Romã 15

Poropy'amokasia rewarà

1Aje ywete jajirovija Jesu rè remẽ, nojirovija ywe'ei ee mãe kõ ikatusa rupi tisipy'amokasi ipi. Ãmẽ tè kee ne'i'ãi kupa: “Jane kõrijõ tesi agyvo jaiko”, ne'i'ãi kupa, ojimomorijau kupa remẽ. Ajawyi janemorya rè kõrijõ rõwã jaja'a. Ãmõ kõ py'amokasia rè ywesõ jaja'a ipi. 2Ajawyi pejo Jesu koty rewarà kõ sipãtavõ ipi, janejãvijõ jẽ. Ãmẽ tè ojimokasità Jesu rè ojirovijaa rè kupa. Ory tevetà ãmẽ kupa. 3A'evo jaiko remẽ Kiristu reruparà mõ jaikotà. Wemimotarà rupi kõrijõ rõwã itõkõ Kiristu ekoi. Ajare kee e'ipa amãtejẽ ojikusiwa Kiristu ayvu rã rõmõ: “Ava mõ nemojaiwe remẽ, ije tè emojaiwe kupa”, e'i maekwerà.#Jĩg. 69.9

4Ikatusa rupi poroauvay wyi aepo e'i maekwerà. Eruparà rõmõ tijaiko ãmẽ. Pirujẽ Janejare'e kareta rè ojikusiwapa maekwerà ikatuay wete janemotekokuwa rõmõ. Janemokasi Jesu vãea siãrõ jẽ jakupa remẽ. Ikatuay wete tijaiko. Tijanererekoiva e'ã ãrõa. Aepo sikuwa Janejare'e kareta rupi.

5Janejare'e tè janepy'amokasi tijajipy jẽ ee ipi. Ajawyi kee a'e ijupe peupewarà mõ: “Papa. Romã taa wãnà kõ emokasi ipi, Kiristu Jesu reruparà mõ toiko kupa. A'evo remẽ ojevo jẽtà nemoe'età kupa”, a'e ijupe ipi. 6A'evo remẽ, ojevo jẽ simoe'età Janejare'e, Janerõvijã Jesu Kiristu Ruu. Ojiupiu katu ojevo jẽ simoe'età.

Ayvu katu ojenutà Juteu rõwã mãe kõ pè remẽwarà

7Ajawyi kee a'e jẽtà pejẽ. Jesu koty rewarà kõ tijareko katu ikenẽ. Tijaja'a katu ojee ipi, a'e pejẽ. Ãwitõ Kiristu janerauvay ipi, ãwĩvo ve jane kõ tijaauvay jaiko ipi. A'evo jaiko remẽ, kee e'ità ãmõ kõ janere omãjã: “Ikatuay wete Janejare'e remĩgwai kõ, ojiauvay ojeeve kupa upa”, e'ità kupa. Penewarà mõ omoe'età Janejare'e ãmẽ kupa.

8Kee a'e teve pejẽ. Pejapyaka katu eayvu rè! Juteu kõ pãtavõarà rõmõ teve Kiristu uu! Janejare'e wyi ivo tekoua rè poromo'earà rõmõ uu. Janejare'e wayvu ome'ẽma tãmõ Aparão kõ pè maekwerà rupi katu tè Jesu uu. 9Juteu rõwã mãe kõ mokasiarà rõmõ teve uu, ãwisõ “nekatuay wete” te'i Janejare'e pè kupa, omã'ẽ oporijauesaa rè kupa remẽ. Ajare kee e'i ojikusiwa Janejare'e kareta rè:

“A'evo rewarà mõ, ‘Nekatuay wete, Janejare'e’, a'età Juteu rõwã mãe kõ reminu rõmõ.

Ajĩga tevetà nemorya rõmõ”, e'i maekwerà.#2Sa. 22.50; Jĩg. 18.49

10Kee e'i teve ojikusiwa:

“Juteu rõwã mãe kõ, tapenoryvay ojeeve peiko, Janejare'e upewarà kõ reve. A'e Juteu kõ reve”, e'i.

11Kee e'i teve ojikusiwa:

“Juteu rõwã mãe kõ, Janejare'e tapemoe'e.

‘Naikoi 'eteay nevo ikatuay wete mã'ẽ!’ tapejẽ ijupe imoe'e.

