Romã 11

Juteu kõ porijauesaa rewarà

1Ajare kee a'e pejẽ. Oitypa sipõ Janejare'e Isaeu kõ? Ãnĩ! Noity kõi. Opota jẽ ereko katu kõ! Uve jẽ ipõ'õ mè aje ywete Janejare'e rè oja'a mãe kõ. Ije ve a'e mõ tè. Isaeu jeapyrerà teve ije, Aparão jeapyrerà rõmõ. Ipary Pejãmĩ#11.1 Tãmõ Jako ra'y mitikwerà tè Pejãmĩ. jeapyrerà rõmõ tè aiko. 2Aje Janejare'e wemipyteporokwerà wyi nopoi ipi. Karamoe remẽ opyteporo kõ. Pekuwa manyvo tãmõ Eriasi#11.2 Janejare'e ayvu mojenuarà karamoe remẽwarà mõ Eriasi. e'i Janejare'e pè Isaeu kõ pewarà mõ, nivoi wereko kupa remẽ. Kee e'i itõkõ: 3“Erõvijã ywete, nemoe'ea rena kõ omotororopa ity kupa. Neayvu mojenuarà kõ wapisipa kupa. Ije rõmõ'ĩte ajuve jẽ, neayvu mojenuarà rõmõ aiko. Age'e ‘sijuka’ e'i eupewarà mõ ojiupe kupa”, e'i maekwerà.#1To. 19.10,14

4Kee e'i Janejare'e tãmõ Eriasi pè ãmẽ: “Ene rõmõ'ĩte rõwã nejuve jẽ. Uve jẽ mõa'ãrõwã aje emoe'e jẽ mãe kõ. 7.000 rõmõ tesõ ekoi kupa. A'e kõ nopoi ekojẽ'ãi tesõ ewyi kupa. Ijarà rã'ãga, Pavu eu ijupe mã'ẽ, a'e rè nojimoryi 'ete imoe'e rã'ãga kupa”, e'i Janejare'e tãmõ Eriasi pè.#1To. 19.18

5-6Aekwery vo jẽ age'e remẽ. Uve jẽ Isaeu kõ põ'õ mè aje Janejare'e rè ojirovija mãe kõ, “aje” e'i Janejare'e Remimuurerà pè wereko katuarà rõmõ mãe kõ. A'e kõ eko katua rewarà mõ rõwã Janejare'e opyteporo kõ. Poroporijauesaa rupi tè opyteporo kõ. Ivo jaiko rewarà mõ sõ janepyteporo remẽ, poroporijauesaa naoty'ãi kuwa janepyteporoa pè ãmẽ mijã.

7Pejapyaka katu ikõ eayvu rè nẽ. Isaeu kõ opota tite ojimokatu kupa ipi. Ajamã'ẽ nojimokatui sire'e kupa ipi. Ajamã'ẽ a'e kõ põ'õ mè ãmõ ãmõgwerà ojiporijauesaoka Janejare'e pè iko. Ajawyi a'e kõ kõrijõ tè Janejare'e oporijauesa imokatu kõ, wemipyteporo kõ rõmõ. Isaeu kõ pẽgà kõrijõ tè a'evo ekoi. Ãmõ kõ noenu tari Janejare'e ayvu. Nojiporijauesaokari e'ete ijupe kupa. 8Kee e'i ojikusiwaoka ijupewarà kõ mõ:

“Noerovija tari kupa.

Ajawyi Janejare'e oke taray mãe kõ vo 'ejẽ oinõ kõ.

Naeai mãe kõ vo 'ejẽ oinõ kõ teve.

Nijapyai mãe kõ vo 'ejẽ oinõ kõ teve.

Aekwery vo jẽ ekoi kupa, ajaate age'e”, e'i Janejare'e ijupewarà kõ mõ.#T.M. 29.4; Isa. 29.10

9Kee e'i teve tãmõ Tavi Janejare'e pè a'e kõ pewarà mõ:

“Emono tojimoripeoka ovote kupa, nivoi jẽsi tojipy'amogeta kupa.

Jimi'u wasua mõ eã'ã kõrijõ tè ovake kõ tojuwei pãnẽ kupa.

Ãwisõ ojimomorijauoka tesõtà ãmẽ kupa.

