Rukasi 15

Kaneiru oo opa oo mã'ẽ rè tè Jesu poromosã'ãga remẽwarà

(Mateusi 18.10-14)

1Ajaire Jesu pè ovãe nivoi ekoi mãe kõ, ãmõ tekoua repy moatyarà kõ. Jesu ayvukwerà poromo'e mã'ẽ renu tè uu uu kupa ipi. 2Ãmẽ Pariseu kõ mõ ijayvu yvu ee kõ omãjã kupa. Ãmõ, tãmõ Moisesi remikusiwarerà rè poromo'e mãe kõ mõ a'evo ve ekoi. Kee e'i kupa:

– Moma'e rã sõpõ nivoi mãe kõ uu Jesu kyty remẽ, ojimory ee kõ ipi? Ãmõ, ojimi'u teve ipyri kõ ipi. Manyvo põ a'evo ekoi? e'i kupa.#Ruk. 5.29-30

3[A'evo teãmã aepo e'i mãe kõ ipi. Nopotai aje ywete ojimotekokuwaoka Jesu pè kupa. Ajawyi aepo e'i kupa.] Ãmẽ aepo e'i kupa remẽ, Jesu wayvu omosã'ãga mijẽ poromo'e. Kee e'i:

4– Uve kaneiru jarà mõ eima ijatyray wereko mã'ẽ. 100 rõmõ tesõ eima kõ mijã. [Kõ'ẽ jawe jawe omoirõ irõ kõ. A'evoa rupi okuwa eima mõ oo opa oo remẽ.] Ãmẽ ãmõ 'ary pè omoirõ irõ kõ remẽ, soõ, pe'ĩ eima naikoi sikaepo. Ajawyi weima kurerà atyry kõ oity rã'ĩ [ikurarà pupe] oo opa oo mã'ẽ reka. Weka eka jẽ ajaate wesa. A'evo tè. 5-6Ajaire weima wesa remẽ, a'e omovy wasi'y 'aryvo erojivy eru. Ory tesõ erojivy eru wetã gyty ãmõ weima kõ pyri. Ajawyi kee e'i ajaire ojimorypa kõ pè, ãmõ, opyriwarà kõ pè: “Erima aesapa, oo opa oo mã'ẽ”, e'i ovãe. “Pejo awi pejimory rã'ĩ ereve”, e'ità ovãe. 7Ãwĩvo ve yva pè Janejare'e remĩgwai kõ oryvaytà nivoi mã'ẽ mõ ojimosĩoka waiwererà reitypypyipaoka Janejare'e pè remẽ ipi. Ãmẽ ywesõ oryvaytà yva pè kupa. Aje, ivo mã'ẽ rè ory tè kupa ipi. Ajamã'ẽ nivoi mã'ẽ weko aiwerà oitypypyipaoka Janejare'e pè remẽ ywesõ oryvaytà kupa ipi, e'i Jesu.

Karakuri moeta okãjã mã'ẽ rè tè Jesu poromosã'ãga remẽwarà

8Ajaire ãmõ rè tè Jesu poromosã'ãga mijẽ. Kee e'i:

– Wãivĩ tekoe'e mõ omoaty karakuri e'ekwerà oupe. 10 rõmõ tesõ omoaty imokatu mijã. Ajaire pe'ĩte omokãjã sikaepo. Ajawyi ijyapea mõ omoeny omokãjã mã'ẽ reka. Ajawyi ijyapea weraa moma'e ma'e wyry rupi oposiko otyvei eka. “Maty põkõ aity?” e'i eka. 9Ajaire wesa ky'y. Ãmẽ kee e'i opyriwarà kõ pè. Ãmõ, ojimorypa kõ pè e'i: “Pejo pejimory ereve”, e'i. “Emã'ẽ. Ekarakuri moeta amokãjã maekwerà aesapa ky'y”, e'i. 10Ajare kee a'e. Ãwitõ karakuri omokãjã maekwerà resaa rè ory tesõ wãivĩ. Ãwĩvo ve Janejare'e remĩgwai yvapewarà kõ oryvay nivoi mã'ẽ mõ ojimosĩoka weko aiwerà reitypypyipaoka Janejare'e pè remẽ ipi. Ojirova Janejare'e kytyre ky'y remẽ oryvay tesõ kupa ipi, e'i Jesu.

