Jesu koty rewarà kõ 7
7
Esitevão ijayvukasi jõvijãgwerà kõ rovake remẽwarà
1Ãmẽ Janejare'e pè oporegeta mãe kõ rõvijã wasu e'i Esitevão pè:
– Aje põ aepo ere si neporegeta neiko ipi? e'i.
2Ãmẽ Esitevão e'i ijupe kõ:
– Eretãrã kõ, pejapyaka ikõ eayvu rè nẽ, e'i. Ãmõ, erõvijã kõ ve, tapeenu rã'ĩ si aporegeta peupe remẽ, e'i. Karamoe remẽ itõkõ Janejare'e ojimoikatu janerãmõi Aparão amyry pè, e'i. Ikasia reny revejẽ itõkõ ojimoikatu ijupe. Mesopotami yvy rupi ojimoena iko remẽ itõkõ a'evo ekoi. Nojimoenaive Arã taa pè remẽ itõkõ a'evo ekoi, e'i. 3Ãmẽ itõkõ Janejare'e e'i tãmõ Aparão pè: “Ejisyry ike wyi neyvy pe wyi eo, e'i. Neretãrãgwerà kõ pytery pe wyi ejisyry eo. Neyvy rã gyty ejisyry eo eayvu rupi, amojisaokatà neupe mã'ẽ gyty, e'i. A'e kyty ejisyry eo”, e'i ijupe.#Jinõ. 12.1
4A'evo tè itõkõ karamoe remẽ janerãmõi Aparão ojisyry oyvy pe wyi oo, e'i. Kauteija yvy pe wyi ojisyry oo, [Mesopotami yvy pe wyi,] e'i. Janejare'e ayvu rupi ojisyry oo, e'i. Ãmẽ itõkõ oo Arã taa kyty ojimoena ky'y, e'i. A'e pè itõkõ ajaire tuu omãnõ ky'y. Aja paire Janejare'e weruoka janerãmõi Aparão ky'y. Aã yvy jajimoena age'e mã'ẽ pè weruoka ky'y, e'i.#Jinõ. 11.31; 12.4 5Nome'ẽive ajamã'ẽ yvy ijupe. Kãramõ ome'ẽtà, ijeapyrerà rã kõ pè. Kee e'i itõkõ Janejare'e Aparão pè maekwerà: “Kãramõ remẽ aã yvy pirujẽ ame'ẽtà neupe. Ãmẽ ajaire nejeapyrerà rã kõ pewarà mõtà teve nerekoawerà”, e'ipa amãtejẽ karamoe remẽ maekwerà, mãerã tè aepo e'i.#Jinõ. 12.7; 13.15; 15.18; 17.8 Naikoive ijãkarã remeve, ijeapyrerà rã omome'u amãtejẽ ijupe. 6E'i jẽ Janejare'e Aparão pè: “Kãramõ nejeapyry rã kõ ãmõ yvy rupi tè rã'ĩ ekoità. Temĩgwai ai rõmõtà tè rã'ĩ ekoi kupa”, e'i. “Temimomorijauarà rõmõtà tè rã'ĩ ekoi kupa kãramõ. Temimokasi e'ã rõmõtà tè ekoi kupa. 400 kwaray rõmõtà tesõ werokwapatà, temĩgwai ai kõ rõmõ kupa”, e'i. 7“Ajamã'ẽ imomorijauarerà kõ amomorijau kõtà. Ajimorara ai ywetetà a'e kõ rè. Aja paire pejeapyrerà rã kõ ojivytà uu a'e yvy kyty wyi ky'y”, e'i. “Kyvo kyty uu tarà mijẽ kupa. Penena rã gyty uu tarà mijẽ iko kupa. Ike emoe'età emory kupa ky'y”, e'i Janejare'e tãmõ Aparão amyry pè maekwerà.#Jinõ. 15.13-14; Jisyry. 