Romã 5

“Janejare'e janemojimoryoka wee ky'y”, e'i mã'ẽ

1Ajaate age'e remẽ Janejare'e ojimorypa kõ rõmõ janerereko ky'y, “aje” ja'e ijupe remẽ. “Ivo mã'ẽ tè ãwĩ” e'i janeupewarà mõ ãmẽ ky'y. Janerõvijã Jesu Kiristu omãnõ janeaiwererà kõ repykarà mõ rewarà mõ a'evo janerereko ky'y. 2Janeporijauesa janerereko, Wa'yry mãnõa rupi. Ajawyi janepy'a katu jajirovija ee jaiko ipi. Janeroryvay amãtejẽ ipyri jaiko tarà mẽ jaiko ipi. Ãmẽ ywesõ ikatuay wetetà jamã'ẽtà ee. 3Ãmõ, a'e kupei kyty, jajimomorijau ipe remẽ, janerory jẽ jaiko. Sikuwa jajimomorijaua rupi jajimokasi jẽ ee remẽ ywesõ jajimomãatã ee jaiko ipi. 4A'evo jajimomãatã ee jaiko remẽ, emimota rupi katu jaiko. Ipy'a rupi katuwarà kõ rõmõ jaiko ãmẽ ipi. A'evo remẽ, jajimokasi jẽ emime'ẽ ãrã rè jaiko ipi. 5Janejare'e remime'ẽ ãrã kõ siãrõ jẽ remẽ, nisiãrõ pãnẽ'ãi jaiko ãmẽ ipi. Janerauvay wete rewarà mõ omẽ'ẽtà siãrõ mã'ẽ janeupe. O'Ãg tẽ tesõ oinõma janepy'a pupe janerauvaya mojikuwapa mõ.

6Aje ywete janerauvay janerereko ipi. Emã'ẽ. Manyvo nija'e'ãi jajireko katu janeaiwererà wyi mijã remeve Kiristu Uu ayvu rupi omãnõ janeupewarà mõ. Ava jẽ rõwã a'evo kuwa ekoi. 7Ivo mã'ẽ pewarà mõ omãnõ kuwa mã'ẽ mõ nijaesa kuwa'ãi. Ãpẽi jaesa kuwa nojipiraui omãnõ kuwa mã'ẽ ivo ay ekoi mã'ẽ rekovijarerà rõmõ mã'ẽ. [Tysi tõ nivoi mã'ẽ rekovijarerà rõmõ omãnõ mã'ẽ nijaesa kuwa'ãi.] 8Ajamã'ẽ Janejare'e janerauvay ipi. Ajawyi nivoi epe jaiko remẽ, omuroka jẽ tesõ Kiristu tomãnõ janeupewarà mõ, ãwisõ tijamãnõ e'ã janeaiwererà reve ky'y. A'evo omojikuwaokapa janerauvaya janeupe. 9Ajawyi Janejare'e tè janeaiwererà wekyipa janewyi ky'y, Kiristu omãnõ janerekovijarerà rõmõ yvyra jipokana rè remẽ. Nomo'y'ãi janeaiwererà janere ãmẽ ky'y. Nijanemomorijau'ãi eewarà mõ ky'y. “Ivo mã'ẽ tè ene” e'ipa janeupe ky'y. 10Karamoe remẽ Janejare'e ãpã kõ rõmõ tè jaiko janeaiwererà rewarà mõ mijã. Jajirova ipe iwyi jaiko remẽ, janemojimoryoka jẽ wee. Wa'yry mãnõa rupi tè ojimorypa kõ rõmõ janerereko ky'y. Ta'yry omãnõ maire, opoera mijẽ oo. Oiko jẽ iko age'e. Ajawyi Jesu reko kasia rupi tẽ tesõ Janejare'e janerereko katuay wete janerereko ky'y. 11Ajawyi tè age'e remẽ, “Ejimorypa tè ene ky'y”, e'i Janejare'e janeupewarà mõ, Janerõvijã Jesu Kiristu rewarà mõ. A'e rupi ojimory katu janere iko ky'y. Ajawyi janeroryvay wete Janejare'e janerereko katua rè jaiko ky'y.

