Romã 4

Tãmõ Aparão pè Janejare'e “ivo katu mã'ẽ” e'i mã'ẽ rewarà

1Ajawyi manyvo ja'età põ janerãmõi Aparão rekoawerà pè? “Ivo katu mã'ẽ tè ãwĩ”, e'i itõkõ Janejare'e ijupe. Manyvo põ aepo e'i ijupe? Janejare'e ayvukwerà ivo tekoua rewarà rupi ekoi rewarà mõ põ? Ãnĩ. 2A'evo sõ remẽ, ojimoe'e kuwa ãmẽ iko mijã. Ajamã'ẽ na'evoi. Ajawyi nojimoe'e'ãi kuwa Janejare'e rovake mijã. 3Ajare kee e'i ojikusiwa Janejare'e kareta rè: “Janejare'e, ‘Kee oroerekotà’, e'i ijupe remẽ, Aparão, ‘Aje ywete a'evotà’, e'i ojirovija ee. Ajawyi Janejare'e, ‘Ivo katu mã'ẽ tè ãwĩ’, e'i ijupewarà mõ”, e'i maekwerà.#Jinõ. 15.6; Kar. 3.6; Tku. 2.23

4Kee jaa itõkõ sikuwa. Japosiko ipi remẽ, janeposikoa repykwerà japyy ajaire. Nijapyy te'ĩtei ipi. Janeposikoa repykwerà tè japyy ipi. 5Ajamã'ẽ ivo jaiko mã'ẽ repykwerà rè nijanerako'i'ãi kuwa ipi, nivoi jaiko teãmã rewarà mõ. Ajawyi Janejare'e rè tè janerako'i jaiko ipi. A'e tè “ivo katu mã'ẽ tè ãwĩ” e'i janeupe, “aje ywete” ja'e ijupe remẽ. 6Aepo e'i Janejare'e janeupe remẽ, janeroryvay ãmẽ jaiko ipi. Janevote ivo jaiko rewarà mõ rõwã janeroryvay jaiko ipi. Janejare'e remiporijauesa rõmõ jaiko rewarà mõ tè janeroryvay jaiko ipi. Ajare kee e'i tãmõ Tavi karamoe remẽ ikusiwa:

7“Kee jaiko remẽ janeroryvay jaiko ipi.

Nivoi jaiko paire Janejare'e ‘awyjepa’ e'i janeaiwererà pè remẽ janeroryvay jaiko ipi.

Omoje'opa maevo sõ tite janeaiwererà janewyi remẽ janeroryvay jaiko ipi.

8Nivoi mã'ẽ Janejare'e nomo'yi janere ky'y remẽ janeroryvay jaiko ipi”, e'i tãmõ Tavi ikusiwa maekwerà.#Jĩg. 32.1-2

9Juteu kõ pè rõmõ'ĩte rõwã aepo e'i tãmõ Tavi. Juteu rõwã mãe kõ pè teve aepo e'i. Pirujẽ Janejare'e rè oja'a mãe kõ pewarà mõ e'i. Ma'e rewarà mõ aepo a'e. Sikuwa itõkõ tãmõ Aparão “aje ywete” e'i Janejare'e pè. Aja rewarà mõ tè Janejare'e “ivo katu mã'ẽ tè ãwĩ” e'i ijupewarà mõ. 10Manyvo ekoi remẽ põ aepo e'i Janejare'e ijupe? Ojiemosĩpire'o paire katu põ? Ãnĩ! Aja paire rõwã. Ojiemosĩpire'o e'ãve aepo e'i ijupe. 11A'evo paire tè ojiemosĩpire'o ojimosã'ãga ky'y. “Aje ywete” e'ipa Janejare'e pè rewarà mõ a'evo ekoi ky'y. Kee jaa tè ojiemosĩpire'oa: “‘Ivo katu mã'ẽ tè ene’, e'ipa Janejare'e eupe. ‘Aje ywete’ a'e ijupe rewarà mõ aepo e'ipa”, ejaa tè. Ajawyi pirujẽ Janejare'e rè oja'a mãe kõ ypykwerà rõmõ tè tãmõ Aparão ekoi ky'y. A'e tè a'evoa wãparõ iko.#Jinõ. 17.10 12Ajawyi kee sikuwa. Ãwitõ tãmõ Aparão “aje ywete” e'i Janejare'e pè rewarà mõ tè, Janejare'e “ivo katu mã'ẽ tè ãwĩ” e'i. Ãwĩvo ve janeupe aepo e'i, “aje ywete” ja'e ijupe remẽ. Ajawyi tãmõ Aparão jeapyrerà kõ vo 'ejẽ jaiko, Janejare'e rè jaja'a jaiko mãe kõ rõmõ. Juteu rõwã mãe kõ rõmõ jaiko remẽ ipe a'evo jaiko. Ãmõ, Juteu kõ rõmõ jaiko remẽ teve a'evo jaiko.