Ãwĩvo remẽ tè ojimomorijautà waiwererà repykarà mõ kupa.

10Ãmõ, omoeapãtõnusu kõ moma'e rè tomã'ẽ e'ã kupa.

Ojimomorijau mãe kõ rõmõ einõ kõ.

Ãwitõ ojiapepy nopõ'ã'ãi ipi tãwĩvo”, e'i tãmõ Tavi Janejare'e pè.#Jĩg. 69.22-23

11Ajawyi kee a'e tarà mijẽ pejẽ. Janejare'e oitypa e'e jimo'yjẽ sipõ Isaeu kõ? Ãnĩ! Oity kõ rã'ĩ tè. Nojirovija tari ee kupa wyi tè a'evo wereko kõ. Ajawyi tè Juteu rõwã mãe kõ kytyre ojirova. Wereko katu kõ ijaiwererà kõ repyka wyi. A'evoa rè Isaeu kõ omã'ẽ remẽ tè, kee e'ità maevo kupa: “Ivo kõ kuwasi jane!” e'ità maevo ãmẽ kupa ky'y. Kee e'i Janejare'e oupe: “Ãmẽ tè ojirova tarà mijẽ ekotyre kupa”, e'i. A'evoa rõmõ tè oity kõ rã'ĩ. 12Ajawyi age'e remẽ Juteu rõwã mãe kõ ywesõ oporijauesa rã'ĩ ky'y, ee ojirovija mãe kõ rõmõ. Juteu kõ “aje” ne'ive Janejare'e Remimuurerà pè wereko katuarà rõmõ. Ojirovija ee kupa ky'y remẽ ywesõ ikatuay wetetà janeupe. Juteu kõ, Juteu rõwã mãe kõ, mokopejõ “aje” ja'e ijupe mãe kõ rõmõ jaiko.

Juteu rõwã mãe kõ porijauesaa rewarà

13Juteu rõwã mãe kõ pè aporegetatà ky'y. Kee a'e pejẽ. Janejare'e tè epyteporo emono pemotekokuwaarà rõmõ, ijayvu e'eay mojenuarà rõmõ taiko pepytery pè. A'evoa rè ajimokasiay aposiko aiko ipi. Eroryvay aposiko remẽ ipi. Apota Janejare'e taory eposikoa rè. 14Maevo pene aposiko pemotekokuwa remẽ, eretãrãgwerà Juteu kõ ojimõarõtà maevo pene omãjã. A'e kõ mõ ojiporijauesaokatà Janejare'e pè ãmẽ ky'y. A'evo eposikoa rupi a'e kõ mõ Janejare'e wereko katutà. 15Janejare'e opoi rã'ĩ iwyi kõ remẽ, ikatuay peupe. Ajamã'ẽ eretãrãgwerà kõ ojirova mijẽ ikotyre remẽ ywesõ ikatuaytà pirujẽ janeupe ky'y. Ãwitõ omãnõ mãe kõ opoera opõ'ã mã'ẽ vo 'ejẽtà ekoi ãmẽ kupa ky'y.

