Rukasi 8
8
Wãivĩgwerà Jesu opãtavõ mãe kõ rewarà
1Aja paire Jesu taa kõ rupi oo oo poromo'e Janejare'e ayvu e'eay rè. “Janejare'e tè kuwa simojõvijã Janerõvijã rõmõ”, e'i Jesu imojenu erokwa. Ãmõ tena wãnà kõ pè aepo e'i teve rõnõ. A'evo remẽ emimo'ekwerà kõ ve oo upi ipi. 12 rõmõ opyteporo maekwerà kõ oo upi.
2A'evo remẽ wãivĩgwerà kõ ve oo upi kõ ipi. Jesu remimokatukwerà kõ tè ãwĩ kõ. Ma'e, ãjãgaiwerà ojimorara ee maekwerà kõ. Ãmõ, itekorã maekwerà kõ. Kejõ oo upi kupa: Maria Matarena. Jypy remẽ ãjãg kõ 7 rõmõ ojimorarai ywete ee mijã. 3Ãmõ oo upi mã'ẽ pè Joana eu. Kusa rerekwarà rõmõ Joana. Ma'e, kovenatu Eroti retã mè oposiko mãe kõ rõvijã rõmõ tè Kusa. A'e rerekwarà oo teve Jesu rupi. Ãmõ, Susana eu ijupe mã'ẽ ve oo Jesu rupi. Ãwĩ ãwĩ kõ oo upi ãmẽ. Ãmõ ãmõ kõ ve oo upi. A'e a'e kõ opãtavõ Jesu, emimo'ekwerà kõ reve. Omoma'enõ Jesu kõ okarakuri kõ pè kupa ipi.#Mat. 27.55-56; Mak. 15.40-41; Ruk. 23.49
Temitã rã'ãigwerà rè tè Jesu poromosã'ãga remẽwarà
(Mateusi 13.1-9; Maku 4.1-9)
4Ajaire taa taa kõ kyty wyi aty wasu uu uu ojatykapa Jesu pyri ijayvu renu kupa. Ãmẽ kee e'i Jesu poromo'e:
5[– Janejare'e ayvu rè poromo'ea a'evo ve jimitãa ipi. Ãwitõ temitãgwerà ãmõgwerà oryvay ipi. Ãmõgwerà naoryi ipi. A'evo ve jane kõ Janejare'e ayvu wenu kupa remẽ ipi.] Poromosã'ãgatà a'evoa rè age'e ky'y. Ãmõ 'ary pè koo jarà oo ojimitã. Moma'e rã'ãigwerà sirikwerà omopepei itã okoo rupi erokwa. Ãmẽ a'evo remẽ ã'ãigwerà mõ pee peve o'a. Apykyrerà kyty a'e 'aryvo ãmõ kõ opãrõ. Wyra kõ o'u teve ãmõ. 6Ãmõgwerà omopepei remẽ, takuru 'arà rupi tè o'a. A'e kõ oẽ ajaire. Oẽ gatu rã'ãga. Noiko pukui ajamã'ẽ. Oovi rã 'ejẽ opa, yy e'ãma pè tè tui rewarà mõ. 7Ãmõgwerà joõ pytery pè o'a tite. A'e oẽ ipegà mijã. Ajamã'ẽ joõ ywesõ oẽ i'arà kyty ijapisipa. 8Ãmõgwerà ikatukwerà pè o'a oẽ. A'e sõsi oẽ oory rõmõ ky'y. I'a katu jome ajaire, e'i Jesu imomewa.
Ajaire e'i jẽ Jesu:
– Tapeenu katu ikõ eayvu nẽ rõnõ, e'i Jesu.
Manyvo temitã rã'ãigwerà rewarà jaa tè
(Mateusi 13.10-23; Maku 4.10-20)
9Ãmẽ Jesu remimo'ekwerà kõ aepo wenu remẽ, kee e'i Jesu pè kupa:
– Manyvo jaa põ neayvukwerà, temitãgwerà rè tè poromosã'ãga mã'ẽ? e'i kupa. Oremotekokuwa jẽ si rejupa! e'i ijupe kupa.
