Jesu koty rewarà kõ 8

1-2Ãmẽ Sauru a'evoa rè omã'ẽ remẽ, “Tojuka ikenẽ”, e'i kõrijõ tè.

Ajaire Jesu koty rewarà kõ waty Esitevão reãgwerà. Wãpirõ ywete eãgwerà omokatu kupa remẽ.

Sauru omomorijautà Jesu koty rewarà kõ remẽwarà

Esitevão ojuka kupa ire yveve, Jesu noerovijai mãe kõ weka ypy ikoty rewarà kõ Jerusarẽ taa rupi kupa. Omomorijau kõ e'e tè ãmẽ kupa ky'y. Opota tite ijapisia e'e kupa mijã. Ajawyi ojimosãsãima oo Jesu koty rewarà kõ Jerusarẽ taa pe wyi ky'y. Jesu remimonokwerà kõ kõrijõ tè Jerusarẽ mè opyta jẽ, 12 rõmõ mãe kõ. Ãmõ kõ ojisyrypa oo. Juteja yvy taa taa rupi opyta kupa. Ãmõ, Samaria yvy taa taa kõ rupi.

3Ãmẽ Sauru ve opota tite ijapisia kõ mijã. Ajawyi oo oo ãmõ tetã tetã wyry rupi eka kõ. Wesa kõ remẽ, opyy enõe eru tetã wyry pe wyi eraa imopã'ã jimopã'ãga pupe ipi. Wãivĩ kõ ve tesõ a'evo wereko. A'evoa wyi tè ojimosãsãima ojiwyi oo oo kupa.#J.K.R. 22.4-5; 26.9-11

Piripi Samaria taa kyty oo remẽwarà

4Ojimosãi oo mãe kõ, pirujẽ taa taa rupi Janejare'e ayvu omojenu jenu erokwa ipi. 5Ãmẽ Piripi oo Samaria yvy taa mõ kyty. A'e rupi omojenu jenu ywete jane kõ pè.

– Janejare'e Remimuurerà tè Jesu Janerõvijã ywete rõmõ, e'i imojenu.

6Ãmẽ Samaria wãnà kõ Piripi ayvu wenu takatu, Jesu ayvu rè omo'e kõ remẽ. Werovija katu ijayvu kupa ipi. Omã'ẽ teve ee, Janejare'e kasia rupi poromokatu remẽ ipi. Aty wasu omã'ẽ ywete ee a'evo ekoi remẽ. 7Ma'e rè omã'ẽ kupa. Ãjãgaiwerà kõ omoisyry mirà kõ pupe wyi imono mã'ẽ rè omã'ẽ kupa. Ãjãg kõ wapuka pukai tesõ mirà kõ pupe wyi oẽ oo mã'ẽ rè omã'ẽ kupa. Ãmõ, etãmã nomãrãkuwai mãe kõ mokatua rè omã'ẽ kupa. Ãmõ, ojapu'apa mã'ẽ mokatua rè omã'ẽ teve kupa. A'e a'e rè omã'ẽ kupa. Mõa'ãrõwã emimokatukwerà kõ rè omã'ẽ kupa. 8A'evo Piripi ekoi remẽ, oryvay tesõ Samaria wãnà kõ ee omãjã ky'y.

Simão paje vo mã'ẽ rewarà

9Ãmẽ jakatu oiko a'e pè jane mõ, Simão eu erà pè mã'ẽ. Paje vo mã'ẽ tè a'e. Ipojy mãe kõ omojisaoka ipi mã'ẽ. Ajawyi Samaria wãnà kõ omã'ẽ takatu ee ipi. Omomojy wete kupa ipi, a'e ywesõ a'evo ekoi ipi rewarà mõ. Ovote ojimoe'e teve Samaria wãnà kõ rovake iko ipi.

– Ije ywesõ ekasiay aiko mã'ẽ tè! e'i oupe ipi.

10Samaria wãnà kõ aepo e'i remẽ werovija ipi. Kee e'i tite kupa:

– Haa! Ãwĩ kwaima'e ywesõ Janejare'e kasia tè wereko! Janejare'e teipõ mãrãnà jikuwa e'ã werekooka ijupe ipi! e'i tite kupa ipi.

