Rukasi 6

“Jimoava 'arà Jarà tè ije,” e'i Jesu mã'ẽ

(Mateusi 12.1-8; Maku 2.23-28)

1Ajaire jimoava 'arà mẽ Jesu kõ koo pyryvo okwa kupa. Aresity koo pupe tui upa. Ãmẽ a'e pyryvo okwa kupa remẽ, Jesu remimo'ekwerà kõ aresi mõ opo'o iwa. Opo pè okamiri ipiro iwa kupa.#T.M. 23.25 2A'evoa rè Pariseu kõ mõ omã'ẽ remẽ, kee e'i Jesu pè kupa:

– Neremimo'earà kõ noerovijai sõ tãmõ Moisesi remikusiwarerà jimoava 'arà rewarà age'e, e'i kupa. “Tapeposiko e'ã jimoava 'arà mẽ”, e'i maekwerà noerovijai kupa, e'i kupa.#6.2 “Aepo werovija sõ kupa remẽ, moma'e rã'ãigwerà nopo'o'ãi kuwa iwa jimoava 'arà mẽ kupa mijã”, jaa tè aepo e'i mã'ẽ. “Janejare'e naoryi omãjã ee kõ ky'y”, jaa tè.

3Aepo rè kee e'i Jesu ijupe kõ:

– [Jane kõ javya ywesõ pemoa'u katu ipi! Poroporijauesaa rè ywesõ kuwasi peja'a peiko mijã! Na'evoi ajamã'ẽ peiko, e'i.] Pemogetapa rõwã sipõkõ kareta mijã, kõi manyvo wereko tãmõ Tavi karamoe remẽ? Ma'e, osota kõ reve nikasi remẽ ijamyay kupa. A'evoa pekuwa ipe itõkõ. 4Ajawyi ãmẽ itõkõ Janejare'e moe'ea retã wyry pè tè oike meju to'u kupa. Janejare'e pè temime'ẽgwerà tẽ tesõ o'u tãmõ Tavi osota kõ reve kupa upa. Janejare'e pè oporegeta mãe kõ kõrijõ tè itõkõ meju o'u kuwa ipi mijã. [“Nivoi” ne'i ajamã'ẽ Janejare'e ijupe.] Aje si napekuwai aepo jaa kõ? e'i ijupe kõ Jesu.#Tek. 24.9; 1Sa. 21.1-6

5E'i jẽ Jesu ijupe kõ:

– Ajikuwapa yva pe wyi ajo ajimojane mã'ẽ rõmõ. Ije ywesõ jimoava 'arà wyi. Jimoava 'arà Jarà tè ije, e'i.

Jesu omokatu ipo japu'a mã'ẽ remẽwarà

(Mateusi 12.9-14; Maku 3.1-6)

6Ajaire ãmõ jimoava 'arà mẽ Janejare'e ayvu rè jimo'ea retã wyry pè Jesu oike poromo'e upa. Ameve mirà mõ ipo japu'a mã'ẽ a'e pè ekoi teve. I'ekatu kytyrewarà ipo siri 'ejẽ. 7Ãmõ kõ ve a'e pè tui. Pariseu kõ. Ãmõ, tãmõ Moisesi remikusiwarerà rè poromo'e mãe kõ. A'e kõ opota teãmã nivoi mã'ẽ omo'y Jesu rè ipi. Ajawyi omã'ẽ jẽ ee kupa upa. Ajawyi,

– Poromokatutà põ Jesu age'e jimoava 'arà mẽ? e'i omãjã ee kupa. Omokatu remẽ, nivoi mã'ẽ simo'ytà ee ãmẽ, e'i ojiupe kupa.

8Ajamã'ẽ aepo jaa okuwavĩ Jesu. Ajawyi kee e'i ipo japu'a mã'ẽ pè:

– Epõ'ã ejo epyri ovake kõ, e'i ijupe.

Ãmẽ “hoõ” e'i. Opõ'ã ovake kõ ãmẽ.

