Romã 16

“Apota ajimory pene kareta rupi”, e'i mã'ẽ

1Jesu koty rewarà mõ amonookatà toposiko pepãtavõarà rõmõ. Wãivĩ e'eay tè amonookatà, Pepi eu ijupe mã'ẽ. Janekõjã e'eay vo 'ejẽ a'e. Age'e oposiko jẽ rã'ĩ Sẽkereja taa wãnà kõ pãtavõarà rõmõ. 2Pepi, ijaty mirà kõ opãtavõ gatu ipi. Ije ve epãtavõ ipi. Ajawyi tapeja'a katu ikõ ee nẽ, ipãtavõ gatu nẽ, pepyri ovãe remẽ nẽ. Janerõvijã ywete remĩgwai e'eay rõmõ ekoi ipi rewarà mõ aepo a'e pejẽ. Tapepãtavõ gatu ereko. Moma'e rè iporijau remẽ, a'e rupi katu tapereko ipi, a'e pejẽ.

3“Owarĩ põ neju?” a'e teve imonooka Pirisira pè. Ãmõ, imẽnà Akira pè aepo a'e. Ejimorypa katu kõ a'e kõ, evo oposiko Kiristu Jesu posikoa rè kupa ipi rewarà mõ.#J.K.R. 18.2 4Nojipiraui tesõ erewarà mõ kupa ipi, Jesu noerovijai mãe kõ emoaità remẽ. Ajawyi aeka kõ jẽ ipi. Ajawyi apota ajimory ee kõ aã kareta rupi. Ije rõmõ'ĩte rõwã apota ajimory ee kõ ajamã'ẽ. Ãmõ, Jesu koty rewarà atyry kõ ve opota ojimory ee kõ, pirujẽ. Juteu rõwã mãe kõ tè. A'e kõ opota ojimory ee kõ mãe kõ.

5Kejõ rè teve apota ajimory eremikusiwarerà rupi. Jesu koty rewarà kõ Pirisira retã wyry pè ojimoaty mãe kõ rè.

Ãmõ, ejimorypa katuay wete Epenetu rè apota ajimory. A'e ypy Asia yvy pè Kiristu rè ojirovija ypykwerà rõmõ ekoi.

6Ãmõ, Maria rè apota ajimory. Akuwa a'e oposiko ywete pepãtavõarà rõmõ ipi.

7Ãmõ, Ãtoroni rè apota ajimory. Ãmõ, Junia rè. A'e kõ Juteu kõ rõmõ ekoi teve, evo. A'e kõ ereve jimopã'ãga pupe tui maekwerà kõ. A'e Jesu remimonokwerà kõ okuwa katu mãe kõ. A'e kõ ypy Kiristu rupi ekoi kupa, najirovijarive ee remeve.

8Ãmõ, Ãpiriatu rè apota ajimory. Ejimorypa katuay wete teve a'e, Janerõvijã ywete koty rewarà rõmõ ekoi.

9Ãmõ, apota ve Upanu rè ajimory. Orereve oposiko Kiristu ayvu mojenua rè mã'ẽ a'e. Ãmõ, ejimorypa katu Esitaki rè apota ajimory. 10Ãmõ, Aperi rè. Kiristu noityi 'eteay ojimomorijau ipe remẽ mã'ẽ tè a'e. Ojikuwa katu a'evo ekoi mã'ẽ rõmõ. Ãmõ, Aritopu kõ rè apota ajimory. Etã wyry pewarà kõ pè teve aepo a'e.

11Ãmõ, Erojião rè. A'e Juteu tè, evo. A'e vo ve Janerõvijã ywete koty rewarà kõ rè apota ajimory, a'e Nasisu retã wyry pè ojimoaty mãe kõ rè. A'e kõ rè ve apota ajimory.

12Ãmõ, kejõ wãivĩ kõ rè apota ajimory. Tiripena rè. Ãmõ, Tiriposa rè. A'e kõ oposiko ywete Janerõvijã ywete posikoa rè ipi mãe kõ. Ãmõ, ejimorypa katu Pesiti rè teve apota ajimory. A'e Janerõvijã ywete posikoa rè oposiko ywete mã'ẽ. Mokopejõ wãivĩ kõ rè apota ajimory.

13Ãmõ, Rupu rè apota ajimory. A'e oposiko ywete Janerõvijã ywete posikoa rè ipi. Ãmõ, ijy rè ve. A'e omemyre'e vo ikatu erereko ipi.#Mak. 15.21

14Ãmõ, kejõ rè apota ajimory teve. Asĩkĩtu rè. Ãmõ, Perekõti rè. Ãmõ, Eremisi rè. Ãmõ, Patoropa rè. Ãmõ, Emasi rè. Ãmõ, ipyriwarà kõ pirujẽ Jesu koty rewarà rè apota ajimory eremikusiwarerà rupi.

15Ãmõ, Piroroku retã pewarà kõ rè. Juria rè teve. Ãmõ, Nereu rè, ikõjã rè ve. Ãmõ, Orĩpa rè. Ipyriwarà kõ pirujẽ Jesu koty rewarà kõ rè apota ajimory, a'e pejẽ.

