Romã 9
9
“Isaeu kõ ypy Janejare'e opyteporo”, e'i mã'ẽ
1Aporegeta ipi remẽ, warikwerà rõwã amovyvy pejẽ ipi. Erõvijã Kiristu okuwa aje ywete a'e ipi. Epy'a kyty wyi tè aporegeta peupe. Janejare'e 'Ãg tè epy'a omomãrãkuwa katu aje ywete mã'ẽ ta'e ipi. 2-3Kee a'età pejẽ. Eretãrãgwerà Isaeu kõ reko rè eãgyoay aiko. Epy'a ayay tesõ ee kõ amãjã, “aje ywete” ne'i Janejare'e Remimuurerà pè kupa rewarà mõ. Eretãrãgwerà kõ tè ekoi kupa. Eremiauvay kõ tè kupa. Ajawyi eãpẽ tite ee kõ aiko ipi. Kee a'e kuwa Janejare'e pè mijã: “Ajimomorijau kuwasi eretãrãgwerà kõ rekovijarà kõ mõ mijã. Kiristu emoisyry kuwasi oovake wyi wemiemavo rõmõ mijã, eretãrãgwerà kõ toiko jẽ ipyri iko”, a'e kuwa mijã. “Ekoty jẽsi ejimõarõ, eatyry kõ teremokatu”, a'e kuwa ijupe kõ mijã.
4Karamoe remẽ itõkõ Isaeu kõ tè Janejare'e opyteporo oirõarà kõ rõmõ toiko kupa. “Eremĩgwai kõ tè pejẽ”, e'i ijupe kõ.#9.4 Aepo Janejare'e e'i tãmõ Aparão pè. Ãmõ, ta'yry Isaki pè. Ãmõ, Isaki ra'yry Jako pè. Jisyry. 4.22 Ãmẽ okatua omojisaoka ijupe kõ ipi. Kee e'i ijupe kõ: “Poroereko katutà ky'y”, e'i ijupe kõ. Janejare'e ijayvukasiay rewarà mõ, nojavy ekojẽi wemimojenuwerà kõ ipi. Wemikusiwaokarerà ome'ẽ teve ijupe kõ tokuwa ivo tekoua kupa. Ajawyi ivo katu Janejare'e moe'ea okuwa ipe kupa. Kee e'i teve ijupe kõ: “Eremime'ẽ rã kõ ame'ẽtà pejẽ, pejeapyrerà kõ pè teve”, e'i teve. 5Tãmõ Aparão kõ jeapyrerà kõ Isaeu kõ. Ãmõ, ijeapyry rõmõ teve Janejare'e Remimuurerà uu ojimojane osaky rõmõ. Ajawyi Isaeu mõ teve Kiristu. A'e ywesõ jane kõ 'arà kyty ekoi. Janejare'e tè teãmã rewarà mõ a'evo ekoi. A'e kuwasi jamoe'e karuaru kuwa mijã. Õ'õ, awyje katu ãwĩvo jamoe'e karuaru jaiko ipi.
6Kee jaa rõwã a'e pejẽ ajamã'ẽ. Janejare'e, “Poroereko katutà ky'y”, e'ipa tãmõ Aparão kõ pè paireve, wayvukwerà nomoteei, jaa na'ei. Kee rewarà mõ aepo na'ei. Pirujẽ Isaeu kõ pè rõwã “Isaeu e'e kõ” Janejare'e e'i. Kejõ kejõgà tè ojipytery pè aje ywete “Isaeu e'e mãe kõ” e'i. 7Kee itõkõ e'i Janejare'e tãmõ Aparão pè karamoe remẽ: “Nera'yry Isaki jeapyrerà kõ ootà nejeapyre'e kõ rõmõ kupa”, e'i maekwerà.#Jinõ. 21.12 Pirujẽ Aparão jeapyrerà kõ pè rõwã aepo e'i. Ta'yry Isaki jeapyrerà kõ pè kõrijõ tè aepo e'i. A'e kõ Janejare'e opyteporo wemĩgwai kõ rõmõ toiko kupa ky'y.
