Rukasi 5

Jesu opyteporo ypy wemimo'earà rã kõ remẽwarà

(Mateusi 4.18-22; Maku 1.16-20)

1Ajaire ãmõ 'ary pè pãranã popy rupi Jesu ekoi. Jenesare eu a'e pãranã pè. Ãmẽ aty wasu kõ uu Janejare'e ayvu renu kupa. Ojatykapa ywete Jesu pyri kupa. 2Ãmẽ yarà rè mõrijõ omã'ẽ Jesu. Ysĩ pãranã reme pè yarà kõ tui upa. A'e yarà pira rè jaraa ipi mã'ẽ teãmã. A'e rewarà kõ omoẽ pira mo'auta kõ eraa ikusu yy pè kupa upa. 3Ãmẽ Jesu opo yarà mõ pupe. A'e yarà jarà pè Simão Peturu eu. A'e pè kee e'i Jesu:

– Emoisyry rã'ĩ aã yarà eraa kuipe'e sa'u ysĩ wyi, e'i.

“Hoõ” e'i Simão. Opo yarà pupe imoisyry sa'u ãmẽ. Ãmẽ Jesu yarà pupe wapy upa. A'e pupe wyi poromo'e upa.#Mat. 13.1-2; Mak. 3.9-10; 4.1 4Ajaire poromo'e paire, e'i Simão pè:

– Eraa yarà typy sa'u mã'ẽ pè, e'i. A'e pè pira mo'auta kõ peinõ yy pè, pira mõ tojimo'a ee, e'i.

5Ãmẽ e'i Simão:

– Poromo'earà, orekõ'ẽma 'ete ipe pira rè oroiko, e'i. Noroekyi 'ete pira mõ. Ajamã'ẽ neayvu rupi oroinõtà tè pira mo'auta esa ajawyi, e'i.

6Weraa pira mo'auta inõ ãmẽ kupa. Soõ, pira omo'au mõa'ãrõwã ky'y. Omokekeipa tesõ pira omo'auta upa. Ajawyi pira mo'auta omõtã tite kupa. Ipowyijay tesõ pira ee. Wekyi tarepe yarà pupe inõ kupa.#Juw. 21.3,6 7Ajawyi opoja pojai kuipe'e wyi ojimorypa kõ pè kupa, ãmõ yarà jarà kõ pè.

– Pejo orepãtavõ pekupa! e'i kupa.

Uu ipãtavõ kõ ãmẽ kupa. Oporo pira imo'auta wyi kupa. Omoãnẽ ãnẽ tesõ pira pupe yarà kupa. Mõrijõ yarà tesõ omoãnẽ kupa. Omoyvypy tesõ yarà kõ pira powyisa.

8Ãmẽ a'evoa rè omã'ẽ Simão Peturu remẽ ijãgyoay tesõ ojipy'amogeta. Ãmẽ ovãe ojimoenãpa'ã Jesu rovake. Kee e'i ijupe:

– Jõvijã, nivoi mã'ẽ rõmõ tè ije, e'i. Ajawyi nerepyta tari epyri. Terejisyry epyri wyi, e'i wãgyo rõmõ iko.

9-10A'evo pira mõa'ãrõwã oporo kupa. Ajawyi tè ojimonyi omãjã kupa. Pirujẽ wapy'a kõ tè imonyi pira pupe. Mape jẽ rõwã ãwĩ rapijarà rè omã'ẽ kupa mijã. A'evo Tiaku eu ijupe mã'ẽ ekoi. Ãmõ, imõmirĩ Juwão ve a'evo ekoi. Semeneu ra'yry tè a'e kõ. Ojeeve pira rè oposiko iko kupa. Ãmẽ e'i Jesu Simão pè:

– Nekyje sõ, e'i. Age'e rire mirà rè tè neposikotà ky'y. Jane kõ teremoaty imogeta Janejare'e ayvu rè, e'i.

11Ajaire yarà kõ omõtã imuu ysĩ 'aryvo imoẽ kupa, a'e pè tatui upa. Ajaire awyje omoma'e kõ oity oo Jesu rupi kupa ky'y.

Jesu omokatu ipisĩsĩma mã'ẽ remẽwarà

(Mateusi 8.1-4; Maku 1.40-45)

12Ajaire ãmõ taa pè Jesu ekoi remẽ, kwaima'e mõ uu Jesu resa. Itekorã mã'ẽ a'e, ipisĩsĩma mã'ẽ tè. A'e uu ovãe Jesu pyri remẽ, ojayvy 'ejẽ ovake. Oporanu Jesu pè. Kee e'i ijupe:

– Jõvijã, akuwa nepota emokatu remẽ, emokatu kuwa nekasia rupi rejupa, e'i Jesu pè.