16Tapejimory katu ikõ ojee Jesu koty rewarà kõ rõmõ ipi nẽ, a'e pejẽ. Pejirovãe remẽ upi upi, a'evo tapeiko, a'e pejẽ. Pirujẽ ikewarà Kiristu koty rewarà kõ atyry kõ opota ojimory pene eremikusiwarerà rupi.

“Tapetekokuwa pejireko katu poromoripearà kõ wyi”, e'i mã'ẽ

17Apota kee a'e jẽ pejẽ, eretãrãgwerà kõ. Tapetekokuwa jẽ ikõ ãmõ rupi tè poromo'e mãe kõ wyi nẽ, a'e pejẽ. A'e kõ opota poromoe'y e'yioka ipi. Ãmõ, oreayvukwerà opota imotee kupa ipi. Opota tè Jesu rè jirovijaa wyi poromomoioka kupa ipi. Ajawyi tapejireko katu iwyi kõ, a'e pejẽ. 18A'evo ekoi mãe kõ Janerõvijã Kiristu ayvu rupi rõwã a'evo ekoi kupa. Wemimota kõ rupi tè a'evo ekoi kupa. Wayvu katusa rupi maevo sõ tite poromoripe kupa ipi. Notekokuwai mãe kõ omoe'e rã'ãga imoripe kõ kupa ipi. 19Ajamã'ẽ pejẽ, Kiristu ayvu e'eay rupi peiko ipi. Pejikuwa a'evoa rõmõ peiko. Ajawyi eroryvay pene aiko ipi. Apota ivoa rè petekokuwavay peiko ipi. Apota ve tapetekokuwa ivo e'ãa rè, upi tapeiko e'ã ipi.

20A'evo remẽ Janejare'e, janepy'amopiryvypy katu mã'ẽ rõmõ, nomokasioka'ãi ãjãgai rõvijã Satanasi. A'evo remẽ pewyry kytytà tè maevo sõ tite ãmẽ ky'y. Opatà ikasia ãmẽ iwyi.

Janerõvijã Jesu Kiristu ikatu ikõ tapenereko katu okatuaya rupi ipi nẽ.

“Epyriwarà kõ naearai pewyi”, e'i mã'ẽ

21Timoteu ve opota ojimory pene ekareta rupi. A'e eposikoa rè epãtavõ mã'ẽ tè. Ãmõ, Rusiu. Ãmõ, Jasão. Ãmõ, Sosipatu. A'e kõ Juteu kõ tè. A'e a'e kõ opota ojimory pene aã kareta rupi.#J.K.R. 16.1

22Ije Tesiu, Pauru ayvu akusiwa peupe mã'ẽ. Ije ve apota ajimory pene, Janerõvijã ywete koty rewarà rõmõ.

23Kaiju ve opota ojimory pene. A'e retã wyry pè teve orojimoaty Jesu koty rewarà kõ rõmõ oroiko ipi. Janejare'e rè oroja'a katu a'e pè oroiko ipi.

Ãmõ, Erasitu ve opota ojimory pene. A'e taa rõvijã karakuri rè oposiko mã'ẽ tè.

Ãmõ, janeretãrã vo mã'ẽ, Kwatu, opota teve ojimory pene. A'e a'e kõ opota ojimory pene.#J.K.R. 19.29; 1Kor. 1.14; 2Tim. 4.20

24Janerõvijã Jesu Kiristu ikõ tapenereko katu jẽ ikõ okatuaya rupi nẽ. Õ'õ, awyje katu ãwĩvo jamoe'e karuaru jaiko ipi.#16.24 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 24 uve. Ãmõgwerà kõ pè nuvei.

Kareta moawyjepaa

25Janejare'e simoe'e ywete. Ijayvu e'eay Jesu Kiristu rewarà amojenu erokwa ipi. A'e rupi Janejare'e okuwa pemokasiay pemomãatãa, tapejirovija jẽ ee. Karamoe remẽ Janejare'e nomojikuwaive ikewarà kõ pè mijã, Juteu rõwã mãe kõ pè. 26Age'e remẽ tè katu ojikuwapa ijupe kõ ky'y. Ijayvu mojenuarà kõ remikusiwarerà rupi katu ojikuwapa ky'y, Janejare'e oiko karuaru mã'ẽ ayvu rupi tè. Pirujẽ taa taa rupi omojikuwaoka ky'y, okasia rupi, ãwisõ pirujẽ jane kõ tojirovija ee ky'y. Ekoa rupi toiko kupa ky'y. 27Pe'ĩte Janejare'e. A'e rõmõ'ĩte pirujẽ okuwa mã'ẽ. Nuve pe'ĩ emikuwa e'ã mõ. Ajawyi kee tija'e: “Janejare'e, nuvei 'eteay mijẽsi nevo ikatuay mã'ẽ mõ!” tija'e, a'e tè Jesu Kiristu omuu janeupewarà mõ rewarà mõ. Õ'õ, awyje katu ãwĩvo jamoe'e karuaru jaiko ipi.

[Awyjepa eremikusiwarerà ãmẽ ky'y.]

Currently Selected:

Romã 16: oymNT

Highlight

Copy