10Aepo rè kee e'i Jesu:
– Pejẽ pekuwapa manyvo Janejare'e poroerekotà Jõvijã wasu rõmõ ojikuwa remẽ. Janejare'e ywete a'evoa omojikuwaokapa pejẽ. Ajawyi nokuwai mãe kõ pè rõwã aepo a'e. Peupe tè aepo a'e. A'e kõ ekasia rè omã'ẽ ipe. Eayvu rè ojapyaka ipe kupa ipi. Ajamã'ẽ nojimotekokuwai ee kupa ipi. Ajawyi ayvu jimosã'ãga rupi tè amo'e kõ ipi.#Isa. 6.9
11– Kee jaa pè aepo amovyvypa pejẽ. Moma'e rã'ãigwerà vo sõ tite Janejare'e ayvu. Yvy maevo sõ tite jane kõ, ijayvu wenu remẽ. 12Ajawyi, ã'ãigwerà pee rupi o'a mã'ẽ a'evo ve ava mõ ijayvu wenu remẽ, wenu ipegà mã'ẽ. Ajaire ãjãgai rõvijã wekyi eminuwerà ipy'a pe wyi ipi, “aje” te'i e'ã ijayvu pè. “Kãramõ ojireko katuayoka Janejare'e pè ne”, e'i ekyi. 13Ãmõ, takuru 'aryvo o'a mã'ẽ a'evo ve ava mõ ijayvu wenu remẽ, ory katu rã'ãga enu. Ajamã'ẽ “aje ywete” ne'i weminuwerà pè. Wãime remeve earaipa iwyi. Waypekwerà tekoua remẽ, opoi weminuwerà wyi ipi, naapoi mã'ẽ vo 'ejẽ ekoi rewarà mõ. 14Ãmõ, joõ pytery pè o'a mã'ẽ jamojiropemĩ ijayvu wenu maevo sõ tite mã'ẽ. A'e ãmõ ãmõ rè tè oja'a rewarà mõ, “aje ywete” ne'i weminuwerà pè ipi. Wekokwerà ikewarà règà oja'a iko. Ma'e. Moma'e moatya règà oja'a iko. Ãmõ, moraita kõ règà. Wãisõ a'e règà oja'a iko ipi mã'ẽ. Earaipa ãmẽ Janejare'e ayvu wyi. 15Ãmõ, moma'e rã'ãigwerà yvy e'e pè o'a mã'ẽ a'evo ve ayvu wenu remẽ, opyykãtã oupe mã'ẽ. Opy'a pupe tè werekotà ereko. Werovija katu iko. Oja'a karuaru ee iko. Naearai'ãi iwyi. Nopoi'ãi iwyi. Upi katu ekoità aja paire, e'i Jesu imogeta kõ.