Pirujẽ jane kõ aepo te'i imoe'e”, e'i ojikusiwa maekwerà.#Jĩg. 117.1

12Kee e'i tãmõ Isajasi ikusiwa [Jesu pewarà mõ]:

“Tãmõ Jese jeapyry rã kãramõ isakytà.#15.12 Jese eu tãmõ Tavi ruu pè. Ajawyi a'e jeapyrerà tè Jesu. Isa. 11.10; J.Jim. 22.16

A'e Janejare'e omoẽokatà Juteu rõwã mãe kõ rõvijã rõmõ toiko.

Ãmẽ tè ojirovija ee kupa remẽ, a'e rupi omokatua wãrõtà kupa”, e'i ikusiwa amãtejẽ.

13Janejare'e wyi tè janemokatua rã siãrõ jẽ jakupa. Ajawyi kee a'età Janejare'e pè peupewarà mõ: “Papa yvapewarà. Romã wãnà kõ ‘aje’ e'i ojirovija nere ipi. Epy'amory kõ. Epy'amopiryvypy katu kõ. Ãmẽ ywesõ ‘aje ywete’ e'ità neupe ne'Ãg kasia rupi, nerãrõ jẽ kupa remẽ”, a'età peupewarà mõ.

Pauru wauvay Romã taa pewarà kõ remẽwarà

14Akuwa ivo katu peiko ipi, eretãrãgwerà kõ. Petekokuwavay peiko ipi. Pekuwa pevote pejimotekokuwa ojeeve tè ivo tekoua rè ipi. Akuwa a'evo peiko ipi. 15Ajamã'ẽ aã kareta jikusiwarerà kõ pupe ajimokasi maevo sõ tite pemogetaa rè, tapenearai e'ã poromotekokuwa ee maekwerà wyi, a'e rewarà mõ tè. Ikatuay Janejare'e epyteporo pepytery pè taposiko. 16Juteu rõwã mãe kõ motekokuwaarà rõmõ epyteporo emono, ijayvu e'eay tamojenu ijupe kõ. Kiristu Jesu remĩgwai rõmõ aposiko, “aje” te'i ijupe kupa. “Aje” e'i Janejare'e pè mãe kõ araa maevo sõ tite ime'ẽ ipo pè. Omoe'età Janejare'e ãmẽ kupa. Kee e'ità kupa: “Ene ywesõ nekasi mã'ẽ rõmõ neiko. Orejarà tè ene”, e'ità ijupe kupa. Aepo jaa Janejare'e wenu remẽ, oryvaytà ãmẽ ee kõ. Ãmẽ si ikatutà ekoi kupa, Janejare'e rovake, i'Ãg tè jipy'amogetaa kõ oinõ ipi rewarà mõ. 17Kiristu Jesu revejẽ aiko mã'ẽ rõmõ aiko. Ajawyi eroryvay aiko, Janejare'e pè aposiko aiko remẽ.

18-19Age'e remẽ Kiristu reko Juteu rõwã mãe kõ pè amome'u ipi, Janejare'e pè “aje” te'i enu kupa. Eayvu wenu katu kupa amotekokuwa kõ ipi remẽ. Ãmõ, Jesu reruparà mõ aiko ovake kõ remẽ, omã'ẽ teve ere kupa ipi. Ãmõ, poromokatua rè omã'ẽ kupa ipi remẽ, “Aje ywete Janejare'e 'Ãg kasia rupi a'evo ekoi”, e'i kupa ipi. Ãwĩvo ijayvu e'eay Kiristu rewarà amojenu remẽ, najipiraui tesõ aiko. Ãwĩvo aiko ipi, Jerusarẽ taa pe wyi aa remẽ, Iririku yvy pijarà rupi amojenu jenu eraa ereko. Ajaate a'e pè avãe. 20Ajimokasiay wete ijayvu mojenua rè aiko ipi. Oiko tena kõ pewarà kõ pè nojenuive ijayvu e'eay Kiristu rewarà. Ajawyi a'e taa wãnà kõ pè ywesõ tamojenu, a'e eupe, a'evoa rè notekokuwaive kupa rewarà mõ. Ãmõ taa wãnà kõ pè ojenupa mã'ẽ pè, najimo'ãgatu ywe'ei a'e kyty taa, ãmõ kõ omojenupa teãmã a'e taa wãnà kõ pè rewarà mõ. 21Kee e'i Janejare'e ikusiwaoka a'evoa rè:

“Eewarà nojenuive ijupe mãe kõ omã'ẽtà ee ky'y.

