Rukasi 7
7
Sota rõvijã mõ “aje” e'i Jesu ayvukasia pè remẽwarà
(Mateusi 8.5-13)
1Ajaire awyjepa Janejare'e ayvu omovyvypa Jesu jane kõ pè remẽ, ãmẽ ojivyrĩ uu Kapanão taa pè ovãe. 2Ãmẽ a'e pè oiko sota atyry rõvijã mõ. Romã wãnà kõ tè a'e, wemĩgwai kõ revejẽ. A'e remĩgwai mõ itekorã ywete sikaepo upa. Okãjã taray upa. Tõvijã remiau tè a'e. 3Ãmẽ Jesu rewarà ojenupa sota kõ rõvijã pè. Jesu kasia ve ojenu ijupe. Ajawyi Juteu rõvijãgwerà kõ mõ omonooka Jesu pè javo, totuu itekorã mã'ẽ mokatu opota remẽ.
4-5Ãmẽ “hoõ” e'i Juteu rõvijã kõ oo Jesu pè javo. Ovãe Jesu pyri kupa remẽ, kee e'i ijupe kupa:
– Sota rõvijã oremuroka nekoty mã'ẽ, mire'eay rõmõ tè a'e. Juteu rõwã ipe mijã. Ajamã'ẽ janerauvay Juteu kõ rõmõ janerereko ipi, e'i kupa. Ãmõ, a'e tè oinõoka Janejare'e ayvu rè jimo'ea retã orerena pè. Ajawyi “ikatuay” oro'e pirujẽ ijupe. Ikatu tè apijarà nepãtavõ remẽ, oro'e ene, e'i Jesu pè kupa.
6Ãmẽ “hoõ” e'i Jesu oo upi kõ iko. Ajaire sota rõvijã retã mè ovãerĩ kupa remẽ, ojimorypa kõ tè omonooka Jesu rõvaisĩ. A'e kõ kee e'i Jesu pè:
– Kee e'i sota rõvijã ene: 7“Nekatu ywe'ei ije maevo nerepotari aa nemogeta. Ãmõ, maevo nerepotari eretã wyry pè neike, Juteu rõwã ije rewarà mõ. Ajawyi kuipe'e wyive emokatu eremĩgwai, a'e neupe. Akuwa ikatupatà neayvu rupi. 8Akuwa ayvukasia rewarà. E'arà kyty oiko tè erõvijã mõ. Ãmõ, ewyry kyty oiko teve eremĩgwai sota kõ. Ajawyi eremĩgwai mõ pè ‘ekwa’ a'e ijupe remẽ, ‘hoõ’ e'i oo eayvu rupi ipi ãmẽ. Ma'e remẽ ãmõ pè ‘ejo’ a'e remẽ, ‘hoõ’ e'i ve uu eayvu rupi. Ãmõ pè, ‘moko ereko’, a'e remẽ, ‘hoõ’, e'i ipi. Eayvu rupi katu ekoi kupa ipi. Ãwitõ ije eayvukasi eremĩgwai kõ pè ipi. Ãwĩvo ve ene neayvukasi tekorãnà mogwapa rè ipi”, e'i sota rõvijã ene, e'i Jesu pè kupa.
9Ãmẽ Jesu aepo wenu remẽ,
– Haa! Aepo e'i sipõ sota rõvijã? e'i.
Ajaire ojirova jane kõ oo upi mãe kõ rè omãjã. Kee e'i ijupe kõ:
– Aje kee a'e pejẽ. Naesaive ãwĩvo eayvukasia pè “aje ywete” e'i mã'ẽ mõ Isaeu kõ põ'õ mè. Emã'ẽ. A'e Juteu rõwã mã'ẽ ipe remẽ, a'evo tesõ ekoi! e'i sota rõvijã pewarà mõ.
10Ajaire sota rõvijã retã gyty ojivy oo ayvu momewarà kõ. Ãmẽ ovãe kupa remẽ, ikatupa emĩgwai upa.