3.12 Aekwerà rupi tè a'evo ekoi ãmẽ. 8Ãmẽ itõkõ Janejare'e e'i tãmõ Aparão pè manyvotà wa'yry wereko, Janejare'e ayvu kuwaparà rõmõ. Kee e'i: “Awyje penõvijã rõmõ tè aikotà ky'y. Pejẽ ãmẽ ekoty rewarà kõ rõmõtà peiko. Ajawyi nera'yry tereemosĩpire'o ity eremĩgwai rõmõ ekoia jikuwaparà rõmõ toiko”, e'i itõkõ Janejare'e ijupe. A'evo itõkõ tãmõ Aparão wereko wa'yry Isaki ãmẽ. 8 'arà remẽ tè o'a paire itõkõ, wemosĩpire'o imojikuwaoka. Janejare'e ayvu rupi tè a'evo wereko. Ãmẽ itõkõ tãmõ Isaki ojimovijapa remẽ, ijãkarã Jako rõmõ. Aja paire tãmõ Jako 12 rõmõ ijãkarã. A'e 12 rõmõ mãe kõ, janerãmõi rã itõkõ kupa.#Jinõ. 17.10-14; 21.2-4
9E'i jẽ Esitevão:
– A'e kõ ojimovijapa remẽ itõkõ, tãmõ Juse reke'yry kõ ojimõarõ tãmõ Juse kytyre. Ajawyi itõkõ teke'yry kõ ome'ẽ omõmirĩ temĩgwai ai rõmõ too ky'y. Karakuri repy rõmõ itõkõ ome'ẽ kupa, ãwisõ ipyyarerà kõ toeraa Ejitu yvy kyty oupi, e'i. Ajamã'ẽ Janejare'e tãmõ Juse reve ekoi a'evo remẽ.#Jinõ. 37.11,28; 39.2,21 10Wereko katu ereko, oo Ejitu wãnà rõvijã pyri remẽ, e'i. Ijãgyoa wekyi iwyi. Omotekokuwaoka teve ereko. A'evo wereko jõvijã wasu Parao rova rupi katuwarà rõmõ toiko, ãwisõ kee te'i ijupe: “Oromonotà jõvijã miti rõmõ. Eretã wyry pewarà rõmõ nejimojõvijãtà ky'y. Ãmõ, pirujẽ eremĩgwai kõ rè nejimojõvijãtà ky'y. Ike yvy rupi pirujẽ nejimojõvijãtà”, e'i itõkõ jõvijã Parao ijupe. A'evo itõkõ Janejare'e wereko katu tãmõ Juse ipi, e'i jẽ ijupe kõ.#Jinõ. 41.39-41
11E'i jẽ Esitevão:
– Ãmẽ itõkõ kãramõ sa'u tyavorusu ojinõ. Ikerõwã itõkõ tyavorà ojinõ. Ejitu yvy popy kyty tè ojinõ. Ojimomorijauvay itõkõ ãmẽ kupa. Nuvei 'eteay itõkõ emi'õ rã kõ a'e rupi ãmẽ ky'y. Ãmõ, Kanaã yvy rupi ve itõkõ nuvei temi'õ janerãmõi kõ pè, Juse ruu rena pè, tãmõ Jako rena pè. Moma'e no'u'ãi kupa ky'y. Ejitu yvy pè uve jẽ sikaepo temi'õ ãmẽ, temitã rã'ãigwerà,#7.11 Trigo [Juse omokatu amãtejẽ maekwerà.] 12Ajaire kee jaa ojenu tãmõ Jako pè: “Ejitu yvy pè uve jẽ temitã rã'ãigwerà”, jaa. Ajawyi itõkõ omono wa'yry kõ too rã'ĩ a'e kyty wemi'õ rã pyy. Oo ipyy eru ãmẽ kupa. [Omõmirĩ gyty tè sikaepo oo ipyy kupa.]#Jinõ. 42.1-2 13A'e ajaire o'upa kupa. Ajawyi oo mijẽ ipyy mijẽ eru kupa, e'i. Ãmẽ tè itõkõ Juse ojikuwaoka ijupe kõ ky'y, weke'yry kõ pè: “Pemõmirĩ tè ije”, e'i itõkõ ijupe kõ. Jõvijã Parao rovake weraa kõ, Parao tokuwa kõ. Tokuwa tãmõ Juse retãrãgwerà kõ. A'e tãmõ kõ tè.