Rukasi 9

Jesu wemimo'ekwerà kõ omonotà rã'ĩ remẽwarà

(Mateusi 10.5-15; Maku 6.7-13)

1Ajaire Jesu wemimo'ekwerà 12 rõmõ mãe kõ omonotà rã'ĩ taa kõ rupi, wayvu mojenuarà kõ rõmõ toiko kupa. Okwai kõ rã'ĩ imuu okoty ijayvumokasi kõ. Omotekokuwa kõ teve, kee javo:

– Ãjãgaiwerà pemoẽ imono ojimoemija ee mãe kõ wyi eayvu rupi, e'i ijupe kõ. Ãmõ, itekorã mãe kõ ve pemokatu ereko eayvu rupi. 2Ãmõ, kee tapejẽ imojenu: “Janejare'e opota Janerõvijã ywete rõmõ janerereko”, pejẽ erokwa. Ãmõ, itekorã mãe kõ pemokatu ve eayvu rupi, e'i ijupe kõ.

3Kee e'i Jesu ijupe kõ imono kõ:

– Moma'e kõ manyvoa rã mõ rõwã peraatà peo remẽ, e'i. Ma'e. Pytu naperaa'ãi. Ãmõ, penepãnakõ naperaa'ãi. Ãmõ, karakuri naperaa'ãi. Ãmõ, penemi'õ rã. Ãmõ, tyru rekovijarà. Wãi wãisõ taperaa e'ã. Mõropãrà rõmõ tè peotà. Ajawyi tapemowasu e'ã peoa, e'i. 4Ajaire taa mõ pè pevãe remẽ, ãmẽ oka jarà mõ pemomytaokatà opyri. A'e kõ tapemo'e ãmẽ, e'i. Tapepyta ipyri kõ ajaate pejisyrytà a'e taa pe wyi peo, e'i Jesu ijupe kõ.

5Ãmẽ e'i jẽ:

– Ajamã'ẽ ãmõ rupi tevetà ãmõ taa pè pevãe remẽ. “Ejo emõropãrà rõmõ”, ne'i'ãi peupe kupa. A'evo remẽ napepyta'ãi a'e taa pè. Peasatà tè peo. Kee tapejẽ a'e taa wãnà kõ pè peasatà peo remẽ: “Mokoi Janejare'e ayvu napeenu tari!” pejẽtà. Yvy ku'ikwerà tapetyvyro pepy re wyi ity peo ãmẽ, e'i Jesu imono kõ.#J.K.R. 13.51; 9.3-5; Ruk. 10.4-11

6“Hoõ” e'i ãmẽ kupa. Oo Jesu ayvu rupi kupa ãmẽ. Pirujẽ taa kõ rupi oo iko kupa. Janejare'e ayvu omojenu erokwa kupa. Ãmõ, itekorã mãe kõ omokatu erokwa Jesu ayvu rupi kupa.

Kovenatu Eroti okyje remẽwarà

(Mateusi 14.1-12; Maku 6.14-29)

7Ãmẽ Jesu rewarà ojenu kovenatu Eroti pè. Pirujẽ Jesu manyvo nyvo jẽ ekoi maekwerà ojenu ijupe. Ojimopirai tesõ enu. Jane kõ kee e'i mã'ẽ ojenu ijupe: “Juwão poromojãmorĩ maekwerà teipõ opoera mijẽ iko”, e'i tite kupa. 8Ãmõgwerà ãmẽ: “Tãmõ Eriasi tè rõwã põkõ uu mijẽ ojikuwa?” e'i tite kupa. Ãmõgwerà ãmẽ, “Janejare'e ayvu mojenuarà karamoe remẽwarà tè rõwã põkõ opoera mijẽ ojikuwa?” e'i e'i tite kupa ikuwa e'ã ãmẽ.#Mat. 16.14; Mak. 8.28; Ruk. 9.19 9Ãmẽ aepo renu remẽ kee e'i kovenatu Eroti oupe:

– Ava pè ywete põ aepo e'i kupa? e'i oupe. Juwão poromojãmorĩ maekwerà sipõ ovãe ma'e remẽ? Aãkãgooka maekwerà rõwã põkõ opoera mijẽ ovãe? Tamã'ẽ ee ajawyi, e'i Eroti oupe upa.