Jesu omomoera okãjãma mã'ẽ remẽwarà
11Ajaire sa'u, ãmõ 'ary pè Jesu kõ oo Nãi taa kyty. Emimo'ekwerà kõ ve oo upi. Ãmõ, aty wasu ve oo upi kõ. 12Ajaire tena pyri'ĩje'ẽ ovãerĩ kupa remẽ, kyty wyi jane kõ atyry ve uu ojiõvaisĩ kupa. A'e kõ kõnomĩokyry reãgwerà mõ omovy eru ereko kupa. Tyvy rena kyty tè weraatà ijaty kupa mijã, taa kupe kyty. Terekwarerà memyry tè okãjã mã'ẽ. Wyjaveay mã'ẽ tè. Ajawyi jane kõ mõa'ãrõwã a'e taa wãnà kõ uu terekwarerà rupi iko. 13Terekwarerà oja'o omemyry reãgwerà rè iko. Ãmẽ Jesu omã'ẽ ee remẽ, oporijauesa. Kee e'i ijupe:
– Neja'o sõ, e'i ijupe.
14Ameve Jesu uu teãgwerà karyru rè ojipy. Omovy eraa mãe kõ opyta rã'ĩ ojimomãatã ee omãjã. Kee e'i Jesu ãmẽ okãjã mã'ẽ pè:
– Epõ'ã age'e si, kõnomĩokyry, e'i.
15Ameve kõnomĩokyry reãgwerà opoerapa. Ijãkãnã'ã ojãrapo'ã oporegeta. E'i ãmẽ Jesu ijy pè, terekwarerà pè:
– Aã opoerapa nememyry ky'y, e'i ijupe.
16Ãmẽ jane kõ ipiryvypy katu omãjã ee. Omã'ẽ tesõ ee kupa. Janejare'e omoe'e ywete ãmẽ kupa ky'y. Kee e'i imoe'e kupa:
– Janejare'e oja'a janere wyi omuroka wayvu mojenuarà janepãtavõarà rõmõ, ijayvukasiay wete mã'ẽ, e'i kupa.
17A'evoa omojenu jenu erokwa kupa ipi, Juteja taa kõ rupi. Omojeapy eraa Juteja yvy pè ãmõ taa taa kõ rupi, ajaate eraa, a'e yvy popy rupiwarà kõ pè toenu kõ.
“Pekwa Jesu mogeta”, e'i Juwão wemimo'ekwerà kõ pè remẽwarà
(Mateusi 11.2-6)
18-19Ajaire Juwão poromojãmorĩ mã'ẽ jimopã'ãga pupe tui upa. Ãmẽ a'e remimo'ekwerà kõ Jesu manyvo nyvo jẽ wereko mãe kõ omome'u me'u Juwão pè kupa. “A'evo 'evo wereko Jesu”, e'i ijupe kupa. Ãmẽ:
– Pekwa Janerõvijã Jesu kyty imogeta, e'i Juwão ijupe kõ. Mõrijõ pè aepo e'i.
– Kee pejẽ Jesu pè: “Ava põ ene?” pejẽ ijupe. “Janejare'e Remimuurà uutà mã'ẽ rõmõ põ ene? Ãnĩ? A'e rõwã põkõ ma'e remẽ? A'e rõwã ene remẽ, ãmõ tè põ oromoa'utà ky'y?” pejẽ ijupe, e'i imono kõ.
20Oo ãmẽ Jesu pyri ovãe kupa. Kee e'i ijupe kupa:
– Juwão poromojãmorĩ mã'ẽ oremuu nekoty. A'e kee e'i oporegeta imuu neupe: “Janejare'e Remimuurà uutà mã'ẽ põ ene? Ãnĩ põ? A'e rõwã ene remẽ, ãmõ tè põkõ oromoa'utà?” e'i Juwão imuu ene, e'i Jesu pè kupa.
