Romã 6

“Janereko pyaukwerà rupi jaikotà ky'y”, e'i mã'ẽ

1Ikatuay itãwĩ Janejare'e janeporijauesa tè jẽ ipi. Ajamã'ẽ kee e'i tite ãmõ kõ: “Nimanyvoi nivoi jaiko jẽ remẽ. Emã'ẽ. Ãmẽ ywesõ Janejare'e janeporijauesatà janerereko”, e'i tite mã'ẽ. Ivo paepo e'i mã'ẽ? 2Ãnĩ! Nivoi 'ete aepo jaa. Jesu rè jajirovija mã'ẽ rupi janeaiwererà nikasi janeupe ky'y. Jamãnõ maevo sõ tite iwyi ky'y. Ajawyi nikatui aiwea rupi jaiko jẽ jaiko ky'y. 3Jajimojãmorĩoka remẽ, “Awyje Jesu koty rewarà rõmõ taiko”, jaa tè janejimojãmorĩa. “Kiristu Jesu revejẽ jamãnõma”, jaa tè. Ãwĩvoa pekuwa katupa. 4Janemojãmorĩ kupa remẽ, a'evo ve jamãnõma Kiristu revejẽ. A'evo ve Jesu reãgwerà revejẽ jajiaty maevo sõ tite. A'evoa jamojikuwa jajimojãmorĩoka remẽ. Ãwitõ Kiristu Uu kasiaya rupi opoera, ãwĩvo ve jane jaiko ikasia rupi. Kee ja'età: “Ereko pyaukwerà rõmõ tè aiko ky'y. Jesu momoeraarerà kasia rupi teve a'evo aiko”, ja'età.#Krs. 2.12 5Ajare kee ja'e. Ãwitõ Jesu revejẽ jamãnõ mã'ẽ vo 'ejẽ jaiko, ãwĩvo ve eevejẽ japoera mã'ẽ vo 'ejẽ jaiko ky'y. Aje ywete a'evo jaiko ky'y. 6Kiristu omãnõ remẽ, eevejẽ jamãnõ mã'ẽ vo 'ejẽ jaiko, ivo jẽ mijã. Janereko ypykwerà oityoka janewyi, janeaiwea rena rõmõ rõwã janepirà toiko ky'y. A'evoa sikuwapa. 7Kõitokõ emĩgwai okãjã mã'ẽ mõ noerovija'ãi oõvijã aiwerà mõ ipi, ãwĩvo teve jane jaiko. Nisirovija'ãi janepy'a aiwerà ky'y. 8Kee jaa rè peja'a. Kiristu reve jamãnõma maevo sõ tite. Ajawyi jakuwa aje ywete eeve jaiko karuarutà teve jaiko. 9Kiristu opoerapa omãnõ maire. Ajawyi awyje nomãnõ'ãi mãerã tè iko ky'y. Mãnõa nikasi ijupe ky'y. A'evoa sikuwapa jaiko. 10Kee sikuwapa teve. Jesu omãnõma remẽ, oitypypyipaoka janeaiwererà janewyi ky'y. Pe'ĩ'yte omãnõ. Nomãnõ mijẽ'ãi ajaire ky'y. Awyje mãerã tè ekoi ky'y. Janejare'e upewarà mõ kõrijõ tè ekoi. 11Ãwĩvo kuwa ve kee ja'e janepy'a pupe: “Epy'a aiwerà pè amãnõma mã'ẽ vo 'ejẽ aiko ky'y. Awyje Janejare'e pewarà mõ aiko e'e tè jẽ aiko”, ja'e kuwa janepy'a pupe. “Kiristu Jesu rè emo'yoka, eevejẽ taiko. Ajawyi tè a'evo ije aiko ky'y,” ja'e kuwa janepy'a pupe.

“Awyje jẽ Janejare'e kasia rupi jaikotà ky'y”, e'i mã'ẽ

12A'evoa rõmõ kee tija'e janepy'a pupe jaiko ipi: “Aiwea rupi rõwã taiko ky'y. Epirà tè opota eiko teitetea. Ajamã'ẽ ke'ĩatu epirà. Emimota ai rupi naa'ãi”, tija'e jẽ jajimokasi rõmõ jaiko.

