Mateo 11

Juan Bautistapa eperãarã pëida

(Lucas 7.18-23)

1Jesupa chi kꞌõpꞌãyoorã doce ũraapꞌeda, mamãikꞌaapa wãji Akꞌõrepa jara pëida jarateede ma eujãdepema pꞌuuru bee chaa.

2Juan carcelde bɨ misa, ũriji Cristopa oomaa bɨ. Aramata ichi ome nipapatapꞌedaarã ũkꞌuru pëiji Jesumaa. Iidinajida:

3—¿Pɨkꞌã ajida, tai kꞌaripapari chonaarãpa cheitꞌee bɨda adapꞌedaa? Maa–e pɨrã, ¿taipa awaraa nɨdaipia bɨkꞌã? ajida.

4Jesupa pꞌanauji:

—Wã́tɨ Juanmaa mãikꞌaapa nepɨrɨ́tɨ parãpa nama unu pꞌanɨ mãikꞌaapa ũri pꞌanɨ. 5Jarátɨ tau pꞌãriu beeda ɨ̃rá unu pꞌanɨ; bɨɨrɨ nɨkꞌanɨkꞌaa beeda tꞌɨa nĩutee; leprapa kꞌayaa beeda jɨpa pꞌanɨ; kꞌɨɨrɨ kꞌĩ beeda ɨ̃rá ũri pꞌanɨ; piudapꞌedaarã waya chokꞌai pꞌanɨ mãikꞌaapa chupɨria chedeerãmaa Tachi Akꞌõrepa pedee pia jara pëida jarateemaa bɨ. 6¡Tꞌãri o–ĩa bɨda aji, chi mɨde ijãa bɨ, kꞌawa–e bɨ mĩda mɨa ne–inaa jõma oo bɨ!

Jesupa Juande pedee pia jarada

(Lucas 7.24-35)

7Juanpa eperãarã pëida wãdapꞌedaa tꞌẽepai, eperãarãmaa Jesupa pedee pia jaramaa beeji Juande:

—¿Kꞌãata parãpa akꞌɨnajidama aji, eujã pania wẽe bɨmaa wãdakꞌãri? ¿Kꞌĩsiajida–ekꞌã akꞌɨnadaitꞌee eperã pariatua kꞌĩsia bɨ, pꞌũajara nãupa pariatua nẽunẽuwaa pꞌuaparikꞌa? 8Maa–e pɨrã, ¿kꞌĩsiajida–ekꞌã akꞌɨnadaitꞌee eperã pꞌaru pi–ia jɨ̃ bɨ? Parãpa pia kꞌawa pꞌanɨ eperã pꞌaru pi–ia jɨ̃ beerã rey tede pꞌanapata. 9Mãga–e pɨrã ¿kꞌĩsiajida–ekꞌã akꞌɨnadaitꞌee Akꞌõre pedee jarapari? Wãara, iru Akꞌõre pedee jarapari kꞌãyaara waibɨara bɨ. 10Na Juandeta Tachi Akꞌõre Ũraa pꞌãdade jara bɨ:

‘Mɨa eperã chokꞌa pëiitꞌee pɨ naa o pia oonamerã pɨ, eperãarã poro waibɨa, chei naaweda.’ (Malaquías 3.1)

11Mɨa wãarata jararu. Juan Bautista kꞌãyaara eperã apida waibɨara bɨ–e. Mamĩda chi ekꞌariara bɨta iru kꞌãyaara waibɨara paitꞌee Tachi Akꞌõrepa ma eperã ichi jua ekꞌari bɨkꞌãri, ichideerã ome beemerã.