9Ãmẽ Jesu e'i Pariseu kõ pè:

– I'ete põ jimoava 'arà mẽ poropãtavõ ipi? e'i. Ma'e remẽ, jimoava 'arà mẽ, nivo'ãi põ poropãtavõ ipi? Manyvo pejẽ põ pekupa? I'ete põ imarama mã'ẽ jamokatu tomãnõ e'ã? Ãnĩ? “Nijamokatu'ãi”, pejẽtà põ? Manyvo pejẽ põ ajaa renu? e'i Jesu.

10Ajaire Jesu pirujẽ omã'ẽ a'e kõ rè erokwa. Nipui ãmẽ kupa. Kee e'i ãmẽ ipo japu'a mã'ẽ pè:

– Ejipomomojai awi, e'i.

Ojipomomojai ãmẽ ovake kõ. Ameve ikatupa. Apy'awarà mõ ikatupa.

11A'e rè Pariseu kõ omã'ẽ remẽ ywesõ ojimõarõay ee omãjã kupa. Tãmõ Moisesi remikusiwarerà rè poromo'e mãe kõ ve a'evo ekoi.

– Manyvo kuwasi Jesu moko'e sireko remẽ? e'i e'i ojiupe kupa.

Jesu opyteporo wemimo'ekwerà kõ remẽwarà

(Mateusi 10.1-4; Maku 3.13-19)

12Ajaire ãmõ 'ary pè Jesu ojisyry rã'ĩ oo yvytyry mõ gyty Uu pè oporegeta upa. Werokõ'ẽ oporegeta ijupe. 13Ajaire kõ'ẽma mẽ okwai wemimo'ekwerà kõ imuu okoty. A'e kõ pytery pe wyi, 12 rõmõ opyteporo wemimonooka rã kõ rõmõ toiko.

14Aã reitõ opyteporo mãe kõ: Simão eu ijupe mã'ẽ. A'e pè Jesu e'i: “Peturu a'età neupe”, e'i eenõ ijupe. Ãmõ, Aãtere, Jesu remipyteporo mõ teve. A'e Simão mõmirĩ rõmõ ekoi. Ãmõ, Tiaku opyteporo, imõmirĩ Juwão revejẽ. Ãmõ, Piripi. Ãmõ, Patoromeu. 15Ãmõ, Mateusi. Ãmõ, Tome. Ãmõ, Tiaku. Aupeu ra'yry tè a'e. Ãmõ, Simão, Juteu kõ yvy rè okãte'ã mã'ẽ. 16Ãmõ, Juta, Tiaku ra'yry. Ãmõ, Jutasi Sikarioti. A'e kãramõ ome'ẽtà Jesu ijãpã kõ po pè karakuri repy rõmõ. [Mokopejõ Jesu remipyteporokwerà kõ emimono rã kõ rõmõ.]

Jesu ayvukasia ojenu okwa remẽwarà

(Mateusi 4.23-25)

17Ajaire wemimo'ekwerà kõ revejẽ Jesu owyjy oo maipe kyty. Yvypee pè uu opyta kupa. A'e pè poromo'e upa. Ãmẽ ijayvu wenutà mãe kõ uu ojatykapa a'e pè, ãmõ jane kõ revejẽ. Juteja yvy pewarà kõ tè uu. Ma'e, Jerusarẽ taa wãnà kõ uu. Ãmõ, pãranã wasu popy pewarà kõ ve uu. Ma'e, Tiru taa wãnà kõ. Ãmõ, Sitõ taa wãnà kõ. Wãi wãisõ uu ipyri ojatykapa. Aty wasu rõmõ uu kupa. 18A'evo remẽ, ãmõgwerà ovãe Jesu ayvu renu. Ãmõgwerà, itekorã mãe kõ ve uu ojimokatuoka Jesu pè kupa. Ãmõ, ãjãgaiwerà remimoaiwerà kõ uu Jesu koty tomokatu ipi. A'e a'e kõ uu. 19A'evo mãe kõ ojipomomojai Jesu rè ojipy okwa remẽ, tomokatu kõ. Pirujẽ a'evo mãe kõ omokatu okasia rupi ãmẽ.

