Rukasi 4

Ãjãgai rõvijã wã'ã tarepe Jesu remẽwarà

(Mateusi 4.1-11; Maku 1.12-13)

1Ajaire Jesu revejẽ Janejare'e 'Ãg ekoi. A'e Jesu py'a oporakapa. Ãmẽ Jesu yy Jotão pe wyi ojivy uu. Ajamã'ẽ Janejare'e 'Ãg ayvu rupi oo tekoe'ãma kyty. 240 'arà rõmõ tesõ ipõ a'e rupi ekoi Jesu. Ãmẽ ãjãgai rõvijã uu ikoty. A'e wã'ã tarepe Jesu ereko. Nojimi'ui rã'ĩ tesõ Jesu iko a'evo remẽ. Ajaate ijamyayay iko ky'y. 3Ãmẽ kee e'i epe ãjãgai rõvijã Jesu pè:

– Tyi tõ “Janejare'e Ra'yry tè ije”, ere. Ajawyi aã takuru einõ meju rõmõ age'e, e'i. Aje sikaepo a'e tè ene remẽ, neinõtà, e'i epe ãjãgai rõvijã Jesu rã'ã.

4Ãmẽ aepo e'i remẽ, kee e'i Jesu:

– Ãnĩ. Kee e'i itõkõ Janejare'e ayvukwerà jikusiwarerà: “Ja'umã'ẽ poromokasi ke'ĩatu tè. [Janejare'e ayvu ãmẽ mãerã tè poromokasi ipi]”,#T.M. 8.3 e'i Jesu ãjãgai rõvijã mogwe rã'ĩ.

5Aja paire ãjãgai rõvijã wã'ã mijẽ Jesu. Weraa rã'ĩ yvytyrapyte 'aryvo. A'e pe wyi yvy pewarà kõ omojisa Jesu tomã'ẽ ee. Jõvijã wasu kõ rerekoarà kõ, taa kõ omojisa Jesu tomã'ẽ ee, pirujẽ. 6Ãmẽ e'i epe ãjãgai rõvijã ijupe:

– Emã'ẽ erokwa. Ãwĩ ãwĩ kõ pirujẽ ojime'ẽma ije, e'i. Ajawyi ewyry kyty tepa jẽ ãwĩ kõ age'e ky'y, e'i. Ame'ẽ kuwa ava mõ pè ame'ẽtà remẽ. Nepota põ a'e a'e kõ tame'ẽ ene? e'i. 7Nepota remẽ, ãwĩ kõ ame'ẽtà ene. Ejimoenãpa'ã rã'ĩ erovake ajawyi emoe'e. Ãmẽ tè oromonookatà ãwĩ kõ 'arà kyty tè terejimojõvijã, e'i rã'ãga ipe ijupe.

8Aepo e'i remẽ, Jesu e'i ijupe:

– Ãnĩ! Janejare'e ayvu jikusiwarerà itõkõ kee e'i: “Janejare'e rõmõ'ĩte Jõvijã wasu rõmõ ekoi. A'e rõmõ'ĩte teremomojy imoe'e ipi. A'e kõrijõ tè teremoẽoka ne'arà kytywarà rõmõ toiko”, e'i ijayvu jikusiwarerà.#T.M. 6.13 Noromoe'e'ãi ajawyi, e'i Jesu ãjãgai rõvijã pè imogwe mijẽ.

9Ãmẽ ajaire Jerusarẽ taa kyty ãjãgai rõvijã weraa Jesu. A'e pè Jesu wenõe Janejare'e moe'ea retã apyterà 'aryvo. Yvate'e tesõ mã'ẽ 'aryvo weraa. Ãmẽ a'e 'aryvo tui kupa remẽ, kee e'i mijẽ ãjãgai rõvijã Jesu pè:

– Aje ywete Janejare'e Ra'yry tẽ tesõ ene remẽ, yvy kyty nepo kuwa ike wyi neo. Neremãnõ'ãi nepo remẽ. 10A'evo jaa rè kee e'i itõkõ ojikusiwapa Janejare'e kareta rè: “Janejare'e wemĩgwai yvapewarà kõ omuutà toja'a nere. 11A'e kõ nepykĩtà terejipyjuka e'ã takuru rè”, e'i maekwerà.#Jĩg. 91.11-12 [Epo ajawyi esa!] e'i rã'ãga ãjãgai rõvijã ijupe.