Ta'yry oiko teitete mã'ẽ rè tè Jesu poromosã'ãga remẽwarà

11E'i jẽ Jesu:

– Uve kwaima'e mõ mõrijõ ta'y mã'ẽ. [Imoma'e ywete mã'ẽ tè a'e kwaima'e. Ajawyi moma'e jẽ rõwã naikoi etã wyry pè ipi. Ajamã'ẽ a'evo ipe remẽ, ta'y mitikwerà nopota ywe'ei tite uu pyri ekoi ky'y.] 12Ãmẽ ãmõ 'ary pè kee e'i ta'y mitikwerà uu pè: “Papa, nema'e mõ eupewarà rõmõtà mã'ẽ, eme'ẽ amãtejẽ ije”, e'i.#15.12 Tuu omãnõ maire tè ima'ekwerà kõ opyta ta'yry kõ tomosãi ojiupe ky'y. Ekoa kõ teãmã a'evoa. “Eme'ẽ ema'e rã rõmõ teãmã”, e'i ta'yry. Ãmẽ “hoõ” e'i tuu. Omosã'ãga wemireko. Omowaite ipẽ ime'ẽ wa'yry kõ pè. [Wauvay kõ wyi a'evo ekoi.] 13Ajaire sa'u ta'y mitikwerà omoaty oma'e kõ, uu remime'ẽgwerà kõ. Ãmẽ kee e'i: “Ãmõ taa kyty aatà”, e'i oo. Weraapa oma'e kõ ãmẽ. Uu kõ oity oo. Ãmõ wãnà kõ yvy kyty tè oo, Juteu rõwã mãe kõ yvy kyty. Ajaire a'e pè oiko teitete kõrijõ tè iko ky'y. Ojimomy'a my'a iko ky'y. Oka'uay ojimory nivoi mãe kõ reve, ojimorypa rã'ãga kõ reve. Opoko ee kõ iko ky'y. A'evo wemipyykwerà omoma katu tekou teitetea rè, uu wyi opyy eraa maekwerà. 14Ajaate ãmõ 'ary pè, soõ, naikoi pe'ĩ sikaepo ikarakuri mõ ky'y. Ãmẽ otyavo tè a'e taa wãnà kõ iko. Amyay oporara iko ky'y. 15Ajawyi oposikoa mõ weka ky'y. A'e yvy wãnà mõ pè kee e'i: “Nepota põ taposiko neupe?” e'i. “Hoõ” e'i ãmẽ. “Ekwa erima kõ tajausĩ rè tereja'a.#15.15 Juteu kõ nomovijai tajausĩ ipi. “Iky'a mã'ẽ tajausĩ”, e'i kupa, “Tape'u e'ã”, e'i Janejare'e tãmõi kõ pè rewarà mõ. Moko kyty ka'api'ity pè tui. Eapoi kõ ipi awi”, e'i imono. “Hoõ” e'i oo. 16A'evoa rè oposiko ãmẽ. Oposiko ywete ipe. Ajamã'ẽ ijamyay wete jẽ iko. Ajaate tajausĩ remi'õ'y tẽ tesõ ojuwei tite, yga vo mã'ẽ. Ava jẽ rõwã ome'ẽ ja'umã'ẽ mõ ijupe ajamã'ẽ. 17Ãmẽ sõsi otekokuwapa ky'y. Kee e'i oupe: “Moma'e rã sõpõ Papa aity ajo!” e'i. “Papa remĩgwai kõ ojimi'u katu iko ipi. Oyte emi'õ kõ ijupe kõ ipi. Manyvore põ ije ike ãmẽ amãnõ taray amyay pè aiko ky'y?” e'i oupe. 18E'i jẽ oupe: “Akuwapa ky'y. Papa kyty ajivytà aa ajawyi”, e'i. “Kee a'età Papa pè avãe: ‘Papa, nivoi tè aiko ije, Janejare'e rovake. Ãmõ, nerovake ve nivoi 'ete aiko’, a'età. 19Ajawyi ‘era'yry’ nere'ãi maevo eupe ky'y. Aepo ere eupe remẽ, ‘Taposiko jẽ neremĩgwai rõmõ, a'e tè ene’, a'età avãe remẽ”, e'i oupe.