21Ãmẽ a'e remẽ itekorã mãe kõ mõa'ãrõwã omokatu Jesu upa, Juwão remimo'ekwerà kõ rovake. Ma'e. Tekorãnaiwerà kõ omokatu. Ãjãgaiwerà ojimoemija ee mãe kõ ve omokatu. Omoẽ imono ãjãg kõ ipy'a kõ pupe wyi ipi. Ãmõ, naeapyoi mãe kõ omokatu taeapyo ky'y. A'e a'e kõ rè omã'ẽ Juwão remimuurerà kõ upa. 22Ajare e'i Jesu ijupe kõ:
– Manyvo nyvo jẽ aiko mã'ẽ rè pemã'ẽma. Pekwa awi penemisakwerà momewa Juwão pè. Ãmõ, peneminuwerà pemome'u ijupe. Emã'ẽ. Naeapyoi maekwerà kõ eapyo ky'y. Ãmõ, etãmã jeapa maekwerà kõ watapa ky'y. Ãmõ, itekorãnai ipisĩsĩma maekwerà kõ ikatupa. Ipisukyrĩ tesõ kupa ky'y. Ãmõ, nijapyai maekwerà kõ ijapya katu ky'y. Ãmõ, okãjã maekwerà kõ opoerapa mijẽ. Ãmõ, nimoma'ei mãe kõ pè Janejare'e ayvu e'eay ojenu okwa, e'i.#Isa. 35.5-6; 61.1; Ruk. 4.18-19 23“Aje ywete” e'i eupe mãe kõ, owaray Janejare'e werekotà. [Pejivy peo ãmẽ aepo jaa momewa ijupe,] e'i Jesu.
Juwão rè Jesu oporegeta remẽwarà
(Mateusi 11.7-19)
24Ajaire, Juwão remimo'ekwerà kõ ojivypa oo Juwão koty paire, kee e'i Jesu jane kõ pè, Juwão pewarà mõ. Juwão ayvu renu oo maekwerà kõ pè e'i:
– Tekoe'ãma kyty itõkõ peo [Juwão poromojãmorĩ mã'ẽ resa] ipi, e'i. Manyvo rã põ peo esa ipi? Manyvo e'i põkõ pejẽ iko ipi, tapejivy jivy tekoe'ãma kyty esa ipi? Iteetejẽ põ ijayvu ipi? Ãnĩ! Wayvu omotee remẽ, nijajapyaka'ãi ee ipi! e'i. Manyvore sipõ peo esa ipi? e'i ijupe kõ. 25Manyvo pejẽ põ ijupewarà mõ? “Tyru e'eay opypy mã'ẽ tè Juwão. A'e resa aatà”, pejẽ põkõ ipi? Ãnĩ! Naikoi a'evo mã'ẽ tekoe'ãma pè ipi! e'i. Wetã wasu pupe tè tui apijarerà ipi! e'i. A'evo rõwã Juwão ekoi. 26Manyvo rewarà mõ põ peo awi esa ãmẽ? Janejare'e ayvu mojenuarà tè Juwão. Aja rewarà mõ tè peo esa ipi! [Aje, Janejare'e Remimuurerà vãea mojenuarà tè Juwão, e'i.] Ajawyi ywesõ pirujẽ Janejare'e ayvu mojenuarà kõ wyi ekoi, e'i. 27A'e pewarà mõ tẽ tesõ Janejare'e kee e'ipa amãtejẽ Wemimuurà rã pè wayvu mojenuarà rupi karamoe remẽ:
“Eayvu mojenuarà mõ amono amãtejẽtà nerenone rupi, oromonotà remẽ.
Nevãea rã omojenu amãtejẽtà jane kõ pè erokwa, tanerãrõ jẽ kupa.
Tojipy'amokatu amãtejẽ nerenone kupa”, e'i maekwerà.#Marak. 3.1
Juwão pewarà mõ tè aepo'i.
28E'i jẽ Jesu:
– Ãmõ, Juwão rewarà kee a'e pejẽ. Nuvei 'ete Juwão rapijarà mõ pepõ'õ mè Janejare'e ayvu mojenuarà rõmõ mijã. Juwão ywesõ ijayvukasiay wete pirujẽ Janejare'e ayvu mojenuarà kõ wyi, ajaate age'e remẽ, e'i. Ajamã'ẽ kãramõ ekoty rewarà kõ erewarà omojenu tary ve kupa. Pirujẽ erewarà okuwa katutà ãmẽ kupa ky'y. Ajawyi a'e kõ remimojenu rã ywesõ ikasità Juwão remimojenuwerà wyi ky'y, e'i Jesu.