Janejare'e poromoryoka mã'ẽ rewarà

(Mateusi 5.1-12)

20Ajaire Jesu omã'ẽ wemimo'ekwerà kõ rè erokwa. Kee e'i ijupe kõ:

– Pejẽ napemoma'ei mãe kõ, tapenory katu peiko ipi, e'i.

Ikatuay Janejare'e penerekotà penõvijã e'eay rõmõ penereko, a'e pejẽ.

21Ãwĩvo teve pejẽ napekasi peiko mãe kõ tè pejẽ. Tapenory peiko, a'e pejẽ.

Pekasi katutà ajaire peiko. Pepy'a katutà ajaire peiko.

Ãwĩvo teve pejẽ peja'o peiko mãe kõ. Penoryvay tary ve peiko.

Pepuka katutà ajaire penoryvay rõmõ peiko, Janejare'e remimory kõ rõmõ tè peiko rewarà mõ, e'i.

22Ãmõ, ekoty rewarà rõmõ peiko rewarà mõ, kee penereko ipe kupa remẽ, Janejare'e pemory katuoka jẽtà penereko.

Ãmõ kõ ojikõ'õ ipe pene remẽ.

Ãmõ, pemowaite ipe owyi kupa remẽ.

Ãmõ, nerõarõ ipe kupa remẽ.

Ãmõ, iteetejẽ nivoi mã'ẽ omo'y teywete ipe pene kupa remẽ.

“Moko te'i ne kupa”, pejẽ kõrijõ ãmẽ ijupe kõ.#1Pe. 4.14

23A'evo penereko ai epe kupa remẽ, tapenory jẽ ãmẽ peiko. Tapenory katu kõrijõ ikõ ãmẽ nẽ. Kee jaa rè tapeja'a. Ãwitõ karamoewarà kõ wereko ai Janejare'e ayvu mojenuarà kõ imomijarĩ ipi, aekwery vo ywete penereko kupa age'e remẽ. Ajawyi tapenory jẽ peiko. Janejare'e omokatupa amãtejẽ penena rã penenone. Ikatuay wete Janejare'e penerekotà, e'i Jesu poromo'e ipi.#J.K.R. 7.52

“Mokoi pejẽ,” e'i mã'ẽ

24Ajaire kee e'i Jesu:

– Mokoi a'e pejẽ! Age'eve pemoma'e ywete ipe peiko. Nikatu'ãi peupe ajaire. Pepy'a katuay tite peiko.

Kãramõ nãwĩ vo'ãi peiko ky'y. Moma'e rè napenako'i'ãi kãramõ peiko.

25Ãmõ, mokoi pejẽ, pekasi katu peiko mãe kõ.

Ajaire peamyay wetetà peiko. Peãgyo tesõtà ãmẽ ky'y.

Ãmõ, ivo jẽ mokoi pejẽ, pepuka te'ĩte peiko mãe kõ.

Kãramõ peja'o ywetetà peiko ãmẽ ky'y.

26Ãmõ, mokoi pejẽ, “mire'eay” e'i jane kõ pejẽ pemoe'e rõmõ penereko remẽ!

Kee jaa rè tapeja'a. Janejare'e ayvu mojenuarà rã'ãga kõ pè ve “mire'eay” e'i ywe'e tite kupa ipi.

Aepo e'ipa rõwã sipõkõ penãmõi kõ Janejare'e ayvu mojenuarà rã'ãga kõ pè karamoe remẽ, e'i.

Ajawyi tè mokoi a'e pejẽ, e'i ijupe kõ.

