Jesu koty rewarà kõ 6

Jesu koty rewarà kõ opyteporotà poropãtavõarà kõ remẽwarà

1Kãramõ sa'u remẽ, Jesu koty rewarà kõ mõa'ãrõwã tesõ ekoi ky'y. Aty wasu rõmõ tesõ ãmẽ kupa ky'y. Py'awarà mõ ipõ ijatyray tesõ kupa. [A'e kõ Jesu remimonokwerà kõ poromotekokuwa jẽ tesõ Jesu rekoa rè iko. Iporijau mãe kõ opãtavõ jẽ teve iko kupa. Ajaire noyi tesõ mosikoa ee kupa ky'y, ijatyray Jesu koty rewarà kõ ky'y rewarà mõ.] Juteu e'ekwerà pawete Jesu koty rewarà kõ rõmõ ekoi a'evo remẽ. Ajamã'ẽ oiko ojipytery pè Kereku kõ ayvu rupi oporegeta mãe kõ, Juteu kõ teipe remẽ. Waiteve Juteu kõ wayvu e'e rupi oporegeta mãe kõ. Epereu eu ijayvu kõ pè. Ãmẽ Kereku ayvu rupi oporegeta mãe kõ ojimõarõ a'e kõ rè ky'y. Kee e'i kupa:

– Jesu remimonokwerà kõ noporijauesa ywe'ei oreretãrãgwerà kõ terekwarerà kõ ãmẽ ipi, e'i kupa. Epereu ayvu rupi oporegeta mãe kõ pè ywesõ ome'ẽ karakuri wemi'õ rã topyy kupa ipi, e'i kupa. Nikatui a'evo ekoi kupa remẽ, e'i kupa.

2A'e rewarà mõ ojimõarõ kupa. Aepo jaa ojenu Jesu remimonokwerà kõ pè, 12 rõmõ mãe kõ pè. Ajawyi omoaty Jesu koty rewarà kõ pirujẽ imogeta kõ kupa ky'y. Kee e'i imogeta kõ kupa:

– Nivoi Janejare'e ayvu rè poromotekokuwaa wyi oropoi rã'ĩ remẽ, ãwisõ karakuri mosãia rè ywesõ toroja'a. A'e rè ywesõ oroposiko puku remẽ, manyvo noporoereko'ãi poromotekokuwa. [Ajawyi mosikoa oromosãità erokwa ky'y. Ore ãmẽ poromotekokuwaa rè kõrijõ tè oroikotà ky'y. Ikatutà a'evo oroiko remẽ.] 3Ajawyi kee sirekotà ky'y. Tapepyteporo kwaima'e kõ mõ iporijau mãe kõ pãtavõarà kõ rõmõ toiko kupa ky'y, e'i. Kee mãe kõ tè ikõ pepyteporo nẽ. Temirovija kõ tè. Otekokuwa mãe kõ tè. Janejare'e 'Ãg kasia rupi ekoi mãe kõ tè. 7 rõmõ tapepyteporo, e'i. A'e kõ oreayvu rupi topãtavõ iporijau mãe kõ, terekwarerà kõ. 4A'evo remẽ, ore Janejare'e ayvu rè poromotekokuwaa wyi noropoi'ãi. Ãmõ, Janejare'e pè moregetaa wyi noropoi'ãi ve, e'i kupa.

5Aepo e'i kupa remẽ, pirujẽ jane kõ kee e'i:

– Hoõ, e'i. Ikatuay wetetà a'evo sireko remẽ, e'i kupa.

A'evo wereko ãmẽ kupa ky'y. Jesu koty rewarà kõ mõ opyteporo poropãtavõarà kõ rõmõ kupa. 7 rõmõ opyteporo kupa. Ma'e kõ: Esitevão. Janejare'e rè eako'iay mã'ẽ tè Esitevão. Janejare'e 'Ãg kasia rupi ekoi ipi mã'ẽ tè. Ãmõ, Piripi. Ãmõ, Porokoru. Ãmõ, Nikano. Ãmõ, Timõ. Ãmõ, Pamena. Ãmõ, Nikorau. Mokopejõ opyteporo kupa. A'e Nikorau Ãtiokia taa wãnerà tè. A'e Juteu kõ rekoa rupi tè ekoi mã'ẽ. Juteu e'e rõwã ajamã'ẽ Nikorau. Ojimojuteu mã'ẽ tè. Ãwitõ Juteu kõ omoe'e Janejare'e ipi, ãwĩvo mã'ẽ tè. 6Wemipyteporokwerà kõ weraa ajaire imojisaoka Jesu remimonokwerà kõ pè kupa ky'y, “i'ete” te'i kupa. A'e kõ pewarà mõ Jesu remimonokwerà kõ oporegeta Janejare'e pè. Wãkãmyy kõ oporegeta Janejare'e pè kupa.