Poroyape mã'ẽ rè tè Jesu poromosã'ãga remẽwarà
(Maku 4.21-25)
16– Ajaire e'i jẽ Jesu:
– [Janejare'e omojikuwaokapa peupe tapemojenu ãmõ kõ pè erokwa. “Tokuwa e'ã kupa”, tapejẽ tite e'ã.] Poroyape mã'ẽ rè tè amosã'ãgatà Janejare'e ayvu tapekuwa sa'u. Poroyape mã'ẽ jamoeny remẽ, ikatu kuwa põ moma'e wyry pè jainõ? Ãnĩ! Nikatu'ãi. Ikatukwerà pè tè jainõ toyape, tojisa omã'ẽ ee etã wyry pè oike mãe kõ.#Mat. 5.15; Ruk. 11.33 17Ãwitõ poroyape mã'ẽ oyape katu janeupe, ãwĩvo ve Janejare'e penemikuwa e'ã omojikuwa katutà wayvukwerà rupi pejẽ ipi. Pirujẽ omojikuwaokatà pejẽ ipi.#Mat. 10.26; Ruk. 12.2 18Ãwijã mẽ pejapyaka katu kuwa eayvu rè tapetekokuwa ipi. Napejapyaka katui remẽ, peenu mã'ẽ wyi penearaipa titetà. Ajawyi pejapyaka katu ikõ ijayvu rè pejimotekokuwa ipi nẽ, a'e pejẽ. Upi ikõ peiko nẽ, a'e pejẽ. Ãmẽ ywesõ Janejare'e pemotekokuwavaytà penereko, e'i Jesu imogeta kõ.#Mat. 25.29; Ruk. 19.26
Jesu y uu imõmirĩ kõ reve esa remẽwarà
(Mateusi 12.46-50; Maku 3.31-35)
19Ajaire Jesu poromo'e jẽ upa tetã mõ wyry pè remẽ, ijy uu esa, imõmirĩ kõ reve. A'e kõ ovãe tarepe Jesu pè. Ajamã'ẽ mã rupi noike'ãi ipyri'ĩje'ẽ kupa, aty wasu oporakapa tesõ tetã upa rewarà mõ. 20Ajawyi ãmõ kõ omome'u Jesu pè kupa:
– Ney uu neresa, nemõmirĩ kõ reve. Wãime tetã ypy pè nerãrõ kupa upa, e'i ijupe.
21Ãmẽ e'i Jesu:
– Hoõ, e'i. Ajamã'ẽ kee a'età pejẽ. Eretãrã kõ vo 'ejẽ pirujẽ Janejare'e ayvu wenu erovija mãe kõ, e'i. Ajawyi “emõmirĩ kõ” a'e pejẽ. Ãmõ, “ekõjã kõ” a'e. Ãmõ, “ey kõ” a'e. Aepo a'e pejẽ, e'i ijupe kõ.#8.21 “Ãwitõ ey ãmõ emõmirĩ kõ aau ipi. Ãwĩvo ve aau Janejare'e koty rewarà kõ”, jaa tè aepo e'i mã'ẽ.
Jesu yvytu ai omomi remẽwarà
(Mateusi 8.23-27; Maku 4.35-41)
22Ãmõ 'ary pè Jesu e'i wemimo'ekwerà kõ pè:
– Jajipota pãranã ovae kyty jaa, e'i.#8.22 Kwaray ẽma kytyre. Juteu rõwã mãe kõ yvy tè a'e.
Ãmẽ opo yarà kwarà pupe kupa. O'yasatà oo ãmẽ kupa.
23Ajaire ojipota oo pãranã myterà pè iko kupa remẽ, Jesu oke sikaepo yarà pupe upa. Ãmẽ si py'awarà mõ yvytu ai okwa. Omopipo pipo tesõ yy yvytu ai. Omoãnẽ tesõ yy yarà upa. Aja rewarà mõ ojipypy weewe tesõ yarà. Ojimopirai tesõ Jesu remimo'ekwerà kõ ãmẽ ky'y.
– Japatà maevo yy pupe! e'i kupa.
24Ãmẽ oo Jesu mõtã kupa:
– Oremo'earà, emã'ẽ! Japa taray yy pè. Manyvo jẽ awi ereko tijamãnõ e'ã, e'i kupa.
Ãmẽ Jesu omã'ẽ remẽ, yvytu ai omoworoki imomi, wayvukasia rupi. Yy nopipoi ky'y. Opipa katu yy pipoa ky'y. Isãrã gatu tesõ yy rova'arà upa ky'y.
25Ãmẽ kee e'i Jesu wemimo'ekwerà kõ pè:
– “Aje” napejẽive sipõ eayvukasia pè? e'i imogeta kõ.
Ãmẽ ojimonyi okyje kupa upa. Kee e'i ojiupe kupa:
– Ava sipõ awi janerõvijã, ãwĩvo tesõ tijayvukasiay wete? Emã'ẽ! Yy pipo pipo mã'ẽ omomi. Ãmõ, yvytu ai wasu omomi teve wayvukasia rupi tè, e'i ojiupe kupa.