“Peãpã kõ tapeauvay ipi,” e'i Jesu mã'ẽ

(Mateusi 5.38-48)

27E'i jẽ Jesu:

– Kee a'e pejẽ, eayvu peenu mãe kõ. Peãpã kõ ikõ peauvay ipi nẽ, a'e pejẽ. Ãwĩvo ve ikõ pene ojikõ'õ mãe kõ tapeovajarĩ e'ã penereko ai kupa remẽ nẽ. 28Ãmõ, pemovyvyrai tè kupa remẽ ikõ tapeauvay kõ jẽ ereko nẽ. Ãmõ, nikatui penereko kupa remẽ ikõ tapeporegeta Janejare'e pè kõrijõ ijupewarà kõ mõ ãmẽ nẽ.

29– Ãmõ remẽ, ava mõ penovapete sõ remẽ, “torojipy” tapejẽ e'ã. Tapejirova kõrijõ ikõ ãmẽ penova rovajarà kõrijõ topete teve ãmẽ nẽ, a'e pejẽ. Ãmõ, peyru ava mõ wekyità pewyi eraa remẽ, kee tapejẽ kõrijõ: “Hoõ, tyru je'arà ve eraa neupe awi”, pejẽ kõrijõ ãmẽ ijupe. 30Ãmõ, “Moma'e emuu ije”, e'i ãmõ kõ pejẽ remẽ, peme'ẽ te'ĩte ikõ ãmẽ ijupe ipi nẽ. Ivo jẽ nema'e weraatà remẽ, kee pejẽ kõrijõ: “Toeraa ãmẽ kupa”, pejẽ kõrijõ ikõ ãmẽ ijupe kõ nẽ. “Emojivy ikõ ije nẽ”, napejẽ'ãi ijupe kõ, e'i Jesu.

31Kee e'i jẽ:

– Ãwitõ pepota koivo kõ penereko katu ipi, ãwĩvo ve ikõ pereko katu kõ ipi nẽ, a'e pejẽ.#Mat. 7.12

32– Penauparà kõ kõrijõ tè rõwã tapeau ipi, a'e pejẽ. Peãpã kõ teve tapeau ipi, a'e pejẽ. Ma'e penauvay mãe kõ kõrijõ tè peauvay ipi remẽ, Janejare'e napemoe'e'ãi a'evoa rè, a'evo teãmã jaiko rewarà mõ. Nivoi mãe kõ mõ ve tesõ wauvay wauparà kõ ipi. 33Ãmõ, ikatuay penereko mãe kõ kõrijõgà rè tè peja'a katu remẽ, ãmõ, a'e kõ pè kõrijõ tè pejiovajarĩ ereko katu kõ remẽ, Janejare'e napemoe'e'ãi a'evoa rè. Nivoi mãe kõ ve tesõ moko e'i teve ipi. 34Ãmõ, kee peiko remẽ Janejare'e napemoe'e'ãi. Moma'e kõ peme'ẽ takatu pejimorypa kõ pè kõrijõ tè remẽ, “Kãramõ moma'e ivokwery pè ome'ẽ tary ve ije”, pejẽ ime'ẽ remẽ. Nivoi mãe kõ ve ovoarà kõ rè oja'a katu ipi. Ajawyi Janejare'e napemoe'e'ãi a'evo kõrijõgà tè peiko remẽ.

35E'i jẽ Jesu:

– Ajawyi peãpã kõ ve tesõ tapeauvay, a'e pejẽ. Pereko katu kõ ikõ ipi nẽ, a'e pejẽ. Ãmõ, ava mõ kee e'i pejẽ remẽ, “Nemoma'e mõ emuu rã'ĩ ije”, e'i pejẽ remẽ, “hoõ” tapejẽ kõrijõ ijupe. Peme'ẽ maire, “Kuise'ẽ ikõ teremojivy imuu ije nẽ”, tapejẽ e'ã ikõ ijupe nẽ. Ãmẽ tè Janejare'e tè penovajarĩokatà ime'ẽ peupe. A'evo pejikuwatà Janejare'e jo'arà kytywarà ãkarãgwerà kõ rõmõ peiko, eruparà kõ rõmõ peiko rewarà mõ. A'e sõsi janerereko katu jome ipi. Nivoi mãe kõ ve tesõ wereko katu ipi. 36Ajawyi ãwitõ Janejare'e janeporijauesa janerereko katu ipi, ãwĩvo ve ikõ koivo kõ tapeporijauesa ipi nẽ, e'i Jesu poromo'e.