13Ãmẽ aepo renu Jesu opojai ikoty ojipy ipirà rè. Kee e'i ijupe:

– Hoõ! Apota! Tanekatupa awi nepirà rupi, e'i ijupe.

Ameve ipisĩsĩma oje'opa iwyi. Ikatuay ipirà rupi ky'y.

14Aja paire kee e'i Jesu ijupe:

– Teremome'u e'ã rã'ĩ nemokatuawerà erokwa. Ekwa rã'ĩ Janejare'e pè oporegeta mã'ẽ kyty, tomã'ẽ nere, e'i. Ãmõ, nemokatuawerà repy rã eraa ime'ẽ teve ijupe. Tãmõ Moisesi remikusiwarerà rupi katu ikõ janeky'a'oa repy eme'ẽ ikõ ãmẽ ijupe nẽ. A'e tè, “Niky'ai ãwĩ ky'y”, e'ità ãmẽ neupe, ãmõ kõ ve tokuwa, e'i Jesu.#Tek. 14.1-32

Ãmẽ “hoõ” e'i oo itekorã maekwerà.

15Aepo e'i epe Jesu ijupe. Ajamã'ẽ Jesu rewarà ojenu jenu jẽ taa kõ rupi. Ãmẽ ywesõ ojenu jenu okwa. Ajawyi jane kõ mõa'ãrõwã uu uu Jesu koty kupa ky'y. Ãmõgwerà ovãe ijayvu renu. Ãmõgwerà itekorã tè uu.

– Emokatutà rõwã põkõ Jesu, e'i ovãe ipyri kupa.

A'evo tè ekoi kupa ipi. 16Ajamã'ẽ Jesu ojisyry rã'ĩ oo tekoe'ãma kyty ipi. Uu pè oporegeta iko ipi. A'e rè ojimokasi iko ipi.

Jesu omokatu etãmã nomãrãkuwai mã'ẽ remẽwarà

(Mateusi 9.1-8; Maku 2.1-12)

17Ajaire ãmõ 'ary pè Jesu poromo'e mijẽ upa. Oka wyry pè poromo'e upa. Ãmẽ Pariseu kõ mõ ojatykapa ipyri ijayvu renu. Ãmõ, tãmõ Moisesi remikusiwarerà rè poromo'e mãe kõ ve ipyri tui. Taa taa kõ gyty wyi ovãe vãe Jesu pyri kupa. Ma'e, Karireja yvy pe wyi uu kupa. Ãmõ, Juteja yvy pe wyi. Ãmõ, Jerusarẽ taa pe wyi. A'e a'e pe wyi uu uu mãe kõ.

Ãmẽ Jesu omokatu itekorã mãe kõ upa. Janerõvijã kasia rupi tè a'evo ekoi. 18Ãmẽ kwaima'e kõ mõ uu ipe ojimorypa mõ reru Jesu rovake tomokatu. Etãmã nomãrãkuwai mã'ẽ tè a'e. Noatai mã'ẽ tè. Ajawyi ikea pupeve weru kupa. Weroike tarepe oka wyry pè kupa, Jesu rovake. 19Ajamã'ẽ mã rupi noeroike'ãi kupa, aty wasu kõ rewarà mõ. Ajaate werojiupi eraa kupa, yvate kyty, tetã ape 'aryvo. A'e pè tetã ape 'aryvo ikwarà mõ oinõ kupa. A'e rupi ojimorypa omowyjy imuu aty wasu pytery pè kupa ky'y. Jesu rovakeve omowyjy imuu kupa.

20Ãmẽ a'evoa rè Jesu omã'ẽ remẽ, kee e'i oupe:

– Haa! Aã kõ “aje ywete” e'i ekasia pè mãe kõ tè. Ere eako'i kupa ky'y, e'i oupe.

Kee e'i ãmẽ etãmã nomãrãkuwai mã'ẽ pè:

– Jepe, neaiwererà aitypypyipaoka newyi ky'y, e'i ijupe.

21Ãmẽ Pariseu kõ wenu aepo e'i remẽ. Ãmõ, tãmõ Moisesi remikusiwarerà rè poromo'e mãe kõ ve aepo wenu. Ajawyi kee e'i ojipy'amogeta kupa:

– Ha! Janejare'e rõmõ'ĩte oitypypyipaoka kuwa janeaiwererà janewyi. Ajawyi nivoi aepo e'i remẽ. Janejare'e werõarõ tè ãwĩ aepo javo rõmõ, e'i tite kupa.