Jesu omoypa katu ja'umã'ẽ aty wasu kõ rè remẽwarà

(Mateusi 14.13-21; Maku 6.30-44; Juwão 6.1-14)

10Ajaire Jesu remimonokwerà kõ ojivyrĩ ovãe ãmõ taa kyty wyi. Manyvo ekoi kupa maekwerà kõ omome'u erovãe Jesu pè kupa.

– A'evo 'evo oroiko oroo remẽ, e'i kupa.

Ajaire Jesu wemimo'ekwerà kõ kõrijõ tè weraatà ãmõ taa kyty. Petesaita eu a'e taa pè. 11Ajamã'ẽ aty wasu kõ okuwa maty põ ootà Jesu kõ mã'ẽ. Ajawyi oo ve atyry kõ Jesu kõ rapyky rupi iko. Ãmẽ Jesu omã'ẽ ee kõ remẽ, kee e'i:

– Totuu ne epyri kupa, tamo'e kõ, e'i Jesu.

Uu ipyri kupa remẽ, kee e'i ijupe kõ:

– Peitypypyipaoka peaiwererà Janejare'e pè, e'i. Janejare'e opota penõvijã ywete rõmõ penereko, e'i Jesu imogeta kõ.

Ãmõ, itekorã mãe kõ omokatu teve. 12Ajaate pãtõ arakaka upa ky'y. Ãmẽ Jesu remimo'ekwerà kõ ojimo'eai ja'umã'ẽ rè iko. Kee e'i Jesu pè ãmẽ kupa:

– Oremo'earà, tekoe'ãma tè ike. Aty wasu kõ noesa'ãi ja'umã'ẽ ike rupi ipyy iwa. Manyvo ne'i'ãi teve ike oke kupa. Nuvei ikea'ypa kõ. Ajawyi emojivy kõ rã'ĩ imono, e'i epe Jesu pè kupa.

13Ajamã'ẽ kee e'i Jesu ijupe kõ:

– Pejẽ si peapoi kõ, e'i.

Ãmẽ e'i kupa:

– Mã ja'umã'ẽ norome'ẽ'ãi to'u kõ? Emã'ẽ. Kejõgà meju sireko, 5 rõmõgà. Noy'ãi atyry kõ pè. Ãmõ, mõrijõgà tè pira jimiirerà. Manotà põ oroereko imoypa? Oropyy kuwa põkõ ja'umã'ẽ aty wasu kõ pè mijã? e'i kupa.

14Aty wasu tesõ tui upa. Kwaima'ekwerà kõ kõrijõ tè jamoirõ irõ remẽ, 5.000 rõmõ tesõ kupa. Ãmẽ kee e'i Jesu wemimo'ekwerà kõ pè:

– Aty wasu kõ waite e'y e'yi toapy okwa kupa. Ma'e remẽ 50 rõmõ waiteve toapy kupa, e'i Jesu ijupe kõ.

15A'evo wereko ãmẽ kupa. Waite e'y e'yi wapy okwa ãmẽ kupa. 16Ajaire Jesu meju opyy, 5 rõmõ. Pira jimiirerà opyy teve, mõrijõ rõmõ, Jesu. Oyvatesa rã'ĩ Janejare'e pè oporegeta.

– Ene tè ja'umã'ẽ nemouve tè oreupe ipi, e'i imoe'e.

A'e si oporegeta paire openo peno meju ime'ẽ wemimo'ekwerà kõ pè tomosãi erokwa kupa. Pira jimiirerà a'evo ve. Wayko yko ime'ẽ ijupe kõ tomosãi teve kupa. Omosãi kupa remẽ, oypa katu ee kõ.

17A'evo jane kõ ojimi'u pirujẽ. Ikasi katu ãmẽ kupa ky'y. Jarevejẽ opyta ja'umã'ẽ. No'upai kupa. Ajawyi ja'umã'ẽ kure kurerà Jesu remimo'ekwerà kõ omoaty ijã rykyry pupe. 12 rõmõ oõjã kupa ky'y.