8-9Kee e'i teve oporegeta tãmõ Aparão pè karamoe remẽ: “Kãramõ ejoa 'arà pè katu ajo mijẽ remẽ, nererekwarà Sara imemytà ky'y, kwaima'e rõmõ”, e'i maekwerà.#Jinõ. 18.10,14; Kar. 4.22-23
Aekwerà rupi katu tè a'evo imemy ajaire sa'i Sara. Isaki eu imemyry rerà pè. A'e pewarà mõ kõrijõ tè “nera'yre'e tè” e'i Janejare'e Aparão pè, wayvukasia rupi tè omoãkarãoka rewarà mõ. “A'e Isaki jeapyrerà kõ pè kõrijõ tè ‘nejeapyry kõ’ a'età”, e'i Janejare'e tãmõ Aparão pè karamoe remẽ.
10[Ãmẽ ajaire tãmõ Isaki ojimovijapa remẽ, sa'i Repeka reve ojireko kupa.] Ajaire Repeka ipuru'a imemy. Ojipupewarà ja'yry rõmõ imemy. 11-12Nimemyrive remẽ, Janejare'e opyteporo amãtejẽ imemyry mõ oupe. Imemyry takypyporà opyteporo amãtejẽ, Jako eu ijupe mã'ẽ. Ajare kee e'i Janejare'e ijy pè: “Nememyry takypyporà joãkãmorà 'arà kytywarà rõmõ ekoità”, e'i amãtejẽ ijy pè.#9.11-12 Isaeu eu teve tãmõ Jako pè. Ajawyi ijeapyrerà kõ pè teve Isaeu kõ eu. Jinõ. 25.23 Nisakyi kupa remeve, aepo e'i Janejare'e ijupewarà kõ mõ. Wemikuwa rupi tè aepo e'i. Ajawyi ivo ekoia kupa remẽ rõwã opyteporo Jako. Wemikuwa rupi tè opyteporo. 13A'e kõ rè kee e'i ikusiwaoka ajaire Jako jeapyrerà kõ pè: “Penãmõi Jako tè apyteporopa eremiau rõmõ. Teke'yry Esau rõwã”, e'i maekwerà.#Marak. 1.2-3
14Wemikuwa rupi tè pe'ĩte opyteporo, mõrijõ revejẽ rõwã! Ajamã'ẽ “nivoi opyteporo” naoty'ãi Janejare'e pè ipi! 15A'evo rè kee e'ipa Moisesi pè: “Eremikuwa rupi tè poroporijauesatà. Eremimotarà kõ tè aporijauesatà”, e'ipa Janejare'e.#Jisyry. 33.19
16Ajawyi jane kõ remimotarà rupi rõwã a'evo poroereko. Wemimotarà rupi tè a'evo ekoi. Poroporijauesa remẽ tè katu poroporijauesa ipi. 17Karamoe remẽ kee e'i oporegeta imuu [Ejitu pewarà rõvijã wasu] Parao pewarà mõ: “Apota nejimojõvijã rewarà mõ tè nejimojõvijã. Ekasia ywesõ nekasia wyi. Nerupi ekasia amojikuwaokatà pirujẽ jane kõ tomã'ẽ ee. Ekasia pirujẽ yvy wãnà kõ pè ojenutà”, e'i Janejare'e [Moisesi rupi imuroka] maekwerà.#Jisyry. 9.16
18A'evo wemikuwa rupi tè Janejare'e poroporijauesa poroereko ipi. Ãwĩvo ve ãmõ kõ oity, tojimomãatã jẽ ijayvu renu tare'ã kupa.