#Jinõ. 45.1,16 14“Pekwa Papa pijarà mõ”, e'i itõkõ tãmõ Juse weke'yry kõ pè ãmẽ ky'y. “Pirujẽ eretãrãgwerà kõ totuu”, e'i. 75 rõmõ tesõ itõkõ ãmẽ oo kupa.#Jinõ. 45.9-10,17-18; Jisyry. 1.1-5 15A'evo itõkõ tãmõ Jako oo Ejitu kyty, wa'yry kõ reve. [A'e rupi tè itõkõ ojikwa ywete kupa ky'y, Ejitu yvy rupi.] A'e pè teve itõkõ tãmõ Jako okãjã ky'y. Janerãmõi kõ ve okãjãma a'e pè.#Jinõ. 46.1-7; 49.33 16Ajaire ijãkarãgwerà werojivy oõvijãgwerà reãgwerà Kanaã yvy kyty kupa. Sikẽ taa pè. Pareti kwarà pupe weraa eãgwerà kõ ijaty kupa. Kõitokõ tãmõ Aparão opyy Emorà ra'yry kõ wyi maekwerà, e'i jẽ ijupe kõ.#Jinõ. 23.3-16; 33.19; 50.7-13; Jos. 24.32
17-18E'i jẽ Esitevão:
– Ãmẽ itõkõ tãmõ kõ opyta puku tesõ Ejitu yvy pè upa. Ojikwa ywete itõkõ a'e pè kupa. Ijatyray itõkõ ãmẽ kupa ky'y. Ãmẽ ajaire itõkõ ãmõ Parao ojimojõvijã wasu ky'y, Ejitu yvy pè. A'e itõkõ nokuwai tãmõ Juse amyry opãtavõ ywete Ejitu wãnà kõ tyavorà remẽ karamoe remẽ. Ajawyi ojikõ'õ teãmã Isaeu kõ rè iko ky'y. Temĩgwai ai kõ rõmõ oinõ kõ ky'y, Janejare'e e'ipa amãtejẽ tãmõ Aparão pè maekwerà rupi katu. 19Ãmẽ itõkõ a'e jõvijã wasu omomorijauvay ereko kõ ipi, e'i. Wereko ai kõ ereko ipi. Noesa tari kõ ereko ipi, e'i. Ãmẽ itõkõ jõvijã Parao e'i tãmõ kõ pè: “Taa kupei kyty ikõ peraa pena'yry sakykyrerà kõ itypypyi tomãnõ ipi nẽ, tapejikwa e'ã”, e'i itõkõ tãmõ kõ pè. A'evo itõkõ ta'yry kõ werekooka ijapisioka kõ tãmõ kõ pè, e'i jẽ Esitevão.#Jisyry. 1.10-11,22
20– Ãmẽ jakatu itõkõ Isaeu jeapyrerà mõ wãivĩ mõ imemy, e'i. Ja'yre'e rõmõ itõkõ imemy. Moisesi eu itõkõ erà pè, e'i. Tyvija rupi tè rã'ĩ omovija ijy ereko. Moapy jay rõmõ itõkõ a'evo ekoi.#Jisyry. 2.2-10 21Ajaire manyvo noereko'ãi remẽ, wenanõ eraa imono yy pè ky'y. Jõvijã Parao rajyry tè itõkõ wesa eraa imovija omemyry rõmõ ãmẽ ky'y. [A'e tè weenõ. Moisesi e'i ijupe.] Wemikuwa pupe tè omovija omemyry rõmõ, e'i. 22A'evo pirujẽ Ejitu yvy wãnà rekoa kõ rupi ojimovija ojimotekokuwa. Okuwapa itõkõ Ejitu wãnà kõ rekoa ky'y. Ajaate itõkõ ijayvukasiay mã'ẽ rõmõ ãmẽ ky'y, e'i Esitevão ijupe kõ.