“Janejare'e Remimuurerà tè ene”, e'i Peturu Jesu pè remẽwarà

(Mateusi 16.13-19; Maku 8.27-29)

18Ãmõ 'ary pè Jesu wemimo'ekwerà kõ reve ojisyry maipe kyty oo. Ãmẽ oo kuipe'e sa'u Jesu oporegeta Uu pè. Ajaire kee e'i oporanu wemimo'ekwerà kõ pè:

– Ava ywe'e pãwĩ e'i põ jane kõ eupe ipi? Pemome'u ãmẽ ije, e'i ijupe kõ.

19Ãmẽ kee e'i kupa:

– “Juwão poromojãmorĩ maekwerà tè rõwã põkõ opoera mijẽ?” e'i neupewarà mõ kupa. Ãmõ kõ, “Ãnĩ, Tãmõ Eriasi tè rõwã põkõ owyjy mijẽ uu?” e'i kupa. Ãmõgwerà ãmẽ, “Janejare'e ayvu mojenuarà amyry karamoewarà tè rõwã põkõ opoera mijẽ uu?” e'i neupewarà mõ kupa, e'i Jesu pè kupa.#Mat. 14.1-2; Mak. 6.14-15; Ruk. 9.7-8

20Ãmẽ Jesu e'i ijupe kõ:

– Pejẽ pa'e? Manyvo pejẽ põ eupe? e'i ijupe kõ.

Ãmẽ Simão Peturu e'i:

– Janejare'e Remimuurerà rõmõ tè ene, Orerõvijã ywete rõmõ,#9.20 Mesia e'i Juteu kõ. Kereku kõ Kiristu e'i. “Janejare'e Remimuurerà Janerõvijã ywete rõmõ” jaa tè. a'e ene, e'i.

21Ãmẽ Jesu e'i ijupe kõ:

– I'ete aepo ere ije, e'i. Ajamã'ẽ aepo tapemome'u e'ã rã'ĩ ãmõ kõ pè, e'i ijupe kõ.

“Ejukatà kupa”, e'i Jesu mã'ẽ

(Mateusi 16.21-28; Maku 8.31–9.1)

22E'i jẽ Jesu wemimo'ekwerà kõ pè:

– Ije, Janejare'e Remimuurerà ajimojane mã'ẽ rõmõ ajo. Ajawyi ajimomorijau 'atà tè penovake, amãnõ. Jõvijãgwerà kõ, “Temipotare'ã tè ãwĩ”, e'ità ije kupa. Kejõ aepo e'ità. Janejare'e pè oporegeta mãe kõ rõvijã. Ãmõ, tãmõ Moisesi remikusiwarerà rè poromo'e mãe kõ. Mokopejõ aepo e'ità. Eraparity kõrijõtà tè kupa. Ejukaoka kõrijõtà tè kupa. Ajamã'ẽ moapy 'arà remẽ, Janejare'e aekwery vo emomoera tarà mijẽ emopõ'ã, e'i Jesu.

23Ajaire e'i jẽ Jesu ijupe kõ:

– Pepota awyje erupi peiko remẽ, eayvu rupi tapeiko ipi. “Jesu remimotarà ywesõ ikasi eremimotarà wyi”, tapejẽ pepy'a pè ipi. Kõ'ẽ jawe jawe ikõ aepo tapejẽ nẽ. Ãmõ, ava mõ sõ kee e'i pejẽ remẽ, “Nereityi Jesu remẽ, orojukatà”, e'i sõ pejẽ remẽ, kee tapejẽ ãmẽ ijupe: “Nimanyvoi ejuka pekupa remẽ. Ajamã'ẽ naity'ãi Jesu ejuka pekupa remẽ”, tapejẽ, e'i Jesu ijupe kõ.#Mat. 10.38; Ruk. 14.27

24E'i jẽ Jesu:

– Ãmẽ ava mõ ojireko katu ipe mãnõa wyi remẽ, kãramõ omãnõ jẽtà ajamã'ẽ, e'i. Ajamã'ẽ eayvu rupi nereity'ãi 'ete mã'ẽ omãnõ remẽ, i'ãg nomãnõ'ãi. Janejare'e omoigo karuarutà opyri.#Mat. 10.39; Ruk. 17.33; Juw. 12.25 25Ava mõ omoma'e kõ moatya règà oja'a remẽ, noja'a'ãi Janejare'e rè ipi. Kãramõ omãnõ remẽ, noeraa kuwa'ãi omoma'e kõ. Agyvotè ootà jimomorijaua rena kyty oo. Awyje a'e pè oikotà. Manyvo ne'i'ãi omoẽa moepy ãmẽ ky'y.

26– Kãramõ yvy opa remẽ, ajo tarà mijẽ. Ãmẽ sõsi Janejare'e Remimuurerà ajimojane mã'ẽ rõmõ tè ajikuwatà ajo ky'y. Papa kasia renya pupe tẽ tesõ ajotà. Papa remĩgwai yvapewarà kõ revejẽ tẽ tesõ ajotà. Temimomojy rõmõtà ajo ky'y. Ajare kee a'e pejẽ. Ava mõ ike yvy pè ojinõsĩ ewyi nererovija tari mãe kõ rovake remẽ, nikatu'ãi ijupe kãramõ ajo mijẽ remẽ. Ãmõ, eayvukwerà wyi ojinõsĩ remẽ. Ãmẽ “ekoty rewarà” na'e'ãi a'evo ekoi mã'ẽ pè. Ajawyi nikatu'ãi ãmẽ ijupe, a'e pejẽ. 27Ajamã'ẽ ãmõgwerà aã ike tui mãe kõ nokãjãive remeve omã'ẽtà ere ajikuwa Janejare'e Remimuurerà rõmõ aiko remẽ. Aje ywete aepo a'e, e'i Jesu ijupe kõ.

Jesu okasia reve ojisaoka remẽwarà

(Mateusi 17.1-8; Maku 9.2-8; 2 Peturu 1.16-18)

28Ajaire 8 oke aepo omovyvy paire, kee e'i Jesu wemimo'earà kõ mõ pè:

– Ja'e yvytyry rè Janejare'e pè taporegeta, e'i Jesu.

Kejõ mã'ẽ pè aepo e'i: Peturu, Juwão, Tiaku. Mokopejõ mãe kõ pè aepo e'i. Weraa kõ ãmẽ oupi. Yvytyry rè ojiupi iko kupa. 29Ãmẽ kuipe'e sa'u Uu pè Jesu oporegeta upa remẽ, ovaenypukĩ tesõ upa. Ãmõ, ijyru kõ apy'ajẽ isuky katu upa. Eny tesõ upa, tõpã vera vo 'ejẽ. 30Ãmẽ a'evoa rè Peturu kõ omã'ẽ remẽ, apy'ajẽ tãmõ Moisesi amyry ojisaoka ijupe kõ. Jesu pyri ojisaoka. Ãmõ, tãmõ Eriasi ve ojisaoka Jesu pyri. [Ojimogeta Jesu reve kupa upa.] 31Janejare'e kasia reny wãrimã kõ tesõ a'evo ekoi remẽ. Jesu mãnõa rã rè oporegeta kupa upa. “Ke'ĩ Jerusarẽ taa pè a'evotà. Janejare'e ayvukwerà rupi katu a'evotà”, e'i ojimogeta kupa.

32Ajamã'ẽ Peturu kõ oke taray iko. Apy'awarà mõ okepa kupa, Jesu kõ oporegeta remeve. Apy'a okepa omãjã kupa. Jesu kõ poroyape mã'ẽ rè omã'ẽ kupa ky'y. Oryvay ee omãjã kupa. Ojimopirai teve ee omãjã kupa. 33Ajaire Moisesi kõ Jesu oitytà oo remẽ, kee e'i Peturu Jesu pè:

– Oremo'earà, ikatuay kuwa ike jaiko remẽ. Nepota remẽ, tapyina kõ mõ oroinõtà, moapy rõmõ. Ãmõ, ene neupewarà. Ãmõ, Moisesi pewarà. Ãmõ, Eriasi pewarà oroinõtà, e'i Peturu.