12Ãmẽ kee e'i Jesu ijupe:

– [Ãnĩ! Napõ'ãi.] Kee e'i itõkõ Janejare'e ayvu jikusiwarerà: “Terã'ã e'ã ikõ rejupa nẽ”, e'i Janejare'e jane,#T.M. 6.16 e'i Jesu ãjãgai rõvijã pè imogwe ky'y.

13A'evo ãjãgai rõvijã wã'ãma tite Jesu esa. Ajamã'ẽ Jesu noerovijai. Ajawyi ajaire ojisyry rã'ĩ oo iwyi. “Kãramõ ajo tarà mijẽ Jesu rã'ã”, e'i oo.

Jesu poromo'e ypy remẽwarà

(Mateusi 4.12-17; Maku 1.14-15)

14Ajaire Jesu ojivy mijẽ oo Karireja yvy kyty poromo'e iko. Ojimokasi Janejare'e 'Ãg rè iko. Ãmẽ Jesu rewarà omojenu jenu taa taa rupi erokwa kupa. [Kee e'i kupa:

– Otekokuwavay poromo'earà tekoe'e rõmõ, e'i Jesu pè kupa.]

15A'evo remẽ Jesu poromo'e Janejare'e ayvu rè jimo'ea retã kõ rupi iko ipi. Ãmẽ jane kõ ojimopirai tesõ Jesu ayvukwerà renu ipi. Omoe'e ãmẽ kupa.

Nasare taa wãnà kõ “aje” ne'i Jesu ayvu pè remẽwarà

(Mateusi 13.53-58; Maku 6.1-6)

16A'evo oo Jesu ovãe oõvijãgwerà rena pè, Nasare taa pè. Jesu jimovijapawerà tè a'e. Jimoava 'arà mẽ upi upi Jesu oo oike Janejare'e ayvu rè jimo'ea retã wyry pè ipi. Ãmẽ ãmõ 'ary pè oo remẽ, opõ'ã Janejare'e kareta mogetatà jane kõ toenu. 17Ava mõ Janejare'e ayvu mojenuarà Isajasi remikusiwarerà ome'ẽ Jesu pè tomogeta. A'e werova rã'ĩ esa. Omogeta ãmẽ ãmõ kõ toenu. Kee e'i ojikusiwa maekwerà omogeta:

18-19“Janerõvijã ywete 'Ãg ereve ekoi.

A'e emomãrãte katu emokasioka Janejare'e ayvu momewarà rã mõ taiko.

‘Janerõvijã ywete poroereko katutà poroerojivyoka oupe’, a'età imojenu erokwa.

Nimoma'ei mãe kõ pè aepo amojenutà.

Ãmõ, nikasi waiwererà reitya rè mãe kõ pè amojenutà topoi iwyi kupa ipi.

Ãmõ, naeapyoi mãe kõ amoeapyookatà ky'y.

Ãmõ, nivoi mãe kõ po pè ojimomomorijau tesõ iko mãe kõ amomoiokatà ky'y.

Ke'ĩ a'evotà Janerõvijã ywete janerereko.

A'e remẽwarà amojenutà jane kõ pè erokwa”, e'i Isajasi ikusiwa maekwerà.#Isa. 61.1-2; Ruk. 7.18-23

20Aepo Jesu omogeta ovake kõ. Omogeta paire, omãmã imojivy a'e tetã wyry pè tui mã'ẽ pè. Oo wapy mijẽ. Ãmẽ ãmõ kõ Jesu rè omã'ẽ upa.

– Manyvo e'ità põ Jesu? e'i kupa.

21Ãmẽ kee e'i Jesu ijupe kõ:

– Aepo amogeta tapeenu maekwerà age'e ojikuwapa ky'y. Aekwerà rupi katu aiko ky'y, e'i ijupe kõ.

22Ãmẽ ory katu kupa. Ojikõtevẽ tesõ Jesu ayvu renu kupa. Ikatuay poromo'e. Ãmẽ kee e'i ojiupe kupa:

– Juse ra'yry rõwã põkõ ãwĩ? Manyvo põ wereko ayvu kõ ikuwa? e'i ojimopirai rõmõ kupa.

23Ajare e'i Jesu:

– Aepo manyvo pejẽ ije mã'ẽ akuwapa. Kee pejẽtà maevo ije: “Tyi tõ mãrãnà jikuwa e'ã tẽ tesõ Kapanão taa pè neinõ nekasia rupi. A'evo ve ikõ ike einõ orerovake nẽ. ‘Aje’ oro'età ãmẽ neupe”, pejẽtà maevo ije. Kee pejẽtà teve ije: “Kee eu maekwerà rupi katu einõ: ‘Paje, netekorãnà itãwĩ neiko. Nevote ejimokatu awi’, eu maekwerà rupi katu. Nekasia emojisaoka oreupe. Ãmẽ tè oroerovijatà ky'y”, pejẽ maevo ije, e'i Jesu ijupe kõ.