23E'i jẽ ijupe kõ:
– 40 kwaray rõmõ tãmõ Moisesi werokwapa ky'y remẽ itõkõ ojipy'amogeta wetãrãgwerà kõ rè, Isaeu kõ rè. 24Oo omãjã ee kõ ãmẽ. Ãmẽ a'e pè oo remẽ, Ejitu wãnà mõ rè omã'ẽ, onõpã nõpã teywete Isaeu jeapyrerà mõ upa remẽ. Ajare oo wetãrã pãtavõ mijã. Wepy itõkõ ãmẽ. Ojuka itõkõ wetãrã onõpã maekwerà ãmẽ, Ejitu yvy wãnà. [Tyvija rupi teipe itõkõ a'evo ekoi remẽ.]#Jisyry. 2.11-15 25Kee e'i tite tãmõ Moisesi oupe a'evo remẽ: “Eretãrã kõ okuwa kuwasi Janejare'e tè epyteporo taekyi kõ jimomorijaua wyi”, e'i tite oupe. Ajamã'ẽ nokuwai a'evoa kupa.
26– Ãmõ 'ary pè, Moisesi omã'ẽ mijẽ Isaeu kõ rè, mõrijõ rõmõ, ovote ojimonupi kupa upa remẽ, ajaave ojikõ'õ ojee kupa. Ãmẽ itõkõ Moisesi omomoi kõ tarepe ojiwyi mijã. Kee e'i epe ijupe kõ: “Kwaima'e kõ, peenu rã'ĩ si eayvu! Pejiapisi sõ pekupa, ojetãrã tè pejẽ remẽ”, e'i epe. 27Ajamã'ẽ noenui kupa. Poromoai mã'ẽ omoãjã kõrijõ Moisesi imono. Kee e'i kõrijõ tè ijupe: “Ava põ orerõvijã rã'ãga rõmõ nemuroka ike orepyri aepo tere ore! Orerõvijã rõwã ene!” e'i ijupe. “Ivoa kuwaparà rõwã teve ene! 28Ãwitõ kwee nejuka Ejitu yvy wãnà mõ, a'evo rõwã age'e ererekotà rejupa!” e'i kõrijõ Moisesi pè. 29Aepo e'i remẽ itõkõ tãmõ Moisesi ojimonyi tesõ ky'y. Ojava itõkõ oo Ejitu pe wyi ãmẽ ky'y. Mijiã yvy kyty oo ojimoena ãmẽ ky'y. A'e wãnà wãivĩ mõ wereko. Ajaire itõkõ ijãkarã a'e pupe mõrijõ rõmõ, e'i Esitevão.#Jisyry. 2.13-14
30E'i jẽ Esitevão ijupe kõ:
– 40 kwaray rõmõ tesõ itõkõ tãmõ Moisesi werokwapa Mijiã yvy rupi iko. Ãmẽ ajaire yvapewarà ojimoikatu ijupe ky'y. Tekoe'ãma pè tè. Sinai yvytyry pyri'ĩje'ẽ ekoi a'evo remẽ. Ka'a ojãmurutu mã'ẽ pytery pè tui upa. A'e pupe itõkõ tata vo sõ tite okai upa. A'e pè yvapewarà ojimoikatu ijupe. 31A'e rè tãmõ Moisesi omã'ẽ remẽ, ojimonyi tesõ. “Moma'e si pãwĩ?” e'i oupe. Ajawyi oo eko omãjã ee. Omã'ẽ gatu ee upa. Ãmẽ Janejare'e oporegeta ijupe [ka'a jãmurutugà pupe wyi]. Kee e'i oporegeta ijupe: 32“Janejare'e tè ije, nerãmõi kõ Rõvijã wasu tè! e'i. Aparão Rõvijã wasu tè! Ãmõ, Isaki Rõvijã wasu tè! Ãmõ, Jako Rõvijã wasu tè”, e'i tãmõ Moisesi pè oporegeta upa.