Jesu omokatu ãjãg ojimoemija ee mã'ẽ remẽwarà
(Mateusi 8.28-34; Maku 5.1-20)
26Ajaire yvytu ai paire oo jẽ yarà rupi iko kupa. Ovãe ajaire Gerasa yvy pè kupa ky'y. A'e yvy Karireja yvy ovae kyty tè tui. [Juteu rõwã mãe kõ rena tè a'e.] 27Ãmẽ a'e pè oẽ yarà pe wyi yy reme pè kupa. Ameve i'ãgai mã'ẽ mõ uu ikoty kõ. Ãjãg ojimoemija ee mã'ẽ tè a'e. Ajawyi oiko ai tè iko a'e. Katu rupi tè ekoi. Wetã wyry pè rõwã ojimoena iko ipi. Tyvy rupi tè ekoi ipi.
28-29Ojimorarai tesõ ãjãgaiwerà ee ipi. Ãmõ remẽ etãrã kõ opokwa ipe. Ãmõ, okupykwa ipe ve kupa. Jipokwa ãtã mã'ẽ pupe tẽ tesõ opokwa ipe mijã. Ajamã'ẽ omotararai jẽ oo ipi. Ojava oo wetãrã kõ wyi ipi. Ãjãg werojava eraa tekoe'ãma rupi tojimomorijau iko ipi. A'evo ekoi ipi.
Ãmẽ Jesu rè omã'ẽ remẽ, ojimomo Jesu rovake ojayvy, yvyu. Kee e'i Jesu ijupe, ãjãg pè:
– Eẽ ejisyry eo aã kwaima'e pupe wyi, e'i.
Ajamã'ẽ noẽ tari ãjãg ipupe wyi. Eamai tesõ upa, kwaima'e pupe wyi. Wayvo oporegeta. Kee e'i:
– Jesu, Janejare'e jo'arà kytywarà Ra'yry tè ene. Moma'e rã põ nejo ekoty? Manyvo eretà põ ije? Temomorijau e'ã rejupa! a'e neupe, e'i.
30Ãmẽ Jesu oporanu ijupe.
– Manyvo eu põ nererà pè? e'i Jesu ijupe.
E'i ãmẽ ãjãg Jesu pè:
– Oreatyray eu ije, e'i.
Ãjãg kõ pe'ĩrõwã uu uu oike ike kwaima'e pupe jypy remẽ. Ajawyi “oreatyray” e'i Jesu pè.
31E'i jẽ ãjãg kõ Jesu pè:
– Oremoisyry aã ike wyi rejupa remẽ, noropotari oroo yvy kwarà mãmĩ gyty ikwa mã'ẽ pupe, e'i Jesu pè kupa.
32Ãmẽ jakatu a'e pyryvo tajausĩ atyry ojimi'u iko kupa, yvytyry yke rupi. Ãmẽ ãjãg kõ e'i Jesu pè:
– “Hoõ” ere remẽ, toroo oroike tajausĩ kõ pupe awi. “Hoõ, i'ete põ?” ere ikawi ore, e'i ãjãg kõ oporegeta Jesu pè.
33Ãmẽ “hoõ” e'i Jesu. Ameve ãjãgaiwerà atyry oẽ oẽma oo kwaima'e pupe wyi oo. Oike ike tajausĩ kõ pupe tè ky'y. Omoeawyrypa kõ ereko kõ. Ameve tajausĩ atyry ojãma oo vykwae kyty okukuipa oo pãranã wasu pupe kupa ky'y. Oyvypypa opa kupa, pirujẽ.
34Ãmẽ tajausĩ jarà kõ a'evoa rè omã'ẽ remẽ, ojava rã'ĩ oo a'evoa momewa wena pewarà kõ pè erokwa kupa. Ãmõ koo pewarà kõ pè ve omome'u erokwa kupa. 35Ajaire aepo renu remẽ a'e yvy pewarà kõ uu uu Jesu resa. Aje kwaima'e i'ãgai maekwerà ikatupa ky'y. Ijyru tè upa ky'y. Wapy Jesu pyri upa. Otekokuwavay ky'y. Ajawyi ojimonyijay ee omãjã kupa.