Tãmõ Atão, Kiristu revewarà

12Karamoe remẽ itõkõ tãmõ Atão nivoi ekoi. Ajawyi mãnõa ojimo'ypa ee. A'evo pe'ĩgà mirà rupi nivoi tekoua ojinõma jane kõ rè okwa ky'y. Pirujẽ janere ojinõma okwa. A'e repykarà rã rõmõ jamãnõ 'atà tè mijã.#Jinõ. 3.6 13Janejare'e nokusiwaokaive wayvu ivo tekoua rewarà tãmõ Moisesi pè remeve, uvepa teãmã nivoia jane kõ pè. Ajamã'ẽ ayvu ivo tekoua rewarà e'ãve nivoi mã'ẽ nomo'yive janere, nuveive imosã'ãgaa rã rewarà mõ. Ajawyi “aje ipõ” ne'ive ijupe kõ. 14-15A'evo ipe remẽ, mãnõa ojiãparõma jane kõ pè tãmõ Atão reko remẽ, ajaate tãmõ Moisesi reko remẽ. Ajamã'ẽ tãmõ Atão aiwererà ovo rupi teve ijeapyrerà kõ aiwererà wyi. Janejare'e tẽ tesõ omogeta ipe tãmõ Atão mijã. Ajamã'ẽ noerovijai tite. Ajawyi Atão ypy noerovijai. Ajawyi nivoi mãe kõ ypykwerà rõmõ oo. Ijeapyrerà kõ ãmẽ eruparà mõ tè nivoi ekoi kupa ipi. Ajawyi Atão wã'ã amãtejẽ maevo sõ tite Jesu Kiristu wãparõ maekwerà. Atão nivoi ekoi rewarà mõ jane kõ ojimojaiwe omãnõ ipi. Pe'ĩgà mirà wyi mãnõa ojinõ tite pirujẽ jane kõ rè okwa ãmẽ. Waiteve Kiristu wãparõ maekwerà. Omãnõa rewarà mõ janeporijauesaa ojinõ okwa ky'y. Imãnõawerà oy katu pe'ĩrõwã mirà kõ rereko katuarà rõmõ ky'y. A'e ywesõ ikasiay wete janemojaiwea wyi ky'y.

16Atão pe'ĩte ipe remẽ, ojeapyrerà kõ pirujẽ omoaiokapa Janejare'e kotyre. Ajawyi kee e'ipa Janejare'e janeupewarà mõ mijã: “Nivoi ekoi kupa. Tojimomorijau ajawyi kupa”, e'ipa janeupewarà mõ mijã. Atão jeapyrerà wyi a'evo jane mijã. Kiristu rupi ãmẽ “ivo katu mã'ẽ tè ãwĩ” e'ipa Janejare'e janeupewarà mõ ky'y, ãwisõ mõa'ãrõwã ipe janeaiwererà kõ remẽ. Janeporijauesa okatuaya rupi a'evo janerereko ky'y. Ajawyi jajimory kuwa ee ky'y. 17Aje ywete pe'ĩte mirà nivoi mã'ẽ wyi pirujẽ jamãnõ 'atà tè mijã. Ajamã'ẽ Atão remiãparõgwerà wyi wete Jesu Kiristu remiãparõgwerà ikasiay wete. A'evo Janejare'e janeporijauesaa rupi ivo katu mã'ẽ rõmõ janerereko ky'y. Janerereko katuay jẽtà janerereko. Ajawyi janepy'a piryvypy katu Kiristu rewarà mõ jaiko ky'y.

18Aja jare kee eu kuwa mijã. Ãwitõ pe'ĩte janemomorijaua wãparõ maekwerà. Ajawyi jamãnõ 'atà tè mijã. Ãwĩvo ve Jesu katua rupi “ivo mã'ẽ tè ãwĩ kõ” e'i Janejare'e janeupewarà mõ age'e ky'y. Ajawyi si jaiko karuaru 'atà tè ipyri jaiko age'e ky'y, Kiristu koty rewarà kõ rõmõ. 19Tãmõ Atão itõkõ noerovijai tite Janejare'e. Ajawyi waiwea rupi poromoaipa pirujẽ poroereko. Emã'ẽ. Pe'ĩgà mã'ẽ rupi jane kõ ojimoaiwepa 'ejẽ iko ipi. Na'evoi ãmẽ Jesu. Uu ayvu werovija mã'ẽ rupi poromokatu tè ãmẽ Jesu. Jesu reko katua rupi “ivo mã'ẽ tè ãwĩ” eu kuwa pe'ĩrõwã jane kõ pè ky'y. [Ivo katu mã'ẽ rõmõ Janejare'e janerereko, “aje” ja'e ijupe remẽ.]

20Karamoe remẽ itõkõ Janejare'e wayvu ivo tekoua rewarà omojikuwaokapa tãmõ Moisesi pè tokusiwa imojikuwa. Ajamã'ẽ a'evo paire ywesõ nivoi ekoi kupa. Ikasiay ipe aiwea ee kõ. Ajamã'ẽ janeporijauesaa ywesõ ikasiay wete janeaiwererà kõ wyi age'e ky'y. 21Janeaiwererà rewarà mõ mãnõa wyry pewarà rõmõ tepa jẽ jane jaiko mijã. Aiwea oẽ tesõ jo'arà kyty mijã. Ajamã'ẽ Janerõvijã Jesu Kiristu mãnõa rewarà mõ janeporijauesaa ywesõ ikasiay ky'y. A'e rupi Janejare'e janemojimoryoka wee ky'y. Janerereko karuarutà opyri janerereko ky'y.

Currently Selected:

Romã 5: oymNT

Highlight

Copy