Jesu koty rewarà kõ 25

Pauru ojimokasi kovenatu Pesitu rè remẽwarà

1Ãmẽ Pesitu Juteu yvy pè ojimojõvijã ypy remẽ, Sesareja taa pè rã'ĩ ekoi. Moapy ke rõmõ oike paire, Jerusarẽ taa kyty ojiupi rã'ĩ oo. 2A'e pè ovãe remẽ, Juteu rõvijãgwerà kõ ojimoaty uu ovake. Janejare'e pè oporegeta mãe kõ rõvijã kõ a'evo ekoi. Ãmõ, Juteu kõ rõvijã kõ ve. A'e a'e kõ oporegeta ai tè Pauru rè. Omome'u katu mijẽ kovenatu Pesitu pè kupa.

– A'evo 'evo sõ mã'ẽ tè Pauru! e'i kupa. 3Ajawyi teremojivyoka Jerusarẽ taa kyty, oremorya rõmõ, e'i kupa.

Ajamã'ẽ, “Pee ku'ai pè sijukatà Pauru”, e'i oupe kupa. Ajawyi aepo e'i tite kupa.

4-5Ãmẽ kovenatu Pesitu e'i ijupe kõ:

– Ãnĩ, e'i. Sesareja taa pè Pauru jimopã'ãga pè tui upa. Kuise'ẽ jẽ ajivytà aa a'e kyty, e'i. Penõvijã kõ mõ kuwasi oo erupi a'e kyty. Ãmẽ tè oiko sikaepo ijaiwererà mõ remẽ, tomome'u katu ije kupa, e'i kovenatu Pesitu ijupe kõ.

6Aja paire Jerusarẽ taa pè oiko puku sa'u jẽ iko, janepokwerà pè oke. Ajaire ojivy oo Sesareja taa kyty ojapara ky'y. Juteu rõvijã kõ mõ ve oo upi. Ovãe maire, kõ'ẽmeve oo tetã ivo tekoua kuwapa retã mè oike wapy, jõvijã apyka 'aryvo. A'e pè kovenatu wenu jane kõ ayvu ipi, oporegeta remẽ. Omuroka Pauru okoty ãmẽ.

7Ãmẽ Pauru a'e pupe oike remẽ, Juteu kõ Jerusarẽ taa pe wyi ojapara uu maekwerà kõ a'e pè tui, kovenatu rupi uu maekwerà kõ. A'e kõ nivoi 'eteay mã'ẽ omo'y teywete Pauru rè kovenatu rovake.

– A'evo 'evo sõ mã'ẽ tè ãwĩ kwaima'e, e'i teywete Pauru pewarà mõ kupa.

Oporegeta ai ywete si kupa. Ajamã'ẽ mã nomo'y'ãi Pauru rewarà aje ywete sikaepo nivoi ekoia, “aje” te'i kovenatu ijayvu kõ pewarà mõ. 8Pauru ãmẽ ojimokasi oporegeta ojireko katu iwyi kõ ky'y. Kee e'i:

– Ije jõvijã kõ ayvu rupi katu aiko ipi, e'i. Naiko teitetei aiko ipi, e'i. Ãmõ, najavyi teve tãmõ Moisesi remikusiwarerà rupi tekoua ipi, e'i. Ãmõ, Janejare'e moe'ea retã namojaiwei teve aiko. Ãmõ, jõvijã wasu Sesa ayvu pojy najavyi teve ipi. Ikatu tè aiko ipi, e'i Pauru.

9Ajamã'ẽ kovenatu Pesitu opota tè Juteu rõvijã kõ mory. Ajawyi e'i Pauru pè:

– Nerepotai põ Jerusarẽ taa kyty neo, takuwa katu nerekokwerà? e'i ijupe.

10– Ãnĩ! e'i Pauru. Ikepa rõwã sipõ aju, nerovake. Jõvijã wasu Sesa remimojõvijã rovake aju! Ajawyi ikeve nivoi aiko mã'ẽ terekuwa, mã põ eresatà, ajawyi. Manyvo na'ei Juteu kõ pè aiko ipi. Ene ve nekuwa katu manyvo na'ei aiko remẽ ipi! 11Aje sõ ijayvukwerà erewarà remẽ, ekuwa kuwa ãmẽ rejupa. Upi katu tè kuwa ejukaoka rejupa. Ajamã'ẽ nivoi omo'y teywete sõ ere kupa remẽ, nivo'ãi kuwa eme'ẽ ipo kõ pè remẽ, e'i. Ajawyi jõvijã wasu Sesa po pè tè emono rejupa, a'e ene ky'y! e'i kovenatu pè.

12Aepo e'i Pauru paire, kovenatu Pesitu oporegeta rã'ĩ opãtavõarà kõ reve, manyvo toereko kupa. Ajaire e'i Pauru pè:

– Hoõ. Aepo erepa rewarà mõ, a'e kyty oromonookatà! e'i.