22Ajamã'ẽ Jesu okuwa teãmã, a'evo ojipy'amogeta iko kupa remẽ. Ajawyi kee e'i ijupe kõ:

– Moma'e rã põ aepo jaa kõ rè pejipy'amogeta ere pekupa? e'i. 23Mã a'e mã'ẽ rè põ “aje ywete” pejẽ kuwa ije? “Aitypypyipaoka neaiwererà newyi”, a'e mã'ẽ rè põ “aje” pejẽ kuwa? “Epõ'ã eata eo”, a'e mã'ẽ rè põ “aje” pejẽ kuwa? Mã rè põ “aje” pejẽ kuwa? 24Aje ywete yva pe wyi tè ajo ajimojane ike pepytery pè. Ajawyi eayvukasiay teãmã aiko ipi. Age'e aã amokatutà eayvukasia rupi. Pemã'ẽ ere remẽ, kee pejẽ kuwa: “Aje ywete janeaiwererà oitypypyipaokatà janewyi”, pejẽ kuwa ije ãmẽ ky'y, e'i ijupe kõ.

Ãmẽ ojirova etãmã nomãrãkuwai mã'ẽ gyty, kee javo:

– Epõ'ã nekea tererojivy eraa neretã gyty, a'e ene, e'i Jesu ijupe.

25Ameve wari e'e opõ'ã wata katu ovake kõ ky'y. Okea omovy eraa wetã gyty. Wata oo iko remẽ, omoe'eay tesõ Janejare'e oo iko.

26A'evoa omoãgyo tesõ aty wasu kõ, omã'ẽ ee kupa remẽ. Janejare'e omoe'e tesõ iko ãmẽ kupa. Kee e'i ojiupe ãmẽ kupa:

– Age'e tè katu mãrãnà jikuwa e'ã rè jamã'ẽ ky'y, e'i kupa.

“Ejo erupi”, e'i Jesu Revi pè remẽwarà

(Mateusi 9.9-13; Maku 2.13-17)

27Aja paire ãmõ 'ary pè Jesu oo wemimo'ekwerà kõ revejẽ. Okwa iko remẽ, kwaima'e mõ rè omã'ẽ. Revi eu ijupe.#5.27 Mateusi eu teve Revi pè. Tekoua repy moatyarà mõ a'e ekoi. Pee reme pè wapy oposiko upa. A'e pè kee e'i Jesu:

– Ejo erupi eremimo'earà rõmõ, e'i ijupe.

28Ameve Revi opõ'ã oo upi. Ajare omoma'e kõ oitypypyipa oo upi.

29Ajaire ãmõ 'ary pè jimi'u wasua oinõtà wetã wyry pè Revi. Jesu omoe'età rewarà mõ a'evo werekooka. Mõropãrà kõ ovãe vãe a'e pè ãmẽ. Kejõ uu kupa. Revi vo tekoua repy moatyarà kõ mõ uu, mõa'ãrõwã. Ãmõ, Jesu kõ. Ãmõ kõ ve uu. Mokopejõ Revi retã wyry pè wapy ojimiwa kupa.

30Ãmẽ Jesu noesa tari mãe kõ a'evoa rè omã'ẽ. Pariseu kõ. Ãmõ, tãmõ Moisesi remikusiwarerà rè poromo'e mãe kõ. A'e kõ ijayvu Jesu remimo'ekwerà kõ pè. Kee e'i kupa:

– Manyvore põ nivoi mãe kõ revejẽ pejimi'u peiko? Emã'ẽ! Tekoua repy moatyarà kõ revejẽ pejimi'u pekupa. Nikatui moko'e remẽ peku! e'i ijupe kõ kupa.#Ruk. 15.1-2

31-32Ãmẽ aepo e'i kupa remẽ, Jesu tè kee e'i ijupe kõ:

– Emã'ẽ! Poropõanõgarà rè tè ajimosã'ãgatà. Imãrãne'ãgwerà kõ nojipõanõokai poropõanõgarà pè ipi. Itekorã mãe kõ tè ojipõanõoka ipi. Ãwitõ poropõanõgarà uu itekorã mãe kõ mokatu, ãwĩvo 'ejẽ ije ajo pepõ'õ mè mijã. Nivoi mãe kõ rè tè ajo aposiko, tojimosĩoka waiwererà reitypypyioka Janejare'e pè kupa ky'y. A'e rapijarà tè ije. Ajawyi, “Ivo tè aiko”, e'i tite oupe mã'ẽ rè rõwã ajo. Nivoi mãe kõ rè tè ajo, e'i Jesu.