Nomãrãkuwai maevo sõ tite Peturu aepo javo rõmõ. 34Ãmẽ aepo e'i jẽ upa remeve yva rãtasĩ owyjy eroike kõ. A'evo remẽ tè tite Peturu kõ okyje. 35Ãmẽ ayvu mõ ojenu yva rãtasĩ pupe wyi. Kee jaa ojenu ijupe kõ:

– Aã si era'yry! Epy'a rupi katuwarà rõmõ ekoi. Peenu ikõ ijayvu ipi nẽ, ejaa ojenu ijupe kõ.#Isa. 42.1; Mat. 3.17; 12.18; Mak. 1.11; Ruk. 3.22; 9.28-35; 2Pe. 1.17-18

36Aepo ojenu paire, Jesu rè kõrijõ tè omã'ẽ kupa ky'y. A'e rõmõ'ĩgà tui ky'y. Ãmẽ nomome'ui rã'ĩ Peturu kõ wemimã'ẽgwerà, yvytyrapyte 'aryvo omã'ẽ ee maekwerà. Kãramõ tè omome'utà kupa ky'y.

Jesu omokatu ja'yry remẽwarà

(Mateusi 17.14-18; Maku 9.14-29)

37Ajaire kõ'ẽme yvytyry pe wyi ojapara owyjy oo kupa remẽ, aty wasu uu Jesu rõvaisĩ. 38Ãmẽ atyry pytery pe wyi kwaima'e mõ oẽ uu Jesu kyty. Wayvo oporegeta Jesu pè. Kee e'i ijupe:

– Poromo'earà, era'yry pe'ĩgwerà nikatui. Ajare ajo nemogeta age'e. Nere erako'i aiko, teremokatu, e'i Jesu pè.

39E'i jẽ:

– Ãjãgai mõ owyry kyty wereko ky'y. Ojimorara ai ywete ee ipi. Ãmõ 'ary pè ãjãgai eamai tesõ iko. Oity era'yry yvy pè tomãnõ mãnõ. A'evo remẽ ijuru jere 'ejẽ iko ipi. Ãmõ, enyajui tesõ iko ipi. Mapejõ 'arà jẽ a'evo ekoi ipi. Nopoi'ãi ãjãgai iwyi. Ãwijã mẽ oiko ai tè era'yry iko ipi. 40Ajawyi ji'i a'e neremimo'earà kõ pè: “Emomoioka ãjãgai era'yry wyi”, a'e ipe ijupe kõ. Ajamã'ẽ nomoisyryi sire'e iwyi kupa. Nijayvukasi ãjãg pè kupa, e'i tuu Jesu pè.

41Aepo'i remẽ, e'i Jesu:

– “Aje ywete” napejẽi eayvukasia pè! Manyvo remẽ ywete si pekuwatà eayvukasia ky'y? Kwee sipõ ajo? Mãrãnà jikuwa e'ã ainõ ipe pepytery pè aiko. Emoãgyo tè pekupa ipi, e'i ijupe kõ.

Ãmẽ e'i tuu pè Jesu:

– Eeru awi ike nera'yry, e'i tuu pè.

“Hoõ” e'i. 42Ãmẽ wa'yry weru tarà mẽ, ãjãg omoyvyapi imomo yvy pè. Omãnõ mãnõ ja'yry. Ajamã'ẽ Jesu ijayvukasi ãjãgai pè:

– Moko ere sõ! e'i ijupe. Age'eve ikõ ejisyry iwyi ekwa nẽ, e'i.

Ameve ãjãg opoi iwyi ky'y. A'evo Jesu omokatupa ja'yry ime'ẽ tuu po pè toerojivy eraa. 43Ãmẽ pirujẽ jane kõ omã'ẽ ee maekwerà kõ, ojimonyi Janejare'e kasia rè omãjã kupa. Pirujẽ Jesu manyvo nyvo ekoi Janejare'e kasia rupi mã'ẽ rè ojimopirai oory rõmõ kupa.

