Romã 14

“Ikatusa rupi tijaiko Jesu koty rewarà kõ rõmõ jaiko”, e'i mã'ẽ

1Ikatusa rupi tijaiko Jesu koty rewarà kõ rõmõ jaiko ipi. Ojirovija ypy Jesu rè mãe kõ reve ywesõ ikatusa rupi tijaiko, a'e kõ nikasi ywe'ei Jesu rè ojirovijaa rewarà mõ. Ajawyi tijamory kõ jẽ ipi. Tijaaka kõ e'ã imosĩoka kõ ipi. 2Kee sõ remẽ. Ja'umã'ẽ wa rè tè aporegetatà pemotekokuwa. Ãmõgwerà “aje” e'i Janejare'e ayvu pè mã'ẽ pirujẽ ja'umã'ẽ o'u ipi. Ajamã'ẽ ãmõgwerà “aje” e'i Janejare'e ayvu pè mã'ẽ kee e'i: “Maevo Janejare'e nopotai o'okwerà ja'u remẽ ipi. Moma'eyva kõrijõ tè ja'u remẽ ikatu maevo ijupe”, e'i. A'evo ekoi kupa remẽ, nimanyvo ywe'ei Janejare'e rovake. Ajawyi kee naoty'ãi apijarà pè: “Ni'ei aepo ere”, naoty'ãi. 3Ajawyi tijarõarõ e'ã aepo e'i mãe kõ. A'evo ve a'evo ekoi mãe kõ toerõarõ e'ã iteetejẽ o'u mãe kõ, Janejare'e pirujẽ poropota katu ipi rewarà mõ. 4Janejare'e remĩgwai kõ tè jane pirujẽ, Jesu koty rewarà kõ rõmõ. Ajawyi nijamosã'ãga'ãi kuwa wemikuwa rupi tè o'u mãe kõ. Janerõvijã tè okuwa janeaiwererà. A'e tè aje ywete “ivo mã'ẽ tè ene” e'ità jane. Ajamã'ẽ nivoia rupi sõ jaiko remẽ, “nivoi ene” e'i tary ve jane ãmẽ. Janejare'e tè okasia ome'ẽ janepy'a pupe ipi, ãwisõ ivo tekoua rupi tijaiko jẽ jaiko, a'e pejẽ.

5Ãmõgwerà kee e'i: “Ojevo jẽ rõwã 'arà”, e'i ipi. Ajawyi, “Ãmõ 'arà remẽ naposiko'ãi. Janejare'e nopota'ãi ãmẽ”, e'i ipi. Janejare'e ory jẽtà aepo e'i mã'ẽ rè ipi. Ãmõgwerà pè ajamã'ẽ, ojevo jẽ 'arà kõ. A'e kee e'i ipi: “Nimanyvoi japosiko jẽ remẽ ipi. Ory jẽtà Janejare'e janere”, e'i ipi. Ajawyi kee a'e pejẽ. Tijajierõarõ e'ã ikõ ojeeve aepo jaa rè nẽ. Janevote janepy'a mãrãkuwa katua rupi kõrijõ tijaiko ipi, a'e pejẽ. 6Ojevo jẽ sipota Janejare'e mory ipi. Ajawyi ãmõgwerà kee e'i: “Aã 'arà mosikoa 'arà rõwã. Janejare'e moe'ea 'arà tè. Ajawyi aja'a pukutà ee”, e'i. Janejare'e oryvaytà aepo e'i mã'ẽ rè. Ãmõgwerà kee e'i teve: “Ja'umã'ẽ me'ẽarà tè Janejare'e. Ajawyi amoe'età aã o'okwerà rè”, e'i iwa. Ãmõgwerà kee e'i teve, moma'eyva kõrijõ tè o'u mã'ẽ: “Eremi'õ me'ẽarà tè Janejare'e. Ajawyi amoe'età ajimi'u remẽ”, e'i teve. Janejare'e orytà aepo e'i mãe kõ rè teve, ojevo jẽ opy'a pupeve omoe'e Janejare'e kupa rewarà mõ. [Ajawyi a'evo ve jaiko remẽ, tijaporegeta ai e'ã ojee, a'e pejẽ.]#Krs. 2.16 7Ma'e rewarà mõ aepo a'e. Janeupe kõrijõ tè rõwã jaiko ipi. Janejare'e upewarà rõmõ teve jaiko ipi. A'evo ve kãramõ jamãnõ remẽ, janeupewarà rõwã teve jamãnõtà. Janejare'e upewarà kõ rõmõ tè jamãnõtà. 8Janejare'e ãkarã tè jane wyi a'evotà jaiko. Ajawyi jakuve jẽ remẽ, ijupewarà mõ tè jaiko ipi. Ãwĩvo ve kãramõ, jamãnõ remẽ, ijayvu rupi jamãnõ tevetà. A'evo manyvo jaiko remẽ, Janejare'e upewarà kõ rõmõ tè jaiko. [A'e teve janemomoeratà ajaire.]

9A'evoa rõmõ Kiristu omãnõ. Aja paire opoera mijẽ Janerõvijã ywete rõmõ. Omãnõ mãe kõ Rõvijã ywete rõmõ ekoi. Nomãnõive mãe kõ Rõvijã ywete rõmõ teve ekoi.

10Pejẽ pa'e! Manyvo rewarà mõ põ pevoarà kõ pè kee pejẽ: “Nivoi rõwã pãkãwĩ ekoi?” pejẽ. Mano põ ãmõ kõ perõarõ tè ereko ipi? Mokoi! Kãramõ Janejare'e rovake jajimoatytà jajimome'u!#2Kor. 5.10 11Kee e'i Janejare'e ikusiwaokapa:

“Aje ywete, awyje jẽ pewarà tè ije aiko, Jõvijã wasu rõmõ.