#Jisyry. 3.6 Ãmẽ tãmõ Moisesi ojimonyi tesõ omãjã ee. Otytypa tesõ ojimonyi rõmõ iko. Nomã'ẽ tari tesõ ee ky'y, okyje iko rewarà mõ. 33Ãmẽ e'i jẽ Janerõvijã ywete ijupe: “Eekyi ãwĩ nesãtaja nepy re wyi, ije Janejare'e ike rupi aiko rewarà mõ. Nesãtaja reve terepãrõ e'ã eyvy 'aryvo. 34Akuwa eãkarãgwerà kõ Ejitu yvy wãnà kõ remimomorijau kõ rõmõ ekoi. Amã'ẽ ee kõ ipi. Aenu teve eamaia kõ ipi. Ajawyi awyjy ajo ekyioka kõ jimomorijaua pe wyi ky'y, tõvijã ai po pe wyi ky'y. Age'e oromojivytà Ejitu yvy kyty”, e'i itõkõ tãmõ Moisesi pè. [Ekwa ãmẽ, tererojisyry kõ eraa kõ,] e'i Janejare'e tãmõ Moisesi pè.#Jisyry. 3.1-10
35– Oo ãmẽ tãmõ Moisesi. Ajamã'ẽ etãrãgwerà kõ “aje” ne'i ijupe. Kee e'i kõrijõ tè kupa: “Ava põ nemuroka ike orepyri orerõvijã rõmõ aepo tere! Ivo e'ãa kuwaparà rõwã teve ene!” e'i ywe'e tite ijupe maekwerà teipe. Ajamã'ẽ jõvijã rõmõ teãmã Janejare'e omuroka, ãwisõ age'e remẽ toekyi jimomorijaua pe wyi. A'e rõmõ Janejare'e wemĩgwai yvapewarà mõ omuu, tata vo sõ tite ka'a jãmurutua pupe wyi toporegeta ijupe.#Jisyry. 2.14
36– [Oo itõkõ tãmõ Moisesi ãmẽ Ejitu yvy kyty.] Marama tè itõkõ ekoi jane kõ rovake Janejare'e kasia rupi, Ejitu yvy rupi ekoi remẽ. Ajaire werojisyry kõ Ejitu yvy pe wyi remẽ itõkõ, Janejare'e kasia rupi a'evo ekoi teve. Ãmõ, Pãranãpirã rupi o'yasa kupa remẽ, ikasia rupi a'evo jẽ ekoi. Ajaire tekoe'ãma rupi ekoi kupa remẽ, ikasia rupi teve a'evo jẽ ekoi kupa. 40 kwaray rõmõ tesõ itõkõ a'evo ekoi kupa, Janejare'e kasia rupi, e'i jẽ Esitevão.#Jisyry. 7.3; 14.21; P.Moirõ. 14.33
37E'i jẽ:
– Ãmẽ tãmõ Moisesi yveve itõkõ e'i Isaeu kõ pè karamoe remẽ: “Janejare'e omurokatà wayvu mojenuarà peupewarà mõ. Ãwitõ ije emuroka peupewarà mõ, ãwĩvo tary ve kãramõ. Janejeapyrerà mõ tè a'evotà ekoi”, e'i itõkõ karamoe remẽ Moisesi.#T.M. 18.15,18 38A'e tãmõ Moisesi yveve teve itõkõ ojimoaty Isaeu kõ reve tekoe'ãma rupi ekoi kupa remẽ. Sinai yvytyry ypy rè ojimoaty kupa remẽ. A'e pè itõkõ yvapewarà oporegeta mijẽ ijupe, yvytyrapyte 'aryvo wyi. Tãmõ Moisesi pè teve itõkõ Janejare'e wayvu manyvo tijaiko mã'ẽ okusiwa ime'ẽ, ãwisõ tomogeta imojenu ajaire janerãmõi kõ pè.#Jisyry. 19.1–20.17
