Jesu koty rewarà kõ 26

Pauru ojimome'u jõvijã Akiripa rovake remẽwarà

1Ajaire jõvijã Akiripa e'i Pauru pè:

– Ene ypy ejireko katu ayvu ai wyi, e'i.

Ãmẽ Pauru opojai tesõ oporegetatà. Kee e'i ijupe:

2– Jõvijã Akiripa, ejapyaka eayvu rè aporegeta neupe remẽ. Juteu rõvijã kõ emojaiwe tesõ ipi, e'i. Ajawyi age'e aporegeta katutà ajireko katua rè, e'i. Ije age'e eroryvay, nerovake ajimokasità ee kõ, ijayvu ai eupe kupa rewarà mõ. Pirujẽ Juteu rõvijã kõ ayvu ai wyi ajireko katutà aiko. 3Niwasu'ãi aporegeta ene remẽ, nekuwa Juteu kõ rekoa ipi rewarà mõ. Ajawyi a'e ene. Ejapyaka katu rã'ĩ eayvu rè aporegeta ene remẽ, a'e ene, e'i.

4– Aã Juteu kõ ekuwa manyvo aiko eja'yry remeve erena pè maekwerà, ajaate age'e. Okuwa manyvo aiko Juteu yvy rupi remẽ teve kupa, Jerusarẽ taa rupi aiko remẽ. Omã'ẽ ere kupa ipi rewarà mõ ekuwa kupa. 5Pariseu teve ije, ivo kõ. A'e kõ ywesõ tãmõ Moisesi remikusiwarerà rupi katu ekoi mãe kõ.#J.K.R. 23.6; Prp. 3.5 Ije ywesõ kõ a'e rupi ajimokasiay aiko mijã. Ajikuwa katu a'evoa rõmõ aiko mijã. Karamoe remeve ajikuwa katu. Ajawyi pirujẽ erekoa okuwa kupa. Opota omome'u kupa remẽ, e'ità ãmẽ kupa. Ewari tè sõ remẽ, okuwa tary ve ãmẽ ewarikwerà kupa. Ere awi ãmẽ ijupe kõ esa, e'i.

6– Karamoe remẽ Janejare'e kee e'ipa orerãmõi kõ pè: “Amomoeratà omãnõ mãe kõ kãramõ”, e'i. Aepo jaa pè “aje ywete” a'e rewarà mõ ojikõ'õ ere kupa. A'evoa rã aãrõ jẽ rewarà mõ teve. Ajawyi tè ereru nerovake kupa. 7Ajamã'ẽ ije kõrijõ tè rõwã a'evoa aãrõ. Pirujẽ eretãrãgwerà Juteu kõ wyive wãrõ, 12 atyry kõ jeapyrerà kõ wyive. Wãrõ jẽ kupa remẽ, werovija teãmã Janejare'e imoe'e kupa ipi, evo ve. Pya rupi, 'arà rupi ijayvu rupi ekoi kupa ipi, wãrõ jẽ kupa remẽ. Ajamã'ẽ, “Aje ywete Janejare'e omomoeratà omãnõ mãe kõ”, a'e rewarà mõ, ojikõ'õ ere kupa. Aepo jaa rewarà mõ tè age'e emojaiwe nerovake kupa, e'i jõvijã Akiripa pè.

8Kee e'i rã'ĩ Pauru Juteu kõ pè, uu imojaiwe mãe kõ pè:

– Kee pejẽ tite põ? “Janejare'e nomomoeraoka'ãi omãnõ maekwerà kõ”, pejẽ tite põ? Ije ve ãmõ rupi teve ajipy'amogeta ipi mijã, e'i.

9E'i jẽ Pauru jõvijã Akiripa pè:

– Ije ve ãmõ rupi teve ajipy'amogeta ipi mijã, e'i. “Aje rõwã Jesu Nasare taa wãnà ayvu”, a'e tite mijã, e'i. Ajawyi kee a'e tite ipi mijã: “Pirujẽ Jesu koty rewarà kõ tamomorijau”, a'e. Ajawyi pirujẽ a'evo ywe'e tite areko kõ ipi, e'i. Amojaiwe kõ ywe'e tite kõ ipi mijã, e'i. 10Jerusarẽ taa pè a'evo aiko ipi mijã. Ikoty rewarà kõ amojaiwe imopã'ã ipi mijã. Janejare'e pè oporegeta mãe kõ rõvijã kõ ayvukasia rupi a'evo areko kõ ipi mijã. Orerõvijã kõ omojaiweoka kõ ijukaoka remẽ, “i'ete” a'e kõrijõ. Ije ve naesa tari kõ ipi mijã.