12ʼJuan Bautista chedakꞌãriipa, eperãarã chõo pɨkꞌa pꞌanɨ tꞌĩudaitꞌee Tachi Akꞌõre jua ekꞌari, ichideerã pꞌaneedaitꞌee mãikꞌaapa kꞌachia beerã aukꞌa chõo pɨkꞌa pꞌanɨ apida mãga pꞌananaadamerã. 13Juan jaratee chei naaweda, Tachi Akꞌõre pedee jarapataarãpa jarapachida Tachi Akꞌõrepa mãgá eperãarã bɨitꞌee ichi jua ekꞌari, ichideerã pꞌaneedamerã. Moisepa pꞌãdade ichiaba mãga jara bɨ. 14Parãpa kꞌawaa kꞌinia pꞌanɨ pɨrã Juanta Elías#11.14 Chonaarãweda Elías Akꞌõre pedee jarapari paji. Akꞌõre Ũraa pꞌãdade jara bɨ na pꞌekꞌau eujã jõi naaweda, Elías waya uchiaitꞌee Israel pidaarã tꞌãide. Malaquías 4.5. chi cheitꞌee bada jara pꞌanadapꞌedaa; ichipɨ. 15Pia kꞌĩsíatɨ parãpa etꞌewa ũridapꞌedaade kꞌawaadamerã kꞌãata jara kꞌinia bɨ.

16ʼMɨa jaraitꞌee sãga pꞌanɨ parã, mɨde ijãadakꞌaa beerã. Warrarã su–akꞌɨ pꞌaneedapꞌeda, jemenemaa pꞌanɨ́kꞌata pꞌanɨ pꞌuuru jãde. Ãchi kꞌõpꞌãyoorãmaa biapata:

17“Taipa siru chaajida. Mamĩda parã pëirada–e paji. Kꞌari kꞌĩsia paraa kꞌarijida. Mamĩda parã jẽeda–e paji.”#11.17 Pia jaraitꞌeera, Tachi Akꞌõrepa pëida eperãarãpa oodakꞌaa paji judiorã poro waibɨarãpa oopidapꞌedaakꞌa. Ma warrarãpa oodapꞌedaakꞌa judiorã chonaarã poro waibɨarãpa oopachida Akꞌõre pedee jarapataarã ome.

18Mãga pɨkꞌa baji Juan ome. Iru cheji mãikꞌaapa nekꞌokꞌaa paji, ne–inaa tokꞌaa paji, eperã jĩpꞌaarãpa oopatakꞌa. Maperã eperãarãpa: “Netuara iru kꞌapꞌɨade merãtɨa bɨda” ajida. 19Tꞌẽepai mɨ, chi Eperã Akꞌõre Truadepema cheji mãikꞌaapa nekꞌoji, ne–inaa toji eperã jĩpꞌaakꞌa. Maperã jara pꞌanɨ mɨ nekꞌoyaa, ne–inaa toyaa bapari. Ma awara mɨ kꞌõpꞌãyo meraaparida a pꞌanɨ, kꞌachia–idaa beerã ome mãikꞌaapa Cesar–itꞌee impuesto pꞌepataarã ome. Mamĩda Tachi Akꞌõrepa wãarata akꞌɨpimaa bɨda aji, mɨa oo bɨ kꞌaurepa parã jõmaarã pari.

Tachi Akꞌõrepa oo bɨ unuamaa iru pꞌanapataarã

(Lucas 10.13-15)

20Mãpai Jesús ijɨ̃atɨ pedeemaa beeji awara–awaraa pꞌuurudepemaarãmaa, ãchia pꞌekꞌau kꞌachia oopata oodaamaa pꞌanadapꞌedaa perã. Mãga pꞌanajida unupachida mĩda irua ooda ne–inaa eperãarãpa pꞌoyaa oodakꞌaa ãchi juadoopa. Jesupa ãchimaa mãgaji:

21—¡Aai, Corazín pꞌuurudepemaarã! ¡Aai, Betsaida pꞌuurudepemaarã! ¡Tachi Akꞌõrepa parã kꞌachiadee pëiitꞌeepɨ! Tiro pꞌuurude, Sidón pꞌuurude eperãpa ooda paara ne–inaa eperãarãpa pꞌoyaa oodakꞌaa ãchi juadoopa mɨa parã pꞌuurude oodakꞌa, taarã–e weda ijãakꞌajida. Ãrapa pꞌekꞌau kꞌachia oopata oo amaa kꞌinia jõnɨpa chupɨria iidikꞌajida Tachi Akꞌõremaa. Ma pꞌekꞌau kꞌachia oopata kꞌaurepa tꞌãri pꞌuapa pꞌaru pꞌãimaa jɨ̃kꞌajida mãikꞌaapa itꞌabarre pꞌora ɨtꞌaa pꞌokꞌajida ãchi poro ɨ̃rɨ. 22Maperã mɨa jara bɨ: Tachi Akꞌõre ewari waibɨa ewate irua parã kꞌachiara ooitꞌee ma Tiro pꞌuurudepemaarã kꞌãyaara mãikꞌaapa Sidón pꞌuurudepemaarã kꞌãyaara. 23Ichiaba parã Capernaum pꞌuurudepemaarã, ¿kꞌĩsia pꞌanɨkꞌã parã pꞌuuruta awaraa pꞌuuru kꞌãyaara waibɨara paitꞌee Akꞌõre kꞌĩrapite? ¡Mãga–e! ¡Ma kꞌãyaara irua parã pꞌuuruta jõtꞌaaitꞌee! Sodoma pꞌuurude eperãpa ooda paara ne–inaa eperãarãpa pꞌoyaa oodakꞌaa ãchi juadoopa, mɨa parã tꞌãide oodakꞌa, ma pꞌuuru atꞌãri bakꞌaji. 24Mamĩda mɨa jara bɨ: Tachi Akꞌõre ewari waibɨa ewate irua parã kꞌachiara ooitꞌeeda aji, Sodoma pꞌuurudepemaarã kꞌachia ooi kꞌãyaara.

Jesupa eperãarã ɨ̃ipipari

(Lucas 10.21-22)

25Maapai Jesupa mãgaji:

—Akꞌõre Waibɨa, pɨ jõmaarã kꞌãyaara waibɨara bɨ. Ne–inaa jõmaweda ɨtꞌari nɨ̃bɨ, na pꞌekꞌau eujãde nɨ̃bɨ paara pɨ jua ekꞌari bɨ. Mɨ tꞌãri o–ĩa bɨ pɨa eperãarã jĩpꞌaarãmaa kꞌawapiru perã ne–inaa pɨa waide kꞌawapi–e pada kꞌĩsia kꞌawaa beerãmaa mãikꞌaapa poro wẽsaa beerãmaa. 26Pɨa mãga ooji mãga oo kꞌinia bada perã.

27ʼMɨ Akꞌõrepa ne–inaa jõma bɨji mɨ jua ekꞌari mɨa akꞌɨpariimerã. Tachi Akꞌõrepapai wãara mɨ, ichi Warra kꞌawa bɨ. Mãgá ichiaba mɨ, chi Warrapapai wãara iru kꞌawa bɨ. Mamĩda mɨa iru kꞌawapii mɨa kꞌawapi kꞌinia bɨ eperãarãmaa. 28Maperã mɨmaa chétɨ parã jõmaweda sẽ pꞌanɨɨrã mimia pꞌanɨpa mãikꞌaapa kꞌĩsia jõnɨpa. Mɨa parã tꞌãri a–tu beepiitꞌee. 29Kꞌõpꞌãyo meráatɨ mɨ ome. Ũrítɨ mɨa jaratee bɨ mãikꞌaapa óotɨ mɨa jara bɨkꞌa. Mɨ tꞌãri pia, chupɨria kꞌawaayaa bapari. Mɨde ijãadakꞌãri, kꞌãiwee pꞌanapataadaitꞌee. 30Mɨa jara bɨkꞌa oodayada aji, mɨa kꞌaripakꞌãri.

Currently Selected:

Mateo 11: sjaB

Highlight

Copy