“Janejare'e wemikuwa rupi tè poroereko ipi”, e'i mã'ẽ
19Kee e'i titetà maevo ava mõ pepytery pewarà mõ eupe: “Janejare'e kee e'i: ‘Pevote pejimomorijauoka, peaiwererà kõ rewarà mõ’, e'i. Ni'ei aepo e'i mã'ẽ ajamã'ẽ. Emã'ẽ. Jo'arà kyty tè Janejare'e ekoi mijã. Ovote wemimota rupi tè poromomorijau ipi. Manyvo nijareko'ãi ãmẽ, a'evo ekoi remẽ”, e'i titetà maevo. 20Aepo e'i mã'ẽ pè kee a'età. Ejimorypa, ava ekojẽ ikasità aepo jaa Janejare'e ayvuvaja vaja. Iwyry kytywarà kõ tepa jẽ jaiko pirujẽ. Ma'e. Ãwitõ turuwa reinõgarerà, a'evo ve Janejare'e janereinõgarerà tè. Turuwa reinõgarà rè tè poroã'ãtà tapekuwa sa'u. Turuwa kee ne'i'ãi kuwa oinõgarerà pè: “Manyvore põ ijeje'ẽ agyvo 'ejẽ ereinõ rejupa?” ne'i'ãi kuwa turuwa oinõgarerà pè. Ãwĩvo ve nija'e'ãi kuwa Janejare'e pè mijã.#Isa. 29.16; 45.9 21Kee jaa rè emã'ẽ. Yjy jarà turuwa oinõtà remẽ, wemikuwa rupi tè oinõ ipi. A'e ojo'o rã'ĩ yjy oinõtà turuwa rõmõ inõ. Ãmẽ e'ità oupe, oinõtà remẽ: “Pe'ĩ turuwa mõ temi'õ rena rõmõ ainõtà. Ãmõ, ute upa rõmõ ainõtà, turuwa eremimotarà rõmõ, ikatuay mã'ẽ rõmõ”, e'i. Wemikuwa rupi tè oinõ turuwa kõ ipi. 22Manyvo ja'età põ a'evo 'evoa rè? Kee e'i Janejare'e oupe: “‘Eremiporijauesa e'ãmarà rõmõ amoma kõtà amãtejẽ’, na'ei. Ajamã'ẽ eayvu noenui mãe kõ pè”, e'i. “Aje ajimõarõay ijaiwererà kõ rè. Ajimõarõay mã'ẽ amojikuwaokatà. Ãmõ, ekasia amojikuwaokatà teve. Ajamã'ẽ najikõtevẽi imomorijaua kõ rè aiko. Emavoa kõ rè najikõtevẽi aiko”, e'i. 23Ãwĩvo Janejare'e omojikuwaoka okatuaya. Kee e'i amãtejẽ: “Eremiporijauesatarà kõ eayvu wenutà. Era'yry rè eako'ità kupa”, e'i. Janeupewarà mõ tè aepo e'ipa teãmã. Janeporijauesa wyi tè aepo e'i. [Jesu rè janerako'i Janerõvijã ywete rõmõ ãmẽ ky'y.] A'evoa rè Janejare'e simoe'e.
24Janejare'e tè janepyteporo okoty rewarà kõ rõmõ tijaiko. Juteu kõ pytery pe wyi janepyteporo. Ãmõ, Juteu rõwã mãe kõ pytery pe wyi teve janepyteporo. 25Kee e'i Janejare'e ikusiwaoka wayvu mojenuarà pè. Oseja eu ijupe mã'ẽ pè kee e'i:
“Ãmõ kõ ekoty rewarà kõ rõwã ekoi mijã.
Ajamã'ẽ ekoty rewarà kõ rõmõ areko kõtà ky'y, e'i.
Aauvay kõtà ereko kõ ky'y, e'i.
Ãmõ yvy wãnà kõ teve eremiauvay kõ rõmõ ekoi tary ve.
Naau kõi e'ete maekwerà kõ a'evo arekotà”, e'i ikusiwaoka.#Ose. 2.23
Aekwerà rupi katu janerereko ky'y. 26Kee e'i teve ikusiwaoka:
“‘Eatyryjarà rõwã pejẽ’, a'e mokope taa wãnà kõ pè mijã.
Ajaire a'e wãnà kõ pè tẽ tesõ, ‘Janejare'e oiko jẽ iko mã'ẽ ãkarãgwerà’, eutà ijupe kõ kãramõ”, e'i.
27Ãmõ, kee e'i ijayvu mojenuarà Isajasi ikusiwa:
“Isaeu kõ ijatyray ipe.
