Romã 10
10
1Eretãrãgwerà kõ, apota ywete ipe Isaeu kõ Janejare'e remireko katu kõ rõmõ toiko. A'e ywesõ apota mã'ẽ. Ajawyi Janejare'e pè aepo jaa rè aporanu ipi. 2Eretãrãgwerà kõ opota tite Janejare'e rekoa rupi ekoi ipi. A'evoa akuwa. Ajamã'ẽ Janejare'e pè ivo tekoua nokuwai kupa. Notekokuwai ee kupa ipi. 3Ãmõ, nokuwai manyvo Janejare'e wereko poroereko katu kupa ipi. Ajawyi ovote titegà opota ivo katu oiko Janejare'e rovake kupa ipi. Ajamã'ẽ Janejare'e rape wyi ojirova sire'e kupa ipi. Ivo tekoua rupi wyi ikãnĩ oo kupa. 4Ajamã'ẽ Kiristu rekoa wapyrasa Janejare'e ayvu ivo tekoua rewarà, tãmõ Moisesi pè okusiwaoka maekwerà. Pirujẽ Kiristu rè eako'i mãe kõ, Janejare'e oporijauesa ipi. A'evo “ivo mã'ẽ tè ãwĩ” e'i ijupe kõ ipi.
“Pirujẽ jane kõ rereko katua Janejare'e opota ipi”, e'i mã'ẽ
5Karamoe remẽ kee e'i tãmõ Moisesi: “‘Janejare'e ayvu ivo tekoua rewarà rupi aikotà’, pejẽ remẽ, pirujẽ ijayvu rupi katu tapeiko ikenẽ. Ãmẽ tè Janejare'e ‘ivo mã'ẽ tè ãwĩ’ e'ità pejẽ”, e'i maekwerà.#Tek. 18.5 6Ajamã'ẽ Kiristu rè janerako'i remẽ, “ivo mã'ẽ tè ãwĩ” e'i jane. Janepytery pè ekoi. Ajawyi kee nija'e'ãi: “Ava kuwa põ oo yva kyty Kiristu pijarà mõ?” nija'e'ãi. 7Ãmõ, “Ava kuwa põ oo omãnõ mãe kõ rena kyty Kiristu pijarà mõ?” nija'e'ãi teve. 8Kee e'i kuwa, Moisesi e'i maekwerà rupi katu: “Aã'ĩje'ẽ Janejare'e ayvu pewyi. Pejipy'amogeta kuwa ee. Peporegeta teve kuwa ee”, e'i maekwerà. Oreremimojenu pewarà mõ aepo e'i amãtejẽ.#T.M. 30.12-14
9-10Jesu omãnõ maire, Janejare'e omomoera mijẽ imopõ'ã mãnõa wyi. A'evoa pè “aje ywete” pejẽ remẽ, tapemojenu jenu ãmõ kõ pè erokwa. Kee jaa tapejẽ: “Jesu Janerõvijã ywete rõmõ tè ekoi ky'y”, tapejẽ imojenu erokwa. “Aje” pejẽ ijupe remẽ, peporijauesatà ãmẽ Janejare'e ky'y. Kee rewarà mõ. Janejare'e rè jajirovija janepy'a pè remẽ, janeporijauesa janerereko katu ipi. “Ivo katu mã'ẽ tè ene” e'i jane, “Erõvijã ywete Jesu” ja'e ijupe ipi remẽ. 11Ajare kee jaa ojikusiwa Janejare'e kareta rè: “Ava mõ sõ ‘aje’ e'i ijupe weako'i rõmõ remẽ, nojirovija pãnẽ'ãi ee, temirovija e'e tè rewarà mõ”, e'i ojikusiwa maekwerà.#Isa. 28.16 12Pirujẽ jane kõ pewarà mõ aepo e'i. Juteu kõ pewarà mõ aepo e'i. Ãmõ, Juteu rõwã mãe kõ pewarà mõ teve aepo e'i. Pirujẽ ikewarà kõ Rõvijã wasu tè Janejare'e. Ajawyi pirujẽ, “Epãtavõ rejupa”, e'i ijupe mãe kõ opãtavõtà. Owaray wereko katu kõtà ãmẽ. 13Ajare kee e'i ojikusiwa Janejare'e kareta rè: “Pirujẽ jane kõ ojiporijauesaoka ijupe mãe kõ oporijauesatà ereko katu”, e'i maekwerà.#Joeu 2.32