– Emotekokuwa kõ, ivo toposiko kupa, e'i Janejare'e pè kupa.

7Ãmẽ Janejare'e ayvu mojenua ojimosãi okwa. Mõa'ãrõwã Jesu koty rewarà kõ Jerusarẽ taa rupi ekoi ky'y. A'e pè ywesõ mõa'ãrõwã ekoi. Janejare'e pè oporegeta mãe kõ ãmõ ãmõgwerà ojirovija Jesu rè ky'y. Ijatyray a'evo ekoi mãe kõ.

Esitevão opyy kupa remẽwarà

8Janejare'e remireko katu ywete Esitevão. Janejare'e kasia rupi ekoi ipi mã'ẽ tè. Ikasia rupi marama tè ekoi. Mãrãnà jikuwa e'ã poromonyi mã'ẽ Janejare'e oinõoka ijupe ipi, Juteu kõ rovake, ãwisõ, “Aje ywete Janejare'e kasia rupi ekoi”, te'i kupa.

9Ãmẽ ajaire Juteu kõ mõ nivoi Esitevão wereko. Noesa tari kupa. Oporegeta ai tè ee kupa. Juteu kõ teipe a'e kõ. Ajamã'ẽ ãmõ yvy wãnerà kõ tè. A'e kõ Janejare'e ayvu rè jimo'ea tetã mõ pè ojimoaty ipi. “Temĩgwaiwerà kõ jimoatya” eu a'e tetã pè. Ãmõgwerà Sireni taa wãnerà kõ tè. Ãmõgwerà Aresãtiria taa wãnerà kõ. Ãmõ, Sirisi yvy wãnerà kõ. Ãmõ, Asia yvy wãnerà kõ. A'e kõ ojimoaty Esitevão ayvuvaja vaja. 10Ajamã'ẽ Esitevão ywesõ i'arà kõ gyty ekoi ipi, Janejare'e 'Ãg tè omotekokuwa rewarà mõ.

11Ajawyi ava kõ mõ wesa epyme'ẽ Esitevão rè nivoi mã'ẽ tomo'y teywete, kee te'i kupa: “Ore oroenu ãwĩ kwaima'e oporegeta ai iko remẽ”, te'i kupa. “Tãmõ Moisesi remikusiwarerà rè oporegeta ai ipi. Upi tekoua rè oporegeta ai ipi”, te'i kupa. “Janejare'e rè tesõ oporegeta ai teve ipi”, te'i owari rõmõ kupa.

12Ãmẽ aepo e'i kupa remẽ, jane kõ mõ werovija tite. Ojikõ'õ Esitevão rè ãmẽ kupa ky'y, iwaria kõ rupi. Juteu rõvijã kõ ve a'evo. Ãmõ, tãmõ Moisesi remikusiwarerà rè poromo'e mãe kõ. Ajaire a'e kõ oo Esitevão pyy eraa Juteu rõvijãgwerà kõ atyry rovake. 13Iwari mãe kõ ve weraa tiwari mijẽ kupa. A'e kõ oporegeta teitete ee ãmẽ. Kee e'i kupa:

– Ãwĩ kwaima'e oporegeta ai Janejare'e moe'ea retã rè ipi, e'i teywete kupa. Ãmõ, tãmõ Moisesi remikusiwarerà ivo tekoua rewarà rè oporegeta ai ipi. Kõ'ẽ jawe jawe a'evo ekoi ipi, e'i owari rõmõ kupa.

14E'i jẽ kupa:

– Ore oroenu oporegeta ai ipi remẽ, kee e'i remẽ: “Jesu Nasare taa wãnà omomatà Janejare'e moe'ea retã”, e'i sõ ipi remẽ! Ãmõ, “Jesu omotee janerekoa ky'y, tãmõ Moisesi remikusiwarerà rupi tijaiko e'ã ky'y”, e'i Esitevão remẽ oroenu, e'i owari rõmõ kupa.

15Ãmẽ Juteu rõvijãgwerà kõ atyry rõmõ wapy upa mãe kõ omã'ẽ Esitevão rè a'evo remẽ. Pirujẽ omã'ẽ ywete ee kupa. Ameve Janejare'e remĩgwai yvapewarà rova vo tesõ Esitevão rova tui ky'y.

Currently Selected:

Jesu koty rewarà kõ 6: oymNT

Highlight

Copy