Pauru jõvijã Akiripa kõ rovake remẽwarà

13Kãramõ sa'u jõvijã mõ uu Sesareja taa kyty kovenatu Pesitu resa. Akiripa eu erà pè. Okõjã revejẽ uu. Pereni eu ikõjã rerà pè. A'e kõ uu ojimory kovenatu Pesitu rè. 14A'e rupi ekoi rã'ĩ kupa. Ijaty sa'u 'arà a'e rupi ekoi kupa. Ãmẽ kovenatu Pesitu omome'u Pauru rewarà ijupe kõ. Kee e'i ijupe kõ:

– Oiko ike kwaima'e mõ, Pauru eu erà pè mã'ẽ, e'i. Kovenatu Perisi ojisyry remẽ, oity ike jimopã'ãga pè maekwerà, e'i. 15Ãmẽ Jerusarẽ taa pè aa remẽ, Juteu rõvijãgwerà kõ nivoi mã'ẽ omo'y ee eupe. Kejõ a'evo ekoi mãe kõ: Janejare'e pè oporegeta mãe kõ rõvijã kõ. Ãmõ, Juteu rõvijã kõ ve. Mokopejõ. “A'evo 'evo sõ ekoi mã'ẽ tè Pauru!” e'i ije kupa. Ajawyi omojaiweokatà eupe kupa. Opota ije tè tamojaiwe kupa, e'i. 16Ajamã'ẽ kee a'e ijupe kõ: “Nikatu'ãi ãwĩvo areko remẽ. Nijamojaiwe teywetei Romã wane'e kõ ipi”, a'e ijupe kõ. “Kee jareko. Oporegeta ai ee maekwerà rovake tatui. Ãmẽ tè omojaiwetà remẽ, ovakeve ãmẽ omojaiwe. Ãmẽ tè temimojaiwerà ojireko katutà ayvu ai wyi ipi”, a'e ijupe kõ. 17Ajawyi a'e kõ ovãe ike erupi remẽ, naiko pukui. Kõ'ẽmeve aa tetã ivo tekoua kuwapa retã mè aapy. Ameve amuroka a'e kwaima'e ekoty. 18Nivoi mã'ẽ omo'y ee mãe kõ ve uu. A'e kõ oporegeta ai wete ee. Ajamã'ẽ manyvo jaa rõwã oporegeta ai ee kupa. Ãmẽ ajipy'amogeta amãtejẽ tite: “‘Pauru noerovijai teipõ jõvijã wasu Sesa ayvu pojy’, e'ità ipõ kupa”, a'e tite. Ne'i ajamã'ẽ kupa. 19Kee e'i kõrijõ tè kupa: “Janejare'e rerovijaa rupi katu rõwã Pauru ekoi ipi”, e'i kõrijõ tè kupa. Ãmõ, Jesu eu ijupe mã'ẽ mãnõa rè ijayvuvaja vaja kupa mijã. Omãnõma a'e. Ajamã'ẽ Pauru: “Opoerapa. Oiko mijẽ”, e'i ijupewarà mõ. Aepo e'i rewarà mõ tè opota omojaiwe ijuka kupa.

20– Ajawyi manyvo na'e'ãi tesõ ky'y, aepo rapijarà ayvu aenu remẽ, e'i. Ajawyi manyvo na'e'ãi teve aporegeta ky'y. Naikoi eporegetaa. Ajawyi a'e Pauru pè: “Nerepotai põ neo Jerusarẽ taa kyty, a'e pè tè si nerekoa takuwa?” a'e. 21Ajamã'ẽ Pauru ojimokasità, kee javo: “Jõvijã wasu Sesa po pè emono rejupa, a'e ky'y!” e'i. Ajawyi a'e pè amonotà tatui ky'y. Ajamã'ẽ ike jimopã'ãga pè tui jẽ rã'ĩ upa, e'i. Amono jẽ sota kõ toãrõ jẽ upa, ajaatetà amonooka jõvijã Sesa kyty, e'i kovenatu Pesitu jõvijã Akiripa pè.

22Ãmẽ aepo wenu Akiripa remẽ, e'i:

– Ije ve apota amã'ẽ ee, tajapyaka ijayvu rè, manyvo e'ità põ oporegeta, e'i.

– Hoõ, e'i kovenatu Pesitu. Kovi neenutà ãmẽ, amuu remẽ, e'i ijupe.

23Ãmẽ kõ'ẽme jõvijã Akiripa uu ovãe jimoatya retã mè, okõjã Pereni reve. Jõvijã yru poko ikatuay mã'ẽ opypy eroike kupa. Ãmõ, sota kõ rõvijã kõ ve uu. Ãmõ, Sesareja taa rõvijã kõ teve. A'e pè tui kupa remẽ, kovenatu Pesitu omono sota kõ too Pauru pijarà mõ. Weru ãmẽ kupa.

24Ãmẽ kovenatu Pesitu e'i ijupe kõ:

– Jõvijã Akiripa. Ãmõ, pirujẽ ike janereve tui mãe kõ ve. Pemã'ẽ aã kwaima'e rè. Aã rè tè Juteu kõ ojikõ'õ. Oporegeta ai ywete ee kupa. Jerusarẽ taa wãnà kõ. Ikewarà kõ teve, e'i. “Ejukaoka” e'i ije kupa ipi. 25Ajamã'ẽ a'e eupe: “Manyvo nijareko'ãi ijuka”, a'e. “Mã rè nijajuka'ãi, nimanyvoi ekoi rewarà mõ”, a'e eupe. Ajamã'ẽ ãwĩ ywete ojime'ẽtà jõvijã wasu Sesa po pè. Ajawyi, “Hoõ, oromonookatà ãmẽ ky'y”, a'e kõrijõ tè ãmẽ ijupe.

26– Ajamã'ẽ nakuwai manyvo a'età ikusiwa kareta rè imonooka eeve jõvijã Sesa pè, tokuwa manyvore põ jamonooka. Ajawyi age'e aeru ike penovake. Jõvijã Akiripa rovake ywesõ aeru, tojimome'u penovake. Maevo ãwĩvo remẽ tè oikotà ayvu takusiwa ee ky'y. 27Kee rewarà mõ. Temimopã'ãgwerà jamonooka jõvijã Sesa pè remẽ, kareta irõromõ tè apijarerà jamono ipi, tokuwa manyvore põ a'evo. Kareta e'ãte nijamonooka teywetei ipi, e'i kovenatu Pesitu.

Currently Selected:

Jesu koty rewarà kõ 25: oymNT

Highlight

Copy