14-15Ajamã'ẽ kee jaa rè tapeja'a. Uve jane kõ mõ noenuive Janejare'e ayvu e'eay mãe kõ. Ava mõ nooive imojenuarà rõmõ. Ajawyi nojenuive ijupe kõ. Ajawyi “aje” ne'ive Janejare'e pè kupa. Manyvo ne'i'ãi ojiporijauesaoka ijupe ãmẽ kupa. Ava jamono too imomewa remẽ tè katu wenutà kupa ky'y. A'evoa rè kee jaa ojikusiwapa Janejare'e kareta rè: “Ijewe katuay ayvu e'eay mojenuarà”, ejaa.#Isa. 52.7
16Ajamã'ẽ Isaeu kõ pirujẽ rõwã “aje ywete” e'i weminuwerà pè ipi, a'e Janejare'e ayvu e'eay. Ajare kee e'i Isajasi ikusiwa maekwerà: “Erõvijã wasu, neayvukwerà oromojenu ipe remẽ, ‘aje’ ne'i oreremimojenuwerà pè kupa”, e'i ikusiwa maekwerà.#Isa. 53.1
17Kee rewarà mõ Kiristu rewarà oromojenu erokwa. Aepo wenu kupa remẽ tè katu “aje” e'i kuwa ijupe ojirovija ee kupa. Aja rewarà mõ tè.
18Ajamã'ẽ kee a'e pejẽ Isaeu kõ pewarà mõ. Nojenuive sipõ Janejare'e ayvu e'eay ijupe kõ? Ojenupa! Kee ojikusiwa maekwerà rupi katu:
“Pirujẽ yvy yvy wãnà kõ pè ojenu Janejare'e ayvu okwa.
Yvy popy kyty ijayvu ojenu okwa”, e'i maekwerà.#Jĩg. 19.4
19Ãmõ, kee a'e teve. Isaeu kõ aepo wenu remẽ, manyvore põ “aje” ne'i kupa? Nokuwai sipõ manyvo jaa tè wenu kupa? Okuwa ipe kupa. Ajare kee e'i tãmõ Moisesi Janejare'e ayvu mojenu ijupewarà kõ mõ:
“Pejẽ ‘aje’ napejẽi eupe, nererovija tari pekupa rewarà mõ. Juteu rõwã mãe kõ ãmẽ ‘aje’ e'ità.
A'e kõ rè poromojimõarõokatà [tepota pekupa] ãmẽ ky'y”, e'i maekwerà.#T.M. 32.21
20Ãmõ, kee e'i Janejare'e Juteu rõwã mãe kõ pewarà mõ. Isajasi pè e'i tomojenu: “Ãwisõ nerekai epe kupa remẽ. Ajamã'ẽ ajikuwaoka jẽtà ijupe kõ”, e'i.#Isa. 65.1 Aekwerà rupi katu tè a'evo ojikuwaoka jẽ ijupe kõ ky'y. Ojimokasi tesõ Isajasi Isaeu kõ rè aepo e'i remẽ. Nojipiraui aepo javo ijupe kõ. 21Isaeu kõ pewarà mõ ãmẽ kee e'i Janejare'e ikusiwaoka:
“Ajipomomojai epe ikoty kõ mijã.
Arokwapa tesõ 'arà iporijauesaa rã kõ rè mijã.
Ajamã'ẽ ojirova kõrijõ eayvu renu tare'ã wyi kupa.
Wemimota aiwerà rupi kõrijõ tè ekoi kupa”, e'i maekwerà.#Isa. 65.2
Currently Selected:
Romã 10: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