“Ejukatà kupa”, e'i mijẽ Jesu remẽwarà

(Mateusi 17.22-23; Maku 9.30-32)

Ãmẽ kee e'i Jesu wemimo'ekwerà kõ pè:

44– Eayvu amovyvytà pejẽ age'e. Peenu ikõ eayvu nẽ. Kee a'e. Yva pe wyi ajo ajimojane mã'ẽ tè ije. Ajamã'ẽ nivoi mãe kõ po pè ereraa 'atà tè eme'ẽ kupa, e'i.

45Aepo e'i ywe'e ipe Jesu ijupe kõ. Noenui sire'e ijayvu kupa ajamã'ẽ. Nokuwai manyvo jaa tè aepo e'i mã'ẽ. Ajamã'ẽ, “Manyvo jaa põ aepo ere?” ne'i Jesu pè kupa. Osĩ iwyi kupa.

“Ava ywesõ põ Janejare'e koty rewarà rõmõ ekoi?” e'i kupa mã'ẽ

(Mateusi 18.1-5; Maku 9.33-37)

46Ãmõ 'ary pè kee e'i Jesu remimo'ekwerà kõ ojiupe: “Janepõ'õmorà ava ywesõ põ ãmõ kõ wyi ekoi? Ava põ oẽtà jo'arà kytywarà mõ?” e'i kupa. Ãmẽ, “Ije tè. Ije tè”, e'i e'i tè ojiupe kupa. Tekoe'ea rè ojimo'eai ojipy'amogeta kupa upa.#Ruk. 22.24 47Ãmẽ ipy'a pewarà kõ okuwavĩ Jesu. Ajawyi ja'yry mõ opyy imuu opyri'ĩje'ẽ to'ã ovake kõ. 48Kee e'i ijupe kõ ãmẽ:

– Aã rapijarà ja'yry rè peja'a katu ekoty rewarà kõ rõmõ peiko remẽ, ere maevo sõ tite peja'a katutà ãmẽ, e'i. Ãwĩvo “hoõ” pejẽ emoe'e remẽ, Emurokarerà pè “hoõ” pejẽ tary ve ãmẽ. Pirujẽ ekoty rewarà kõ pè aepo a'e. Ajare kee a'e pejẽ: Pepytery pè ava mõ jowyry kytygà ekoi remẽ, a'e tè jo'arà kytywarà rõmõ ekoità, a'e pejẽ, e'i Jesu.#Mat. 10.40; Juw. 13.20

49Ajaire kee e'i Juwão Jesu pè imomewa:

– Jõvijã, ãmõ mirà rè oromã'ẽ, neayvu rupi ãjãg kõ omoẽ imoisyry remẽ! Neremimo'earà rõwã ãwĩ ajamã'ẽ. Nonuri nerupi ipi. Ajawyi kee oro'e ijupe: “Mokoo sõ nereko! Nereoi Jesu rupi orereve moko javo,” oro'e. I'ete põ aepo oro'e ijupe remẽ? e'i.

50Ãmẽ Jesu e'i ijupe:

– Ãnĩ! Aepo tapejẽ e'ã ijupe. Moko te'i ne apijarà, e'i. Ma'e, ava mõ nojimoãpãi janere remẽ, janekoty rewarà rõmõtà ãmẽ ipi, e'i Jesu.

Samaria taa wãnà kõ nomomyta tari Jesu wena pè remẽwarà

51Ajaire awyjepaerĩ Jesu rekoa 'arà jane kõ pyterà rupi ky'y. Ke'ĩ oẽtà oo yva kyty. Ãmẽ kee e'i wemimo'ekwerà kõ pè:

– Jerusarẽ taa kyty aatà ky'y, e'i.

– Neo ne, e'i tite ijupe kupa.

Ajamã'ẽ oo jẽ.