“Peaiwererà rè ypy tapemã'ẽ ãmõ kõ aiwererà wyi”, e'i mã'ẽ

(Mateusi 7.1-5)

37Ãmẽ e'i jẽ Jesu:

– Koivo kõ reko tapemosã'ãga e'ã ikõ ipi nẽ. Ãmẽ tè peneko nomosã'ãga'ãi ãmõ kõ ipi. Ãmõ, nivoi mã'ẽ tapemo'y tite e'ã koivo kõ rè imojaiwe ipi. Kãramõ nivoi mã'ẽ nomo'y'ãi teve pene pemojaiwe ãmẽ kupa. Nivoi penerekoa remẽ, “awyjepa” tapejẽ kõrijõ ijupe ipi. Aepo e'i tary ve pejẽ ãmẽ kupa ipi. 38Ãwitõ ãmõ kõ ikatu tè pereko ipi, ãwĩvo ve upi katu tè penerekotà ajaire kupa ipi ãmẽ. Ajawyi ikatuay tapereko koivo kõ ipi, a'e pejẽ.

39E'i jẽ Jesu:

– Manyvo tekoua rè amosã'ãgatà ayvu mõ pemo'ea rõmõ. Aje sipõ naeapyoi mã'ẽ ovoarà mõ opopyy eraa pee rupi ipi? A'evo kuwa põ? Ãnĩ. Ootà o'a yvy kwarà pupe ojevo jẽ kupa ãmẽ.#Mat. 15.14 40Aepo jaa rupi kee a'e. Joemimo'earà noẽ'ãi jomo'earerà 'arà kyty ipi. Ajamã'ẽ ojimo'eoka mã'ẽ oẽ kuwa omo'earà akatu ipi. Ojevojẽtà ajaire kupa, e'i.#Mat. 10.24-25; Juw. 13.16; 15.20

41E'i jẽ:

– Manyvore põ neaiwererà rè jẽsi nerejimo'eai neiko? Moma'e rã põ koivo kõ aiwererà règà nejimo'eai neiko? Neaiwererà rè ypy kuwasi pemã'ẽ itypypyi mijã! Tea rè tè poromosã'ãgatà pemotekokuwa rõmõ. Manyvore põ koivo rea pè yvy oo remẽ, “Taekyi nerea pe wyi”, ere? Ajamã'ẽ nerea pupe oo yvy mitirõwã mã'ẽ remẽ, nerejimo'eai. Nerea rè ypy kuwasi nejimo'eai neiko mijã. Manyvore põ a'evo neiko? 42Yvy oo janerea pupe remẽ, nijamã'ẽi ipi. Nojisai. Ajawyi aje si yvy oo koivo rea pè remẽ, “Eeru nerea taky'a'o. Yvy taekyi ene”, ere kuwa põ koivo pè? Ãnĩ! Mokoi ivoa rã'ãga mãe kõ. Ajawyi nerea rè ypy eja'a. Aja paire tè koivo rea rè tereja'a ipi. Ãmẽ tè nereapyo katutà iky'a'oa rè ãmẽ. Ãwĩvo ve neaiwererà neitypa remẽ tè kuwa koivo kõ aiwererà rè nemã'ẽ kuwa, e'i Jesu ijupe kõ.