11Ãmẽ Simão wã'ã ipojy mã'ẽ joe ipi remẽ, Samaria wãnà kõ kee e'i:

– Haa! Manyvo ywete sipõ e'i katuay ee? e'i ee omãjã kupa ipi.

Ijaty kwaray tesõ a'evo Simão ekoi. Ajawyi omã'ẽ ywete ee kupa ipi, erãkwẽ rewarà mõ. 12Ajamã'ẽ ajaire Piripi ovãe. Jesu rekoa omojenu a'e taa wãnà kõ pè.

– Janejare'e opota Janerõvijã ywete rõmõ janerereko. A'evoa rõmõ Jesu Kiristu omuu Wemimuurerà rõmõ. A'e rè janerako'i remẽ, Janejare'e wãkarãgwerà rõmõ janerereko, e'i imojenu.

Aepo omojenu remẽ, jane kõ werovija katu ijayvu.

– Aje ywete oporegeta! e'i kupa.

Oja'a ypy Janejare'e rè ãmẽ kupa ky'y. A'evo mãe kõ Piripi omojãmorĩ, Jesu Kiristu koty rewarà kõ rõmõ. Kwaima'ekwerà. Ãmõ, wãivĩgwerà kõ ve.

13A'evo remẽ Simão ve oja'a ypy Jesu rè. Ojimojãmorĩoka Piripi pè ãmẽ. Ajaire Piripi rupi oo ky'y, maipe kyty oo remẽ. Ajawyi omã'ẽ Piripi rè, mãrãnà jikuwa e'ã wereko Janejare'e kasia rupi remẽ. Iteetejẽ mã'ẽ rè omã'ẽ ky'y.

– Haa! Manyvo ywete sipõ ãwĩ! e'i ee omãjã.

14Ãmẽ Jesu remimonokwerà kõ mõ pè a'evoa ojenu, Jerusarẽ taa pè tui kupa remẽ. “Samaria wãnà kõ ‘aje’ e'i Janejare'e ayvu pè ky'y”, e'i mã'ẽ ojenu ijupe kõ. Ajawyi mõrijõ omono Samaria yvy kyty. Kejõ oo kupa. Peturu. Ãmõ, Juwão. Mokopejõ oo kupa. 15Ãmẽ Samaria taa pè ovãe kupa remẽ, oporegeta Janejare'e pè Samaria wãnà kõ pewarà mõ kupa, Jesu rè oja'a ypy mãe kõ pewarà mõ. Kee e'i kupa:

– Janejare'e, ne'Ãg kasia emuu imokasia kõ rõmõ, e'i kupa.

16Janejare'e 'Ãg nonurive ijupe kõ rewarà mõ aepo e'i ijupe kupa. Ojimojãmorĩoka kõrijõ tè Janerõvijã Jesu ayvu rupi kupa. Ajamã'ẽ Janejare'e 'Ãg noikeive ipy'a kõ pupe ajamã'ẽ. 17Ãmẽ Peturu kõ wãkãmyy kõ remẽ, ãmẽ si Janejare'e 'Ãg oike ipy'a kõ pupe ky'y. 18A'evoa rè Simão omã'ẽ ãmẽ.

– Haa! Moko tè sõsi wereko! e'i opy'a pupe. Ijãkãg kõ opyy remẽ, Janejare'e 'Ãg tẽ tesõ oike ipy'a kõ pupe ky'y! Ije ve kuwasi moko areko kõ! e'i oupe.

Ajawyi opota tite karakuri ome'ẽ Jesu remimonokwerà kõ pè, Peturu kõ pè. E'i epe ijupe kõ:

19– Moko a'e ve kuwa mijã. Ãmẽ tè ãwĩvo aãkãmyy kõ remẽ, Janejare'e 'Ãg oiketà ipy'a kõ pupe, e'i epe ijupe kõ.