“Aje ywete” ja'e Janejare'e ayvu pè mã'ẽ rewarà

13Karamoe remẽ itõkõ Janejare'e kee e'i tãmõ Aparão pè: “Owaray poromoigookatà, nejeapyrerà kõ reve. Pirujẽ yvy wãnà kõ eremireko katuarà kõ rõmõtà nerewarà mõ”, e'ipa tãmõ Aparão kõ pè. “Aje ywete a'evotà” e'i tãmõ Aparão enu. Ajawyi itõkõ Janejare'e “ivo mã'ẽ tè ãwĩ” e'i tãmõ Aparão pewarà mõ. Mano rewarà mõ põ aepo e'i Janejare'e ijupe? Ijayvu ivo tekoua rewarà rupi katu ekoi rewarà mõ põ? Ãnĩ. Aja rewarà mõ rõwã.#4.13 Janejare'e nomojikuwaokaive wayvukwerà ivo tekoua rewarà a'evo remẽ. Kãramõ tè tãmõ Moisesi pè tè omojikuwaokapa. Jinõ. 12.2-3; 17.4-6; 22.17-18; Kar. 3.29 “Aje ywete” e'i ijayvu pè rewarà mõ tè aepo e'i. Ajawyi tè “ivo katu mã'ẽ tè ãwĩ” e'i Janejare'e ijupewarà mõ.

14Ajare kee ne'i Janejare'e tãmõ Aparão pè: “Ivo tekoua rupi katu tè neiko wyi owaray oromoigookatà”, ne'i. Aepo e'i sõ remẽ, manyvoa rã rõmõ rõwã janerako'i kuwa ijayvukwerà rè, “Owaray poroerekotà”, e'i maekwerà rè mijã. Ivo tekoua rupi jaiko mã'ẽ repykwerà rõmõ a'evo kuwa mijã.#Kar. 3.18 15Ajamã'ẽ ivo nijaikoi sire'e ipi. Ijayvu ivo tekoua rupi katu nijaikoi sire'e jaiko ipi. Ajawyi jajimomorijau 'atà tè kuwa, ijayvu rupi katu nijaikoi sire'e rewarà mõ. Nuvei sõ ijayvu ivo tekoua rewarà remẽ, nuve'ãi kuwa teve ijayvu javya mijã.#4.15 Ajawyi nijanerako'i'ãi ivo tekoua rewarà rè, Janejare'e okusiwaoka tãmõ Moisesi pè maekwerà rè.

16Ajawyi sikuwa okatuaya rupi tè owaray Janejare'e wereko “aje ywete” e'i ijupe mãe kõ ipi. Ikasiay ijayvu a'evoa rã rè. Nomotee'ãi wayvukwerà ipi. Aepo rupi katu owaray tãmõ Aparão wereko ipi. Ãmõ, ijeapyrerà kõ a'evo wereko teve. A'evo 'evotà pirujẽ janererekotà “aje” ja'e ijayvu pè remẽ ipi. Juteu kõ pè kõrijõ tè rõwã aepo e'i. Pirujẽ Aparão vo jaja'a ee mãe kõ ve owaray janerereko, wayvu rupi katu ipi. Janeypykwerà rõmõ tãmõ Aparão ekoi ãmẽ.#Kar. 3.7 17Ajare itõkõ kee e'i amãtejẽ Janejare'e Aparão pè nijãkarãive remeve: “Ãmõ ãmõ yvy wãnà kõ ypykwerà rõmõ neikotà”, e'i amãtejẽ.#Jinõ. 17.5 Aepo e'i maekwerà pè, “Aje ywete a'evotà”, e'i Aparão. A'evoa rã wãrõ ãmẽ. Okuwa Janejare'e nomowasu'ãi a'evoa. Omãnõ mãe kõ omomoera mã'ẽ tè Janejare'e. Ãmõ, naikoive mãe kõ omoẽoka wayvukasia rupi mã'ẽ tè. Ajawyi tãmõ Aparão, “Aje ywete a'evotà”, e'i enu.

18-19Ajawyi Janejare'e e'i maekwerà rupi itõkõ wãrõ jẽ tesõ wãkarã rã, Janejare'e ome'ẽtà ijupe mãe rã. A'evo remẽ werywete 100 kwaray rõmõ wesa esapa Aparão. Ãmõ, erekwarà Sara isa'imãnai teve iko. Ika'akuwa ywete kupa.#Jinõ. 17.17 [Nijãkarã'ãi kuwa ãmẽ kupa mijã.] Ajamã'ẽ a'evo ipe remẽ, “Aje ywete a'evotà”, e'i tè jẽ oupe iko ipi. Nojimoearai'ãi aepo jaa wyi. 20-21“Aje sipõ Janejare'e emoãkarãokatà?” ne'i. “Aje ywete a'evotà”, e'i kõrijõ tè iko. Ãmẽ ywesõ aepo e'i, okuwa katu Janejare'e kasia rewarà mõ. A'evoa rã rè omoe'e amãtejẽ ãmẽ. 22A'evo tãmõ Aparão ekoi. Ajawyi tè Janejare'e “ivo katu mã'ẽ tè ene” e'i ijupe ãmẽ. 23Aepo jaa ojikusiwapa Janejare'e kareta rè. Ajamã'ẽ Aparão pewarà mõ rõmõ'ĩte rõwã aepo e'i Janejare'e. 24Janeupewarà mõ teve “ivo mã'ẽ tè ene” e'i, “aje” ja'e ijayvu pè remẽ ipi. “Ivo katu mã'ẽ tè ene” e'i ãmẽ janeupe. A'e tè itõkõ Janerõvijã Jesu omomoera imopõ'ã omãnõ maire. Ajawyi jakuwa nomowasu'ãi a'evoa iko. 25Aje ywete Janejare'e omuroka Jesu tomãnõ janeaiwererà repykarà mõ. Imãnõa rupi oitypypyipaoka janeaiwererà kõ janewyi ky'y. Ãwĩvo ve omomoera maekwerà rupi ivo mãe kõ rõmõ janerereko ky'y.#Isa. 53.4-5

Currently Selected:

Romã 4: oymNT

Highlight

Copy