13Jypy remẽ nivoia tè jamoẽ jane'arà kyty mijã. Janepirà jamojaiwe tè ipi mijã. Ta'evo e'ã age'e remẽ jaiko ky'y. Kee ja'età Janejare'e pè: “Orerõvijã ywete rõmõ neiko. Orerekyipa nanererovijai mãe kõ pytery pe wyi orerereko ky'y. Ajawyi nepo pè orojime'ẽma ky'y. Ene tè orepirà jarà rõmõ neiko ky'y. Oremokasiay wete orerereko rejupa, ivoa rupi katu toroiko nerovake ky'y”, tija'e kõrijõ ijupe. 14Ijayvukwerà ivo tekoua rewarà rupi katu jaiko rewarà mõ rõwã janerereko katu ipi. Ãwisõ upi nijaikoi sire'e rewarà mõ tè a'evo janerereko. Aje, okatuaya rupi tè Janejare'e janerereko katu ky'y. Ajamã'ẽ aje ivo tekoua rupi tijaiko jẽ, Janejare'e remime'ẽgwerà rupi poroauvay rewarà mõ. Ãmẽ tè aiwea nikasi'ãi janere ky'y.

Manyvo age'e Jesu reve tekoua 'arà

15Ajawyi kee taoty e'ã: “Jesu omãnõma eupewarà mõ ky'y. Ajawyi nimanyvoi nivoi aiko remẽ. Eporijauesa jẽtà!” taoty e'ã. Aje Janejare'e janerereko katuay okatuaya rupi. Aje ijayvu ivo tekoua wyry kyty rõwã jaiko ky'y. Ajamã'ẽ, “Nimanyvoi nivoi aiko jẽ remẽ”, tapejẽ e'ã ikenẽ!

16Napekuwai sipõ mã jamoẽ jane'arà kyty mã'ẽ, a'e remĩgwai rõmõ tè jaa ipi? Emimotarà rupi tè jaikotà ãmẽ. Ajawyi kee ja'e rã'ĩ kuwa ipi. Mã sipõ penõvijã rõmõ oiko kuwa? Janejare'e sipõ? Aiwea sipõ? Mã sipõ? Aiwea pemoẽ pe'arà kyty remẽ, pemãnõ 'atà tè peiko ãmẽ. Ajamã'ẽ Janejare'e pemoẽ pe'arà kyty remẽ, ivo mã'ẽ rõmõ penerekotà ãmẽ.

17Aje jypy remẽ nivoi tekoua rupi tè pejimojaiwe tè peiko mijã. Ajamã'ẽ Janejare'e ayvu e'ekwerà ojenu pejẽ remẽ, “aje ywete” pejẽ ijupe ky'y. Perovija katu enu ky'y. A'evo peiko ky'y mã'ẽ rè Janejare'e amoe'e aiko ipi. 18Awyje katu Janejare'e pemomoioka peaiwererà wyi ky'y, ajawyi tè age'e a'e rupi rõwã peiko ky'y. Ivo tekoua rupi tè peiko ky'y.

19Age'e penemikuwa rupi ve aporegetatà pejẽ, napejẽ katuive ivo tekoua rupi peiko rewarà mõ. Jypy remẽ itõkõ pejipy'amogeta ai ipi mijã. Ãmẽ pepirà kõ pemoaiweoka tesõ ipi mijã. Ta'evo e'ã age'e remẽ peiko ky'y. Ivo katua rupi tè tapeiko ky'y. Ãmẽ sõsi Jesu reruparà mõ peikotà ãmẽ ky'y. Ijupewarà kõ rõmõ peikotà ãmẽ ky'y.

20-21Jypy remẽ itõkõ peaiwererà rupi peiko ipi mijã. Napejipy'amogetai 'ete itõkõ ivo tekoua rè peiko ipi mijã. Ikatuay sipõ peupe ãmẽ? Niĩ. Nikatui. Owaray põ ãmẽ pejẽ peiko? Niĩ. Nowari ve. Ajawyi sitõ age'e remẽ pejinõsĩ 'ejẽ aekwerà rè peiko ky'y! Ãmõ, ipojy ai ãmẽ pekoty mijã. Pemãnõ 'atà tè peaiwererà rewarà mõ mijã. Ajawyi, “Moma'e rã sõpõ ãwĩ vo aiko?” pejẽ kuwasi peiko mijã. 22Age'e remẽ ãmẽ Janejare'e pemomoiokapa peaiwererà wyi ky'y. Ajawyi wemĩgwai rõmõ tè penereko ky'y. Peneko pyaukwerà ikatuay peupe teve ky'y. Ijupewarà kõ rõmõ tè peiko, ajaate peiko karuarutà ipyri peiko ky'y. 23Aje, jamãnõ 'atà tè janeaiwererà repykarà mõ mijã. Ajamã'ẽ Janejare'e janerereko katu takatu, ãwisõ awyje jẽ ipyri tijaiko karuaru ky'y. Janerõvijã Kiristu Jesu revejẽ jaiko mãe kõ rõmõ tè a'evo janerereko ky'y.

Currently Selected:

Romã 6: oymNT

Highlight

Copy