjari naggaꞌ si Judas Iskariyot, dambuwaꞌ meꞌ tindeg si Isahin. Si Judas hep inin mamuddihan si Isahin. 5Paꞌin si Judas, “Gam pe isellan bengngi miyaꞌan pinabellihan, bu pangurung sīnin si meꞌ mamiskinin. Halgaꞌne miyaꞌan tangdan hinang dem dan tahun.” 6Dumaꞌin weꞌ maꞌaseꞌ si Judas si meꞌ mamiskinin hangkan inin bissāne, saguwaꞌ peggeꞌ panangkew iye. Iye hep pinangandel magantan pangisihan sīnden duk daran iye ngeddoꞌ. 7Manjari paꞌin si Isa, “Pasagadanun dende inin. Ennaꞌne isellan bengngi inin para ellew pangubul akuhin. 8Meꞌ mamiskinin gaꞌi du usaꞌ amban kaꞌam duk tatabangbi siye. Saguwaꞌ aku, gaꞌi ku teteg tuꞌu si kaꞌam.”

Meꞌ nakuraꞌ imamin magisun laꞌat para pu si Lasarus

9Ekka meꞌ aꞌa ngataꞌu weꞌ laꞌi si Isa si Betani, hangkan hap pī siye laꞌi. Pī siye dumaꞌin sabab si Isa hadja, saguwaꞌ batang kitede isab si Lasarus, iye bakas pinakellum si Isa amban kamateynen. 10Hangkan magisun meꞌ nakuraꞌ meꞌ imamin weꞌ dumaꞌin hadja si Isa pinapateyden saguwaꞌ sampay si Lasarus isab. 11Hangkan siye magisun kuweꞌ miyaꞌan, peggeꞌ sabab Lasarus ekka meꞌ Yahudihin kahagad ne pu si Isa. Gaꞌi ne siye nuhut meꞌ imamden.

Pamahadje si Isa papīne si Awrusalamin

(Mateo 21:1-11; Markus 11:1-11; Lukas 19:28-40)

12Pagsasumuhin, takale weꞌ meꞌ aꞌa maꞌekka si pagkādjaꞌan si Awrusalamin weꞌ laꞌi ne si Isa si lān tudju Awrusalam. 13Manjari ngeddoꞌ siye kuweꞌ bantuk tuggu dawen lahing duk paguwaꞌ siye pī pasampang pu si Isa. Ngalingan-ngalingan siye papales, paꞌinde, “Pudjite bi Tuhanin. Pudjite bi pinapitu weꞌ Tuhanin. Pudjite bi Sultan bangsa Israꞌilin.” 14Ngasuwaꞌ hep si Isa dambuwaꞌ anak asnu (hayep kuweꞌ bantuk kuraꞌ) duk sinakeyan weꞌ ne. Hininang si Isa inin, maguyun duk niyaꞌ ayat tasulat dem kitab, pinaꞌin,

15“Kaꞌam, meꞌ aꞌa Awrusalamin, daꞌa kaꞌam tinalew. Tiyaꞌ pitu sultanbin pasakey diyataꞌ anak asnu.”

16Waktu miyaꞌan, gaꞌ tahāti meꞌ tindeg si Isahin meꞌ kēmon inin. Saguwaꞌ pagtapoleꞌ ne si Isa si surgaꞌ, bahu taꞌessebde weꞌ meꞌ hininangde pu si Isahin asal tasulat hatiꞌ dem kitab. 17-18Hangkan hep pasampang meꞌ aꞌa mabanesin pu si Isa si lān, peggeꞌ bakas takalede sabab hininang si Isa makaꞌulaliꞌin pangalingan si Isa si Lasarusin amban dem kubulin duk pamakellumne iyehin. Peggeꞌ meꞌ aꞌa masumābu malaꞌihin, siye hep magaka-aka si meꞌ aꞌahin sabab hininang si Isa inin. 19Manjari magbissā-bissā meꞌ Pariseohin, paꞌinde, “Payamanun bi, kēmon meꞌ aꞌahin patuhut ne si iye. Gaꞌ be niyaꞌ tahinangte bi.”