Nojimi'ui rupi Janejare'e pè moregetaa rewarà

(Mateusi 9.14-15; Maku 2.18-20)

33Ajaire kee e'i Jesu pè kupa:

– Nemã'ẽ põ Juwão [poromojãmorĩ mã'ẽ] remimo'ekwerà kõ rè ipi? A'e kõ oporegeta pukutà Janejare'e pè remẽ, opoi rã'ĩ ja'umã'ẽ wyi kupa ipi. Nojimi'ui jẽ rã'ĩ kupa ipi. Pariseu kõ remimo'ekwerà kõ ve a'evo ekoi ipi. Na'evoi ãmẽ neremimo'ekwerà kõ ipi. Ojimi'u tepe'yte kupa ipi. Ãmõ, moma'e ry o'u tepe'yte teve kupa ipi. Manyvo põ moko neremimo'ekwerà kõ e'i? e'i ijupe kupa.

34Aepo rè ãmẽ Jesu e'i ijupe kõ:

– Erekwatà mã'ẽ rè tè ajimosã'ãgatà pemotekokuwa rõmõ. Ãwitõ erekwatà mã'ẽ ojirekotà remẽ, ojimorypa kõ okwai rã'ĩ imuu, tojimi'u eeve kupa. Oryvay ojeeve ãmẽ kupa. Ikatu kuwa põkõ nojimi'ui jirekoa pè kupa remẽ, erekwatà mã'ẽ eeve kõ jẽ ekoi remẽ? Ãnĩ! Nikatui kuwa! Tojimi'u kupa, ory kupa rewarà mõ. 35Ojireko paire erekwapa mã'ẽ ojisyrytà oo iwyi kõ ãmẽ ky'y. Ãmẽ tè ijimorypa kõ opoi kuwa ja'umã'ẽ wyi ky'y, wãgyo rõmõ, e'i. [Ãwĩvo tary ve eremimo'ekwerà kõ. Ereko e'ã mẽ tè ijãgyo kuwa kupa. Ijãgyotà ãmẽ kupa ky'y. Ãmẽ tè nojimi'u'ãi rã'ĩ kuwa kupa ky'y,] e'i Jesu ijupe kõ.

Tekoua pyaukwerà rewarà

(Mateusi 9.16-17; Maku 2.21-22)

36Ajaire poromotekokuwa jẽ Jesu. Kee e'i:

– Kamisa jukwerà rè tè poromosã'ãgatà ky'y. Kamisa jukwerà okekeipa remẽ, nijamokarapeta'ãi kamisa pyau pẽgwerà ijukwerà reve ipi. A'evo jaiko remẽ ywesõ okekeipa 'ejẽ jakusu remẽ. [Ajare kee a'e pejẽ. Ayvu pyaukwerà momewa tè ajo aã ike pepõ'õ mè. Ajamã'ẽ ãmõ kõ oja'a jẽtà weko karamoewarà rè. Ajawyi eayvukwerà pè “aje ywete” ne'i'ãi kupa. Ne'i'ãi kuwa kupa.]

37Aepo jaa pè kee e'i jẽ Jesu:

– Ãmõ, ava jẽ rõwã uvary pyaukwerà oinõ ena jukwerà#5.37 Teima pirerà sikãgwerà pupe oinõ kupa ipi. pupe ipi. A'e pupe sõ oinõ tite remẽ, okekeipa 'ejẽtà tè ena ovu remẽ. Osururupatà uvary ãmẽ. 38Ajawyi uvary pyaukwerà ena pyaukwerà pupe tè jainõ ipi. Na'evo'ãi ãmẽ. [Ena jukwerà vo 'ejẽ tãmõ kõ rekoawerà. Eayvu pyaukwerà tè ena pyau mã'ẽ vo jẽ ky'y. A'e rupi tapeiko ãmẽ ky'y.] 39Ajamã'ẽ ava mõ uvary jypy remẽwarà wã'ã esa remẽ, aja paire kee ne'i'ãi: “Ta'u uvary age'e remẽwarà”, ne'i'ãi ipi. “Jypy remẽwarà ikatu teipõ”, e'i titetà ãmẽ ipi, e'i Jesu.#5.39 “Eayvu pyau rupi noo'ãi kupa”, jaa tè aepo e'i.

Currently Selected:

Rukasi 5: oymNT

Highlight

Copy