29Ajawyi a'e remẽ Juwão ayvu wenu maekwerà kõ, ãmõ, tekoua repy moatyarà kõ revejẽ, pirujẽ kee e'i ojiupe kupa:
– Aje ywete Janejare'e ayvu e'eay tè Juwão omome'u janeupe mijã. Janejare'e ivoaya mã'ẽ tẽ tesõ omojikuwaoka jane. Ikatuay. Mã jẽ rõwã nijaenu'ãi ijayvu ipi mijã, e'i ojiupe kupa.
A'evo remẽ uu uu ojimojãmorĩoka Juwão pè kupa ipi mijã.
30Ajamã'ẽ Pariseu kõ noenu tari Juwão ayvukwerà ipi. Ãmõ, tãmõ Moisesi remikusiwarerà rè poromo'e mãe kõ noenu tari ijayvukwerà ipi. Ovote Janejare'e ayvu omomorĩ kupa. Ajawyi nojimojãmorĩoka tari Juwão pè kupa ipi.#Mat. 21.32; Ruk. 3.12
31Ãmẽ kee e'i Jesu jane kõ pè:
– Mã kõ rè pãwĩ age'e remẽwarà kõ amosã'ãgatà? Manyvo sõ põ mirà ajamã'ẽ, Janejare'e ayvu noenu tari mãe kõ? e'i. 32Hoõ, ja'yrerà kõ rè tè amosã'ãga kõtà ajawyi. Ma'e ja'yry kõ omory tarepe ojee ipi. Oka rupi oẽ werojimaraità remẽ, kee e'i ojiupe kupa ipi:
“Manyvo põ: ‘Ejo jajimory’, oro'e ipe pejẽ?
Emã'ẽ! Jimi'a oroopy remẽ, napenoryi orevo jẽ peiko ipi?
Ajamã'ẽ, ‘Age'e jajiãpirõtà’, oro'e remẽ, ajaire oroja'o ipe orokupa. Ajamã'ẽ napeja'oi orevo ve ipi.
Manyvo põ norepotai pekupa? Nikatui ãwijã mẽ”, e'i e'i ja'yrerà ijayvu ojimõarõ ojiupe ipi.
Ma'e ja'yrerà vo 'ejẽ pejẽ peiko. 33Emã'ẽ! Juwão uu pepytery pè remẽ, napemã'ẽ tari kõrijõ ee ipi. Kee jaa rewarà mõ. Ovo rupi teve ekoi ipi. Nojimi'ui ãmõ kõ vo ipi. Ãmõ, moma'eyvary aisiririkwerà no'u tari ipi. Ajawyi “aje” napejẽi ijayvu pè. “Ãjãg ipy'a pupe mã'ẽ teipõ ãwĩ”, pejẽ kõrijõ ijupe ipi. 34Ajaire ije yva pe wyi ajo ajimojane mã'ẽ rõmõ aiko. Ajimi'u katu ipe pepytery pè aiko ipi. Ãmõ, moma'eyvary aisiririkwerà a'u teve ipe ipi. Ajamã'ẽ nivoi tekoua kõrijõ tè pemo'y ere ipi. Kee pejẽ ije: “Emã'ẽ ee. Nivoi mãe kõ jimorypa tẽ tesõ Jesu. Tekoua repy moatyarà kõ jimorypa teve tesõ Jesu”, pejẽ kõrijõ ije. “Ojimi'u te'ĩte iko”, pejẽ kõrijõ ije. Ãmõ, “Moma'eyvary aisiririkwerà ve o'u iko ipi. Nikatui ekoi”, pejẽ kõrijõ tè ije ipi, ererovija e'ã rõmõ peiko. Moko pejẽ remẽ, “Temipotare'ã ãwĩ”, pejẽ kõrijõ tè ore ipi, ãwisõ Janejare'e ayvu mojenuarà kõ tè ore remẽ. 35Ore, orojikuwa katu Janejare'e ayvu mojenuarà kõ rõmõ oroiko. Oromojenu remẽ, jane kõ opota Janejare'e remimota rõmõ ekoi. A'evoa kõ rupi orojikuwa aje ywete Janejare'e ayvu mojenuarà kõ rõmõ tè ore, ije, Juwão reve, e'i Jesu ijupe kõ.