16Ãwitõ Juteu kõ ypykwerà Janejare'e opyteporo oupewarà rõmõ toiko, ãwĩvo ve ijeapyrerà kõ ve a'evo ekoità.#P.Moirõ. 15.17-21 17Temitã'y vo 'ejẽ Juteu kõ ypykwerà, tãmõ Aparão. Temitã rãkã kõ vo 'ejẽ ãmẽ ijeapyrerà kõ.#P.Moirõ. 15.17-21 Ãkã jaeta imomo mã'ẽ vo 'ejẽ Juteu kõ Janejare'e wyi ojirova mãe kõ. Pejẽ, ãmõ rãkã jaãpatarõ ekovijarerà rõmõ mã'ẽ vo 'ejẽ pejẽ, Juteu rõwã mãe kõ rõmõ. A'evo peypykwerà rõmõ maevo sõ tite tãmõ Aparão ky'y. 18Ajawyi kee tapejẽ e'ã Isaeu kõ pewarà mõ: “Haa! Ãwĩvo si ãwĩ kõ nivoi ekoi. Ajawyi Janejare'e weta kõ ity. Jane jẽ Janejare'e janepyteporo oupewarà mõ”, tapejẽ e'ã erõarõ kõ rõmõ peiko. Tapeau kõ jẽ ereko. Kee jaa rè tapeja'a. I'y rupi ikasia oike ãkã mokasia mõ ipi. Ãkã osinĩma remẽ, ikasi jẽ kuwa i'y. Noikei ikasia ãkã rupi. Ãkã rupi sõ oike ikasia mõ remẽ, uve jẽ kuwa ãkã mõ i'y omãnõ remẽ mijã. Emã'ẽ. Ãkã vo tè pejẽ. A'evo pejẽ, Janejare'e penau, Juteu kõ ypykwerà rupi tè penau. Ajawyi tapejimoe'e ywe'e tite e'ã peiko. 19Kee tapejẽ tite e'ã pejimoe'e rõmõ peiko: “Õ'õ, aje, ãkãgwerà jaeta imomo mãe kõ vo 'ejẽ Juteu kõ”, tapejẽ e'ã. “Ãkãgwerà weta imomo mã'ẽ rekovijarerà rõmõ janereinõ ipi. Janeupewarà mõ weta kõ ity kõ”, tapejẽ tite e'ã. Peupewarà mõ rõwã weta kõ. Ojirova iwyi kupa rewarà mõ tè weta kõ!

20Õ'õ, aje ywete ajamã'ẽ a'evo ekoi. Ajawyi tapetekokuwa a'evoa rè peiko ipi. Ãwitõ temitã rãkã jaeta imomo, ãwĩvo ve Janejare'e opoi rã'ĩ Juteu kõ wyi, noerovija tari ijayvu kupa rewarà mõ. Ajawyi mokoi. Kee tapejẽ kõrijõ tè: “Ivo kõ taiko ywe'e tite e'ã”, tapejẽ. Ãmẽ ywesõ tapemomojy Janejare'e. Ikatu ikõ Janejare'e rè pejirovija ajawyi nẽ, a'e pejẽ. 21Emã'ẽ. Ãwitõ Janejare'e noporijauesai Juteu kõ ojirova iwyi kõ remẽ, napeporijauesa'ãi teve pejirova iwyi remẽ. 22A'evoa rè jamã'ẽ remẽ, Janejare'e katua sikuwatà ky'y. Ipojya sikuwatà teve. Ojirova iwyi mãe kõ noporijauesai. Ajamã'ẽ janeporijauesa, janerako'i ee jaiko remẽ ipi. Ikatuaya rè penako'i jẽ peiko remẽ, ikatuaytà peupe. Ajamã'ẽ pepoi sõ iwyi remẽ, temitã rãkã jaeta imomo mã'ẽ votà tè pejẽ peiko ãmẽ ky'y.

23Emã'ẽ. Janejare'e opota jẽ Juteu kõ oporijauesa. Ojirova mijẽ ikotyre kupa remẽ, oporijauesa jẽtà ereko kõ. Keetà ãmẽ. Ãwitõ ãkãgwerà jaeta imomo maekwerà jaeru mijẽ imojipy mijẽ ee, ãwĩvo 'ejẽ wereko kõtà ãmẽ Janejare'e.

24Pejẽ pa'e, Juteu rõwã mãe kõ. Temitã rãkã jaeta imojipy ekovijarerà pè mã'ẽ vo 'ejẽ tè pejẽ, ãwisõ Janejare'e remipyteporo kõ rõmõ tapeiko ky'y. Ajamã'ẽ Juteu kõ temitã rãkã e'e vo 'ejẽ ekoi ky'y. Ajawyi niwaujẽ'ãi Janejare'e omojivy mijẽ imojipy mijẽ aekwerà rè. A'evo ve niwaujẽ'ãi teve oity rã'ĩte maekwerà kõ omojivy mijẽ, wemipyteporo kõ rõmõ toiko kupa ky'y.