Eewarà wenutà teve kupa ky'y”, e'i ikusiwaoka.#Isa. 52.15

[Aekwerà rupi katu aa jẽ Jesu Kiristu rewarà mojenu noenuive mãe kõ pè.]

22Apota tite aa penesa ipi mijã. Ajamã'ẽ a'e remẽ upi upi manyvo na'e'ãive aa ipi.#Rom. 1.13

“Aa jẽtà penesa”, e'i mã'ẽ

23Jypy remeve ajipy'amogeta penesaa rã rè ipi. Age'e ajipy'amogeta jẽ aiko ipi. Age'e si eposikoa ike rupiwarà opa ky'y. 24Ajawyi maevo aatà penesa ky'y. Esipajã yvy kyty aa aiko remẽ, akwatà penena rupi penesa. Aiko puku sa'utà pepyri ãmẽ. Apota epãtavõ pekupa eoa rã rè, Esipajã yvy pè taa.

25Ajamã'ẽ age'eve aatà rã'ĩ Jerusarẽ taa kyty. Janejare'e koty rewarà kõ remimonokwerà rõmõ aatà. 26Oiko a'e pè Jesu koty rewarà kõ mõ nimoma'ei mãe kõ mõ. Ajawyi Masetonia yvy wãnà kõ okarakuri mõ omoatypa imonookatà ijupe kõ. Akaja yvy wãnà kõ ve a'evo wereko. Ajawyi a'e kõ karakuri araatà rã'ĩ ime'ẽ Jerusarẽ taa wãnà kõ pè.#1Kor. 16.1-4 27Ovote wemikuwa kõ rupi tè a'evo wereko kupa. Ajamã'ẽ aje ywete a'evo toereko oposikoa rõmõ kupa. Juteu rõwã mãe kõ tè Masetonia wãnà kõ. Akaja yvy wãnà kõ Juteu rõwã mãe kõ teve. A'e kõ Jesu rè ojirovija ypy, Jerusarẽ taa wãnà kõ omotekokuwa kõ remẽ. Juteu kõ tè omotekokuwa kõ remẽ. Ajawyi opota okarakuri mõ omonooka ipãtavõarà ãrã kõ rõmõ. I'ete a'evo wereko kupa remẽ.#1Kor. 9.11

28Ajaire a'evoa opa remẽ, aatà Esipajã yvy kyty ky'y. A'e kyty aa remẽ, akwatà penena rupi ky'y. Ãmẽ apyta rã'ĩtà pepyri. 29Avãe pepyri remẽ, jajimoryvaytà ojee jaiko. Kiristu janerereko katua rè japoregetatà ojiupe jaiko. A'evoa rè japoregeta remẽ ywesõ janeroryvaytà jaiko.

30Kee a'e jẽ pejẽ, eretãrãgwerà kõ. Janerõvijã ywete rõmõ Jesu Kiristu ekoi. Ajawyi i'Ãg rupi tè jaiko jẽ jaiko ky'y. A'e rupi tè jajiauvay ojeeve jaiko ipi. Ajawyi tapeporegeta jẽ Janejare'e pè eupewarà mõ ipi, a'e pejẽ. 31Kee tapejẽ peporegeta ijupe eupewarà mõ: “Papa, yvapewarà. Pauru epãtavõ, Jerusarẽ taa kyty oo nekoty rewarà kõ karakuri reraa remẽ. Jypy remẽ nanererovijari mãe kõ Juteja yvy wãnà kõ opota Pauru momarama kupa mijã. Ajawyi a'e kõ wyi Pauru epijarĩ ereko katu. Ãmõ, a'e pewarà kõ nekoty rewarà emoryoka Pauru vãe rè. Taory emiraawerà opyy kupa remẽ, Papa”, tapejẽ. 32Aepo tapejẽ eupewarà mõ. Ãmẽ tè mokope avãe remẽ, eroryvaytà aiko, aje ywete Janejare'e opota aa remẽ. Jajimoryvaytà ojeeve ãmẽ ky'y.

33Janejare'e ikõ tapepy'amopiryvypy katu penereko ipi nẽ. A'e ikõ pepytery pè toiko pemokasiarà rõmõ penereko ipi nẽ. Õ'õ, awyje katu ãwĩvo jamoe'e karuaru jaiko ipi.

Currently Selected:

Romã 15: oymNT

Highlight

Copy