39– Ajamã'ẽ ãwĩvo ipe remẽ itõkõ janerãmõi kõ noerovijai Moisesi ayvu kupa. Kee e'i kõrijõ tè kupa: “Oropota orojivy Ejitu yvy kyty oroo”, e'i kõrijõ tè kupa. 40Sinai yvytyry rè Moisesi ojiupi oo remẽ itõkõ kee e'i teke'yry pè ãmẽ kupa, Arão pè: “Arão, moma'e jimoãtãgwerà tereinõ janerõvijã kõ rõmõ, janererekoarà rõmõ. Joãkãmorà rõmõ a'e reikatu rupi tijaa”, e'i ywe'e tite kõrijõ kupa. “Emã'ẽ, Moisesi janereru maekwerà, nojikuwai tesõ upa. Ejitu yvy pe wyi janereru teywete. Okãjã maevo janewyi ky'y”, e'i ywe'e tite kupa, e'i Esitevão.#Jisyry. 32.1
41E'i jẽ ijupe kõ:
– Oinõ ywe'e tite itõkõ ãmẽ ojarà rã'ãga kupa. Pui ra'yry rã'ãga jimoãtãgwerà itõkõ oinõ kupa, ojarà rã'ãga rõmõ. A'e pè ojuka rã'ãga weima kõ mõ ime'ẽ rã'ãga ijupe kupa ipi, ojarà rã'ãga pè. A'e rè oja'a ywe'e tite imojõvijã. A'evo weminõgwerà yveve omoe'e rã'ãga kupa.#Jisyry. 32.2-6
42– Ajamã'ẽ a'evo ekoi kupa remẽ sitõ Janejare'e werekoiva kõ ky'y, Isaeu kõ. Oity kõ rã'ĩ. “Ta'evo rã'ĩ jẽsi awi ekoi kupa!” e'i. Ajawyi: “Janejarà teipõ wãi”, e'i ywe'e tite teve jaytata kõ pè kupa. Jaytata rã'ãga jimoãtãgwerà oinõ ywe'e tite imoe'e rã'ãga ãmẽ kupa. Ãmõ, jay rã'ãga jimoãtãgwerà. Ãmõ, kwaray rã'ãga jimoãtãgwerà. A'e kõ rè kõrijõ tè itõkõ omoe'e ywe'e tite kupa ipi. A'e kõ pewarà mõ kee e'i Janejare'e wayvu mojenuarà kõ pè, tokusiwa kupa:
“Isaeu kõ, eupe rõwã penima pejuka ime'ẽ ipi, 40 kwaray rõmõ tekoe'ãma rupi peiko remẽ.
[Penõvijã rã'ãga pè kõrijõ tè peme'ẽ ywe'e tite.
A'e pè kõrijõ tè: ‘Oroerovijatà orerõvijã rõmõ ky'y’, pejẽ tite.]
43Moroki eu itõkõ penõvijã rã'ãga mõ pè. A'e moe'ea retã rã'ãga itõkõ pemovy penupi eraa ipi.
Ãmõ, jaytata rã'ãga jimoãtãgwerà ve oinõ imoe'e kupa,
Rẽpã pejẽ ijupe mã'ẽ.
A'e jimoãtãgwerà rã'ãga teve itõkõ peinõ ywe'e tite imojõvijã rã'ãga. A'evo peiko rewarà mõ poromomorijautà ky'y.
Poromoisyrytà ike wyi ky'y. Ãmõ yvy kyty poromonotà.