20– Ãmẽ si ojivyrĩ oo uu rena kyty ky'y. Ovãerĩ remẽ, kuipe'eve tuu omã'ẽ ee. Oporijauesa tesõ ee omãjã. Opõ'ã oo wa'yry rõvaisĩ. Wajuvy tesõ wa'yry. Oovamosu, wauvay jẽ rewarà mõ. 21Kee e'i ta'yry ãmẽ: “Nivo miti aiko neupe, papa. Ãmõ, Janejare'e rovake nivo miti ve aiko. Ajawyi ‘era'yry’ nere'ãi maevo ije ky'y”, e'i epe ta'yry. 22Ajamã'ẽ aepo e'i remẽ, tuu kee e'i wemĩgwai kõ pè: “Pekwa kuise'ẽ jẽ tyru e'eay peeru aã era'yry pè topypy”, e'i. “Ãmõ, sãtaja peeru ve inõ ipy rè. Ãmõ, mõ'ãgwa peeru inõ ipõ'ã rè”, e'i. 23“Ãmõ, erima pui ra'yry ikyrau mã'ẽ pejuka imii eru si'u”, e'i. “Jajimi'u jajimory katutà jaiko ky'y”, e'i. 24“Emã'ẽ, omãnõ mã'ẽ vo sõ tite era'yry mijã. Age'e sõsi epyri ekoi tarà mijẽ”, e'i tuu. A'evo ojiãparõ ypy ijimorya ijupe kõ.

25– Teke'yry reã'ã rupi tè a'evo ekoi ajamã'ẽ. A'e ka'api'i kyty tè ji'ite ipõ oo oposiko upa, imõmirĩ novãeive remeve. Ajaire tè ovãe. Ãmẽ ovãerĩ iko remẽ, pee ypy peve wenu jĩgarà kõ. Ãmõ, torya ryapu wenu. 26Ãmẽ uu remĩgwai mõ pè oporanu. Kee e'i ijupe: “Manyvo rewarà mõ põ moko e'i ojĩga wete kupa?” e'i. 27Ãmẽ emĩgwai e'i ijupe: “Ovãema nemõmirĩ ky'y”, e'i ijupe. “Ory tesõ neruu ivãea rè. Ajawyi ojukaoka weima ikyrau mã'ẽ si'u janerory rõmõ. Kee e'i neruu: ‘Emã'ẽ. Aesa mijẽ era'yry aekwery vo. Ajimo'ãgatu ky'y’, e'i neruu”, e'i emĩgwai teke'yry pè.

28– Ãmẽ teke'yry aepo wenu remẽ, naoryi. “Haa! Moko e'i sipõ kupa? Naa'ãi ikoty kõ”, e'i. Aepo e'i maekwerà ojenu tuu pè. Ajawyi oẽ wa'yry teke'yry resa. Kee e'i epe ijupe: “Ja'e jajimory”, e'i epe. Ãmẽ, “Ãnĩ, naa'ãi”, e'i kõrijõ. 29Kee e'i jẽ uu pè: “Nivoi erereko rejupa, papa. Emã'ẽ, karamoe remeve newyry kyty tè aiko ipi. Oroerovija katu aiko ipi. Mape remẽ jẽ rõwã neayvukwerà narovijai mã'ẽ. A'evo ipe. Ajamã'ẽ nereme'ẽi 'ete nerima mõ ije tajuka iwa, ejimorypa kõ reve tajimory”, e'i. 30“Ajamã'ẽ aã nera'yry moma'e neremirekokwerà rè ojimorarai tè iko. Ojimomy'a my'a tè iko. A'evoa rè omoma nema'ekwerà kõ. A'evo ipe. Ajamã'ẽ ovãema remẽ, nejukaoka teima kyrauvay mã'ẽ ijupe”, e'i teke'yry.

31– Ãmẽ kee e'i tuu: “Ãnĩ, tuku. Epyryvo tè neiko ipi. Ema'e kõ pawete nema'e kõ, e'i. 32Ajamã'ẽ aã nemõmirĩ ojivy mijẽ uu remẽ, i'ete jajimory ojee jaiko. Emã'ẽ. Okãjãma mã'ẽ vo 'ejẽ nemõmirĩ mijã. Age'e uve mijẽ mã'ẽ vo ky'y. Ajawyi ãwĩvoa rè jajimory kuwa, e'i tuu, e'i Jesu poromo'e.

[Kee jaa tè aepo e'i mã'ẽ: “Janejare'e poroporijauesa jẽ, nivoi epe jaiko remẽ ipi. Ajawyi janerãrõ jẽ tijajivy ikoty. Javãe mijẽ ipyri remẽ, janerereko katu jẽtà wãkarã kõ rõmõ, wemiauvay kõ rõmõ”, jaa tè aepo e'i mã'ẽ.]

Currently Selected:

Rukasi 15: oymNT

Highlight

Copy