20-21Ajamã'ẽ aepo e'i remẽ, Peturu noenu tari. Ajawyi kee e'i:

– Haa! “Apyy kuwa sipõ Janejare'e kasia karakuri repy rõmõ?”, ere tite sipõ! e'i. Nijaepyme'ẽ'ãi Janejare'e kasia ipi! e'i. Tepy e'ãte ome'ẽ janeupe ipi, e'i. Nepy'a nivoi Janejare'e pè rewarà mõ tè aepo ere tite! e'i. Ajawyi ni'e'ãi neposiko orevo Janejare'e pè, e'i. Janejare'e ikõ tanemono tata wasu pupe nẽ, nekarakuri revejẽ, aepo ere jẽ remẽ, e'i. 22Terejimosĩoka neaiwererà rè. Nejipy'amogeta ai reity! e'i. Janerõvijã ywete pè terejiporijauesaoka. Maevo “awyjepa” e'i jẽtà nejipy'amogeta aiwerà pè, e'i. 23Akuwa, “Ije tè kuwasi ãwĩvo aiko mijã”, ere nejimõarõ iko mõ. Nejimoane'e jẽ nejimõarõ neiko nẽ. Nanekasi nejimõarõa reitya rè. [Janejare'e kõrijõ tè okasia rupi oityoka kuwa neupe,] e'i Peturu ijupe.

24Ameve tite Simão e'i Peturu pè, Juwão pè teve:

– Aje pejẽ. Peporegeta awi Janerõvijã ywete pè eupewarà mõ, temomorijau e'ã peayvu rupi, e'i.

[– Hoõ, e'i Peturu kõ ãmẽ.

A'evo wereko ãmẽ kupa ky'y.]

25Aja paire Peturu kõ opyta rã'ĩ Janerõvijã ywete ayvu omojenua rè. Ajaire ojivy oo Jerusarẽ taa kyty kupa. Janejare'e ayvu omojenu jenu jẽ iko kupa, Samaria pijarà rupi oo iko kupa remẽ. Samaria taa taa rupi oo iko kupa remẽ omojenu erokwa kupa. Ijatyray jane kõ pè omojenu erokwa kupa, ajaate Jerusarẽ taa pè ovãe kupa.

Piripi Etiopia yvy wãnà reve remẽwarà

26Ãmẽ ãmõ 'ary pè Janerõvijã ywete remĩgwai yvapewarà ojimoikatu Piripi pè, Jerusarẽ taa pè tui remẽ. A'e kee e'i ijupe:

– Piripi, ejimokatu ekwa kwaray yke kytyre katu ekwa, pee rupi. Gasa kyty oo mã'ẽ rupi ekwa. A'e tekoe'ãma rupi okwa mã'ẽ rupi, e'i.

27Ojimokatu ãmẽ oo Piripi. Ãmẽ a'e pee rupi oo iko remẽ, kwaima'e mõ oõvaisĩ, Euna eu ijupe mã'ẽ. Etiopia yvy wãnà kõ rõvijã miti tè sikaepo a'e. Jõvijã wasu wãivĩ pè oposiko karakuri rè mã'ẽ tè a'e. Kãtasi eu tõvijã wãivĩ pè. A'e jõvijã miti Piripi oõvaisĩ mã'ẽ Janejare'e moe'e oo Jerusarẽ taa pè mijã. 28A'e pe wyi ojivy oo wena kyty iko. Kavaru kahu omõtã eraa mã'ẽ rupi ojivy oo iko. Kareta omogeta iko, Janejare'e ayvu mojenuarà Isajasi remikusiwarerà.

29Ãmẽ Janejare'e 'Ãg e'i Piripi pè:

– Ekwa ãwĩ kwaima'e pyri'ĩje'ẽ sa'u. Ãwĩ kavaru kahu omõtã eraa mã'ẽ rupi oo iko mã'ẽ pyri'ĩje'ẽ. Ekwa upi, e'i.

30A'evo Piripi ekoi ãmẽ. Oo ipyri'ĩje'ẽ remẽ, wenu Isajasi remikusiwarerà omogeta remẽ. Ajawyi e'i ijupe:

– Emãrãnà! e'i. Neenu põkõ ãwĩ nemogeta remẽ, manyvo jaa tè? e'i.