11– Ajawyi a'evo aiko maekwerà tè ije, a'e ajupa ene. Ajimokasi ywe'e tite, “Jesu rekoa toity kupa”, a'e tite rewarà mõ. “Peja'a jẽ sõ Jesu rè remẽ, poromomorijautà ãmẽ”, a'e ipe ijupe kõ ipi. “Poromopã'ãtà poroapisi”, a'e ipe teve ijupe kõ mijã. Nopoi tite Jesu ayvu wyi kupa remẽ, amomorijau kõ ipi. “Topoi ekojẽ iwyi kupa”, a'e tite rewarà mõ a'evo areko kõ ipi mijã. Napotai tesõ kõ eewarà kõ aenu. Ajawyi taa taa rupi aa Janejare'e ayvu rè jimo'ea retã kõ rupi ipi. Jesu koty rewarà kõ amomorijau, Juteu kõ rena kõ rupi. Ãmõ, Juteu rõwã mãe kõ rena kõ rupi teve a'evo aiko ipi mijã. A'e rè ywesõ aja'a ipi mijã. A'evo aiko puku tesõ mijã, e'i Pauru Akiripa pè upa.#J.K.R. 8.3; 22.4-5

Pauru omoteeawerà omovyvy remẽwarà

(Jesu koty rewarà kõ 9.1-19; 22.6-16)

12E'i jẽ Pauru:

– Ãmõ 'ary pè kõ Tamasiku taa kyty aa, Janejare'e pè oporegeta mãe kõ rõvijã kõ ayvu rupi. A'e kõ remikusiwarerà rupi tapyy Jesu koty rewarà kõ mijã. 13Ajamã'ẽ Tamasiku pijarà rupi aa poromopã'ãtà aiko remeve, Janejare'e emoteeoka ãmẽ ky'y. Jane 'aryvo katu kwaray remẽ kõ a'evo. Ãmẽ kwaray vo sõ mã'ẽ owyjy ore'aryvo. Erupi oo mãe kõ 'aryvo ve owyjy. A'e ywesõ poroeakwaso kwaray wyi. Ore'aryvo katu itãrawã oreãrimã. 14Ãmẽ erupi oo mãe kõ reve oro'apa katu tesõ yvyu. Ãmẽ moregeta aenu, a'e kwaray vo sõ mã'ẽ pupe wyi. Eayvu rupi tè oporegeta, Juteu kõ ayvu rupi, Epereu kõ ayvu rupi. Kee e'i ije: “Sauru! Sauru! Epy'amopirai sõ erereko rejupa!” e'i. “Ni'ei nejimokasi epe erovake remẽ! Nevote nejimoai ywe'e titetà ãwĩvo remẽ”, e'i ije.

15– Ãmẽ a'e ijupe: “Ava põ ene, Jõvijã?” a'e. E'i ije ãmẽ: “Jesu tè ije. Epy'amopirai erereko rejupa mã'ẽ tè ije”, e'i. 16“Ajamã'ẽ ka'e ene. Epõ'ã jẽsi ekwa. Oropyteporopa eremĩgwai rõmõ tereiko, ãwĩvo age'e nemã'ẽ ee mã'ẽ teremojenu erokwa ãmõ kõ pè. Ajawyi tè age'e ajikuwapa neupe ky'y. Aepo a'e ene maekwerà teremojenu teve, manyvo a'età mijẽ põ ajaire neupe. 17Neayvu noenu tari mãe kõ opotatà nemoai. Juteu kõ wyi. Ãmõ, Juteu rõwã mãe kõ wyive. Ajamã'ẽ oroereko katutà iwyi kõ nerereko. Oromonotà ijupe kõ, 18ãwisõ teremotekokuwa kõ. Aje ywete mã'ẽ rè tè nemotekokuwa kõtà. Teko aia wyi nerova kõtà, ekoty rewarà kõ rõmõ toiko kupa ky'y”, e'i ije. “Ãjãgai rõvijã Satanasi kasia wyi nemomoi kõtà ekoty imuu. Ere eako'i mãe kõ apy'aky'a'otà. Ãmẽ Janejare'e ‘awyjepa’ e'ità ijaiwererà kõ pè ky'y. Oupewarà kõ rõmõ werekotà ãmẽ, pirujẽ ere eako'i mãe kõ reve”, e'i Jesu ije, e'i.

“Janejare'e ayvu mojenuarà rõmõ aiko ky'y”, e'i Pauru mã'ẽ

19E'i jẽ Pauru oporegeta:

– Ajawyi kee a'e ene, jõvijã Akiripa. Arovija ayvu yva pupe wyi ojenu ije mã'ẽ, e'i. 20Ajawyi Tamasiku taa pè ypy amojenu, e'i.#J.K.R. 9.20,28-29 Ajaire Jerusarẽ taa pè. Ajaire pirujẽ Juteja yvy rupi. Juteu kõ pè amojenu erokwa. Ãmõ kõ pè teve amojenu erokwa, Juteu rõwã mãe kõ pè. Kee a'e ijupe kõ: “Tapejimosĩoka peaiwererà rè. Tapejimome'u Janejare'e pè peaiwererà reitypypyipaoka”, a'e ijupe kõ. “Awyje Janejare'e koty rewarà kõ rõmõ tapeiko ky'y. Ãmẽ tè pejikuwatà aje ywete Janejare'e kyty pejirova mãe kõ rõmõ peikotà”, a'e ijupe kõ ipi, e'i.