Wãivĩ mõ ojoẽ ipije mã'ẽ Jesu rè imogy remẽwarà
36Ajaire ãmõ 'ary pè Pariseu mõ Simão eu erà pè mã'ẽ kee e'i Jesu pè:
– Ejo orepyri ejimiwa, e'i ijupe.
“Hoõ” e'i Jesu ãmẽ. Oo ãmẽ oike etã wyry pè. Ãmõ, ojapu'a ojimiwa upa, namesa 'aryvo.
37Ãmẽ uve a'e taa pè wãivĩ mõ. Wãivĩ aiwerà tè a'e wãivĩ. A'e wãivĩ pè ojenupa Jesu Simão retã wyry pè tui remẽ. Ãmẽ:
– Taa ajawyi esa, e'i wãivĩ oupe.
Ajawyi moma'e e'ekwerà mõ opyy eraa Jesu kyty. Ipije katu mã'ẽ putei po'i pupe weraa eroike etã wyry pè. 38Jesu ape kyty uu upa. Oja'o tesõ upa, ijãgyo tesõ weko aiwerà rè rewarà mõ. Kee e'i oupe:
– Erauvay Jesu. Nemokuipe'e'ãi owyi, e'i oupe.
Ãmẽ Jesu py rè ojayvy wãivĩ. Ipy omojau wearykwerà pupe. Omosikã ajaire wapira pupe. Omosu ajaire ipy. Ãmõ, ipije mã'ẽ omogy teve ipy rè. Jesu wauvay rewarà mõ moko wereko.#Mat. 26.7; Mak. 14.3; Juw. 12.3
39Ãmẽ moko wereko remẽ, tetã jarà omã'ẽ rã'ĩ ee upa, a'e Simão. Ojipy'amogeta ai ee omãjã. E'i ãmẽ oupe: “Aje ywete sõ Janejare'e ayvu mojenuarà rõmõ tè Jesu remẽ, okuwa kuwa nivoi mã'ẽ tè ãwĩ wãivĩ”, e'i. Opy'a pupe tè aepo e'i. 40Ajamã'ẽ Jesu okuwavĩ aepo e'i Simão remẽ. Ajawyi kee e'i ijupe:
– Simão, ayvu mõ tamome'u ene age'e, e'i Jesu ijupe.
– Hoõ, ere ãmẽ, poromo'earà, e'i Simão.
41Ãmẽ Jesu kee e'i poromosã'ãga rõmõ:
– Uve kwaima'e mõ ikarakuri ywete mã'ẽ, e'i. Mape remẽ karakuri mõ ome'ẽ rã'ĩ koivo kõ pè ipi, e'i.#7.41 Moma'e kõ topyy oupe kupa tè ome'ẽ rã'ĩ. Ajaire omojivytà karakuri rekovijarerà ijupe kupa ipi. Ãmõ pè moeta karakuri sĩ mõa'ãrõwã ome'ẽ rã'ĩ. 500 rõmõ tesõ ome'ẽ rã'ĩ ijupe. [“Ajaire amojivytà ekovijarerà neupe”, e'i ikusiwa kareta rè imojikuwaparà rõmõ karakuri opyy remẽ.] Ajaire ãmõ pè teve ome'ẽ moeta karakuri sĩ mõ. Kejõgà ome'ẽ ijupe. 50 rõmõgà ome'ẽ rã'ĩ ijupe. 42Ajaire karakuri mojivya 'arà mẽ, kee e'i karakuri jarà ijupe kõ: “Age'e si pemoepy ije ky'y”, e'i ijupe kõ. Soõ, noerekoi karakuri kupa. Manyvo noereko'ãi imojivy ãmẽ kupa. Ajawyi ojimopirai tesõ kupa upa. Ajamã'ẽ karakuri jarà oporijauesa kõ ãmẽ ky'y. Kee e'i ijupe kõ: “Teene. Karakuri ame'ẽ rã'ĩ peupe maekwerà naekovijanõoka'ãi peupe ky'y”, e'i. “Awyjepa. Kõi kareta pekusiwa ity peo karakuri rewarà maekwerà, amokekeipa imopopo ky'y”, e'i ijupe kõ. Ãmẽ sõsi nojimopirai kupa ky'y, karakuri jarà oporijauesa kõ rewarà mõ. Nijãgyoi kupa ky'y. Ory kõrijõ tè iko kupa ky'y. Ãmẽ ywesõtà karakuri jarà wauvay kupa ky'y, e'i Jesu.