“Peporegeta rupi pepy'a pewarà ojikuwa”, e'i Jesu mã'ẽ

(Mateusi 7.17-20; 12.33-35)

43Ajaire temitã rè tè poromosã'ãga. Kee e'i:

– Temitã yvyra ikatu remẽ ikatu teve i'a ipi. Ni'a'ãi nikatui mã'ẽ rõmõ ipi. Ãwĩvo ve yvyra'y nikatui remẽ, ni'a'ãi ikatu mã'ẽ rõmõ ipi. Nikatui mã'ẽ rõmõ kõrijõ tè i'atà. I'akwerà weru o'y ipi. 44Ãwijã mẽ yvyra'akwerà rupi tè ojikuwa yvyra'y ipi. Ajaa rupi jakuwa yvyra'y ikatu mã'ẽ ipi. Emã'ẽ. “Ikatuay i'a remẽ ikatuay yvyra'y” eu kuwa ipi. Ava noo'ãi joõ'y kyty tè moma'eyva e'eay po'o iwa ipi. Ojikuwa teãmã ja'u e'ãte a'e. Yvyra'a'y rè tè i'akwerà mõ jaesa kuwa ipi. 45Ãwĩvo ve mirà kõ poregetaa rupi ipy'a pewarà ojikuwa ipi. Kwaima'e mõ mirà katu remẽ, ikatuay ojipy'amogeta iko ipi. Ikatuay teve oporegeta wetãrãgwerà kõ põ'õ mè ipi. Na'evoi ãmẽ imirai mã'ẽ. A'e ojipy'amogeta teitete mã'ẽ. A'e nikatui oporegeta ãmõ kõ pè ipi, nivoi ipy'a pewarà rewarà mõ, e'i Jesu.#Mat. 12.33-34

Tetã reinõa rè tè Jesu poromosã'ãga mã'ẽ rewarà

(Mateusi 7.24-27)

46E'i jẽ Jesu:

– Manyvo põ “Erõvijã ywete” pejẽ teywete ije ipi. Ajamã'ẽ napeenui eayvu. Erupi napeikoi. 47Ajawyi eayvu wenutà erovija mã'ẽ manyvo tekoua rè amosã'ãgatà imome'u pejẽ tapekuwa manyvo põkõ a'e ekoi ipi. 48Ma'e tetã reinõgarà rè tè poromosã'ãgatà tapekuwa. Eayvu rupi ekoi mã'ẽ a'evo ve ava mõ ikatuay oposiko tetã reinõa rè mã'ẽ. Ke'ĩrõwã opãkõi rã'ĩ imomãatãa rõmõ. Ajaire yvy ãtã gatu mã'ẽ 'aryvo tè wetã omõ'ãtà. Takuru 'aryvove jẽ omõ'ã. Omomãatãtà tè inõ. “Ãmẽ tè nopypyru'ãi ajaire”, e'i inõ. Ajaire oinõ maire, yvytu ai epetà. Ãmõ, ãmãnusu oky ipetà. A'e werokwa ipetà. No'a'ãi ajamã'ẽ. Noku'e'ãi 'ete teve, omõ'ãgãtãay rewarà mõ. Ãwĩvo eayvu wenu katu mã'ẽ ojimo'eai ee ipi remẽ, “Ije arovija katutà”, e'i oupe ipi. 49Ajamã'ẽ eayvu noenui mã'ẽ na'evo'ãi. Kee ne'i: “Janejare'e ayvu rupi katu taiko”, ne'i mã'ẽ a'evo ve tetã omõ'ã rã'ãga mã'ẽ vo 'ejẽtà ãmẽ. “Yvy ãtã 'aryvo tè tainõ imomãatã gatu”, ne'i imõ'ã rõmõ. Nojimo'eai ee. Omõ'ã tepe'yte inõ. Ajaire oinõ maire, yvytu ai okwa. Ameve tetã omopypyru ero'a ijarà kõ 'aryvo. Ãmãnusu oky remẽ, omotujupatà. A'evo 'ejẽ eayvu rè nojimo'eai 'ete enu mãe kõ ipi, e'i Jesu poromo'e.

Currently Selected:

Rukasi 6: oymNT

Highlight

Copy