31– Ãnĩ! Manyvo kuwa põkõ areko enu, ava mõ nemotekokuwai ee remẽ! e'i. Ije rõmõ'ĩte manyvo nareko'ãi ikuwa, e'i. Ejiupi awi epyri eapy teremome'u ije, e'i.

“Hoõ” e'i ãmẽ Piripi. Ojiupi oo Etiopia wãnà rupi ãmẽ. 32-33Kee e'i tè sikaepo kareta jikusiwarerà, a'e omogeta ereko mã'ẽ:

“Ãwitõ kaneiru jaraa ijuka remẽ, ãwĩvotà jaraatà ijuka mãerã.

Nipu'ãi kõrijõ tè ãwĩvo jareko remẽ.

Ãwitõ kaneiru ra'yry nipui kõrijõ tè jaavo remẽ.

Ãwĩvo ve nipu'ãi a'e jaraa ijuka remẽ.

Ivo katu ekoi epe. Jamomorijau ywe'e titetà.

Nivoi ywe'e titetà jareko. Omãnõtà ãmẽ.

Ajawyi nojeapy'ãi, omãnõtà amãtejẽ rewarà mõ”, e'i tè sikaepo kareta jikusiwarerà.#Isa. 53.7-8

34A'e rè Etiopia wãnà kee e'i Piripi pè:

– Emome'u rã'ĩ si ije, manyvo jaa sikaepo aã? Ava upewarà mõ ywesõ põ Janejare'e ayvu mojenuarà aepo e'i amãtejẽ? Oupewarà mõ põ? Ãmõ kõ pè sipõ? e'i. Emotekokuwa rejupa, ava pewarà mõ põ aepo e'i? e'i Piripi pè.

35Ajawyi Piripi omotekokuwa ky'y, Janejare'e ayvu jikusiwarerà rè.#8.35 Kee e'i maevo ijupe: “Ãwitõ kaneiru jajuka ime'ẽ janeaiwererà repykarà mõ. Ãwĩvo ve Jesu omãnõ janeaiwererà repykarà mõ ky'y”, e'i maevo ijupe. Pirujẽ omome'u Jesu rekoa ijupe. [A'e “aje” e'i enu ãmẽ ky'y.]

36Ãmẽ oo jẽ iko kupa remẽ, yy miti mõ pè ovãe kupa. Ãmẽ Etiopia wãnà e'i:

– Emã'ẽ yy rè, e'i. Emojãmorĩ ajawyi rejupa! e'i.

37Piripi e'i ijupe:

– Nejirovija Jesu rè nepy'a pupe remẽ, oromojãmorĩ kuwa, e'i.

– Õ'õ, aje ywete Janejare'e Ra'yry tè Jesu, a'e kuwa ky'y. Janejare'e Remimuurerà tè Janerõvijã ywete rõmõ, a'e ijupe ky'y, e'i Piripi pè.#8.37 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 37 uve. Ãmõgwerà kõ pè nuvei.

38Ajawyi Etiopia wãnà weropyta rã'ĩ kavaru yy reme pè. Mõrijõ revejẽ opo yy pupe kupa. A'e pè Piripi omojãmorĩ.

39Aja paire oẽ yy pupe wyi iko kupa. Ameve Janerõvijã 'Ãg py'awarà mõ weraa amãtejẽ Piripi iwyi. Nomã'ẽi Etiopia wãnà ee ky'y. Ajamã'ẽ oo jẽ wena kyty. Ory tesõ oo iko.

40Ameve Piripi py'awarà mõ ãmõ taa pè ekoipa, Asutu taa pè. A'e pe wyi oo jẽ Sesareja taa pijarà rupi. Oo iko remẽ Janejare'e ayvu omojenu jẽ erokwa. Pirujẽ taa taa rupi a'evo ekoi. Ajaate Sesareja taa pè ovãema.

Currently Selected:

Jesu koty rewarà kõ 8: oymNT

Highlight

Copy