Ajawyi kãramõ pirujẽ jane kõ ojimoenãpa'ãtà erovake emoe'e.

‘Janejare'e tè ene’, e'ità eupewarà mõ kupa, ijãvijõ kõ jẽ”, e'i ikusiwaokapa tijakuwa.#Isa. 45.23

12Aje ywete a'evotà jaiko ãmẽ, ijayvukwerà rupi katu. Janejare'e pè jajimome'upa katutà ike yvy pè janerekokwerà rè, janejãvijõ jẽ.

“Tijajavyoka e'ã Jesu koty rewarà kõ mõ pè ja'umã'ẽ wa rè ipi”, e'i mã'ẽ

13-14Ajawyi kee a'e pejẽ. Tijajimokasi ojee Jesu morya rè ipi. Tisimojaiweoka e'ã ãmõ kõ pè ipi. Nikatui nijamokasiokari ãmõ kõ pè Jesu jirovijaa remẽ ipi. A'evoa rè kee e'i Janerõvijã Jesu Kiristu imojikuwaoka ije. Pirujẽ ja'umã'ẽ ojevo jevo jẽ Janejare'e pè. Ajamã'ẽ ãmõgwerà kee e'i: “Eky'atà Janejare'e pè a'u remẽ”, e'i. Aepo e'i sõ remẽ, to'u e'ã aepo e'i paire, a'e. “Janejare'e morya rõwã a'evoa”, e'ipa opy'a pupe ajawyi. 15Aepo e'i mã'ẽ revejẽ jaiko remẽ, “Ajimoane'e jẽtà iwa”, tija'e e'ã. Jamosĩokatà aepo e'i mã'ẽ a'evo jaiko remẽ. Janeremi'õ rewarà mõ jamosĩokatà. Jajavytà ivo tekoua ãmẽ, poroauvaya rupi rõwã jaikotà rewarà mõ. A'evo sõ jaiko remẽ, nijaja'a'ãi ãmõ kõ py'amokasia rè jaiko. Janerewarà mõ maevo opoità Kiristu rupi tekoua wyi ãmẽ ky'y, ãwisõ Kiristu omãnõ ijupewarà mõ teve. Janeremi'õ rewarà mõ tè a'evo ywe'e titetà jaiko. 16Ma'e remẽ manyvo jaiko mã'ẽ ikatu ipe janeupe. Ajamã'ẽ ãmõ kõ pè maevo nikatui. Ãmẽ ãwĩvo remẽ, tijatekokuwa jẽ ãmõ kõ pytery pè jaiko. Ãmẽ tè noporegeta ai'ãi janere Jesu koty rewarà kõ rõmõ kupa. 17Kee rewarà mõ aepo a'e pejẽ. Janerõvijã ywete tè Janejare'e. Ajawyi jajirovija ee remẽ, ja'umã'ẽ rã rè rõwã jajipy'amogeta ipi. Ãmõ, jane'ywa kõ rã rè rõwã teve. Ivoa rupi tekoua rè tè jajipy'amogeta ipi. Ãmõ, poropy'amory katua rè teve jajipy'amogeta ipi. Janerorya rè teve. Janejare'e 'Ãg tè janemokasi a'evo tijaiko ipi. 18A'evo Kiristu rekoa rupi jaiko remẽ, ãmẽ si Janejare'e py'a rupi katuwarà rõmõ jaikotà ipi. Ãmõ kõ ve “ivo katu mã'ẽ tè ãwĩ” e'ità janeupewarà mõ kupa.

19Ajawyi ikatusa rupi tijaiko ãmẽ ipi. Tijajipy'amokasiay ojeeve Janerõvijã Jesu Kiristu rè jajirovija mãe kõ rõmõ jaiko ipi. 20Tijajavyoka e'ã ava mõ pè janeremi'õ rewarà mõ ipi. Aje, Janejare'e reminõgwerà tè pirujẽ ikatuay mã'ẽ teãmã. Ajawyi iteetejẽ ja'umã'ẽ ja'u kuwa ipi. [Moma'e ro'okwerà. Ãmõ, jay'u mã'ẽ. Ãwĩ ãwĩ kõ.] Ajamã'ẽ nojimi'ui iteetejẽ mãe kõ rovake emi'õ rõwã ja'u remẽ, sijavyokatà maevo ãmẽ ijupe kõ. Nikatui a'evo jaiko remẽ ipi. 21Poroereko katua rupi ywesõ tijaiko ipi. A'evo jaiko remẽ, nijajavyoka'ãi jane kõ pè janeremi'õ rewarà mõ ipi.

22Ãmẽ, “Nimanyvo'ãi iteetejẽ a'u remẽ”, ja'e remẽ, tijajimoe'e e'ã jane kõ rovake a'evoa rè ipi. Janejare'e kõrijõ tè aepo jaa okuwa. Sikuwa ivoa rupi jaiko remẽ, ivo tijaiko ãmẽ ipi. A'evo remẽ tijanerory kõrijõ ãmẽ jaiko.

23Ajamã'ẽ kee ja'e remẽ, tija'u e'ã: “Aje ipõ Janejare'e ory jẽtà ere a'u remẽ? Maevo naory'ãi!” ja'e remẽ. Aepo ja'e paire ja'u jẽ remẽ, “nikatu'ãi” e'ità Janejare'e janeupewarà mõ ãmẽ. Ãwisõ jajirovija ipe ee remẽ, nijajirovija ywe'ei ee. Ajawyi “aje ipõ” ja'e jẽ. Ajawyi ãmõ rupi tè jaiko remẽ, janeaiwererà sirekotà janereve ãmẽ. Janepy'a pupe nivoi jaiko.

Currently Selected:

Romã 14: oymNT

Highlight

Copy