Meꞌ aꞌa Girik miha si Isa

20Niyaꞌ meꞌ aꞌa bangsa Girik patuhut si meꞌ aꞌahin pī nambahayang si Awrusalam waktu pagkādjaꞌan miyaꞌan. 21Pī siye pu si Pilip duk paꞌinde si iye, “Tuwan, bayaꞌ kami magkite duk si Isa.” Si Pilip inin dambuwaꞌ tindeg si Isa amban kalumaꞌan Betsaida laꞌi si lahat Jalil. 22Pī si Pilip ngakahan si Andariyas, ubus pī siye duwangan ngakahan si Isa. 23Sambungan si Isa siye, paꞌinne, “Taꞌabut ne waktukun. Aku, Anak Manusiyaꞌin, sōng pinahadje ne ku. 24Sabennal akahante kaꞌam, weꞌ da lowang binihiꞌ tattap da lowang hadja samantaꞌan gaꞌi pinadem bulak. Saguwaꞌ bang pinadem bulak ne, kuweꞌ dalil matey bu kinubul, na, manjari tomoꞌ duk ekka buwaꞌne. 25Damikkiyan isab aꞌahin. Bang ellegne teꞌed umulne si dunya inin, gaꞌ niyaꞌ umulne salama-lama. Saguwaꞌ bang gaꞌi du ellegne umulne si dunya inin, niyaꞌ du umulne salama-lama.” 26Paꞌin si Isa, “Sine-sine bayaꞌ daꞌak-daꞌakku, subey iye nuhut-nuhut aku. Manjari antag-antagku, laꞌi isab iye. Sine-sine ngahinang pangandaꞌakankun, pahadje Samakun iye.”

Missā si Isa sabab kamateynen

27Missā-missā pe si Isa, paꞌinne, “Suse teꞌed ateykun kuweꞌitu. Na, ine subey paꞌinku? Pākuku enteꞌ si Samakun weꞌ gaꞌi patekkane si aku kabinasahan inin? Gaꞌi inin pākuku peggeꞌ asal inin sababnen hangkan ku pitu, weꞌ subey ku makalabey kabinasahan inin.” 28Manjari missā si Isa si Tuhanin, paꞌinne, “O Ammaꞌ, pahadjehun ēnnun.” Magtawus niyaꞌ suwala amban langit magpaꞌin, “Bakas ne pahadjeku ēnkun duk pahadjeku du balik.” 29Meꞌ aꞌa magtengge malaꞌihin, takalede suwala inin. Paꞌin meꞌ sinduwehin, “Uy, lugung hep īꞌen.” Paꞌin meꞌ sinduwehin isab, “Malaꞌikat miyaꞌan, missā si iye.” 30Saguwaꞌ paꞌin si Isa si siye, “Suwala miyaꞌan pinakale si kaꞌam, dumaꞌin si kahāpanku saguwaꞌ si kahāpanbi.” 31Paꞌinne, “Taꞌabut ne waktu pangahukum meꞌ manusiyaꞌ si dunyahin. Taꞌabut ne waktu pangānan basag nakuraꞌ seyitanin, iye magnakuraꞌ tuꞌu si dunyahin. 32Bang ne ku pinadangkat diyataꞌ olom,” paꞌin si Isa, “taboꞌoku du kēmon aꞌahin nuhut aku.” (33Binissā si Isa inin, pamahātine si meꞌ aꞌa malaꞌihin bang saꞌingge kamateynen.) 34Nambung meꞌ aꞌa mabanesin pu si Isa, paꞌinde, “Paꞌin kitab kamihin weꞌ Almasihin ellum salama-lama. Saguwaꞌ paꞌinnu weꞌ Anak Manusiyaꞌin subey pinadangkat duk pinapatey. Sine teꞌ Anak Manusiyaꞌ inin?” 35Nambung si Isa paꞌinne, “Tiyaꞌ pe tuꞌu si kaꞌam dantaꞌ mangurung dantaꞌ si pikilanbin, saguwaꞌ gaꞌi ne tiggel. Pādpād tuꞌu pe si kaꞌam dantaꞌin, palanjalun bi paglengnganbin duk kaꞌam gaꞌi taꞌabut lindem. Peggeꞌ malumengngan dem lindemin, gaꞌi kataꞌuhanne papīhannen. 36Hangkan,” paꞌin si Isa, “subey kaꞌam sandel si dantaꞌin pādpād tuꞌu pe si kaꞌam dantaꞌin duk kaꞌam manjari meꞌ aꞌa sukuꞌ si dantaꞌin.”