24E'i jẽ Jesu ijupe kõ:

– A'evo tè jane kõ ekoi ipi. Janejare'e ayvu mojenuarà kõ karamoewarà temimoe'e kõ teipe. Ajamã'ẽ ena pewarà kõ “aje ywete” ne'i ijayvu kõ pè ipi. Noerovijai kupa ipi. 25Ajare kee a'e pejẽ, tapeja'a ee. Tãmõ Eriasi ekoi remeve itõkõ amyay oporara kupa. A'evo remẽ itõkõ kwaray puku. Nokyi 'ete ãmãnà upa. Moapy kwaray rõmõ tesõ itõkõ a'evo tui. A'evo tyavorusu okwa. A'evo remẽ Isaeu yvy pè pe'ĩrõwã terekwarerà kõ amyay oporara tesõ iko, penãmõi kõ põ'õ mè.#Juw. 4.44; 1To. 17.1,8-16; Tku. 5.17-18 26Ajamã'ẽ a'e kõ kyty rõwã itõkõ Janejare'e omonooka tãmõ Eriasi. Ãmõ kõ rena kyty tè omonooka. Sitõ yvy kyty tè omonooka. Ajawyi Sarepita taa wãnà mõ terekwarerà pãtavõ tè oo tãmõ Eriasi. 27A'evo ve jẽ tãmõ Eriseu ekoi remeve. Pe'ĩrõwã itekorãnai mãe kõ ekoi ipe Isaeu kõ põ'õ mè mijã, ipisĩsĩma mãe kõ. Ajamã'ẽ a'e kõ rõwã itõkõ omokatu tãmõ Eriseu. Sirija yvy wãnà mõ tè itõkõ omokatu, Naamã eu ijupe mã'ẽ tè. Isaeu wãnà mõ rõwã ipe remẽ omokatu, e'i Jesu Nasare wãnà kõ pè.#2To. 5.1-14

28Ãmẽ aepo wenu kupa remẽ, ojimõarõay tesõ Jesu rè kupa ky'y. Pirujẽ Janejare'e ayvu rè jimo'ea retã wyry pè tui mãe kõ ojikõ'õ ee ky'y. 29Ajaate opõ'ã ee kupa.

– Ejisyry orerena pe wyi eo! e'i ijupe kupa.

Opyy imoisyry kupa. Taa kupe kyty werojisyry eraa kupa. Yvytyru 'aryvo werojiupi eraa kupa. Pareti apyte 'aryvo weraa kupa. A'e pareti taa ojinõ ee mã'ẽ 'aryvo weraa kupa. Ãmẽ kee e'i kupa:

– Simoãjã ity imono vykwae kyty to'a omãnõ, e'i tite kupa.

A'evo Jesu werekotà ijuka kupa mijã. 30Ajamã'ẽ Jesu oẽ okwa a'e kõ pytery pe wyi oo.

Jesu omokatu ãjãgaiwerà ojimoemija ee mã'ẽ remẽwarà

(Maku 1.21-28)

31Ajaire Jesu oo jẽ Kapanão taa kyty ovãe, Karireja yvy pè. A'e pè jimoava 'arà mẽ upi upi poromo'e upa. Janejare'e ayvu rè jimo'ea retã wyry pè poromo'e ipi. 32Ãmẽ omoãgyo kõ tesõ Jesu ayvu wenu kupa remẽ. Kee e'i ãmẽ kupa:

– Haa! Otekokuwavay Jesu. Emã'ẽ, ijayvukasi tesõ Janejare'e ayvu rè poromo'e ipi, e'i enu kupa.#Mat. 7.28-29

33Ãmẽ ãjãgaiwerà ojimoemija ee mã'ẽ mõ Janejare'e ayvu rè jimo'ea retã pè ve ekoi, ãmõ kõ pytery pè. A'e ajaire ãjãg ayvu rupi eamamai tesõ. Kee e'i Jesu pè:

34– Haa! Manyvo eretà põ oreupe, Jesu Nasare taa wãnà? Nekoty rewarà rõwã ore. Oremoma tè sipõ nejo ike? e'i kwaima'e ãjãg ayvu rupi. Orokuwa katu, e'i. Janejare'e Remimuurerà ivo katu teãmã mã'ẽ tè ene, e'i kwaima'e ãjãg ayvu rupi.