Papironi taa kupei kyty poromonotà pemomorijauoka rõmõ ky'y”, e'i itõkõ Janejare'e tãmõ kõ pè.#Ams. 5.25-27
44Kareta rè aepo okusiwaoka wayvu mojenuarà kõ pè, janerãmõi kõ tokuwa. Janejare'e tè itõkõ omotekokuwa tãmõ Moisesi omoe'ea retã rã reinõa rè, tekoe'ãma rupi ekoi kupa remẽ. Omojisaoka ijupe manyvo toereko. A'e rupi katu itõkõ Moisesi oinõoka ãmẽ, e'i. Tetã ropa oinõoka. [Teima pirerà pupe ve oinõoka.] A'e weraa oupi kupa, tekoe'ãma rupi oo kupa remẽ. Janejare'e ipyri kõ ekoia mojikuwaparà rõmõ a'e tetã.#Jisyry. 25.9,40 45A'e tetã tè ajaire tãmõ kõ ome'ẽ wãkarã kõ pè toereko jẽ kupa. Okãjã remẽ itõkõ oity ijupe kõ. [Ãmẽ itõkõ tãmõ Moisesi okãjã ky'y.] Ãmẽ tãmõ Josue ojimojõvijã ky'y. A'evo remẽ Janejare'e moe'ea retã weraa jẽ kupa, tekoe'ãma kyty wyi Kanaã yvy kyty. Ãpã kõ rena kyty oike kupa remẽ, weraa jẽ kupa. Ãmẽ itõkõ Janejare'e omoisyryoka Kanaã yvy pewarà Isaeu kõ renone, e'i. Ãmẽ itõkõ janerãmõi kõ wereko jẽ. A'e pè Janejare'e moe'ea retã ropa weropyta kupa ky'y, Kanaã yvy pè, e'i. A'e pè opyta puku ky'y, ajaate tãmõ Tavi ojimojõvijã, e'i jẽ Esitevão.#Jos. 3.14-17
46– Ãmẽ sitõ Janejare'e oryvay jõvijã Tavi rè, opy'a rupi katuay tè ekoi mã'ẽ Tavi rewarà mõ. Ãmẽ itõkõ tãmõ Tavi e'i Janejare'e pè: “Tãmõ Jako Rõvijã ywete ene. Erõvijã ywete teve ene”, e'i. “Nemoe'ea retã e'e ainõtà ky'y, awyje ike tatui”, e'i epe Janejare'e pè.#2Sa. 7.1-16 47[Ajamã'ẽ: “Ene rõwã neinõtà”, e'i Janejare'e ijupe. “Nera'yry tè oinõtà”, e'i itõkõ ijupe ãmẽ.] A'evo ãmẽ Tavi ra'yry tè oinõ Janejare'e moe'ea retã rã ãmẽ ky'y. Saromão eu tãmõ Tavi ra'yry rerà pè. A'e tè itõkõ oinõ ãmẽ. [Ojimojõvijã uu renawery pè iko paire tè oinõoka.]#1To. 6.1-38
48– A'evo ipe Janejare'e retã. Ajamã'ẽ janevo rõwã Janejare'e. Jo'arà kytywarà tè. Tetã wyry pè rõwã tui. Tetã mirà kõ oinõ mã'ẽ wyry pè rõwã tui ipi, Janejare'e e'e tè rewarà mõ. Kõitokõ karamoe remẽ Janejare'e wayvu okusiwaoka wayvu mojenuarà mõ pè:
49-50“Yva ekasia rena tè. Yvy ekasia rena teve.
Ajawyi manyvo napeinõ'ãi kuwa eretã eupe, tajimoena iwyry pè!
Ije tè pirujẽ ainõ mã'ẽ!” e'i maekwerà.#Isa. 66.1-2
Aekwerà rupi katu a'evo ekoi.