Gaꞌi kahagad meꞌ Yahudihin

Pagubus inin bissā si Isa, tahalaꞌ iye duk patapuk iye amban siye. 37Bisan du ekka meꞌ hinangan makaꞌulaliꞌ tahinang si Isa si matahan meꞌ aꞌa malaꞌihin, masi du siye gaꞌi kahagad si iye. 38Toꞌo teꞌed tasulat Nabi Isaya dem kitabin. Paꞌinne hep laꞌi,

“O Tuhan, gaꞌ niyaꞌ kahagad si meꞌ inaka kamihin. Meꞌ aꞌa mangite balakatnun, kulang du siye makahātihin.”

39Lagiꞌ pe, sinulat isab weꞌ Nabi Isaya jānnen bang weꞌey meꞌ aꞌa manggaꞌi mabayaꞌ makahagadin ujudnen gaꞌi ne makajari kahagad. Paꞌin Isaya,

40“Pinessekan weꞌ Tuhanin meꞌ mataden duk siye gaꞌi ngite, duk pinababbal weꞌ ne pikilanden duk siye gaꞌi makahāti. Manjari gaꞌi pinda ateyden, paꞌin Tuhanin, hangkan gaꞌi tapuwasanku duseden.”

41Binissā inin weꞌ Nabi Isaya peggeꞌ takitene sahaya si Isahin duk binissāne inin sabab si Isa.

42Saguwaꞌ bisan ne sa miyaꞌan, ekka du meꞌ nakuraꞌ meꞌ Yahudihin kahagad pu si Isa, saguwaꞌ gaꞌ hadja siye missā patampal sabab inin, peggeꞌ tinalew siye kaw kataꞌuhan meꞌ Pariseohin ubus gaꞌi ne siye pinaꞌasek dem langgal. 43Peggeꞌ sinna pe siye bang kasulutan manusiyaꞌin si siye amban bang kasulutan Tuhanin si siye.

Meꞌ bissā si Isahin mangahukumin

44Manjari missā si Isa pinapales, paꞌinne, “Makahagad si akuhin, dumaꞌin hadja aku kinahagadnen, saguwaꞌ kahagad isab iye si Tuhan, iye mamapitu akuhin. 45Duk mangite akuhin, takitene isab mamapitu akuhin. 46Pitu ku si dunya ngurung dantaꞌ si pikilan manusiyaꞌ supaya sine-sine kahagad si aku gaꞌi teteg dem lindem. 47Bang niyaꞌ aꞌa makakale meꞌ panoloꞌkun bu gaꞌi tuhutne, dumaꞌin aku mangahukum iyehin. Peggeꞌ dumaꞌin ku pitu ngahukum meꞌ aꞌa si dunyahin, saguwaꞌ pitu ku nimbul siye. 48Si ellew dambuli, niyaꞌ du ngahukum meꞌ manggaꞌi manayimaꞌ akuhin duk meꞌ manggaꞌi manuhut meꞌ panoloꞌkun. Iye pangahukuman siyehin meꞌ bakas panoloꞌku si siyehin. 49Peggeꞌ meꞌ panoloꞌkun dumaꞌin amban di pikilanku, saguwaꞌ amban Samaku mamapitu akuhin. Kēmon panoloꞌkun, iye hadja dinaꞌakne si aku pamanoloꞌin. 50Duk kataꞌuhanku weꞌ meꞌ panoloꞌnen ngurung umul gaꞌ tamananne laꞌi si surgaꞌ. Hangkan hep gaꞌ niyaꞌ bissāku si manusiyaꞌ seddili amban pangandaꞌakan Samaku akuhin.”

Currently Selected:

Yahiya 12: yakV

Highlight

Copy