35Ãmẽ aepo wenu Jesu remẽ, ijayvukasi ãjãg pè. Kee e'i ijupe:

– Epi! Age'eve ikõ eẽ eo aã kwaima'e pe wyi nẽ, e'i Jesu ijupe.

Aepo e'i remeve ãjãg wero'a kwaima'e yvyu, ovake kõ. Oẽ ãmẽ iwyi oo. Nojimorarai ee ky'y. Oẽma kõrijõ tè oo iwyi.

36Ãmẽ a'evoa rè omã'ẽ mãe kõ ojimopirai tesõ ee omãjã. Ojimonyi tesõ teve kupa. Kee e'i ãmẽ ojiupe kupa:

– Manyvo sipõ wereko imokatu? Emã'ẽ! Ijayvukasiay wete Jesu. Nikasi miti ãjãgaiwerà kõ ovake. “Eẽ” e'i ijupe kõ remeve oẽ oo kupa, ijayvukasi rupi. Nijamã'ẽi 'ete apijarerà rè ipi mijã, e'i e'i ojimopirai rõmõ kupa.

37Ãmẽ a'evoa py'awarà mõ ojenu jenu ena ena kõ rupi okwa. Ajaate a'e yvy popy kyty ojenu okwa ky'y.

Jesu omokatu Simão tija remẽwarà

(Mateusi 8.14-17; Maku 1.29-34)

38Ajaire Jesu Janejare'e ayvu rè jimo'ea retã pe wyi oẽ oo. Simão retã gyty tè oẽ oo. Ãmẽ a'e pè Simão Peturu tija ikaray wasu sikaepo upa. Ajawyi Jesu ovãe remẽ, a'e pè tui mãe kõ kee e'i Jesu pè:

– Ãwĩ emokatu itekorã mã'ẽ, e'i ijupe kupa.

39Ãmẽ oo Jesu ipyri. Ojayvy omãjã ee. “Tokwapa nekaray newyi”, e'i ijupe. Ameve ikaray okwapa iwyi. Ajaire opõ'ã okea pe wyi. Oja'a Jesu kõ rè ky'y. [Ja'umã'ẽ kõ ome'ẽ ijupe.]

Jesu oinõ mãrãnà jikuwa e'ã remẽwarà

40Ajaire kwaray o'aerĩ oo remẽ, a'e taa wãnà kõ itekorã mãe kõ iteetejẽ weru eru Jesu pè, tomokatu kõ. Ãmẽ Jesu opo oinõ itekorã mãe kõ 'aryvo imokatu wayvukasia rupi, ijãvijõ kõ jẽ. Ameve okwapa itekorãnà kõ iwyi kõ. 41Ãmõ, ãjãg ojimoemija ee mãe kõ ve omokatu. Omoẽ ãjãg kõ jane kõ pupe wyi imonooka. A'evo remẽ ãjãg kõ wapuka pukai tesõ oẽ oo iwyi kõ. Kee e'i oẽ oo kupa remẽ:

– Janejare'e Ra'yry rõmõ tè ene! e'i e'i kupa.

Ajamã'ẽ Jesu nomomoregetaokari kõ ãmẽ, ãjãg kõ okuwa Janejare'e Remimuurerà tè Jesu rewarà mõ.#4.41 Nopotai ãjãg kõ omomewarà kõ rõmõ. Omomi kõ imoẽ imonooka.

42Ajaire kõ'ẽma mẽ Jesu oo tekoe'ãma kyty, a'e rõmõ'ĩte toiko rã'ĩ iko. Ajamã'ẽ aty wasu uu eka. Wesa kupa remẽ, kee e'i ijupe kupa:

– Epyta jẽ rã'ĩ orepyri, e'i kupa. [Oremo'e katu rã'ĩ rejupa, e'i epe ijupe kupa.]

43“Ãnĩ” e'i ajamã'ẽ Jesu. Kee e'i jẽ ijupe kõ:

– Aa jẽtà ãmõ taa kõ gyty. Kee jaa amojenutà erokwa: “Janejare'e opota katuay ojimojõvijã pe'arà kyty”, jaa. Ni'ei ike kõrijõ tè apyta aiko. Waite ite tena kõ pewarà kõ motekokuwaarà rã rõmõ tè ajo, e'i Jesu.

44Ajawyi a'e taa Jesu oity oo maipe kyty, Juteja yvy rupi. A'evo remẽ taa taa kõ rupi okwa poromo'e. Janejare'e ayvu rè jimo'ea retã kõ wyry rupi poromo'e iko ipi.

Currently Selected:

Rukasi 4: oymNT

Highlight

Copy