51E'i jẽ Esitevão ijupe kõ:
– Eretãrãgwerà kõ, naperovijai ywe'e tite sipõ Janejare'e ayvu ipi! Napeapyai maevo sõ tite peiko! Janejare'e aepo e'i jẽ oporegeta pejẽ remẽ, napeenu tari! e'i. Ãwitõ penãmõi kõ ojirova kõrijõ Janejare'e 'Ãg wyi karamoe remẽ, a'evo ekoi maekwerà kõ vo ywete peiko ywe'e tite! e'i.#Isa. 63.10 52Ijayvu mojenuarà kõ itõkõ penãmõi kõ omomorijau ywete, ijãvijõ kõ jẽ. Naikoi pe'ĩ nomomorijaui kupa mã'ẽ! “Janejare'e Remimuu rã ivo e'e teãmã mã'ẽ uutà”, e'i epe sõ imojenu kupa mijã. Ajamã'ẽ aepo e'i rire katu noenu tari ijayvu kupa. Ojuka kõrijõ itõkõ kupa. A'e kõ vo ywete pejẽ peiko! Janejare'e Remimuurerà tẽ tesõ pemoãkwa'ã ijukaoka! e'i. 53Ãwisõ Janejare'e ayvu ivo tekoua rewarà pereko ipe, wemĩgwai yvapewarà rupi ome'ẽma janerãmõi kõ pè maekwerà, e'i. Ajamã'ẽ upi napeikoi ipi! e'i Esitevão ijupe kõ. [Awyjepa oporegeta ãmẽ ky'y.]
Esitevão jukaawerà
54Ameve Juteu rõvijãgwerà kõ atyry aepo wenu remeve, ojikõ'õ tesõ kupa ky'y. Ãi jikyty kyty tesõ ojikõ'õ iko kupa.
55Ajamã'ẽ Janejare'e 'Ãg omokasiay Esitevão a'evo remẽ. Eevejẽ ekoi. Ãmẽ oyvatesa imono remẽ, Janejare'e kasia reny rè tẽ tesõ omã'ẽ. Ameve yva ojiovapyjavo. Jesu rè tẽ tesõ omã'ẽ teve, Janejare'e 'ekatu kytyre opõ'ã upa remẽ.
56A'e rè omã'ẽ remẽ, kee e'i:
– Pemã'ẽ rã'ĩ si! Yva ojiovapyjavo upa! Janejare'e Remimuurerà ajimojane mã'ẽ rè amã'ẽ ajupa! A'e Jesu rè! Janejare'e pyri opõ'ã upa, i'ekatu kytyre! e'i Esitevão ijupe kõ.
[Janejare'e 'Ãg tè a'e rè omomã'ẽoka ijupe. Nojisaokari ãmõ kõ pè ajamã'ẽ. Nomã'ẽ kuwa'ãi ee kupa.] 57Ajawyi aepo e'i Esitevão remẽ, ojiapyakwapyy kõrijõ ijayvu renu tare'ã kupa. Wayvo tesõ wapuka pukai kupa, ojikõ'õ iko kupa. Ojã oo ipyy kupa, pirujẽ. 58Opyy imotyryry eraa taa kupe kyty kupa. A'e kyty ojapi japi takuru pupe ijuka kupa.
Ãmẽ a'evotà remẽ jõvijãgwerà kõ ojiyrumopysoso rã'ĩ kupa. Oyru poko omopyso rã'ĩ kupa. Kõnomĩokyry mõ pè omono rã'ĩ oyru poko topyy rã'ĩ, a'evo ekoi kupa remẽ. Sauru eu erà pè mã'ẽ pè omono rã'ĩ kupa. A'evo paire tè takuru pupe ojapi japi ijuka kupa.
59A'evo remẽ, Esitevão e'i Jesu pè imono:
– Erõvijã Jesu! Eraa e'ãg age'e nepyri ky'y! e'i.
60Aepo e'i paire ojimoenãpa'ã yvy pè. Wayvo tesõ wapukai, kee javo:
– Erõvijã! Teremomorijauoka e'ã ikõ ejukaarerà kõ nẽ! e'i.
Aepo e'i kõrijõ omãnõ ky'y.
Currently Selected:
Jesu koty rewarà kõ 7: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