36– A'evo 'evo wereko Jesu imokatu, e'i ajaire imojenu ãmõ kõ pè kupa.
37Ãmẽ ojimonyipa okyje Gerasa taa pewarà kõ iko. Ajawyi a'e kõ pirujẽ kee e'i Jesu pè:
– Noropotai orerena pè neiko. Ejisyry ikõ ike wyi eo nẽ! Orereity iko eo rejupa nẽ! e'i kupa.
Ãmẽ “hoõ” e'i Jesu. Oo opo yarà pupe ojivytà oo.
38Ãmẽ Jesu remimokatukwerà kee e'i epe ijupe:
– Erõvijã, taa nerupi age'e. “Hoõ” ere remẽ, aatà. I'ete? e'i epe.
39Ajamã'ẽ Jesu:
– Ãnĩ, nereo'ãi, e'i. Ejivy jẽsi nerena kyty eo. Emã'ẽ. Ikatuay Janejare'e nerereko. Ekwa awi aekwerà momewa neretãrãgwerà kõ pè erokwa, e'i ijupe.
“Hoõ” e'i ãmẽ kwaima'e. Oo wena kyty oo, a'e rupi aekwerà momewa erokwa.
Jairu ojiporijauesaoka Jesu pè remẽwarà
(Mateusi 9.18-19; Maku 5.21-24)
40Ajaire Jesu ojivyrĩ ovãe pãranã ovae pè remẽ, aty wasu kõ wãrõ amãtejẽ upa. Ivãea rè oryvay kupa. 41-42Ãmẽ kwaima'e mõ uu Jesu mogeta, Jairu eu erà pè mã'ẽ. Janejare'e ayvu rè jimo'ea retã rõvijã mõ tè a'e kwaima'e. A'e rajyry itekorãnay upa. Pe'ĩte tajyry ja'y kõjatãi rõmõ a'e. 12 kwaray werokwapa mã'ẽ. Ajawyi tuu uu Jesu pyri ojayvy kee javo:
– Eporijauesa rejupa. Erajyry okãjã taray. Nere erako'i, Jesu. Ja'e eretã gyty teremokatu, e'i Jesu pè.
Ãmẽ “hoõ” e'i Jesu. Ootà tuu rupi etã gyty. Oo iko remẽ, ojimokyrytyty tesõ aty wasu ee, oo oo upi mãe kõ.
Jesu wãivĩ wyypu mã'ẽ omokatu remẽwarà
(Mateusi 9.20-22; Maku 5.25-34)
43Ãmẽ jakatu atyry pytery pè sikaepo wãivĩ mõ itekorã ywete mã'ẽ ekoi. Wyypu mã'ẽ tè a'e wãivĩ. A'e karamoeve sikaepo itekorã puku iko. 12 kwaray rõmõ tesõ nopi'ãi wyy iwyi iko. Ojipõanõoka py'yi ipe poropõanõgarà kõ pè ipi mijã. Ojikarakuri moma tesõ ipe opõanõa rã rè. Ajamã'ẽ nomokatukuwa'ãi kupa. [Ajaate Jesu ovãe tesõ ena pè ky'y.] 44Ãmẽ wãivĩ e'i oupe:
– Jesu emokatu kuwa, e'i oupe.
Ajawyi Jesu ape kyty uu ovãe ijupe. Ajamã'ẽ ojinõsĩ wyi nojikuwai uu. Ijyru poko retoapy règà ojipy. Ameve py'awarà mõ ikatupa. Opi wyy ameve iwyi ky'y. 45Ava nomã'ẽi ee a'evo remẽ. Ajamã'ẽ Jesu okuwavĩ a'evoa. Ajawyi kee e'i oporanu:
– Ava põ ojipy ere? e'i.