Ãwitõ ysĩ ku'ikwerà vo tesõ ipe ijatyray kupa.
A'evo ipe remẽ ãmõ ãmõgwerà tè Janejare'e wereko katutà opyri ipi.
28Ke'ĩ Janerõvijã ywete nivoi mãe kõ wepyme'ẽokatà ky'y, ijaiwererà kõ rewarà mõ”, e'i Isajasi ikusiwa maekwerà.#Isa. 10.22-23
29Kee e'i teve Isajasi imojenu:
“Karamoe remẽ Sotoma taa wãnà kõ nivoi tesõ ekoi.#9.29 Karamoe remẽ Janejare'e omoma Sotoma wãnà kõ tata wasu pè jimo'yjẽ, ijaiwererà kõ rewarà mõ. Komora wãnà kõ teve a'evo wereko. Jinõ. 19.24-28; Mat. 10.15; 11.24; Isa. 1.9
Ãmõ, Komora taa wãnà kõ ivo kõ jẽ nivoi ekoi kupa.
Ajawyi Janejare'e omoma kõ jimo'yjẽ karamoe remẽ.
Ãwĩvo ve Janejare'e jo'arà kytywarà sõ nijaneporijauesai remẽ, janemoma kuwa ve mijã.
Ajawyi ãmẽ jane ve nijaiko'ãi mãrãgwe age'e remẽ mijã.
Ãwitõ nijeapyi 'ete kupa, ãwĩvo ve nijanejeapy'ãi 'ete kuwa mijã”, e'i maekwerà.
“Ijatyray Isaeu kõ noerovijai”, e'i mã'ẽ
30Kee ne'i Juteu rõwã mãe kõ: “Manyvo a'e kuwa ivo mã'ẽ rõmõ Janejare'e rovake aiko?” ne'i. Nojimo'eai ywe'ei ivo oikoa rè kupa. Ajamã'ẽ a'evo ipe kupa remẽ, Janejare'e ivo mãe kõ rõmõ wereko kõ, “aje” e'i ijupe kupa remẽ. 31Isaeu kõ ãmẽ ojimokasi epe ivo oikoa rupi katu toiko. “Janejare'e janemoe'età ãmẽ”, e'i tite kupa. Ajamã'ẽ Janejare'e katuaya rè naeako'i tite kupa. Ajawyi “nivoi mã'ẽ tè ãwĩ” e'i jẽ Janejare'e ijupe kõ. 32Manyvo rewarà mõ pãwĩvo Juteu kõ? Weko katua règà eako'i tite kupa. Janejare'e omuu Wa'yry janerereko katuarà rõmõ toiko remẽ, naeako'i ee kupa. Nojirovija tari ee kupa. Ãwitõ jajipyãkãmota takuru rè ja'a, ãwĩvo maevo sõ tite ekoi kupa. 33Ajare kee e'i amãtejẽ Janejare'e ikusiwaoka [Isajasi pè] wemimuu rã pè:
“Aesapa jane kõ Rõvijã ywete, kee ekoi mã'ẽ vo.
Ãwitõ tetã reinõgarà kõ takuru tetã oinõtà remẽ, takuru ikatuay wete ypy wesa tetã ãparõga rõmõ kupa ipi.
Ãwĩvo ve ikatuay wete mã'ẽ aesapa jane kõ Rõvijã ywete rõmõ toiko, e'i.
Erena pè, Jerusarẽ taa pè ekoità.
Sião taa eu teve mã'ẽ pè ekoità.
Ajamã'ẽ ‘aje’ ne'i ywe'ei tite ijupe kupa.
Ajawyi jajipyãkãmota mã'ẽ vo 'ejẽtà tè a'e ijupe kõ.
Waiteve ava mõ eako'i ee remẽ.
Nojirovija pãnẽ'ãi ee, temirovija e'e tè rewarà mõ”, e'i Janejare'e ikusiwaoka maekwerà.#Isa. 8.14; 28.16; 1Pe. 2.8
Currently Selected:
Romã 9: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