“Janejare'e pè pirujẽ ojevo jẽ”, e'i mã'ẽ

25Eretãrã kõ, temikuwa e'ã amome'utà pejẽ ky'y. Isaeu kõ taperõarõ ywe'e tite e'ã, a'e pejẽ. Aje, a'e kõ noerovija tari Janejare'e ayvu. Ojimoane'e jẽtà kupa, ajaate pejimoatypatà Janejare'e koty rewarà kõ rõmõ peiko. Ãmẽ tè ojirova tarà mijẽ ikotyre watyray rõmõ kupa ky'y. 26A'evotà pirujẽ Isaeu kõ. Janejare'e oporijauesa kõ tarà mijẽ ereko katu kõ rõmõ, eako'i ee kupa remẽ. Ajare kee jaa ojikusiwapa Janejare'e kareta rè:

“Eremimuu penereko katuarà rõmõ uutà, Sião taa pe wyi.#11.26 Sião taa eu teve Jerusarẽ taa pè, Sião yvytyry 'aryvo tui rewarà mõ.

A'e omagookatà Jako jeapyrerà kõ ijaiwererà kõ wyi ereko kõ ky'y.

27Ijaiwererà kõ aitypypyipaokatà ijupe kõ ãmẽ ky'y”, e'i.

“Aje ywete a'evo areko kõtà”, e'i maekwerà.

28Juteu kõ ojirova Janejare'e wyi ijayvu e'eay renu tare'ã. Ajawyi Janejare'e rõvajãrà rõmõ tè ekoi rã'ĩ kupa. Ajawyi maevo sõ tite Jesu Kiristu rè pejirovija mãe kõ rõmõ tè pejẽ ky'y, Juteu kõ rekovijarerà rõmõ. Ajamã'ẽ Janejare'e wauvay kõ jẽ, ijypykwerà kõ rewarà mõ. “Eremipyteporokwerà kõ tè ãwĩ”, e'ipa karamoe remẽ tãmõi kõ pè rewarà mõ. 29Janejare'e nomoteei wayvukwerà ipi. “Ãwĩ kõ apyteporotà eremĩgwai kõ rõmõ”, e'i paire, aje ywete aekwerà rupi katu a'evotà ekoi. Nomotee'ãi wayvukwerà ipi.

30Jypy remẽ itõkõ pejẽ Janejare'e naperovijari peiko mijã, Juteu rõwã mãe kõ rõmõ. Ajamã'ẽ age'e remẽ Janejare'e peporijauesapa ky'y, Juteu kõ noerovija tari rewarà mõ. 31Ãwitõ peporijauesa penereko, ãwĩvo ve Juteu kõ oporijauesatà kãramõ ereko kõ. Ojirova tarà mijẽ ikotyre kupa, peporijauesaa rè omã'ẽ kupa remẽ. Ãmẽ sõsi ojevo jẽ emiporijauesa kõ rõmõ jaikotà ky'y. 32A'evoa rupi janeporijauesaa omojikuwa. Ojevo jẽ wereko Juteu rõwã mãe kõ, Juteu kõ revejẽ. Temiemavo kõ rõmõ rã'ĩ janerereko pirujẽ, nisirovijai mãe kõ rõmõ, ãwisõ emiporijauesa kõ rõmõ toiko ojevo jẽ kupa ky'y.

“Janejare'e simoe'e”, e'i mã'ẽ

33Ajare kee ja'e Janejare'e pewarà mõ imoe'e. Ikatuay wete! Otekokuwavay! Ava jẽ rõwã okuwapa itekokuwavaya. Nisikuwai 'ete Janejare'e jipy'amogetaa. Ekoa nisikuwai 'eteay teve.#Isa. 55.8 34A'evoa rè kee e'i ojikusiwa Janejare'e kareta rè:

“Janerõvijã ywete jipy'amogetaa nijakuwai 'eteay.

Naikoi 'eteay imotekokuwaarerà.#Isa. 40.13

35Moma'e jẽ rõwã opyy jowyi, epykwerà tijapyy iwyi”, e'i maekwerà.#Jo 41.11

36Pirujẽ reinõgarerà tè Janejare'e. Ikasia rupi tè eminõgwerà kõ oiko. Ajawyi simoe'e ywete eminõgwerà kõ rõmõ, pirujẽ janereinõgarerà tè ãwĩ rewarà mõ. A'e kuwasi jamoe'e karuaru kuwa mijã. Õ'õ, awyje katu ãwĩvo jamoe'e karuaru jaiko ipi.#1Kor. 8.6

Currently Selected:

Romã 11: oymNT

Highlight

Copy