52Ãmẽ wayvu mojenuarà kõ mõ omono wenone rupi. A'e kõ oo enone rupi ovãe Samaria wãnà kõ rena pè ajaire. Ãmẽ Jesu kea'ypa rã reka tè oo ipe kupa mijã. 53Ajamã'ẽ “hoõ” ne'i Samaria wãnà kõ ijupe kõ. A'e kõ okuwavĩ Jerusarẽ taa kyty tè ootà. Aja rewarà mõ nopotai Jesu kõ wena pè oke kupa. 54Ãmẽ Tiaku ãmõ Juwão revejẽ a'evoa okuwa remẽ, ojimõarõ kupa. Kee e'i Jesu pè kupa:

– Jõvijã, nikatui aã taa wãnà kõ janerereko. Nepota remẽ, tata yva pe wyi orookwaità imogyoka aã kõ 'aryvo imoma kõ. Nepota põ? e'i kupa.#2To. 1.9-16

55Ãmẽ kee e'i Jesu ijupe kõ.

– Ãnĩ. Aepo pejẽ sõ. Napekuwai mã ayvu rupi aepo pejẽ pekupa age'e. Nikatui aepo pejẽ pejipy'amogeta remẽ. 56Yva pe wyi ajo ajimojane mã'ẽ tè ije. Poromoma rõwã ajo ike kyty. Poroereko katuarà rõmõ tè ije ajo yva pe wyi, e'i Jesu.

Ajaire ojisyry ojiapy oo ãmõ taa kyty kupa.

“Aatà nerupi”, e'i tite Jesu pè kupa remẽwarà

(Mateusi 8.18-22)

57Ãmõ 'ary pè Jerusarẽ pijarà rupi Jesu kõ oo iko remẽ, ava mõ oporegeta Jesu pè. Kee e'i:

– Aatà nerupi age'e. Maipe kyty neo remẽ, aa tary ve nerupi, awyje, e'i Jesu pè.

58Aepo renu e'i ãmẽ Jesu ijupe:

– Neitytà sipõ nerena neo erupi? e'i. Emã'ẽ. Ena mã'ẽ tè mijarà ipi. Wena pè oke kupa ipi. Ãmõ, wyra kõ ojiowaitynõ oupe ipi. Ije ãmẽ nerenai mã'ẽ tè, Janejare'e Remimuurerà ajimojane mã'ẽ rõmõ, e'i. Ajawyi erupi sõ neo remẽ, mape nereju'ãi kuwa evo, e'i ijupe. Neo jẽtà põ erupi? e'i Jesu.

59Ajaire ava mõ pè kee e'i Jesu:

– Ja'e erupi eremimo'ekwerà rõmõ, e'i.

A'e ãmẽ kee e'i Jesu pè:

– Erõvijã, aa kuwa ipe age'e nerupi mijã. Ajamã'ẽ age'eveay naa'ãi rã'ĩ. Aãrõtà rã'ĩ papa, ajaate itãivĩ remẽ tokãjã. Okãjã remẽ, aatytà eãgwerà rã'ĩ. Aja paire tè aatà nerupi ky'y, e'i epe.

60Aepo e'i remẽ, e'i Jesu:

– Ãnĩ si. O'ãg pè okãjã mãe kõ ojevote tojeaty ne kupa.#9.60 Janejare'e noerovijai mãe kõ pewarà mõ aepo e'i. Ene ãmẽ ekwa jẽsi Janejare'e ayvu mojenu erokwa, kee jaa: “Janejare'e opota jamoẽoka jane'arà kyty”, ejaa emojenu erokwa, e'i Jesu ijupe.

61Ajaire kee e'i ãmõ Jesu pè:

– Erõvijã Jesu, ije ve aatà nerupi. Taa rã'ĩ eretãrãgwerà kõ pè javo ajamã'ẽ. I'ete põ? e'i.#1To. 19.20

62E'i ajamã'ẽ Jesu ijupe:

– Ãnĩ. Nikatu'ãi ãmẽ. Nãwĩvoi ãmẽ erekoa rupi ekoi mã'ẽ. Wekokwerà rè toja'a e'ã ky'y. Nikatui wape kytyre ojirova omãjã remẽ. Ãwĩ rapijarà nomoẽoka kuwa'ãi Janejare'e o'arà kyty iko ipi, e'i Jesu.

Currently Selected:

Rukasi 9: oymNT

Highlight

Copy