21– Aepo a'e rewarà mõ tè Juteu kõ epyy, Janejare'e moe'ea retã ypy pè aju remẽ. Opota ejuka kupa. 22Ajamã'ẽ Janejare'e epãtavõ. Ajawyi ijayvu amojenu aiko. Pirujẽ ãmõ kõ pè amojenu jenu aiko, ojimojõvijã mãe kõ pè. Ãmõ, jõvijã e'ã kõ pè teve. Pirujẽ jane kõ pè amojenu. Janejare'e ayvu mojenuarà kõ ayvukwerà vo ve eayvu. Ãmõ, tãmõ Moisesi ayvukwerà vo eayvu. 23Kee e'i amãtejẽ kupa maekwerà: “Janerereko katuarà, ojimomorijautà mãe rã teãmã. Omãnõtà mãe rã teãmã teve. A'e ypy opoeratà mãnõa wyi mãe rã teve. A'e teve Janejare'e Remimuurerà ypy mãnõa e'ã wãparõtà. Omomoera rewarà mõ, kee jaa ojikuwa. Kãramõ omãnõ mãe kõ omomoera tarà mijẽ eraa okoty opyri toiko karuaru kupa. Juteu kõ. Juteu rõwã mãe kõ ve”, e'i maekwerà. Aepo tãmõ Moisesi e'i. Ãmõ, Janejare'e ayvu mojenuarà kõ ve aepo e'i, e'i Pauru ijupe.#1Kor. 15.20; Isa. 42.6; 49.6

24Aepo Pauru e'i oporegeta ojireko katu upa remẽ, kovenatu Pesitu wayvo tesõ wapukai javo ijupe. E'i:

– Pauru! Nereawyry sipõ? Nejimotekokuwavay sipõ nereawyry rõmõ? e'i tite.

25Ãmẽ Pauru e'i ijupe:

– Ãnĩ, nereawyryi, jõvijã! Ikatu tè aiko ipi. Neãkãgai teve aiko, e'i. Ajamã'ẽ aje ywete aepo a'e, e'i. 26Jõvijã Akiripa okuwapa katu a'evoa, tyvija rupi rõwã rewarà mõ. Ajawyi aepo a'e kuwa eminu rõmõ, e'i.

27Ajaire jõvijã Akiripa pè e'i jẽ:

– Jõvijã Akiripa, akuwa “aje” ere Janejare'e ayvu mojenuarà kõ remikusiwarerà pè ipi, e'i Pauru.

28E'i jõvijã Akiripa ãmẽ ijupe:

– “Ãmẽ teipõ Kiristu koty rewarà rõmõ ekoità!” ere tite sipõ ije? e'i. “Aepo a'e remẽ teipõ werovijatà”, ere tite sipõ eupe? e'i ijupe.

29– Ãnĩ! e'i Pauru. Ajamã'ẽ Janejare'e pè aporegetatà neupewarà mõ. “Jõvijã Akiripa nera'yry Jesu rè ‘aje’ te'i, evo”, a'età. Neupewarà mõ rõmõ'ĩte rõwã ajamã'ẽ aepo a'età, e'i. Pirujẽ jane kõ age'e eayvu rè ojapyaka upa mãe kõ pewarà mõ ve aepo a'età. Evo tapeiko pirujẽ. Ikatuay wetetà ãmẽ. Ajamã'ẽ napotai kõrijõ tè pepokwaa, evo, e'i Pauru jõvijã Akiripa pè.

30Aepo e'i paire, pirujẽ a'e pè tui mãe kõ opõ'ã oo. Kejõ. Jõvijã Akiripa, okõjã Pereni reve. Ãmõ, kovenatu Pesitu. Ãmõ, taa wãnà rõvijã kõ. Ãmõ, sota rõvijã kõ. A'e kõ opõ'ã oẽ oo Pauru rè oporegeta. 31Oẽ oo kupa remẽ, kee e'i ojiupe kupa:

– Nimanyvoi 'eteay ekoi mã'ẽ tè ãwĩ kwaima'e. Manyvore ywete sipõ omopã'ã kupa? Ajawyi, “Tijajuka ãwĩ”, naoty kuwa'ãi ijupe mijã! e'i ojiupe kupa.

32Ãmẽ kee e'i jõvijã Akiripa kovenatu Pesitu pè:

– Ije sõ remẽ amoẽoka kuwa jimopã'ãga pupe wyi ãwĩ, e'i. Jõvijã wasu Sesa rè sõ nojimokasi remẽ, jamoẽ kuwa ãmẽ. Ajamã'ẽ aepo e'ipa rewarà mõ, nijamoẽoka'ãi ky'y. Ajawyi tijamonooka kõrijõ tè jõvijã wasu Sesa pè, e'i jõvijã Akiripa ijupe kõ.

Currently Selected:

Jesu koty rewarà kõ 26: oymNT

Highlight

Copy