Aepo omome'u paire, e'i jẽ Simão pè:
– Simão, mõrijõ kwaima'e kõ tomojivy karakuri rekovijarerà mijã, e'i. Ãmõ kejõgà tè omojivytà mijã. Ãmõ, ijatyray sa'u omojivytà mijã. Ajare kee ere ije. A'e kõ wyi mã ywesõ wauvay karakuri jarà, “Neremoepy'ãi ky'y”, e'i paire? e'i ijupe.
43Ãmẽ e'i Simão:
– Kõi ijatyray karakuri maekwerà nomoepy'ãi ky'y mã'ẽ, a'e ije, e'i.
Ãmẽ Jesu e'i:
– I'ete ere, e'i ijupe.
44Aepo e'i paire Jesu ojirova wãivĩ gyty omãjã rã'ĩ. Kee e'i ãmẽ Simão pè:
– Nemã'ẽ põ aã wãivĩ rè, Simão? Ijaiwererà kõ mõa'ãrõwã. Ãwitõ ijatyray karakuri nomoepy'ãi ky'y mã'ẽ voay wete wãivĩ. Ajawyi ãwĩ ywesõ erauvay newyi. Emã'ẽ. Ji'i neretã wyry pè aike remẽ, yy mõ nererui tajipykusu.#7.44 Kee Juteu kõ wereko mõropãrà kõ ovãe remẽ ipi. Opykusu kõ ipi. Ãmõ, oovamosu kõ ipi. Ekoa teãmã a'evo ekoi kupa. Ãwĩ ãmẽ wearykwerà pupe tẽ tesõ epykusu. Epymosikã ajaire wapira pupe, e'i. 45Ãmõ, nerovamosui rejupa, avãe remẽ, e'i. Aã wãivĩ ãmẽ epymosu, e'i. 46Ãmõ, eãkãg rè neremogyi moma'eyva kawerà.#7.46 Juteu kõ omoe'età ava mõ remẽ, ijãkãg rè moma'eyva kawerà omogy kupa ipi. Aã ãmẽ epy kõ rè tẽ tesõ ipije katu mã'ẽ omogy. Nãwĩvoi ene neiko, e'i. 47Aja rewarà mõ kee a'e ene. Pirujẽ ijaiwererà kõ aitypypyipaokatà iwyi age'e ky'y. Ajawyi tè erauvay ãwĩ, e'i. Ijatyray ijaiwererà kõ ee mijã. Ajawyi ãwĩ ywesõ erauvay newyi, e'i ijupe.
48Ãmẽ e'i Jesu wãivĩ pè:
– Awyje aitypypyipaoka neaiwererà newyi ky'y, e'i ijupe.
49Ãmẽ mõropãrà kõ aepo wenu remẽ, kee e'i ojiupe kupa:
– Haa! Mã si pãwĩ kwaima'e, aepo e'i mã'ẽ? Janeaiwererà oitypypyipaoka kuwa põ janewyi? e'i kupa.
50Ajaire e'i Jesu wãivĩ pè:
– “Aje ywete” ere ije rewarà mõ oroereko katu jimomorijau wasua wyi, e'i ijupe. Age'e tanepy'a piryvypy katu neiko, nejivy neo remẽ, e'i ijupe.
“Hoõ” e'i wãivĩ oo ãmẽ.
Currently Selected:
Rukasi 7: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