Ãmẽ ãmõ kõ:
– Ije rõwã, ije rõwã, e'i e'i kupa.
Ãmẽ Peturu e'i Jesu pè:
– Oremo'earà, emã'ẽ. Ojimokyrytyty tesõ aty wasu kõ nere. Ajawyi nijakuwa'ãi ava põ ojipy nere mã'ẽ. Ava jẽ rõwã okuwa, e'i
46Ajamã'ẽ Jesu e'i:
– A'evoa pè rõwã a'e, e'i. Akuwa ava mõ ojimokatuoka ekasia rupi, ojipy ere remẽ. A'e pè aepo a'e, e'i Jesu.
47Ãmẽ si wãivĩ kee e'i oupe:
– Manyvo na'e'ãi põ ajimomewa ijupe, e'i oupe.
Otyty 'ejẽ tesõ uu ojimoenãpa'ã Jesu pyri upa.
– Ije tè neyru rè ajipy. “Tekatupa” a'e tè. Ajipy neyru rè remeve ekatupa ky'y, e'i ijupe.
A'evo ojimome'upa ky'y. 48Ãmẽ e'i Jesu ijupe:
– Jãjã, ere nerako'i rewarà mõ oromokatupa. Tanepiryvypy katu ajawyi nejivy neo nerena kyty, e'i Jesu ijupe.
49Ãmẽ oporegeta jẽ Jesu wãivĩ pè remẽ, Jairu retã gyty wyi ava mõ ovãe mijẽ. Kee e'i Jairu pè, Janejare'e ayvu rè jimo'ea retã rõvijã pè:
– Teene, nemo'eai poromo'earà ky'y ne. Okãjãma nerajyry ky'y, e'i ijupe.
Jesu omomoera Jairu rajyry remẽwarà
(Mateusi 9.23-26; Maku 5.35-43)
50Ãmẽ aepo jaa wenu Jesu remẽ, kee e'i tuu pè:
– Nekyje ne. “Aje” ere jẽsi Janejare'e kasia pè. Ikatupatà tè nerajyry ãmẽ, e'i ãmẽ ijupe.
51Oo jẽ ãmẽ kupa. Ovãe Jairu retã mè kupa. Atyry mõ a'e pè tui. Etã wyry pè tajyry reãgwerà tui. Ajare kee e'i Jesu:
– Kejõ kõrijõ tè oiketà etã pè: Tuu, ijy, Peturu, Tiaku, Juwão. Mokopejõ. Ãmõ kõ noike'ãi etã pè, e'i.
52Ãmõ kõ mõa'ãrõwã tetã ypy pè tui upa. Ojiãpirõ wasu kupa upa. A'e kõ pè Jesu e'i:
– Peja'o sõ. Oke tè ja'y kõjatãi upa, e'i Jesu.
53[Jesu okuwa omomoeratà toiko mijẽ. Ajawyi aepo e'i ijupe kõ.] Ãmẽ ãmõ kõ oojai aepo e'i remẽ. Okuwa okãjã e'epa ja'y kõjatãi mijã. Ajawyi oojai tite kupa.
54Ãmẽ tè Jesu oike ky'y, weroike mãe kõ reve. Eãgwerà po rè ojipy. Kee e'i ijupe:
– Ja'y kõjatãi, epõ'ã, a'e neupe, e'i.
55Ameve i'ãg ojivy ikoty. Opoerapa opõ'ã ãmẽ ky'y. Ãmẽ Jesu kee e'i Jairu pè, erekwarà reve:
– Opoerapa. Peapoi jẽsi ja'umã'ẽ pupe, e'i ijupe kõ.
56Ãmẽ ojimonyi tesõ a'evoa rè omãjã tuu kõ. Kee e'i Jesu ajamã'ẽ ijupe kõ:
– Napemome'u'ãi jẽ rã'ĩ amomoera maekwerà, e'i Jesu.
Currently Selected:
Rukasi 8: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
